1 Korɛ̰t 15 - Gabri Maja

Bɔyɛ lɨbe gɨ da Kɨris

¹ Ay, karmɨnɨ ga ban̰aŋ dan̰ ga kandɨ, ɨŋ gey hɨne kuduroygɨŋ a cay tɔgɛ bɛrnɛ di da Kɔl-gɨ-Ɗari gɨ ɨŋ te bɨgɨŋ. Tɔgɛ bɛrnɛ di nee le kɨŋ ƴee bɨ, haw kɛ kol caa na kɨŋ luyoŋ toy nee kuɗa.

² Dan̰ gɨyəŋ gɨ da tɔgɛ bɛrnɛ di nee le kɨŋ poɗɨ, hɨn̰ gɨ kɨŋ na ƴɨma kɔl gɨ da bɛrnɛ gɨ ɨŋ ba te bɨgɨŋ le usa. Na hɨn̰ wo̰ naŋ na, kɨŋ ay kuduroygɨŋ na kalɨn̰ wo̰ dugo.

³ Hɨnga ga ɨŋ ba gɨlgɨŋ cay wase tumon̰ hɨnga nɔm le, na hɨnga ga gɨləŋge ɨŋ-bandi cay wase bɨ. Gɨləŋge gɨ Kɨris na ma naa kɨya cay ɨsɨna tɔna, dan̰ te gɨyəŋ gɨ da kɔl gɨ walge duroy Magtubu di da Kumu dɨŋ le.

⁴ Kɨris le kan ɨmgiige. Wɔlɛ sɨbɨdi gɨŋ na, Kumu boyii lɨbii hɨn̰ gɨ kan ba walge tumɔ duroy Magtubu di da Kumu dɨŋ le.

⁵ Ban andaŋ dus a cay Kepas bɨ, kardi nee na andaŋ dus gusi ka-gɨre-gɨye ga mɔjɨ-cayge-sɔɔ bɨ.

⁶ Ɗaŋ coŋ kardi nee na, ban andaŋ dus cay ka-karme ga ban̰aŋ dan̰ ga kandɨ won̰ge aru bay kɨbɨge koge gɨŋ. Ka-karme ga ban̰aŋ dan̰ ga kandɨ ga nee le ga pɨna duroyge mage ama kondɨwayge baage dan̰ cɨndɨge ƴee.

⁷ Kardi nee ban andaŋ dus gusi Jag bɨ, gusi ka-gɨre-gɨye nɔm bɨ.

⁸ Kardi nee gɛs na, ɨŋ-bandi gɨ ɨŋ woy hɨn̰ kɨye gɨ wɔlɛdi ɓala naŋ ma wooyge wo̰ le, ban andaŋ dus gusɨnɨ kardɨge kan nɔm bɨ.

⁹ A duroy ka-gɨre-gɨye nɔm le ɨŋ-bandi ma na gɨ dḛ ɗige bɨrɨŋ uja gɨ ni tɔgɔŋge ba-gɨre-gɨye kalɨn̰ ma naŋ, kɨya wa tumɔ ɨŋ gɨlɨn̰ Ka-Daye ga da Kumu cɨn̰-gɨle-cɨn̰.

¹⁰ Ama haw kɛ na ɨŋ na ba-gɨre-gɨye kɨya gɨ Kumu lee ɗarwa danaŋ bɨ, ɗarwa di Kumu lee danaŋ le na hɨnga ga wo̰ dugo naŋ. Kɨya wa ɨŋ lee gɨye ɗige kan nɔm. Leen̰ cɨndi na, gɨ lee gɨye kuɗa na, na ɨŋ-bandi naŋ ama na ɗarwa di da Kumu di ba danaŋ.

