1 Timote 1 - Gabri Maja

Pol leen̰ Timote lapɨya

¹ Na ɨŋ-bandi Pol, ba-gɨre-gɨye gɨ da Jesu-Kɨris dan̰ kuduroy geye gɨ da Kumu gɨ Ba-poɗɨna bɨ, dan̰ kuduroy geye gɨ da Jesu-Kɨris gɨ na bee ɨrɨmedɨna cayi bɨ le.

² Ba gɨyɨn̰ dan̰ magtubu di kɛ le bɨn̰ ji-bandi Timote. Ji na kuronɨ gɨ cɨndi, kɨya wa na ɨŋ-bandi ba lɔɔ gɨ ji ayɨn̰ kuduron̰. Kuɗa gɨ Bayna Kumu dan̰ Ba-gulondɨna Jesu-Kɨris leege ɗarwa danan̰ bɨ, sɨlage cɨn̰-n̰age ton̰ bɨ, bɨn̰ge gusi-dɔbɛ bɨ.

Ɗɔɔ muɗɔlɛ a cay hɨnga ga ni gɨle ga dan̰ gɨyəŋdɨge naŋ

³ Hɨn̰ gɨ ɨŋ ba yen̰ tumɔ pa dɨm ma, maŋ ba san̰ orɨn̰ a cay gɨsəŋ ga Masedɨwan ƴee le, ji sɨma a cay ƴaa di Epɛs dɨŋ, an̰ san̰ dan̰ kalaŋ ga pɨna ɗe ɗege ba, gɨlɨn̰ kalaŋ hɨnga ga dan̰ gɨyəŋdɨge naŋ bɨ,

⁴ ɗe gɨ an̰ san̰ dan̰ kalaŋ, ɗe kan lun̰doŋ te dɔrɛ te hɨnga ga toyge bɨ cayge bɨ unɔ bɨ, kardi dɔrɛ te mon̰ gɨ kagadi unɔ bɨ naŋ. Kɨya wa hɨnga ga nee le, kɨya haŋge gɨyəŋ bɨn̰ na man̰e-kɔl bɨ, kɨya narge lɔɔ gɨye cay hɨnga ga Kumu gɨsɨ. Hɨnga ga Kumu gɨsɨ le, lee gusɨge na dan̰ gɨyəŋ gɨ da aye kudurɔ.

⁵ Ɨŋ bɨn̰ te tumɔ di nee le, na gɨ ɗe kalaŋ na ƴomɨn̰ge wandɨ dan̰ gusɨge. Dan̰ kuduroyge ga bɛrɛ kən̰jəŋ bɨ, dan̰ kuduroyge ga ɨrɨm kɔl gɨ ɨsɨni naŋ bɨ, dan̰ aye kudurɔ gɨ leen̰ cɨndi bɨ.

⁶ Kalaŋ ga pɨna ɗege kardi hɨnga ga ɗari ga nee le coŋ bɨ, andɨn̰ge boy man̰e-kɔl gɨ da kɔl ga kalɨn̰ wo̰ dugo gaŋ.

⁷ Kan geyge lɔɔ gusɨge leen̰ ka-gɨlɨn̰ kalaŋ gasɨn̰-kɔl gɨ da Moyis. Ama kan sɨlage te kɔl gɨ kan ye le naŋ bɨ, kɔl gɨ kan ƴomge osɨ le naŋ bɨ.

⁸ Əw, na sol gɨ gasɨn̰-kɔl le, na hɨnga ga kuɗa. Hɨn̰ gɨ ungo na aya laan̰ gɨye dan̰ gɨyəŋdi.

⁹ Kuɗa gɨ na sɨla gɨ Kumu be gasɨn̰-kɔl na kɨya cay kalaŋ ga dan̰ durɔ ɗɨngar naŋ. Ama na kɨya cay ka-lɔɔ hɨnga ga dan̰ gɨyəŋdɨge naŋ bɨ, ka-baa bɨ, ka-lɔɔ ɨsɨna bɨ, ka-lɔɔ terɨn̰ bɨ, ka-bugoŋ dan̰ Kumu cay hɨnga ga woy dan̰ cɨndɨge naŋ bɨ, ka-dɨɗe ban̰an̰ge dan̰ ƴon̰iige bɨ, ka-dɨɗe kalaŋ bɨ,

¹⁰ ka-lɔɔ gɨye yɔyɛ gɨ toy kan̰di kan̰di bɨ, ka-wɔyɛ dan̰ kamdɨge ban̰aŋ bɨ, ka-dɔnɛ-gɔyɔŋ leen̰ gɨyaw bɨ, ka-poy bɨ, ka-dɔrɛ gusɨge kalɨn̰ wo̰ bɨ, ka-lɔɔ hɨnga ga ɗaŋ nɔm ga bugoŋ pɨna dan̰ hɨnga ga ni gɨle ga cɨndi naŋ bɨ.

