2 Korɛ̰t 1 - Gabri Maja

Lapɨya

¹ Na ɨŋ-bandi Pol ba-gɨre-gɨye gɨ da Jesu-Kɨris dan̰ gɨyəŋ gɨ da kuduroy geye gɨ da Kumu bɨ, kurɨndɨgɨŋ Timote bɨ, ba gɨyɨn̰ge dan̰ magtubu di kɛ le. Ni gɨyɨn̰ bɨn̰ na Ka-Daye ga da Kumu ga a cay ƴaa-di-gumu di Korɛ̰t bɨ, kan ga woyge dan̰ cɨndɨge ga somge a cay gɨsəŋ ga Agay gaŋ nɔm bɨ.

² Ɗa gɨ Baynagɨŋ Kumu dan̰ Ba-gulɔŋ Jesu-Kɨris laage kuduroy-ɗarwa danagɨŋ bɨ, bɨgɨŋge gusi-dɔbɛ bɨ.

Pol leen̰ Kumu ho’o

³ Kuɗa gɨ na hɨram Kumu, Ba-gulondɨna Jesu-Kɨris Bayi, ban na kɨye Bayi gɨ ba sɔlɛ cɨn̰-n̰age bɨ, ban na Kumu gɨ ba jale ɗugoy kalaŋ duroy hɨnga nɔm gaŋ bɨ.

⁴ Ban na ba dɔbɛ bandɨ kuduroyna duroy hɨnga ga ni dɔsɛ-ɗugɔ gaŋ nɔm ɗe ana na ɓalɨn̰ dobɨn̰ bandɨ kuduroy kan ga somge duroy hɨnga ga ni dɔsɛ-ɗugɔ gaŋ bɨ. Na kɨya dɔbɛ bandɨ kuduroyge na dan̰ gɨyəŋ gɨ da bandɨ di na-gandi kalɨn̰ ma na wayi na gusi Kumu.

⁵ Hɨnga ga ni gɨle-cɨn̰ ga da Kɨris usugoŋ cayna. Kɨris lee gɨ dɔbɛ bandɨ di ɗɨn̰ usugoŋ cayna hɨn̰ wo̰ bɨ.

⁶ Hɨn̰ gɨ ni-gandi ni na dɨga nərɨn̰ na, ni de nərɨn̰ na ɗe gɨ agɨŋ na wan̰ bandɨ bɨ pɔɗɛ bɨ. Hɨn̰ gɨ Kumu na bɨni bandɨ na, hɨnga ga nee le woy na ɗe gɨ kɨŋ-gandi kalɨn̰ ma kɨŋ na wayan̰ bandɨ bɨ, ɓalan̰ ƴomɨn̰ kuduroygɨŋ duroy gɨle-cɨn̰ di pɨna haa hɨn̰ ni-gandi wo̰ bɨ.

⁷ Ɨrɨmedɨni gɨ ni ba bee caygɨŋ le osu kəŋ kəŋ, kɨya wa ni sol gɨ kɨŋ kɨya bugoŋ pɨna danani duroy hɨnga ga ni jale ɗugɔ gaŋ hɨn̰ gɨ tumɔ kɨŋ ba bugoŋ pɨna danani duroy hɨnga ga ni gɨle-cɨn̰ gaŋ wo̰ bɨ.

⁸ Ay karmɨnɨ ga ban̰aŋ dan̰ ga kandɨ, ɨŋ gey gɨ kɨŋ na sɨla kardi hɨnga ga ni dɔsɛ-ɗugɔ ga andaŋ cayni a cay gɨsəŋ ga Aji gaŋ: Hɨnga ga ni dɔsɛ-ɗugɔ ga nee le nɨn̰ni tɔgɨ, kɔjɛdɨge ɗɨn̰ togɨyni, bɨrɨŋ gɨ ni ɨrɨm hɨn̰ gɨ ni na kɨya sɔmɛ-bɨra hɨn̰ wo̰ naŋ.

