Yahaya 5 - Fulfulde Nigeria

Yeesu Yamɗitini Jaraaɗo

¹ Gaɗa ɗu'um Yeesu yahi Urucaliima ngam wongo humto diina Yahuudanko'en.

² Ton Urucaliima e woodi njonga ndiyam haade wongal dammugal gariiri ndin bi'eteengal Dammugal Baali. Haade njonga ngan e woodi rumpaaji jowi. Nder Ibraaniyankoore e nga noddiree Betasda.

^3-4 Nyawɓe ɗuɗɓe e pukkoo haade njonga ngan. E woodi wumɓe, e yimɓe ɓe koyɗe nyawɗe, e jaraaɓe.

⁵ E woodi goɗɗo neɗɗo ɗon gaɗɗo duuɓi 38 e nyawa.

⁶ Nde Yeesu yi'imo e mo fukkii ɗon, kadin e andi o neeɓii e mo fiida e ɗum ɗon nyawu, sey Yeesu ƴamimo wi'i, “A yiɗi ɗum yamɗitinmaa?”

⁷ Nyawɗo on wi'imo, “Moodibbo, mi walaa ballayɗoyam hoccayam suuwayam nder njonga ngan carel ngel ndiyam ɗam lancaa. Fuu carel ngel ngiɗumi nattuki, sey goɗɗo artayam.”

⁸ Sey Yeesu wi'imo, “Umma koccaa daago maaɗa, njaaɓaa.”

⁹ Ɗon e ɗon neɗɗo on yamɗiti, hocci daago muuɗum, fuɗɗi yaadu. Too, nyalnde nde fii ɗu'um waɗi ɗum Nyalnde Siwtaare.

¹⁰ Ngam non, ardiiɓe Yahuudanko'en mbi'i jamɗitinaaɗo on, “Hande ɗum Nyalnde Siwtaare, Attawra haɗii koccaa daago maaɗa.”

¹¹ Ammaa jamɗitinaaɗo on wi'iɓe, “Jamɗitinɗoyam wi'iyam mi hoccaa daago am mi ndillaa.”

¹² Ɓe ƴamimo ɓe mbi'i, “Moye woni biiɗoma koccaa daago maaɗa ndillaa?”

¹³ Ammaa jamɗutuɗo on andaa moye yamɗitinimo, ngam e woodi yimɓe ɗuɗɓe e wigeere nden; Yeesu boo yaadake nattii nder maɓɓe.

¹⁴ Gaɗa non Yeesu tawimo nder Wuro Ceniingo wi'imo, “Raa, a yamɗitii! Alu waɗuki hakke to' goɗɗum ɓurɗum ɗu'um halluki heɓumaa.”

¹⁵ Sey neɗɗo on yahi wi'i ardiiɓe Yahuudanko'en Yeesu yamɗitinimo.

¹⁶ Ngam Yeesu e huwa iri kuuɗe ɗe'e Nyalnde Siwtaare, ardiiɓe Yahuudanko'en puɗɗi hallankimo.

¹⁷ Yeesu boo wi'iɓe, “Haa hande Nyaako am e huwa, min maa e mi huwa.”

¹⁸ Ka'a haala waɗi ardiiɓe Yahuudanko'en ɓeydi ɗaɓɓutuki laawol no mbardatamo. Ngam naa' dooka Nyalnde Siwtaare tan o yewi, ammaa haa maa o wi'ii Allah ɗum Nyaako maako, waato o wartirii hoore maako go'o e Allah won ɗon.

Laamu Ɗum Ɓiɗɗo Allah Woodi

¹⁹ Yeesu nootii wi'iɓe, “E mi wi'a'on goonga, Ɓiɗɗo on waɗataa koo ɗume kanum tan, ko o yi'i Nyaako maako e waɗa tan o waɗata, ngam koo ɗume ko Nyaako on waɗata, kanjum ɓiɗɗo on waɗata.

²⁰ Nyaako on e yiɗi Ɓiɗɗo on, nden fuu ko o waɗata e hoore maako o holliiɗum Ɓiɗɗo on. O hollaymo kuuɗe mawɗe ɓurɗe ɗe'e ngam kayɗinon.

²¹ Non no Nyaako on umminirta mayɓe hokkaɓe yonki, non maa Ɓiɗɗo on e hokka koo moye mo yiɗi yonki.

²² Nyaako on waɗantaa koo moye kiita e hoore maako. O hokki Ɓiɗɗo maako laamu waɗanki koo ɗume kiita,

²³ ngam koo moye mawnina Ɓiɗɗo on non no mawninirta Nyaako on. Koo moye mo mawninaayi Ɓiɗɗo on mawnintaa Nyaako liloyɗomo.