¹¹ Kɨŋ na ja bɛrnɛ di nee le, naa gusɨnɨ ɨŋ-bandi naŋ le gusi ka-gɨre-gɨye kalɨn̰ ma na pɨna hayi. Ni-gandi nɔm na kɔl gɨ pɨna hayi gɨ nee le ma mani tee bɛrnɛ di bɨ, kɨŋ bee kuduroygɨŋ cay nee.

Kalaŋ kɨya bɔyɛge lɨbe leen̰ cɨndi

¹² Hɨn̰ gɨ na-gandi nɔm na na tɨga bɛrnɛ gɨ Kumu na bɨya Kɨris lɨbii na, kɛ na mɨna ma kalaŋ ga pɨna duroygɨŋ yege gɨ kalaŋ ga mage na kɨya bɔyɛge lɨbe naŋ ga?

¹³ Hɨn̰ gɨ kalaŋ ga mage na kɨya bɔyɛge lɨbe naŋ na, Kɨris kalɨn̰ ma bɨya lɨbɨ naŋ bɨ.

¹⁴ Ma hɨn̰ gɨ Kɨris na bɨya lɨbɨ naŋ na, bɛrnɛ di ni te le na kɔl gɨ kalɨn̰ wo̰ dugo bɨ, aye kudurɔ kogɨŋ kalɨn̰ ma na kalɨn̰ wo̰ dugo bɨ.

¹⁵ Hɨn̰ gɨ kalaŋ ga mage na kɨya bɔyɛge lɨbe leen̰ cɨndi naŋ na, ni na ka-lɔɔ tɨmon̰ gɨ da Kumu gɨ leen̰ cɨndi naŋ, kɨya wa ni poy kɔl si kɨbɨ Kumu ye hɨn̰: «Kumu na boy Kɨris lɨbii, ama ban bɨyayi lɨbii naŋ.»

¹⁶ Hɨn̰ gɨ kalaŋ ga mage na kɨya bɔyɛge lɨbe naŋ, hɨn̰ wo̰ na Kɨris kalɨn̰ ma bɨya lɨbɨ naŋ bɨ.

¹⁷ Ma hɨn gɨ Kɨris na bɨya lɨbɨ naŋ na, aye kudurɔ kogɨŋ na kalɨn̰ wo̰ dugo bɨ, kɨŋ na boy ɨsɨna togɨŋ dɨŋ ƴee bɨ.

¹⁸ Hɨn̰ gɨ naa hɨn̰ wo̰ na, kan ga mage bɨ beege kuduroyge cay Kɨris pa dɨm ma mage le, kan na kalaŋ ga kayaŋge ɨni.

¹⁹ Hɨn̰ gɨ nana bɨga ɨrɨmedɨna a te bugoŋ pɨna dan̰ Kɨris, kɨya somɨn̰-bɨra a cay gɨsəŋ gaŋ kɛ ƴɔbɨ na, na na ka-gɨle-cɨn̰ ga gɨle-cɨn̰ tɔna ɗɨn̰ da kalaŋ nɔm.

²⁰ Ama leen̰ cɨndi na Kumu boy Kɨris lɨbii duroy kalaŋ ga madɨrdaŋ gaŋ bɨ, ban na gɨ cay wase gɨ hangɨ gɨyəŋ gɨ da bɔyɛ lɨbe gɨ da kalaŋ ga madɨrdaŋ bɨ.

²¹ Hɨn̰ gɨ tɨma ba ɨrga a cay kalaŋ dan̰ gɨyəŋ gɨ da ungo pɨna hayi le, bɔyɛ lɨbe kardi kalaŋ ga madɨrdaŋ kalɨn̰ ma ɨrga na dan̰ gɨyəŋ gɨ da ungo pɨna hayi bɨ.

²² Hɨn̰ gɨ kalaŋ nɔm ba marɨn̰ge kɨya cay hɨnga ga Adam ba lee le. Kalaŋ nɔm kɨya jɨgage sɔmɛge-bɨra na hɨn̰ wo̰ bɨ kɨya gɨ kan bugoŋ pɨna dan̰ Kɨris.