⁹ A kɨɗɨn̰ ga nee gaŋ le na, ni sol kuduroyni gɨ ni naa hɨnga ga da tɨma ɨni. Nərɨn̰ di andaŋ cayni le andaŋ hɨn̰ wo̰ ɗe ani na been̰ kuduroyni cay gusɨni gɨŋ gaŋ naŋ, ama ɗe ani na been̰ kuduroyni cay Kumu gɨ ba bɔyɛ kalaŋ ga madɨrdaŋ lɨbe.

¹⁰ Na cɨndi, Kumu gɨ ba boɗɨni kɨbɨ tɨma di ba hɨn̰ wo̰ dɨŋ le, ban kɨya boɗɨni ɗaŋ coŋ. Ni bee ɨrɨmedɨni nɔm na cayi ban ƴɔbɨ, ho’o ban kɨya dorni kɨbɨ tɨma dɨŋ ɗaŋ coŋ.

¹¹ Kɨŋ-gandi kalɨn̰ ma ojɨ gɨ kɨŋ na jɨbɨ toyni dan̰ ɔlɛ Kumu kogɨŋ. Kumu kɨya jɔɔ ɔlɛ kogɨŋ nɔm gɨ kondɨwadi kalaŋ olge bɨ, kol cay ɔlɛ nɔm gɨ nee le na, ban kɨya tɔrɛ kɨbi cayni bɨ kondɨwadi kalaŋ kɨya loon̰ge Kumu ho’o kol cayni bɨ.

Pol ɗe ɔrɛ tɨrga toy woy

¹² Cayni ayaŋ daa kɨya cay ɨrɨme gɨ woy a kuduroyni. Ni sol kuduroyni gɨ haldɨni na ƴee cɨn̰ kalaŋ ga a cay gɨsəŋ gaŋ kɛ. Kɨŋ-gandi kalɨn̰ ma kɨŋ sol hɨn̰ gɨ haldɨni naa hal gɨ woy dan̰ najidi dɨle orɨn̰ dan̰ ɨrɨme gɨ ɗaŋ a kuduroyni. Na ɗarwa di da Kumu ba-dɔrɛ tumoyni ma lee gɨ ni leen̰ hɨnga dan̰ najidɨge, ama na cɨn̰-muɗɔlɛ di da kalaŋ ga ɨndəŋ naŋ.

¹³ Ni wal na kɔl gɨ kɨŋ kɨya ɓale ɗɔngɨsɛ bɨ sɔlɛ duroy bɨ, bɨgɨŋ ƴɔbɨ. Bɨ ɨŋ bee ɨrɨmenɨ caygɨŋ gɨ kɔl gɨ ni ba ar koldi danagɨŋ le, kɨŋ na gɨ ɓale sɔlɛ duroy arɨn̰a.

¹⁴ Ɨŋ ye kɔl gɨ nee le kɨya wa kɨŋ ba sɔlɛ duroy kuduroy geye koni kuɗa ƴee. Hɨn̰ gɨ kɨŋ na sɨla duroy kuduroy geye koni na, wɔlɛ gɨ Ba-gulondɨna Jesu-Kɨris kɨya caga le, caygɨŋ kɨya ayaŋ daa kol cayni hɨn̰ gɨ toni ba ayaŋ daa kol caygɨŋ wo̰ bɨ.

¹⁵ Na cɨndi, ɨŋ bee kuduronɨ caygɨŋ osu. Na toy di hɨn̰ wo̰ ma ɨŋ gey ɔrɛ gusɨgɨŋ pa dɨm. Hɨn̰ wo̰ na kɨŋ kɨya ɓale wɔɔ tɔrɛ-kɨbɨ caygɨŋ sɔɔ.

