1 Ja̰ 2 - Gabri Maja

Kɨris na ba ƴɔɔ cay nagɨŋ

¹ Ay, kɨŋ ga kɨŋ woy hɨn̰ karɨnɨ kange wo̰ le, ɨŋ wal kɔl gɨ kɛ le bɨgɨŋ na ɗe gɨ agɨŋ na leen̰ ɨsɨna naŋ ɨni. Ama hɨn̰ gɨ ungo duroynagɨŋ na laa ɨsɨna na, na orɨn̰gɨŋ dan̰ ungo pɨna woy nee gɨ ba ƴɔɔ cay nagɨŋ tumoy Baynagɨŋ Kumu. Ba ƴɔɔ cayna le, na Jesu-Kɨris gɨ ba lɔɔ hɨnga ga dan̰ durɔ ɗɨngar le.

² Na ban ba-aye gusi bɨn̰ tɨma leen̰ hɨnga ga ni bogɨn̰ kɨbar, ɗe Kumu na ɗen̰ kuduroyi jal a cay ɨsɨna konagɨŋ gɨŋ. Gusi gɨ ban ay bɨn̰ tɨma le, na kol ɨsɨna konagɨŋ ƴɔbɨ naŋ. Ama na kɨya cay ɨsɨna gɨ da kalaŋ nɔm ga a cay gɨsəŋ gaŋ.

³ Hɨn̰ gɨ na na bɨgagɨŋ kɔl a cay te tumɔn̰əŋ ga da Kumu na, na solgɨŋ leen̰ cɨndi gɨ na na solgɨŋ Kumu.

⁴ Waŋ waŋ gɨ na ya hɨn̰: «Ɨŋ solii», ama na bɨga kɔl a cay te tumɔn̰əŋ kayi naŋ na, ban na ba poy bɨ kɔl gɨ cɨndi unɔ kɨbi bɨrɨŋ bɨ.

⁵ Ama ungo gɨ na bɨga kɔl a cay kɔl koyi gɨŋ na, ban gɨl leen̰ cɨndi gɨ ɗi na geyi. Dan̰ gɨyəŋ gɨ nee le na, na solgɨŋ leen̰ cɨndi gɨ na na bugoŋgɨŋ pɨna dan̰ Kumu.

⁶ Ungo gɨ na ya gɨ ɗi na bugoŋ pɨna dan̰ Kumu na, ojɨ gɨ ban kɨya ɔrɛ a cay gɨsəŋ gaŋ hɨn̰ gɨ Kɨris ba orɨn̰ a cay gɨsəŋ gaŋ wo̰ bɨ.

Te tumɔ di hɨrɨwa

⁷ Ay, kɨŋ ga ɨŋ lee-toygɨŋ, ɨŋ wala na te tumɔ di hɨrɨwa bɨgɨŋ naŋ. Ama, ɨŋ wal na te tumɔ di woy nee na jɨne haa bɨ, di kɨŋ sɔlɔɔ na tumɔ hagɨŋ bɨ, bɨgɨŋ. Te tumɔ di nee le, na kɔl gɨ da Kumu gɨ kɨŋ ba je a kɨbɨni le.

⁸ Ama naa hɨn̰ wo̰ kalɨn̰ ma, na te tumɔ di hɨrɨwa ma maŋ wal bɨgɨŋ bɨ, hɨndedo gɨl guso gusi Jesu bɨ, gusɨgɨŋ kɨŋ-gandi bɨ, kɨya wa dɨlɨm ay te ayaŋ bɨ, asɨn̰a gɨ cɨndi ay te asɨn̰e bɨ.

⁹ Waŋ waŋ gɨ na ya gɨ ɗi na som naa asɨn̰a gɨŋ, ma na ƴɨma kurɨndi dan̰ kuduroyna, ban baa andaŋ duroy dɨlɨm dɨŋ doŋ coŋ ƴee.

¹⁰ Ama ungo gɨ na gey karmii ga ban̰aŋ dan̰ ga kandɨ na, ban som na a duroy asɨn̰a gɨŋ bɨ, ban ɨran̰ dan̰ hɨnga ga kɨya dɔgɛ tɨbayi dorii a te gɨyəŋ gɨŋ coŋ naŋ bɨ.