²⁴ “E mi wi'a'on goonga, koo moye nanɗo boliiɗe am hoolii on ɗon liloyɗoyam e woodi yonki ki re'ataa, o taƴantaake kiita, o yaadake o ƴaɓɓake mayde o heɓii yonki ki re'ataa.

²⁵ E mi wi'a on goonga, carel e wara, carel ngel yaadake warii ngel yimɓe ɓe keɓaayi yonki ki re'ataa nanata hononde Ɓiɗɗo Allah. Nanɓe nde njaɓi koo nde wi'i keɓay yonki ki re'ataa.

²⁶ Non no Nyaako on woodiri bawɗe hokkuki yonki, non maa o hokkii Ɓiɗɗo on bawɗe hokkuki yonki.

²⁷ Kadin o hokkii Ɓiɗɗo on laamu taƴuki kiita, ngam o Ɓii Neɗɗo.

²⁸ To' on kayɗin e ɗu'um, ngam carel e wara ngel fuu mayɓe gonɓe nder genaale nanata hononde Ɓii Neɗɗo

²⁹ ɓe mburtoyoo daga nder genaale maɓɓe. Gaɗuɓe ko wooɗi ɓe ummoto ɓe keɓa yonki ki re'ataa, nden gaɗuɓe ko halli boo ɓe ummoto ɓe taƴanee kiita.

Ceyda Dow Yeesu

³⁰ “Mi waawataa mi waɗa goɗɗum e hoore am, e mi waɗa kiita no Allah wi'iyam mi waɗa tan. E mi waɗa kiita goonga, ngam naa' ko welnantayam ɓernde ngaɗaymi, ammaa ko welnata ɓernde on ɗon lilɗoyam ngaɗaymi.

³¹ “To mi hokkii ceyda hoore am, ɗum hoccay ko mbiimi naa' ɗum goonga.

³² Ammaa e woodi goɗɗo kokkoowo ceyda dow am, e mi andi ceyda goonga o hokkata dow am.

³³ On lili yimɓe to Yahaya, kanko boo o hokki'on ceyda goonga dow am.

³⁴ Naa' mi darii dow ceyda ɗum neɗɗo hokkata, ammaa mi wi'uka ngam kison.

³⁵ Yahaya e nandi e fitilaaru kuɓɓayndu hokka jayngol, nden ngam carel seɗɗa on cuɓii nanki belɗum jayngol.

³⁶ Ammaa e mi woodi ceyda dow am ɓurɗum ceyda ɗum Yahaya hokki. Ɗe'e kuuɗe ɗe kuwaymi jooni ɗe Nyaako Mo Dow hokkiyam mi yottina, e ɗe kokka ceyda Nyaako on liloyiyam.

³⁷ Nyaako liloyɗoyam, kanko e hoore maako o hokkii ceyda dow am. On meeɗaayi nanki hononde maako, on meeɗaayi yiiki no o wa'i.

³⁸ Wolde maako boo walaa nder ɓerɗe mooɗon ngam on koolaaki mo o liloyi.

³⁹ On njanga aayaaje Allah ngam on nyuma e laawol maaje keɓoton yonki ki re'ataa. Ɗe'e aayaaje ɗe njangoton boo e ɗe kokka ceyda dow am.

⁴⁰ Ammaa fuu e non on nganyii warki to am keɓon yonki ki re'ataa.

⁴¹ “Mi ɗaɓɓitataa mawnineeki daga to yimɓe.

⁴² Ammaa e mi andi on ngiɗaa Allah nder ɓerɗe mooɗon.

⁴³ Mi wardii e laamu Nyaako am, ammaa on njaɓaayiyam. Ammaa to goɗɗo wardii e laamu hoore muuɗum, on njaɓaymo.

⁴⁴ No waɗata koolooɗonyam to on ɗaɓɓita mantindirki, ammaa on ndurwaayi keɓon manteeki daga to Allah? Kanko tan woni Allah.

⁴⁵ To' on nyumu mi wulloto'on yeeso Nyaako am. Muusa mo ngaɗuɗon kammunde dow muuɗum, kanko woni gullotooɗo'on.

⁴⁶ Daa on koolakeno Muusa e goonga, daa on koolakeyam, ngam dow am o windi.

⁴⁷ Ammaa nde on njaɓaayi ko o windi, no njaɓirton ko mbiimi?”