1 Pɨyɛr 1 - Gabri Maja

Pɨyɛr leen̰ kalaŋ lapɨya

¹ Na ɨŋ-bandi Pɨyɛr, ba-gɨre-gɨye gɨ da Jesu-Kɨris, ba wale magtubu di kɛ le. Ɨŋ wal bɨn̰ na kan ga Kumu torge ga sugudonge a cay jaa dɨŋ, a cay gɨsəŋ ga Po̰ gaŋ bɨ, Galasi gaŋ bɨ, Kapadosɨ gaŋ bɨ, Aji gaŋ bɨ, Bitini gaŋ bɨ.

² Bayna Kumu tornagɨŋ dan̰ gɨyəŋ gɨ da gɨse gɨ ban gɨsɨ tumɔ hayi. Lee gɨ kɨŋ na kalaŋ kayi dan̰ gɨyəŋ gɨ da Turnɔ toyi ɗe agɨŋ na jen̰ kɔl kɨbɨ Jesu-Kɨris bɨ, ɗe kɨbardi gɨ bugoŋ dugo le na dorgɨŋ mɨra bɨ. Kuɗa gɨ ɗarwa di da Kumu bɨ, gusi-dɔbɛ toyi bɨ, baa danagɨŋ gɨɗaŋ.

Ɗarwa da Kumu woy kol cay ka-aye kudurɔ

³ Kuɗa gɨ ana hɨramgɨŋ Ba-gulondɨna Kumu, Jesu-Kɨris Bayi. Kɨya cay sɔlɛ cɨn̰-n̰age toyi di gumu di ban jɨga wɔɔnagɨŋ ɗaŋ dan̰ gɨyəŋ gɨ da bɔyɛ lɨbe gɨ da Jesu-Kɨris duroy kalaŋ ga madɨrdaŋ. Hɨnga ga nee le, lee gɨ ɨrɨmedɨnagɨŋ gɨ na ba bee cay nee le kɨya wɔyɛ-bɨra.

⁴ Na orɨn̰gɨŋ dan̰ hɨnga ga ni wɔɔ ga ni ban̰di-gulɔŋ ga kɨya ɔsɨn̰ɛ naŋ bɨrɨŋ bɨ, ga mɨdage kɨya ƴɔmɛ naŋ bɨ, ga te jɨran̰dedɨge kɨya ayaŋ naŋ bɨ. Kumu gam hɨnga ga ni ban̰di-gulɔŋ ga nee le a gɨɗɨgɨ-Kumu gɨŋ ojɨn̰ caygɨŋ.

⁵ Dɔnɔ da Kumu kɨya gamgɨŋ dan̰ gɨyəŋ gɨ da aye kudurɔ, ɗe agɨŋ wan̰ pɔɗɛ gɨ Kumu ƴom cay tɨbayi bɨ, kɨya wasɨn̰e cayi doŋ wɔlɛ kagadi gɨŋ bɨ.

⁶ Kɨya cay hɨnga ga ni wɔɔ ga ni ban̰di-gulɔŋ ga nee le, hɨn̰ gɨ haw kɛ hɨnga ga ni gɨwase ga toyge kan̰dɨge kan̰dɨge na laagɨŋ cɨn̰-kula gɨ ni tɨwa lam wo̰ kalɨn̰ ma, laagɨŋ gusi-mɔwa di gumu.

⁷ Na solgɨŋ gɨ lɔr di lam wo̰ kɨya unɔ le, kan gɨwasooge na dan̰ tɨwa. Na hɨn̰ wo̰ ma, aye kudurɔ kogɨŋ gɨ kɨledi ɗɨn̰ lɔr kalɨn̰ ma, kɨya gɨwasiige ɗe age na solɨn̰ togii. Na hɨn̰ wo̰ ma kɨɗɨn̰ ga Jesu-Kɨris kɨya caga le, Kumu kɨya hɨramgɨŋ bɨ, dɨbe gusoŋ-tɔgɛ caygɨŋ bɨ, aye caygɨŋ daa bɨ.

⁸ Jesu le, kɨŋ sɨlayi dan̰ cɨndɨgɨŋ naŋ pa pa, ama kɨŋ geyii. Hɨn̰ gɨ haw kɛ kɨŋ na sɨlayi naŋ kalɨn̰ ma, kɨŋ bee kuduroygɨŋ a cayi. Na toy di hɨn̰ wo̰ ma gusɨgɨŋ moogɨŋ tɔgɨ bɨ, moogɨŋ bɨrɨŋ ɗɨn̰ gɨ ni yɔ yɔd bɨ.