²³ Ama kan kɨya bɔyɛ lɨbe na kardi gusɨge: Tumɔ cay wase cɨg cɨg na Kɨris. Kardi nee a boy wɔlɛ gɨ ban kɨya jɨga na, kalaŋ ga da Kɨris nɔm kɨya bɔyɛge lɨbe.

²⁴ Gɨ nee le ma na kagadi wɔlɛ kɨɗɨn̰ ga Kɨris kɨya mɔndɛ dɔɔ-ƴaan̰əŋ nɔm bɨ, ka-dɔɔ-ƴaan̰əŋ nɔm bɨ, kɨya mɔndɛ dɔnɔ di da turnɔn̰əŋ ga ɨsɨndəŋ nɔm bɨ, jogɨn̰ dan̰ dɔɔ-ƴaa gɨ ni dɔbɛ kobɨ bayi Kumu le.

²⁵ Kɨya wa naa wa wa kalɨn̰ ma ojɨ gɨ ban na da dɔɔ-ƴaa bɨrɨŋ gɨsɨn̰ gɨ Kumu na bɨl ka-baadi nɔm laan̰ hɨnga ga ban kɨya bogɨn̰ gondii cay nee.

²⁶ Ba-baa gɨ karu gɛs gɨ kan kɨya mondii coŋ le, na tɨma.

²⁷ Ho’o: «Kumu dobɨ hɨnga nɔm a te dɔnɔ toy dɨŋ.» Ama kɨɗɨn̰ ga ban ye hɨn̰ ban na dobɨ hɨnga nɔm a te dɔnɔ toy dɨŋ na, ban Kumu gusi na a te dɔnɔ toy dɨŋ naŋ. Gɨ nee le woy doŋ arɨn̰ carara.

²⁸ Kɨɗɨn̰ ga Kumu kɨya dɔbɛ hɨnga nɔm a te dɔnɔ toy dɨŋ na, kɨɗɨn̰ ga nee le na Kurɨn̰-Kumu gusi ba kɨya dɔbɛ cayi a te dɔnɔ di da Kumu gɨ ba dɔbɛ hɨnga nɔm a te dɔnɔ toy dɨŋ. Ɨni na Kumu kan̰di hayi kɨya sɔmɛ cay hɨnga nɔm.

²⁹ Hɨn̰ gɨ bɔyɛ lɨbe na unɔ na, kalaŋ ga leegege batɛm kɨya cay karmɨge ga mage le kɨya lɔɔge na mɨna ga? Hɨn̰ gɨ kalaŋ ga mage na kɨya bɔyɛge lɨbe naŋ bɨrɨŋ na, na kɨya wa ma kalaŋ ga pɨna leegege batɛm kɨya cay karmɨge ga mage le ga?

³⁰ Bɨ na-gandi kalɨn̰ ma na kɨya wa mana som kɨbɨ tɨma dɨŋ dan̰ tɨwa nɔm ga?

³¹ Ay, karmɨnɨ ga ban̰aŋ dan̰ ga kandɨ, dan̰ wɔlɛ pɨna pɨna ɨŋ ɨre kɨbɨ tɨma dɨŋ: Na cɨndi gɨ kol caygɨŋ le canɨ ayaŋ daa kol bugoŋ gɨ kɨŋ bugoŋ pɨna dan̰ Ba-gulɔŋ Jesu-Kɨris.

³² Wɔrɨn̰ɛ gɨ ɨŋ worɨn̰ dan̰ kɨmɛnɛ a cay ƴaa-di-gumu di Epɛs le, hɨn̰ gɨ ɨŋ na laa naa dan̰ gɨyəŋ gɨ da ɨrɨme gɨ da ungo gɨ ɨndi na kɛ kɨya andaŋ na wa ga? Hɨn̰ gɨ kalaŋ ga mage na kɨya bɔyɛge lɨbe naŋ na ɗa gɨ na da bɨ sa bɨ, kɨya gɨ wan̰do na kɨya mare.

