2 Pɨyɛr 1 - Gabri Maja

Pɨyɛr leen̰ kalaŋ lapɨya

¹ Na ɨŋ-bandi Simo Pɨyɛr ba-gɨre-gɨye bɨ, marɨna ba-gɨye bɨ, gɨ da Jesu-Kɨris, ba wale magtubu di kɛ le, gɨyɨn̰ bɨn̰ kan ga wayge aye kudurɔ gɨ kɨledi osu hɨn̰ koni wo̰ bɨ, dan̰ gɨyəŋ gɨ da gɨye-lɔɔ gɨ dan̰ durɔ gɨ da Kumu bɨ, Jesu-Kɨris gɨ Ba-poɗɨnagɨŋ bɨ le.

² Kuɗa gɨ ɗarwa bɨ, gusi-dɔbɛ bɨ, baa dan̰ kɔndɔ haa dan̰ gɨyəŋ gɨ da sɔlɛ gɨ kɨŋ sol Kumu bɨ, Ba-gulondɨna Jesu-Kɨris bɨ.

Tɔgɛ ungo bɨ dɔrɛ ungo gɨ da Kumu bɨ

³ Na cɨndi, Kumu bɨnagɨŋ hɨnga nɔm ga na or n̰agedɨge na kol dɔnɔ toyi, ɗe ana na somɨn̰gɨŋ-bɨra bɨ, leen̰gɨŋ gɨye lɔɔ gɨ bugoŋ pɨna dan̰ Kumu bɨ. Ban Kumu lee gɨ na solgɨŋ gɨ ban teenagɨŋ na dan̰ gɨyəŋ gɨ da gusoŋ-tɔgɛ koyi bɨ, na dan̰ gɨyəŋ gɨ da tɔgɨ toyi bɨ.

⁴ Na kol cay gusoŋ-tɔgɛ dan̰ tɔgɨ toyi le ma, nana wan̰ hɨnga nɔm ga ɗadɨrdaŋ ga gɨmdəŋ ga kɨledɨge osu tɔgɨ, gɨ naa Kumu ye gɨ ɗi na kɨya lɔɔ bɨna le. Ban bɨgɨŋ hɨnga nɔm ga ɗadɨrdaŋ ga nee le, na ɗe gɨ tabɨlaŋdi hɨnga ga ɨsɨndəŋ ga cay gɨsəŋ gaŋ na gɨ mondɨgɨŋ naŋ ɨni. Ama na ɗe gɨ ana na bugoŋgɨŋ pɨna leen̰ cɨndi dan̰ Kumu.

⁵ Kɨya cay kɔl gɨ nee le na, kuɗa gɨ kɨŋ ƴɨma gusɨgɨŋ usa bɨ, kɨŋ si hal gɨ ɗari a cay aye kudurɔ kogɨŋ gɨŋ bɨ, kɨŋ si hɨnga-sɔlɛ a cay haldɨgɨŋ gɨ ɗari gɨŋ bɨ,

⁶ sɨgɨŋ a cay hɨnga ga ni sɔlɛ gaŋ, dɔnɔ di ni ƴomɨn̰ gusu osɨwa a cay hɨnga bɨ, sɨgɨŋ dɔnɔ di ni ƴomɨn̰ gusu osɨwa cay haye-kudurɔ gɨŋ bɨ, sɨgɨŋ a cay haye-kudurɔ gɨŋ gɨye-lɔɔ gɨ bəgɨŋ pɨna dan̰ Kumu bɨ,

⁷ sɨgɨŋ a cay gɨye-lɔɔ gɨ bugoŋ pɨna dan̰ Kumu, geye gusu te karme bɨ, sɨgɨŋ a cay geye gusu te karme, geye bɨ.

⁸ Hɨnga nɔm ga nee le, ojɨ gɨ kɨŋ laa ɨran̰ dan̰ cɨndɨgɨŋ tumɔ. Ama hɨn̰ gɨ hɨnga nɔm ga nee le, kɨŋ na ɨran̰ kunda na, na kan ba kɨya lɔɔ ɗe gɨ kɨŋ na laan̰ gɨye bɨ, kɨŋ na sɨlan̰ Ba-gulondɨna Jesu-Kɨris cɨndɨgɨŋ tumɔ tumɔ bɨ.

⁹ Ama ungo gɨ na ɨran̰ dan̰ hɨnga nɔm ga nee le naŋ na, ban na ungo gɨ ba-bɨbe gɨ mamde-kɨɗɨn̰. Kuduroy hal gɨybəŋ cay dɔrɛ gɨ dorge ɨsɨna koyi gɨ jɨne cayi coŋ le.

¹⁰ Karmɨnɨ ga ban̰aŋ dan̰ ga kandɨ, na toy di hɨn̰ wo̰ ma, kuɗa gɨ kɨŋ ƴɨma togɨygɨŋ daa ɗe ɗɨn̰ di tumɔ coŋ agɨŋ ɨrɨn̰ osu a te tɔgɛ gɨ Kumu təgɨŋ le bɨ, dɔrɛ gɨ Kumu dorgɨŋ le bɨ. Kɨya wa hɨn̰ gɨ kɨŋ na laa hɨn̰ wo̰ na, kɨŋ kɨya bɔɔ a boy hɨnga ga ɨsɨni gaŋ naŋ bɨrɨŋ.