⁹ Gusi-mɔwa di nee le kɨŋ orɨn̰ na kɨya gɨ kɨŋ poɗɨ ɨni. Hɨnga ga kɨŋ wayi a te aye kudurɔ kogɨŋ gɨ kɨŋ ay bɨn̰ Jesu le, na pɔɗɛ gɨ ban bɨgɨŋ le.

¹⁰ Ka-yɔɔ-kɔl-gɨ-Kumu-ba-yɔɔ ga yege kɔl gɨ sayga gusi Kumu ojɨn̰ cay hɨnga ga Kumu kɨya lɔɔ bɨgɨŋ kalɨn̰ le, geyge sɔlɛ duroy pɔɗɛ gɨ nee le. Kɨya cayi na, kan malge toy gɨɗaŋ.

¹¹ Turnɔ di da Kɨris di woy kuduroyge le gɨlge gɨle-cɨn̰ da Kɨris tumɔ haa bɨ, gusoŋ-tɔgɛ gɨ ban ba kɨya wɔɔ kardi gɨle-cɨn̰ di nee dɨŋ le bɨ. Kan malge toyi gɨɗaŋ kɨya solɨn̰ge gɨ hɨnga nɔm ga nee le na kɨya ɨrga naa dan̰ wɔlɛ gɨ ani gɨŋ bɨ, dan̰ gɨyəŋ gɨ mɨna bɨ ga?

¹² Kumu gɨlɨn̰ ka-yɔɔ-kɔl-gɨ-Kumu-ba-yɔɔ, gɨ kan na teege bɛrnɛ bɨgɨŋ naa kɨŋ-gandi, wala kan na tɨgage bɛrnɛ naa kol cayge naŋ. Ka-tɔgɛ bɛrnɛ Kɔl-gɨ-Ɗari yege kɔl gɨ nee le labɨde na dan̰ dɔnɔ di da Turnɔ ɗe-kuduroy-bɛrɛ. Turnɔ ɗe-kuduroy-bɛrɛ le, na Kumu gɨ som gɨɗɨgɨ-Kumu gɨŋ le ba gɨygɨn̰ danaa. Ka-ƴɔbɛ ga daa nii kan kalɨn̰ ma, dan̰ gusɨge koge malge gɨ ni sɔlɛ kɔl gɨ nee le toyi bɨ.

Teege ka-aye kudurɔ ɗe na ayge gɨye-lɔɔ gɨ da Kumu

¹³ Kol cay hɨnga ga nɔm ga Kumu ba lee bɨgɨŋ le, sɨmagɨŋ a cay tɨbaygɨŋ dɨŋ kɨya lɔɔ gɨye bii bɨ. Ƴɨmagɨŋ gusɨgɨŋ usa duroy hɨnga nɔm. Ɗagɨŋ ɨrɨmedɨgɨŋ nɔm a cay ɗarwa di Kumu ba kɨya bɨgɨŋ, kɨɗɨn̰ ga Jesu-Kɨris ba kɨya cagan̰ le.

¹⁴ Sɨlagɨŋ hɨn̰ gɨ kɨŋ naa karɨn̰ Kumu bɨ, jagɨŋ kɔl kɨbi daa daa bɨ. Ɗɔɔgɨŋ baa lɔɔ hɨnga ga tumɔ tabɨlaŋdɨge ba leegɨŋ kɨɗɨn̰ ga kɨŋ ba sɨlan̰ hɨnga naŋ ƴee le.

¹⁵ Kumu gɨ ba togɨgɨŋ le woy dan̰ cɨndi. Na toy di hɨn̰ wo̰ ma, kuɗa gɨ kɨŋ-gandi kalɨn̰ ma kɨŋ wɨya dan̰ cɨndɨgɨŋ te gɨye-lɔɔdɨgɨŋ gɨŋ nɔm bɨ.

¹⁶ Kɨya wa walge duroy Magtubu di da Kumu dɨŋ yege hɨn̰: «Wɨyagɨŋ dan̰ cɨndɨgɨŋ, kɨya ɨŋ-bandi Kumu ɨŋ woy dan̰ cɨnɨ bɨ.»