³³ Ɗɔ cɨndɨgɨŋ nargɨŋ naŋ: «Ƴɔmɛ pɔgɨn̰ɛ dan̰ kalaŋ ga haldɨge ɨsɨn le kɨya mɔndɛ hal gɨ ɗari gɨ da ungo.»

³⁴ Jɨgegɨŋ a te gɨyəŋ gɨ ɗari gɨŋ gɨ kɨŋ ɗe coŋ bɨ, kɨŋ ɗɔɔ ba lɔɔ ɨsɨna bɨ. Ɨŋ yəgɨŋ kɔl gɨ nee le kɨya gɨ kalaŋ ga pɨna duroygɨŋ sɨlage Kumu naŋ, gɨ nee le na dasi kol caygɨŋ.

Kuyoŋdi-gusi kalaŋ ga kɨya bɔyɛ lɨbe

³⁵ Ama gajanaŋ ungo gɨ ɨngɨre kɔl yon̰ hɨn̰: «Kɛ kalaŋ ga madɨrdaŋ kɨya bɔyɛge lɨbe na mɨna ga? Kɛ kuyoŋdi-gusɨge kɨya wɔyɛ na mɨna ga?»

³⁶ Ji gɨ ba dɨngale! Gasi-gɨse gɨ ji ba gɨsɨ dugo le kɨya bɨle na hɨn̰ gɨ tumɔ ji na ɨmgɨge dugo hɨn̰ hɨnga ga ma wo̰ dɨm.

³⁷ Hɨnga ga ji gɨsɨ dugo ɗe na bɨl le na gusi hɨnga naŋ ama na cɨndɨge, na cɨn̰ gɛmɛ naŋ le cɨn̰ gasa ga ɗaŋ.

³⁸ Kardi nee na Kumu bɨn̰ gasi gɨse ga ji ba gɨsɨ dugo le gusɨge hɨn̰ gɨ kuduroy gey wo̰. Bɨ ban bɨn̰ cɨn̰ gasi gɨse kan̰dɨge kan̰dɨge gusɨge gɨ ojɨ cayge cayge.

³⁹ Kɨya wa hɨnga ga ni se nɔm ga somge-bɨra le gɨlɨn̰ge dɛj dɛj naŋ bɨ, kuyoŋdɨge wɨya pɨna naŋ bɨ. Kuyoŋ ga pɨna na gɨ da kalaŋ bɨ, kuyoŋ ga pɨna na gɨ da kɨmɛnɛ bɨ, kuyoŋ ga pɨna na gɨ da cɨɗəŋ bɨ, kuyoŋ ga pɨna na gɨ da gusan̰əŋ bɨ.

⁴⁰ Kuyoŋdi-gusu hɨnga ga gɨɗɨgɨ-Kumu gaŋ woy nee bɨ. Kuyoŋdi-gusu hɨnga ga cay gɨsəŋ gaŋ woy nee bɨ. Hɨnga ga a gɨɗɨgɨ-Kumu gaŋ puydoŋ tɨwa kan̰dɨge bɨ, hɨnga ga cay gɨsəŋ gaŋ puydoŋ tɨwa kan̰dɨge bɨ.

⁴¹ Tɨwa di daa orɨn̰ dan̰ puyoŋ tɨwado bɨ, kɨdɨrɛ orɨn̰ dan̰ puyoŋ tɨwadi bɨ, dɛsɨɗɛŋn̰əŋ orɨn̰ dan̰ puyoŋ tɨwadɨge bɨ. Duroy dɛsɨɗɛŋn̰əŋ kalɨn̰ ma puyoŋ tɨwadɨge woy kan̰dɨge kan̰dɨge bɨ.

