1 Korɛ̰t 1 - Gabri Maja

Lapɨya bɨ tɔrɛ-kɨbɨ bɨ

¹ Na ɨŋ-bandi Pol gɨ Kumu təŋ dan̰ gɨyəŋ gɨ da kuduroy geye koyi gɨ ɨŋ na bɨləŋ ba-gɨre-gɨye gɨ da Jesu-Kɨris, dan̰ kurɨndɨna Sostɛn ba walege magtubu bɨgɨŋ.

² Ni wal magtubu di kɛ le gɨyɨn̰ bɨn̰ na Ka-Daye ga da Kumu ga somge a cay ƴaa di Korɛ̰t bɨ, bɨn̰ kan ga woyge dan̰ cɨndɨge dan̰ bugoŋ pɨna dan̰ Jesu-Kɨris bɨ, bɨn̰ kalaŋ nɔm ga Kumu teege te gɨyəŋ koyi gɨŋ ɗe na bɨləŋge kalaŋ ga woyge dan̰ cɨndɨge dan̰ kalaŋ nɔm ga olge Kumu a kɨɗɨn̰ gaŋ nɔm dan̰ guson̰ Ba-gulɔŋ Jesu-Kɨris, ban gɨ na Ba-gulondɨge bɨ, Ba-gulondɨna bɨ le.

³ Ɗa gɨ Baynagɨŋ Kumu dan̰ Ba-gulɔŋ Jesu-Kɨris laage kuduroy-ɗarwa danagɨŋ bɨ, bɨgɨŋge gusi-dɔbɛ bɨ.

⁴ Ɨŋ leen̰ Kumu hɨnge ho’o daa daa kol caygɨŋ, kol hɨnga ga ban bɨgɨŋ dan̰ kuduroy-ɗarwa toyi kol bugoŋ gɨ kɨŋ bugoŋ pɨna dan̰ Jesu-Kɨris.

⁵ Na cɨndi, kɨɗɨn̰ ga kɨŋ ba bugoŋ pɨna dan̰ Jesu-Kɨris le, Kumu woy te tɔrɛ kɨbi caygɨŋ bɨ, woy te lɔɔ gɨ hɨnga ga ni wɔɔ ga toyge kan̰dɨge kan̰dɨge ƴee gusɨgɨŋ cɨrab cɨrab dan̰ kɔl bɨ, dan̰ hɨnga-sɔlɛ bɨ.

⁶ Na toy di hɨn̰ wo̰ ma, tɨmon̰ di leege a cay Kɨris le, dobɨ sarna gag gag a kuduroygɨŋ.

⁷ Lee gɨ hɨnga ga ni ɗarwa di da Kumu ga ban bee le, pɨna wo̰ ga wɨygɨŋ unɔ, kɨŋ ga kɨŋ ba som gam tɨwa di Ba-gulondɨna Jesu-Kɨris kɨya andɨn̰ dus le.

⁸ Na ban ba kɨya lɔɔ ɗe toygɨŋ osu bɨrɨŋ dɨɗɨn̰ kɨbi, ɗe gɨ a wɔlɛ caga gɨ da Ba-gulondɨna Jesu-Kɨris gɨŋ na, kɨŋ na wɨyan̰ kalaŋ ga ungo ɓala dɨbe kɔl cayge naŋ.

⁹ Kumu gɨ ba togɨgɨŋ ɗe agɨŋ na bugoŋ pɨna dan̰ Kurondi Jesu-Kɨris gɨ na Ba-gulondɨna le, na Kumu gɨ ba ɨre a cay gasɨndi gaŋ.

Puyoŋ gɨ woy duroy Ka-Daye

¹⁰ Ay, karmɨnɨ ga ban̰aŋ dan̰ ga kandɨ, ɨŋ lee n̰age gusɨgɨŋ dan̰ guson̰ Ba-gulondɨna Jesu-Kɨris: Bugoŋgɨŋ pɨna nɔm bɨ, ɗa gɨ puyoŋ unɔ duroygɨŋ bɨ. Ɗa gɨ kuduroygɨŋ bɨ ɨrɨmedɨgɨŋ bɨ, bugoŋ pɨna.

¹¹ Ay, karmɨnɨ ga ban̰aŋ dan̰ ga kandɨ, ɨŋ ye kɔl gɨ nee le na kɨya gɨ kalaŋ ga pɨna a duroy ƴaa gɨ da tɨmdɨna Kulwe yəŋge gɨ bɔjɨn̰ɛ na woy duroygɨŋ.