¹⁷ Kɨŋ ol Kumu bɨ, kɨŋ teeyi Baygɨŋ bɨ, ban dɨra cɨn̰ ungo naŋ bɨ. Ama ban boy kɔl cay ungo gɨ ani ani ojɨn̰ cay gɨye-lɔɔdi. Na toy di hɨn̰ wo̰ ma, ojɨ gɨ kɨŋ dɨbii hurɔmɔ cayi bɨ, ɗe gɨye-lɔɔdɨgɨŋ woy gɨ ɗari a boy wɔlɛ nɔm gɨ kɨŋ ban̰ a cay gɨsəŋ gaŋ kɛ.

¹⁸ Sɨlagɨŋ, hɨnga ga Kumu bee kɨya bon̰ caygɨŋ duroy gɨye-lɔɔ gɨ ɨsɨni gɨ ban̰an̰gɨŋ ɗege bɨgɨŋ, hɨn̰ hɨnga ga ni ban̰di-gulɔŋ wo̰ le, ban dɨragɨŋ na dan̰ hɨnga ga lam wo̰ ga kardi nee kɨya mundoŋ hɨn̰ nare gɨ ni arja̰ bɨ, lɔr bɨ wo̰ naŋ.

¹⁹ Ama ban boy caygɨŋ na dan̰ kɨbar gɨ da Kɨris gɨ kɨledi osu tɔgɨ. Ban woy gɨlɨn̰ na hɨn̰ kurɨn̰-dɨmangɨ gɨ kɨɗɨn̰di pɨna wo̰ mundoŋ naŋ bɨ.

²⁰ Tumɔ pa dɨm ma Kumu kɨya ɗon̰ gɨɗɨgɨ-Kumu bɨ, cay gɨsəŋ bɨ ƴee na, Kumu dor Kɨris ɗe bɨləŋ hɨnga ga ni bogɨn̰ kɨbar. Lee gɨ haw kɛ a kagadi wɔlɛ gɨŋ gɨ Kumu wasɨn̰ cayi doŋ waŋ ɗe ban na poɗɨgɨŋ.

²¹ Dan̰ gɨyəŋ gɨ da Kɨris le, kɨŋ bee kuduroygɨŋ a cay Kumu gɨ boyii lɨbii kardi kalaŋ ga madɨrdaŋ gaŋ, ayi duroy gusoŋ-tɔgɛ koyi gɨŋ bɨ, lee gɨ aye kudurɔ kogɨŋ bɨ, ɨrɨmedɨgɨŋ gɨ kɨŋ bee cayi bɨ, woy na cay Kumu.

²² Kɨŋ bee kɔl a cay kɔl gɨ cɨndi gɨŋ, dorɨn̰ gusɨgɨŋ mɨra na gɨ agɨŋ na geyɨn̰ karmɨgɨŋ ga ban̰aŋ dan̰ ga kandɨ ga ka-aye kudurɔ dan̰ geye gɨ nara cɨn̰ ungo naŋ. Hɨn̰ wo̰ na, kɨŋ gey gusɨgɨŋ dɨle gɨlalɨn̰ bɨ, dan̰ kuduroygɨŋ ga pɨna bɨ.

²³ Kɨŋ bɨləŋ kalaŋ ga hɨrɨwa na dan̰ wɔɔ gɨ hɨrɨwa bɨ. Wɔɔ gɨ nee le, saya na a te wɔɔ gɨ ni tɨma dɨŋ naŋ. Ama na a te kɔl gɨ da Kumu gɨ woy bɨra gɨ kɨya mare naŋ bɨrɨŋ.

²⁴ Walge duroy magtubu Kɨbe Kɨra dɨŋ yege hɨn̰: «Ungo gɨ ɨndi le woy gɨlɨn̰ na hɨn̰ hɛɗɨmɛ wo̰ bɨ, Gusoŋ-tɔgɛ koyi nɔm woy gɨlɨn̰, Na hɨn̰ bɨn̰edi hɛɗɨmɛ ga coŋ wo̰ bɨ, Hɛɗɨmɛ hayi bɨ, bɨn̰edɨge gunguloŋ coŋ bɨ.

²⁵ Ama kɔl gɨ da Ba-gulɔŋ woy ban̰di dɨŋ mɨra mɨra.» Kɔl le, na Kɔl-gɨ-Ɗari gɨ kan tee bɛrnɛdi bɨgɨŋ le.