Əbɨro 1 - Gabri Maja

Kumu ye kɔl dan̰ gɨyəŋ gɨ da Kurondi

¹ A boy ɨlge ga jɨne jɨne gaŋ, Kumu yen̰ mon̰ina kɔl dan̰ gɨyəŋ gɨ da ka-yɔɔ-kɔl-gɨ-Kumu-ba-yɔɔ tɨbaa kondɨ bɨ, dan̰ gɨyəŋ gɨ toyge kan̰dɨge kan̰dɨge bɨ.

² Ama a wɔlɛdi gɨ haw kɛ gɨ kardi nee gɛs na, Kumu yena kɔl na dan̰ gɨyəŋ gɨ da Kurondi gɨ ban dorii si ba-gulɔŋ hɨnga nɔm bɨ. Na danayi ban ɗaŋ coŋ ma, Kumu sɨn̰ gɨɗɨgɨ-Kumu dan̰ cay gɨsəŋ dan̰ hɨnga nɔm ga boy nee bɨ.

³ Na gusi Kurɨn̰-Kumu gɨ nee le ma gusoŋ-tɔgɛ gɨ da Kumu jɨran̰de jə̰ jə̰ bɨ, ban gɨlɨn̰ dan̰ Bayi Kumu hɔlɔlɔ bɨ, ban gam cay gɨsəŋ ɗe som osu daa na dan̰ gɨyəŋ gɨ da dɔnɔ di da kɔl koyi bɨ. Kɨɗɨn̰ ga ban dorɨn̰ kalaŋ mɨra te ɨsɨna koge gɨŋ coŋ ɨni na, ban say or daa sɔmɛ gɨɗɨgɨ-Kumu gɨŋ a cay kɔbɔ gɨ bara gɨ da ban gɨ orɨn̰ dan̰ dɔnɔ di ɗɨn̰ hɨnga nɔm.

Kurɨn̰ Kumu gumu ɗɨn̰ ka-ƴɔbɛ ga daa nii

⁴ Kumu bɨn̰ kurondi gusoŋ-tɔgɛ gɨ gumu ɗɨn̰ da ka-ƴɔbɛ ga daa hen̰ coŋ, hɨn̰ gusoŋ gɨ Kumu ba bii ba ɗɨn̰ gusondɨge hen̰ coŋ wo̰ bɨ.

⁵ Na cɨndi duroy ka-ƴɔbɛ ga daa le, pɨna wo̰ gɨ Kumu yeyi hɨn̰: «Ji na kuronɨ, ayɨn̰ toy labɨde ɨŋ na ban̰» le, unɔ. Naŋ le, ɗaŋ coŋ: «Ɨŋ kɨya bɨle ban̰ bɨ, ji kɨya bɨle kuronɨ bɨ» le, unɔ.

⁶ Ama kɨɗɨn̰ ga Kumu andɨn̰ dan̰ kurondi gɨ cay wase cɨg cɨg a cay gɨsəŋ gaŋ na, ban ye hɨn̰: «Ojɨ gɨ ka-ƴɔbɛ ga daa nii, Ga da Kumu nɔm na n̰ɨriige.»

⁷ Kɔl gɨ Kumu ye ojɨ cay ka-ƴɔbɛ ga daa nii le ba kɛ: «Kumu lee ka-ƴɔbɛ kayi ga daa hɨn̰ kal wo̰ bɨ, Ka-lɔɔ gɨye kayi hɨn̰ kɨlɛn̰ tɨwa wo̰ bɨ.»

⁸ Ama a cay kurondi na, Kumu ye hɨn̰: «Ay, Kumu kali-tɨrɨmbala ton̰ woy dan̰ tumɔɔ. Bɨ ji di cay ƴaa ton̰ na dan̰ gɨye-lɔɔ, Gɨ dan̰ durɔ ɗɨngar bɨ.

⁹ Ji gey gɨye-lɔɔ gɨ dan̰ durɔ ɗɨngar bɨ, Ji jɨbɨ gɨye-lɔɔ gɨ ɨsɨni sɛdɨ coŋ bɨ, Na toy di hɨn̰ wo̰ ma, ay Kumu, Kumu kon̰ dorɨn̰ sɨn̰ dan̰ cɨndɨn̰, N̰ɨgɨn̰ sɔŋ gɨ ni gusi-mɔwa can̰ bɨ, Sɨn̰ jam cɨndi gaŋ a duroy ka-pogɨn̰ɨn̰ bɨ.»

¹⁰ Ban ye ɗaŋ coŋ, ye hɨn̰: «Ay Ba-gulɔŋ, an̰ toy dɨŋ ɓɨragɨ na, Ji-bandi ba se te cay gɨsəŋ bɨ, Gɨɗɨgɨ-Kumu kalɨn̰ ma, kobɨn̰ ji-bandi ba lɔɔ bɨ.

¹¹ Hɨnga ga nee le nɔm kɨya kaɗɨn̰e coŋ, Ama ji-bandi na, ji som na yɔd. Leen̰ cɨndi, cay gɨsəŋ bɨ gɨɗɨgɨ-Kumu bɨ, Kɨya lɔɔ ga ɨlgi hɨn̰ badɨge wo̰.

¹² Ji kɨya goɗɨge dɨbe coŋ hɨn̰ badɨge Ga kan dobɨ cay kamdɨge gaŋ wo̰ bɨ, Ji kɨya kɨlangɨge coŋ hɨn̰ badɨge wo̰ bɨ. Ama ji-bandi na, ji som kɨɗɨn̰dɨn̰ gaŋ yɔd, Hɨn̰ gɨ tumɔ wo̰ bɨ, Ɨlgedɨn̰ toyi kɨya ayaŋ naŋ bɨ.»

¹³ Duroy ka-ƴɔbɛ ga daa nii le, pɨna wo̰ gɨ Kumu yeyi hɨn̰: «Ɨre sɨma a kɨwanɨ a cay kɔbɔŋ gɨ bara gɨŋ, Bɨrɨŋ gɨsɨn̰ gɨ aŋ bɨle ka-baadɨn̰ Leen̰ hɨnga ga ni bogɨn̰ gondɨn̰ cay nee» le, unɔ yɔd.

¹⁴ Ka-ƴɔbɛ ga daa nii nɔm na turnɔn̰əŋ ƴɔbɨ ga ka-lɔɔ gɨye gɨ da Kumu bɨ, Kumu gɨygɨge ɗe kan na laa gɨye kol cay kalaŋ ga ka-wɔɔ pɔɗɛ bɨ.