⁴² Kɨya wɔyɛ hɨn̰ wo̰ boy wɔlɛ gɨ kalaŋ ga madɨrdaŋ kɨya bɔyɛge lɨbe bɨ. Kuyoŋdi-gusɨna gɨ ɨmgiige dugo le, kɨya mundoŋ ama kuyoŋdi-gusɨna gɨ ba kɨya bɔyɛ lɨbe le, kɨya mundoŋ naŋ bɨrɨŋ.

⁴³ Kuyoŋdi-gusɨna gɨ ɨmgiige dugo le gɨlɨn̰ na hɨn̰ hɨnga ga dɨbɨge coŋ wo̰ ama kɨɗɨn̰ ga na bɨya lɨbɨ na, kɨya wɔyɛ kan̰di bɨ puydoŋ tɨwa biɗ biɗ bɨ. Kuyoŋdi-gusɨna gɨ ɨmgiige dugo le ɨran̰ dan̰ dɔnɔ naŋ, ama kɨɗɨn̰ ga na bɨya lɨbɨ na orɨn̰ dan̰ dɔnɔ tɔgɨ.

⁴⁴ Kuyoŋdi-gusɨna gɨ ɨmgiige dugo le na kuyoŋdi-gusɨna gɨ ɓɨragɨ. Ama gɨ ba kɨya bɔyɛ lɨbe le na kuyoŋdi-gusu gɨ da turnɔ. Na cɨndi hɨn̰ gɨ kuyoŋdi-gusɨna gɨ ɓɨragɨ na wɨya nee na, kuyoŋdi-gusu gɨ da turnɔ kalɨn̰ ma woy nee bɨ.

⁴⁵ Na toy di hɨn̰ wo̰ ma walge duroy Magtubu di da Kumu dɨŋ yege hɨn̰: «Adam, ungo gɨ cay wase le Kumu bii sɔmɛ-bɨra.» Ama ojɨn̰ cay Adam gɨ kardi nee gɛs na, na ban mana kuyoŋdi-gusu gɨ da turnɔ gɨ ba bɨn̰ kalaŋ sɔmɛ-bɨra.

⁴⁶ Na kuyoŋdi-gusu gɨ da turnɔ ba ɨrga wase naŋ. Na kuyoŋdi-gusɨna gɨ ɓɨragɨ ba ɨrga wase, kuyoŋdi-gusu gɨ da turnɔ na ɨrga na kardi nee.

⁴⁷ Adam ungo gɨ cay wase gɨ leeyige dan̰ gɨsəŋ le, ban mana gɨ da gɨsəŋ. Ama Adam gɨ ni sɔɔdi na, sayga na gɨɗɨgɨ-Kumu gɨŋ ɨrga.

⁴⁸ Ban gɨ leeyige dan̰ gɨsəŋ le, kan ga ɗaŋ ga leegege dan̰ gɨsəŋ le kalɨn̰ ma gɨlɨn̰ge na danayi bɨ. Ban gɨ sayga gɨɗɨgɨ-Kumu gɨŋ le, kan ga ɗaŋ ga saygage gɨɗɨgɨ-Kumu gɨŋ kalɨn̰ ma gɨlɨn̰ge na danayi bɨ.

⁴⁹ Hɨn̰ gɨ na ba ay gɨlɨn̰a gɨ da ungo gɨ a cay gɨsəŋ gaŋ kɛ le, na kɨya aye gɨlɨn̰a gɨ da ungo gɨ a gɨɗɨgɨ-Kumu gɨŋ hɨn̰ wo̰ bɨ.

⁵⁰ Ay, karmɨnɨ ga ban̰aŋ dan̰ ga kandɨ, kɔl gɨ ɨŋ ba gey yogɨŋ ba kɛ: Kuyoŋ-gusu ɓala wɔɔ hɨnga ga ni ban̰di-gulɔŋ gɨ da dɔɔ-ƴaa di da Kumu naŋ. Hɨnga ga kɨya ɔsɨn̰ɛ kɨya ɓale wɔɔ hɨnga ga ni ban̰di-gulɔŋ gɨ da hɨnga ga kɨya ɔsɨn̰ɛ naŋ, naŋ bɨrɨŋ.