¹¹ Ama waŋ waŋ gɨ na ƴɨma kurɨndi gɨ bara dan̰ tɨmdi di tama dan̰ kuduroyna, ban som na duroy dɨlɨm dɨŋ bɨ, or na duroy dɨlɨm dɨŋ bɨ, ban sɨla te gɨyəŋ koyi gɨ ban orɨn̰ nee naŋ bɨ, kɨya gɨ dɨlɨm bɨbɨ cɨndi.

Geyegɨŋ cay gɨsəŋ naŋ

¹² Ay, karɨnɨ kange, ɨŋ wal kɔl gɨ kɛ le bɨgɨŋ: «Kumu ɗe kuduroyi jal a cay ɨsɨna kogɨŋ gɨŋ ɨni kol cay guson̰ Jesu-Kɨris.»

¹³ Ay, karɨn̰aŋ ban̰an̰ge, ɨŋ wal kɔl gɨ kɛ le bɨgɨŋ: «Kɨŋ sol ban gɨ som a toyi dɨŋ ɓɨrag. Ay, marɨne, ɨŋ wal kɔl gɨ kɛ le bɨgɨŋ: Kɨŋ boy-kɨmbɨl cay Haban̰ Ba-lɔɔ ɨsɨna.»

¹⁴ Ay, karɨn̰aŋ, ɨŋ wal kɔl gɨ kɛ le bɨgɨŋ: «Kɨŋ sol Bayna.» Ay, karɨn̰aŋ ban̰an̰ge, ɨŋ wal kɔl gɨ kɛ le bɨgɨŋ: «Kɨŋ sol ban gɨ som a toyi dɨŋ ɓɨrag.» Ay, marɨne, ɨŋ wal kɔl gɨ kɛ le bɨgɨŋ: «Kɨŋ lee bandɨ bɨ, kɔl gɨ da Kumu ƴom kuduroygɨŋ bɨ, kɨŋ boy-kɨmbɨl cay Haban̰ Ba-lɔɔ ɨsɨna bɨ.»

¹⁵ Ɗɔɔgɨŋ cay gɨsəŋ dan̰ hɨnga ga a nee a duroy cɨndɨgɨŋ gaŋ naŋ. Hɨn̰ gɨ ungo na ɗa cay gɨsəŋ a jam tɨdi dɨŋ na, ban kɨya geye Baynagɨŋ Kumu naŋ.

¹⁶ Na cɨndi, hɨnga nɔm ga woy a cay gɨsəŋ gaŋ hɨn̰ tabɨlaŋdi hɨnga ga ɨsɨni da kuyoŋdi-gusu bɨ, tabɨlaŋdi hɨnga ga na solgɨŋ dan̰ cɨndɨnagɨŋ bɨ, dɔgɛ-jɔrgɔ kɨya cay kandi-wɔɔ bɨ le, saa na a gusi Baynagɨŋ naŋ. Ama say na a cay gɨsəŋ gaŋ kɛ.

¹⁷ Cay gɨsəŋ dan̰ tabɨlaŋdi hɨnga kaa kɨya pɨdege. Ama kalaŋ ga ka-lɔɔ kuduroy geye gɨ da Kumu le, kɨya sɔmɛge danayi dan̰ tumoyge.

Ba baa gɨ da Kɨris

¹⁸ Ay, karɨnɨ, na somgɨŋ na a wɔlɛ kagadi gɨŋ ɨni. Tumɔ, kɨŋ je gɨ ba-baa gɨ da Kɨris na kɨya caga. Ama haw kɛ na, ka-baa ga da Kɨris kondɨge ɨrgage bugoŋ ɨni. Dan̰ gɨyəŋ gɨ nee le na, na solgɨŋ gɨ na somgɨŋ na wɔlɛ kagadi gɨŋ ɨni.

¹⁹ Tumɔ kan na duroynagɨŋ, ma haw kɛ sayge andaŋge, ama leen̰ cɨndi na, tumɔ kalɨn̰ ma kan na karmiinagɨŋ naŋ. Tumɔ hɨn̰ gɨ kan naa karmiinagɨŋ na, kan ni kɨya sɔmɛ dananagɨŋ. Sɔ gɨ kan sayge andaŋge duroynagɨŋ doŋ coŋ le, gɨl doŋ pɨraŋ gɨ ungo pɨna wo̰ duroyge gɨ na kurɨndɨnagɨŋ le unɔ.