¹¹ Na cɨndi, na toy di hɨn̰ wo̰ ma leege ɗarwa danagɨŋ, lee gɨ kan kɨya bɨgɨŋ gɨyəŋ andɨn̰ boy dɔɔ-ƴaa di da Kumu di woy dan̰ cɨndo dɨŋ le. Dɔɔ-ƴaa le na di da Jesu-Kɨris gɨ na Ba-gulondɨna bɨ, Ba-pɔɗɨna bɨ.

¹² Na kɨya cay kɔl gɨ nee le ma maŋ hɨn kuduroygɨŋ daa daa a cay hɨnga ga ɗari gaŋ ga nee le, ga kɨŋ sol ɨni bɨ kɨŋ ɨre osu a te kɔl gɨ cɨndi gɨ kan gɨlgɨŋ ɨni bɨ le.

¹³ Ama ɨŋ ba baa dan̰ cɨnɨ ƴee na, na gɨye-lɔɔnɨ gɨ ɨŋ hɨngɨŋ gɨ kɨŋ na sɨman̰-bɨra daa daa cay hɨnga nɔm ga nee le.

¹⁴ Kɨya wa ɨŋ sol gɨ ɨŋ kɨya ɗɔɔ kuyoŋdi-gusɨnɨ gɨ ba kɨya mare gɨ ba woy kɛ le coŋ mɨnde, hɨn̰ gɨ Ba-gulondɨna Jesu-Kɨris ba yəŋ koldi tumɔ le.

¹⁵ Lee gɨ ɨŋ ƴom gusɨnɨ osu kɨya leen̰ hɨnga nɔm ga togɨnɨ ɓal le, kɨya laan̰ danagɨŋ ɗe hɨn̰ gɨ ɨŋ na mara kalɨn̰ ma, kuduroygɨŋ hɨn a cay hɨnga ga nee lee dan̰ tumoygɨŋ.

Kan ga solge Kɨris a te bɔyɛ lɨbe gɨŋ

¹⁶ Kɔl gɨ ni ba tee bɛrnɛdi bɨgɨŋ ojɨ cay dɔnɔ di da Ba-gulondɨna Jesu-Kɨris bɨ, caga koyi bɨ le, na dɔrɛ kɔl gɨ cayi bɨ toyi bɨ unɔ hɨn̰ dɔrɛ kɔl gɨ kalaŋ dorge dan̰ cɨn̰-muɗɔlɛ koge wo̰ naŋ. Na cɨndi, ni-gandi ni sol gɨmɨn̰aw toyi dan̰ cɨndɨni bɨ, lee tɨmon̰ toyi bɨ.

¹⁷ Ni ɨre nee kɨɗɨn̰ ga Bay Kumu bii hurɔmɔ bɨ gusoŋ-tɔgɛ bɨ. Te tumɔ di sayga duroy jɨran̰e dɨŋ di ɗɨn̰ hɨnga nɔm le ye hɨn̰: «Ban gɨ kɛ le na Kuronɨ gɨ ɨŋ lee-toyi tɔgɨ, gusɨnɨ mɔŋ cayi.»

¹⁸ Ni-gandi kalɨn̰ ma ni je te tumɔ di sayga gɨɗɨgɨ-Kumu gɨŋ di nee le, kɨɗɨn̰ ga ni ɨrɨn̰ danayi a cay garma gɨ woy dan̰ cɨndi gɨŋ le.

¹⁹ Lee gɨ ni lun̰doŋ kardi kɔl gɨ da ka-yɔɔ-kɔl-gɨ-Kumu-ba-yɔɔ ba yege le, osu ɗɨn̰ gɨ tumɔ coŋ. Hɨn̰ gɨ kɨŋ na bɨga kuduroygɨŋ kardi kɔl gɨ nee le na, kɨŋ lee na hɨnga ga kuɗa. Kɨya wa ban woy gɨlɨn̰ na hɨn̰ lamba di ƴee duroy dɨlɨm dɨŋ bɨrɨŋ kɨɗɨn̰ wol wo̰. Kɨɗɨn̰ ga woli le, na turɨmbɔlɔ gɨ na Kɨris gɨ kɨya lɔɔ gɨ na kɨya solɨn̰gɨŋ hɨnga nɔm.

²⁰ Tumɔ pa dɨm na, ojɨ gɨ kɨŋ sɨla hɨnga ga ba kɛ kuɗa: Kɔl gɨ Kumu ɗe kɨbɨ ka-yɔɔ-kɔl-gɨ-Kumu-ba-yɔɔ ma walge duroy Magtubu toyi dɨŋ le, ungo gɨ ba ɓale dɔrɛ duroyi dan̰ cay gusi koyi unɔ.

²¹ Kɨya wa na kuduroy geye gɨ da ungo ba andɨn̰ dan̰ kɔl gɨ Kumu ɗe kɨbɨ ka-yɔɔ-kɔl-gɨ-Kumu-ba-yɔɔ naŋ, ama na kol jɨbe gɨ Turnɔ ɗe-kuduroy-bɛrɛ ba jɨbɨge ma kalaŋ yen̰ge kɔl gɨ Kumu ɗe kɨbɨge le.