¹² Kɔl gɨ ɨŋ ba gey yogɨŋ ba kɛ: Waŋ waŋ kalɨn̰ ma kɔl yɔdi or kan̰di kan̰di. Kan ga pɨna yege hɨn̰: «Ɨŋ-bandi ɨŋ na gɨ da Pol.» Ga ɗaŋ yege hɨn̰: «Ɨŋ-bandi ɨŋ na gɨ da Apolos.» Ga ɗaŋ coŋ yege hɨn̰: «Ɨŋ-bandi ɨŋ na gɨ da Kepas.» Bɨ ga ɗaŋ yege hɨn̰: «Ɨŋ-bandi ɨŋ na gɨ da Kɨris.»

¹³ Kɛ Kɨris le buyoŋ dugo ga? Kɛ na ɨŋ-bandi Pol ma kan gagɨləŋge cay sɨya-gɨ-dagɨli gɨŋ kol caygɨŋ ga? Kɛ na dan̰ guson̰ Pol ma kan ləgɨŋge batɛm ga?

¹⁴ Ɨŋ leen̰ Kumu ho’o kɨya gɨ ɨŋ laan̰ ungo pɨna duroygɨŋ batɛm naŋ, ama na Kɨrispus dan̰ Gayus ƴɔbɨ.

¹⁵ Hɨn̰ wo̰ na, ungo pɨna wo̰ gɨ kɨya ɓale yɔ hɨn̰, leegɨŋge batɛm dan̰ gusoŋnɨ, unɔ.

¹⁶ Əw! Ɨŋ hal gɨybəŋ, ɨŋ leen̰ dan̰ kalaŋ ga a duroy ƴaa gɨ da Ɛstepanas batɛm bɨ. Ama ojɨ cay toyge ga ba na, ungo gɨ ɗaŋ gɨ ɨŋ leeyi batɛm le, ɨŋ sɨla naŋ.

Jesu-Kɨris na dɔnɔ bɨ cɨn̰-muɗɔlɛ da Kumu bɨ

¹⁷ Kɨya gɨ Kɨris gɨyəŋ na kɨya leen̰ kalaŋ batɛm naŋ, ama na kɨya tɔgɛ bɛrnɛ Kɔl-gɨ-Ɗari, dɨle tɔgɛ bɛrnɛ dan̰ gɨyəŋ gɨ da sɔlɛ-hɨnga da cɨn̰-muɗɔlɛ da kalaŋ. Kɨya wa naa hɨn̰ wo̰ na, tɨma di Kɨris ma a cay sɨya-gɨ-dagɨli gɨŋ le kɨya bɨle na hɨnga ga kalɨn̰ wo̰ dugo.

¹⁸ Na cɨndi, kɔl gɨ ojɨ cay tɨma di Jesu ma a cay sɨya-gɨ-dagɨli gɨŋ le, na kɔl gɨ woy dɨngal na kɨya cay kan ga kɨya mundoŋ coŋ, ama na dɔnɔ di da Kumu kɨya cayna na-gandi ga na poɗɨ.

¹⁹ Kɨya wa walge duroy Magtubu di da Kumu dɨŋ yege hɨn̰: «Ɨŋ kɨya mɔndɛ cɨn̰-muɗɔlɛ da ka-muɗɔlɛ coŋ bɨ, Ɨŋ kɨya mɔndɛ hɨnga-sɔlɛ ga da ka-sɔlɛ hɨnga, Bɨlɨn̰ leen̰ hɨnga ga kalɨn̰ wo̰ dugo bɨ.»

²⁰ Haw kɛ na, ba cɨn̰-muɗɔlɛ le ba ani ga? Ba-gɨlɨn̰ kalaŋ gasɨn̰-kɔl gɨ da Moyis le ba ani ga? Ba man̰de kɔl gɨ kalaŋ ga a cay gɨsəŋ gaŋ geyge le ba ani ga? Kɛ, Kumu gɨl gɨ cɨn̰-muɗɔlɛ di a cay gɨsəŋ gaŋ kɛ naa hɨnga ga ni dɨngale naŋ ga?