¹¹ Kɔl gɨ ni gɨle gɨ nee le, bugoŋ pɨna dan̰ Kɔl-gɨ-Ɗari gɨ bəŋge kɔbɔŋ bɨ gɨl gusoŋ-tɔgɛ gɨ da Kumu gɨ orɨn̰ dan̰ tumoy wolwa bɨ.

Pol leen̰ Kumu ho’o kɨya ɗarwa toyi

¹² Ɨŋ leen̰ ho’o Ba-gulondɨna Jesu-Kɨris ba bəŋ tɔgɨ, kɨya wa ban sol gɨ ɨŋ ɓal gɨ ban na kɨya bəŋ kuduroyi. Lee gɨ Ban ayaŋ a boy gɨye koyi gɨŋ.

¹³ Ɨŋ-bandi gɨ tumɔ ɨŋ na ba yagɨde Kumu bɨ, ba gɨlɨn̰ kalaŋ kayi cɨn̰ bɨ, gɨ kɨbɨnɨ mɔɔ tɔgɨ kol cayge bɨ le, Kumu sol cɨn̰-n̰age tɨnge. Kɨya wa boy wɔlɛdi gɨ nee le, ɨŋ aya kuduronɨ bɨn̰ Jesu-Kɨris naŋ ƴee. Kɨya wa ɨŋ lee hɨnga na boy sɔlɛdɨge gɨŋ naŋ.

¹⁴ Ama Ba-gulondɨna lee ɗarwa danaŋ tɔgɨ. Ban lee gɨ ɨŋ ay kuduronɨ bɨ, ɨŋ ƴom wandɨ danayi bɨ, kɨya cay bugoŋ gɨ ɨŋ bugoŋ pɨna dan̰ Jesu-Kɨris.

¹⁵ Kɔl gɨ kɛ le, na kɔl gɨ cɨndi gɨ ojɨ gɨ ungo na bɨga kuduroy cay nee bɨ, na kɔl gɨ ɓal gɨ kalaŋ nɔm na ƴage mɨlaŋ bɨ: Jesu-Kɨris ɨrga a cay gɨsəŋ gaŋ na kɨya pɔɗɛ ka-lɔɔ ɨsɨna. Ama ɨsɨna hɨnge ɗɨn̰ ɨsɨna gɨ da ka-lɔɔ ɨsɨna nɔm.

¹⁶ Ama Kumu sol cɨn̰-n̰age hɨnge. Na toy di hɨn̰ wo̰ ma, Jesu-Kɨris gɨlɨn̰ ɗarwa toyi jɨn̰ doŋ, kɨya canɨ ɨŋ-bandi gɨ ɨsɨna hɨnge ɗɨn̰ ɨsɨna gɨ da ka-lɔɔ ɨsɨna nɔm. Kɨris lee wo̰ na kɨya ɗon̰ hɨnga ga ni gɨle kɨya cay kan ga kɨya bɔgɛ kuduroyge cayi gɨ ni wan̰ sɔmɛ-bɨra gɨ dan̰ cɨndi.

¹⁷ Kɨlma gɨ ba-sɔmɛ ɨlge dan̰ ɨlge, Gɨ na Kumu gɨ kɨya mare naŋ bɨ, Ungo kɨya sɔlɛ cɨndi naŋ bɨ, Ban gɨ na pɨna hayi kəɗ kəɗ bɨ le, Kuɗa gɨ kalaŋ ayage cayi daa bɨ, Dɨbɨge gusoŋ-tɔgɛ cayi bɨ, Ɨlge dan̰ ɨlge. Ɗa-ɗe-woy-hɨn̰-wo̰.

¹⁸ Kuronɨ Timote hɨnga ga ɨŋ ba yen̰ gɨ ji na laa le, or pɨna na dan̰ te gɨyəŋ gɨ da kɔl gɨ Kumu ɗe kɨbɨ ka-yɔɔ-kɔl-gɨ-Kumu-ba-yɔɔ, lee gɨ kan ye kol can̰ tumɔ le. Ɗe kɔl gɨ kɛ le bɨn̰ tɔgɨ an̰ leen̰ wɔrɨn̰ɛ gɨ kuɗa.

¹⁹ Ji gama aye kudurɔ bɨ, ɗɔɔ gɨ ɗugon̰ alɨn̰ naŋ bɨ. Kalaŋ ga pɨna kan̰ge jɔɔ kɔl gɨ da ɗugoyge di alge coŋ. Na hɨn̰ wo̰ ma kan leen̰ge hɨnga, ɗe gɨ aye kudurɔ koge baan̰ coŋ.

²⁰ Himene bɨ, Alegjandɨr bɨ, woyge duroy kalaŋ ga nee le. Ɨŋ ɗege kobi Sidan. Na hɨn̰ wo̰ ma, wɔlɛ gɨ ɗaŋ kan gɨ jɔgɛ yagɨde Kumu naŋ ɨni.