⁵¹ Jagɨŋ, ɨŋ gey yogɨŋ hɨnga pɨna ga woy kɨɗɨn̰ ɓurongɛdɨge gaŋ ɗe agɨŋ sol. Na kɨya mare nɔm naŋ, ama na-gandi nɔm le kuyoŋdi-gusɨna kɨya bɨləŋ.

⁵² Hɨnga ga nee le kɨya lɔɔ gusɨge na haw wo̰ hɨn̰ ti ungo di lee bɨɗɨm wo̰ kɨɗɨn̰ ga burun̰ji di ni dɨɗɨn̰ kɨbɨ kɔl kɨya yɔ. Kɨya wa burun̰ji kɨya yɔ bɨ kalaŋ ga madɨrdaŋ kɨya bɔyɛge lɨbe dan̰ kuyoŋdi-gusɨge gɨ kɨya ɔsɨn̰ɛ naŋ bɨ, na-gandi nɔm kuyoŋdi-gusɨna kɨya bɨle.

⁵³ Na cɨndi naa wa wa kalɨn̰ ma ojɨ gɨ kuyoŋdi-gusɨna gɨ ba kɨya ɔsɨn̰ɛ na dɨba kuyoŋdi-gusɨna gɨ ba kɨya ɔsɨn̰ɛ naŋ bɨrɨŋ le. Bɨ ojɨ gɨ kuyoŋdi-gusɨna gɨ ba kɨya mare na dɨba ban gɨ ba kɨya mare naŋ bɨ.

⁵⁴ Kɨɗɨn̰ ga kuyoŋdi-gusɨna gɨ ba kɨya ɔsɨn̰ɛ na dɨba ban gɨ ba kɨya ɔsɨn̰ɛ naŋ bɨ, ban gɨ ba kɨya mare na dɨba ban gɨ ba kɨya mare naŋ bɨ ɨni na, na kɨɗɨn̰ ga nee le ma kɔl gɨ walge a duroy Magtubu di da Kumu dɨŋ kɨya ɔrɛ kɨɗɨn̰dɨge gaŋ: «Banga ƴom kɨbɨ tɨma yɔd coŋ ɨni.»

⁵⁵ «Ay tɨma, banga tɛɛ ba ani ga? Ay tɨma, dɔnɔ tɛɛ ba ani ga?»

⁵⁶ Tɨma orɨn̰ dan̰ dɔnɔ cayna na kɨya cay ɨsɨna bɨ, ɨsɨna orɨn̰ dan̰ dɔnɔ cayna na kɨya cay gasɨn̰-kɔl bɨ.

⁵⁷ Ɗa gɨ na laan̰ Kumu gɨ ba bɨna banga dan̰ gɨyəŋ gɨ da Ba-gulondɨna Jesu-Kɨris le ho’o.

⁵⁸ Na toy di hɨn̰ wo̰ ma, karmɨnɨ ga ban̰aŋ dan̰ ga kandɨ ga ɨŋ lee-toygɨŋ le, ɨrgɨŋ a cay tɨbaygɨŋ dɨŋ bɨ ɗɔɔgɨŋ gɨ hɨnga yɨbagdɨgɨŋ naŋ bɨ. Laagɨŋ gɨye gɨ da Ba-gulɔŋ cɨndɨgɨŋ tumɔ tumɔ dɨle ɨre dugo bɨ. Kɨya wa kɨŋ sol gɨ gɨlale gɨ kɨŋ ba gɨlal te bugoŋ pɨna kogɨŋ gɨŋ dan̰ Ba-gulɔŋ le, na gɨlale gɨ kalɨn̰ wo̰ dugo naŋ.