¹⁶ Ɨŋ gey caŋge caygɨŋ cay wase kɨɗɨn̰ ga ɨŋ kɨya ɔrɛ cay gɨsəŋ ga Masedɨwan gaŋ bɨ, ɗaŋ coŋ kɨɗɨn̰ ga ɨŋ kɨya sɔ Masedɨwan jɨga a caygɨŋ bɨ. Ɨŋ gey gɨ kɨŋ na jɨbɨ tonɨ a te ɔrɛ tɨrga tɨnge di a cay gɨsəŋ ga Jude gaŋ.

¹⁷ Kɨɗɨn̰ ga ɨŋ ba gey ɔrɛ gusɨgɨŋ hɨn̰ wo̰ le, kɛ kɨŋ gɨ yɔ gɨ ɨŋ na ojɨ naa dɨle ɨrɨme ga? Kɛ kɨŋ gɨ yɔ gɨ ɨŋ na ojɨ naa dan̰ gɨyəŋ gɨ da ɨrɨme gɨ da ungo gɨ ɨndi ƴɔbɨ gɨ ye «Əw» bɨ «Naŋ» bɨ, kɨbɨ nee ga?

¹⁸ Kumu na tɨmon̰ hɨnge, kɔl gɨ ɨŋ ba yəgɨŋ le, na «Əw» bɨ «naŋ» bɨ, kɨbɨge koge gɨŋ naŋ.

¹⁹ Kɨya wa Jesu-Kɨris Kurɨn̰-Kumu, ban gɨ ɨŋ-bandi bɨ, Sɨlas bɨ, Timote bɨ, ni ba tee bɛrnɛ di da kɔl koyi bɨgɨŋ le, ban ɨrga na kɨya wɔyɛ na «Əw» bɨ «Naŋ» bɨ, kɨbɨge koge gɨŋ naŋ. Ban na «Əw» di da Kumu dan̰ wɔlɛ pɨna pɨna.

²⁰ Na cɨndi, hɨnga nɔm ga Kumu ye gɨ ɗi na kɨya lɔɔ le, ban lee dan̰ gɨyəŋ gɨ da Kɨris. Dan̰ gɨyəŋ gɨ da Kɨris, Kumu ye «Əw.» Na toy di hɨn̰ wo̰ ma na yəgɨŋ «Ɗa-ɗe-woy-hɨn̰-wo̰» dan̰ gusondi bɨ, na dɨbɨn̰ gusoŋ-tɔgɛ cay Kumu bɨ.

²¹ Ama ungo gɨ ba lɔɔ gɨ nana ɨr usa pɨna a te bugoŋ kona dan̰ Kɨris bɨ, ba n̰ɨge sɔŋ cayna dorna sɨna dan̰ cɨndɨna bɨ le, na Kumu.

²² Kumu ɗe kambe kayi a gusɨna bɨ, bɨna dan̰ Turnoyi a ɗugoyna di bɨle woy hɨn̰ hɨnga ga gɨlna gɨ Kumu na kɨya bɨna hɨnga ga ɗari ga ban ƴom cay tɨbayge kol cay kalaŋ kayi.

²³ Gɨ ojɨn̰ canɨ ɨŋ-bandi le ɨŋ ay na Kumu leen̰ tɨmon̰ hɨnge, kɔl gɨ ɨŋ ba yəgɨŋ kɛ le na cɨndi: Hɨn̰ gɨ ɨŋ na jɨga ɨra Korɛ̰t naŋ na, ɨŋ gey na ɔrɛ yogɨŋ kɔl gɨ kɨya mɔndɛ kuduroygɨŋ naŋ.

²⁴ Ni mala na gɨ ni dɔɔ-ƴaa a cay aye kudurɔ kogɨŋ gɨŋ naŋ, kɨya wa ni sol gɨ kɨŋ ɨre osu a cay aye kudurɔ kogɨŋ gɨŋ. Ama ni na ka-lɔɔ gɨye pɨna danagɨŋ kol gusi-mɔwa togɨŋ kɨŋ-gandi gaŋ.