²⁰ Ama kɨŋ-gandi na, kɨŋ gɨlɨn̰ hɨn̰ kan wo̰ naŋ. Kɨris n̰ɨgɨ Turnɔ ɗe-kuduroy-bɛrɛ caygɨŋ hɨn̰ gɨ kan n̰ɨgɨn̰ sɔŋ a cay ungo wo̰, lee gɨ kɨŋ-gandi nɔm kɨŋ orɨn̰ dan̰ hɨnga-sɔlɛ.

²¹ Ɨŋ wal kɔl gɨ kɛ le bɨgɨŋ na kɨya sɔlɛ gɨ kɨŋ sɨla kɔl gɨ cɨndi le naŋ, naŋ. Ama ɨŋ wal kɔl bɨgɨŋ na kɨya gɨ kɨŋ sol kɔl gɨ cɨndi bɨ, kɨŋ sol duroyi hɨn̰ gɨ kɔl poy pɨna wo̰ na saa a gusi kɔl gɨ cɨndi gɨŋ naŋ bɨ.

²² Kɛ na waŋ ma na ba-poy le ga? Ba-poy le, na ban gɨ ba-man̰e kɨbi cay Jesu yon̰ gɨ ban naa Kɨris ban gɨ Kumu dorii le naŋ. Waŋ waŋ gɨ na gɨlɨn̰ hɨn̰ wo̰ na, ban na ba-baa gɨ da Kɨris. Ban man̰ kɨbi yen̰ gɨ Kumu naa Jesu bayi naŋ bɨ, yen̰ gɨ Jesu naa Kurɨn̰-Kumu naŋ bɨ.

²³ Waŋ waŋ gɨ na man̰a kɨbi yan̰ gɨ Jesu naa Kurɨn̰-Kumu naŋ na, ungo gɨ nee le, Kumu na bayi naŋ ɨni. Ungo gɨ na ya pɨraŋ daa gɨ Jesu naa Kurɨn̰-Kumu na, Kumu bɨle na bayi ɨni.

²⁴ Kɔl gɨ kɨŋ ba je a toyi dɨŋ le, kuɗa gɨ ɗe woy kuduroygɨŋ. Hɨn̰ gɨ kɔl gɨ kɨŋ ba je a toyi dɨŋ le, na wɨya kuduroygɨŋ na, kɨŋ bugoŋ pɨna dan̰ Kɨye bɨ, dan̰ Bayi bɨ.

²⁵ Hɨnga ga Kumu ye gɨ ɗi na kɨya lɔɔ bɨna le ba kɛ: Na sɔmɛ-bɨra gɨ dan̰ tumoyi.

²⁶ Sɨlagɨŋ ɨŋ wal kɔl gɨ kɛ le bɨgɨŋ, ojɨn̰ na cay kalaŋ ga malge gɨyəŋ gɨ ni nargɨŋ bogɨgɨŋ kayaŋ.

²⁷ Ama kogɨŋ kɨŋ-gandi na, Turnɔ ɗe-kuduroy-bɛrɛ di Kɨris n̰ɨgɨ caygɨŋ hɨn̰ sɔŋ wo̰ le som danagɨŋ dan̰ wɔlɛ pɨna pɨna. Na toy di hɨn̰ wo̰ ma, kɨŋ ɨran̰ dan̰ n̰age gɨ ungo na gɨlgɨŋ hɨnga naŋ ɨni. Ama Turnɔ ɗe-kuduroy-bɛrɛ di Kɨris bɨgɨŋ le, gɨlgɨŋ hɨnga nɔm. Turnɔ ɗe-kuduroy-bɛrɛ le, kɔl kɔɔ na hɨnde bɨ, ya poy naŋ bɨ. Bugoŋgɨŋ pɨna dan̰ Kɨris hɨn̰ gɨ Turnɔ ɗe-kuduroy-bɛrɛ ba gɨlgɨŋ wo̰.

²⁸ Ho’o, karɨnɨ kange bugoŋgɨŋ pɨna dan̰ Kɨris ɗe wɔlɛ gɨ ban na andaŋ dus na, ana ɨrɨn̰gɨŋ tumoyi dɨle sɔlɛ-hɨnga pɨna wo̰ bɨ, dɨle dasi dɔɔnagɨŋ bɨ.

²⁹ Hɨn̰ gɨ kɨŋ na sɨla gɨ ban naa ungo gɨ dan̰ durɔ ɗɨngar na, kɨŋ sol gɨ waŋ waŋ gɨ na laa hɨnga ga dan̰ durɔ ɗɨngar na, na ungo gɨ bɨləŋ kurɨn̰ Kumu ɨni.