²¹ Na cɨndi, kɨɗɨn̰ ga Kumu gɨl cay cɨn̰-muɗɔlɛ toy nee le, kalaŋ ɓalage solii dan̰ gɨyəŋ gɨ da hɨnga-sɔlɛ ga da kalaŋ ga a cay gɨsəŋ gaŋ naŋ. Na toy di hɨn̰ wo̰ ma, Kumu poɗɨ kalaŋ na dan̰ gɨyəŋ gɨ da bɔgɛ kudurɔ a cay tɔgɛ bɛrnɛ di da Kɔl-gɨ-Ɗari gɨ kalaŋ solge leen̰ hɨnga ga ni dɨngale.

²² Jubɨn̰əŋ ɨngɨrge na hɨnga ga ɗɨn̰ cɨn̰-kɨɗɨn̰ bɨ, Gɨrɛgn̰əŋ malge na cɨn̰-muɗɔlɛ bɨ.

²³ Ama ni-gandi na, ni tee bɛrnɛ gɨ da Kɨris gɨ kan gagɨlige a cay sɨya-gɨ-dagɨli gɨŋ le bɨn̰ na kalaŋ nɔm. Bɛrnɛ di nee le bɨle na hɨn̰ gundi sɨya gɨ ba dɔgɛ tɨban̰ Jubɨn̰əŋ bɨ, bɨle na hɨnga ga ni dɨngale cɨn̰ kalaŋ ga toyge na Jubɨ naŋ bɨ.

²⁴ Ama ojɨn̰ cay kan ga Kumu teege le, kan naa Jubɨn̰əŋ wala, kan naa Gɨrɛgn̰əŋ kalɨn̰ ma, Kɨris le na dɔnɔ di da Kumu bɨ cɨn̰-muɗɔlɛ da Kumu bɨ.

²⁵ Ho’o, hɨnga ga ungo sol ma woy hɨn̰ gɨ Kumu na dɨngal wo̰ le, cɨn̰-muɗɔlɛ di woy boy nee ɗɨn̰ cɨn̰-muɗɔlɛ da kalaŋ bɨ, hɨnga ga ungo sol ma woy hɨn̰ gɨ tɔgɨ da Kumu na unɔ boy nee wo̰ le, hɨnga ga nee le togɨyge ɗɨn̰ gɨ da kalaŋ ga ɨndəŋ bɨ.

²⁶ Dan̰ kɔl gɨ ɗaŋ, ay, karmɨnɨ, kɨŋ ga Kumu təgɨŋ le, kɨbagɨŋ gusɨgɨŋ kogɨŋ sɨlagɨŋ kɛ kɨŋ na waŋ ga? Cɨn̰ kalaŋ na, ka-muɗɔlɛ kundage duroygɨŋ naŋ bɨ, kan ga ka-dɔnɔ kundage duroygɨŋ naŋ bɨ, kalaŋ ga toyge na te kalaŋ ga gɨmdəŋ kundage duroygɨŋ naŋ bɨ.

²⁷ Ama Kumu bɨnde na hɨnga ga woy dɨngal cɨn̰ kalaŋ ga cay gɨsəŋ gaŋ dɨbɨn̰ dasi cay ka-cɨn̰-muɗɔlɛ bɨ, ban bɨnde na hɨnga ga togɨyge unɔ cɨn̰ kalaŋ dɨbɨn̰ dasi cay hɨnga ga togɨyge woy nee gaŋ bɨ.

²⁸ Kumu bɨnde na hɨnga ga kalɨn̰ wo̰ dugo cɨn̰ kalaŋ bɨ, hɨnga ga kalaŋ hagɨrge bɨ, kalaŋ ga ɓalage lɔɔ hɨnga naŋ bɨ, kɨya mondɨn̰ hɨnga ga woy hɨnga a cɨn̰ kalaŋ le,

²⁹ hɨn̰ wo̰ na, ungo gɨ ɨndi kɨya ɓale gɨle gusi tumoyi Kumu naŋ.

³⁰ Na Kumu ba bɔgɨna pɨna dan̰ Jesu-Kɨris bɨ, ban lee Kɨris leen̰ cɨn̰-muɗɔlɛ tona di sayga gusi Kumu bɨ, hɨnga ga dan̰ durɔ ɗɨngar kana bɨ, dɔrɛ se dan̰ cɨndi kona bɨ, bɔyɛ ca tona bɨ,

³¹ kɨya hɨn̰ gɨ kan ba walge duroy Magtubu di da Kumu dɨŋ yege hɨn̰: «Hɨn̰ gɨ ungo na gey gɨle gusi na, kuɗa gɨ ban na gɨl gusi ujan̰ cay hɨnga ga Ba-gulɔŋ lee dɨɗɨ kɨbɨge ɨni.»