1 Ja̰ 1 - Gabri Maja

Kɔl gɨ ni somɨn̰-bɨra

¹ Ni wal magtubu bɨgɨŋ ojɨn̰ na cay ban gɨ ba-bee sɔmɛ-bɨra le. Ban som nee tumɔ ɓɨrag, pa dɨm ma Kumu ɗen̰ hɨnga nɔm ƴee. Ni-gandi, ni je kɔl gɨ ban ye bɨ, ni solii dan̰ cɨndɨni bɨ, ni ɗe cɨndɨni cayi kuɗa bɨ, ni ɨsɨbii dan̰ kobɨni bɨ.

² Ban gɨ na sɔmɛ-bɨra le, gɨl gusi lee gɨ ni solii dan̰ cɨndɨni bɨ, ni lee tɨmon̰ toyi bɨ. Na toy di hɨn̰ wo̰ ma, ni tee bɛrnɛ di da sɔmɛ-bɨra gɨ dan̰ tumoy gɨ tumɔ som na gusi Bayi pa dɨm ma gɨl gusi bɨni ƴee le, bɨgɨŋ.

³ Hɨnga ga ni ba sol dan̰ cɨndɨni bɨ, je koldɨge dan̰ sɨmayni bɨ le, ni te bɛrnɛdɨge bɨgɨŋ, kɨya gɨ ni gey gɨ kɨŋ-gandi kalɨn̰ ma kɨŋ na bugoŋ pɨna danani te bugoŋ pɨna gɨ nee gɨŋ le bɨ. Bugoŋ pɨna gɨ na ba orɨn̰gɨŋ le, na bugoŋ pɨna dan̰ Bayna bɨ, dan̰ Kurondi Jesu-Kɨris bɨ.

⁴ Ni wal kɔl gɨ kɛ le bɨgɨŋ ɗe gɨ gusi-mɔwa di na ba orɨn̰gɨŋ nɔm le na duroŋ cɨrɛɗ.

Kumu na asɨn̰a

⁵ Sɨlagɨŋ kɔl gɨ ni ba je a gusi Jesu-Kɨris gɨ ni ba tee bɛrnɛdi bɨgɨŋ le ba kɛ: Kumu na asɨn̰a bɨ, dɨlɨm unɔ a gusi bɨ.

⁶ Hɨn̰ gɨ na na guragɨŋ a duroy dɨlɨm dɨŋ, ma mana na yagɨŋ gɨ na na bugoŋgɨŋ pɨna dan̰ Kumu na, na na ka-poy bɨ, na guragɨŋ a te kɔl gɨ cɨndi gɨŋ naŋ bɨ.

⁷ Ama hɨn̰ gɨ na na guragɨŋ a duroy asɨn̰a dɨŋ hɨn̰ gɨ ban kalɨn̰ ma na asɨn̰a wo̰ bɨ na, na sol leen̰ cɨndi gɨ na na bugoŋgɨŋ pɨna duroyna dan̰ gusɨnagɨŋ bɨ, kɨbardi Kurondi Jesu dornagɨŋ mɨra te ɨsɨna konagɨŋ gɨŋ nɔm bɨ.

⁸ Hɨn̰ gɨ na na ya hɨn̰: «Na na ɨran̰ dan̰ ɨsɨna naŋ na», na nargɨŋ na gusɨnagɨŋ konagɨŋ gaŋ bɨ, kɔl gɨ cɨndi unɔ kɨbɨnagɨŋ bɨrɨŋ bɨ.

⁹ Kumu na ungo gɨ ɨre a cay gasɨndi gaŋ bɨ, na ungo gɨ dan̰ durɔ ɗɨngar bɨ. Hɨn̰ gɨ na na yagɨŋ te ɨsɨna konagɨŋ daa pɨraŋ na, ban kɨya ɗɔɔ kuduroy jalɨwa cay ɨsɨna konagɨŋ gɨŋ bɨ, kɨya dornagɨŋ mɨra te ɨsɨna konagɨŋ gɨŋ nɔm bɨ.

¹⁰ Hɨn̰ gɨ na na ya hɨn̰: «Na na laa ɨsɨna naŋ na», na lee Kumu leen̰ ba poy bɨ, kɔl koyi unɔ a kuduroynagɨŋ bɨ.