Yahaya 3 - Fulfulde Nigeria

Yeesu e Nikoodimus

¹ E woodi goɗɗo Faarisankeejo bi'eteeɗo Nikoodimus, e mo nder kawtal ardiiɓe Yahuudanko'en.

² O yahi to Yeesu jemma, o wi'imo, “Moodibbo, e min andi a moodibbo mo Allah liloyi, ngam walaa baawayɗo waɗa kuuɗe kayɗiniiɗe ɗe'e ɗe ngaɗataa sey ni to Allah e wondi e maako.”

³ Yeesu wi'imo, “E mi wi'umaa goonga, walaa baawayɗo natta Laamu Allah sey to ɗum fuɗɗitii ɗum danyiimo.”

⁴ Nikoodimus ƴamimo wi'i, “No neɗɗo mawɗo danyitirtee? Ɗum waɗataako o so''o nder reedu maduujo maako ɗum fuɗɗita ɗum danyamo ɗiɗaɓum.”

⁵ Yeesu wi'imo, “E mi wi'umaa goonga, walaa baawayɗo natta Laamu Allah sey ni to ndiyam e Ruuhu Allah danyiimo.

⁶ Ko neɗɗo danyi ɗum neɗɗo, ammaa ko Ruuhu danyi ɗum ruuhu.

⁷ Taa' hayɗin ngam mi wi'iima doole ɗum fuɗɗita ɗum danyumaa.

⁸ Hendu e wisa to yiɗiri, a nana sonnyo mayru, ammaa a andaa to ndu ƴiwoyi koo to ndu yahata. Non maa ɗum wontindiri e koo moye mo Ruuhu Allah danyi.”

⁹ Nikoodimus ƴamimo wi'i, “No ɗu'um waɗortoo?”

¹⁰ Yeesu nootii wi'imo, “A moodibbo mawɗo nder Israa'iila, ammaa a faamaayi ɗu'um?

¹¹ E mi wi'umaa goonga, e min meta dow ko min andi, nden e min kokka ceyda dow ko min ngi'i, ammaa on njaɓaayi ko min mbi'i'on.

¹² Mi metanii'on dow fii duuniyaaru, ammaa on njaɓaayi. No waɗata njaɓon to mi wi'ii'on ko woni e dow?

¹³ Walaa meeɗuɗo yaaki dow sey ni on ɗon ƴiwoyɗo daga dow, waato Ɓii Neɗɗo.

¹⁴ “Non no Muusa ƴeftiri mboodi gaɗiraandi njamndi mboɗeeri nder ladde, non maa doole Ɓii Neɗɗo ƴeftee,

¹⁵ ngam koo moye kooliiɗomo heɓa yonki ki re'ataa.

¹⁶ Ngam yidde nde Allah yiɗi duuniyaaru haa o hokkii Ɓiɗɗo maako bajjo, ngam koo moye kooliiɗomo to' halka ammaa heɓa yonki ki re'ataa.

¹⁷ Ngam Allah liloyaayi Ɓiɗɗo muuɗum nder duuniyaaru ngam o taƴanandu kiita. Ammaa o liloyiimo ngam o hisna duuniyaaru e laawol maako.

¹⁸ “Koo moye kooliiɗomo taƴantaake kiita, ammaa mo hoolaakimo o yaadake o taƴanaama kiita, ngam o hoolaaki Ɓiɗɗo Allah bajjo.

¹⁹ Raa ko waɗi Allah taƴanta yimɓe kiita: jayngol warii nder duuniyaaru, ammaa ɓe ɓurii yiɗuki nyiwre dow jayngol, ngam kuuɗe maɓɓe ɗe kalluɗe.

²⁰ Koo moye gaɗoowo ko halli wanyii jayngol, nden o nattataa to jayngol woni, ngam e mo hula to' kuuɗe maako kalluɗe mburtinee e njayri.

²¹ Ammaa koo moye gaɗoowo goonga e natta jayngol, ngam ɗum yi'a e njayri e mo waɗa ko Allah yiɗi.”

Yeesu e Yahaya

²² Gaɗa ɗu'um, Yeesu e tokkuɓemo njahi ladde leydi Yahuudiya. Ton o jooɗii o neeɓidi e tokkuɓemo e mo waɗana yimɓe baptisma.

²³ Yahaya maa e waɗana yimɓe baptisma e Aynon haade Salim, ngam e woodi ndiyam ɗuɗɗam ton. Yimɓe ngaɗi ka yaaki to maako e mo waɗanaɓe baptisma.

²⁴ Ɗu'um ɗum waɗu ko Yahaya suree nder suudu cural.

²⁵ Sey geddi ummii hakkunde tokkuɓe Yahaya e goɗɗo Yahuudankeejo dow lootaaki ki neɗɗo waɗata no diina Yahuudanko'en wi'i.

²⁶ Tokkuɓe Yahaya njahi to maako ɓe mbi'imo, “Moodibbo, on ɗon neɗɗo gondunooɗo e maaɗa e fongo Caangol Urdun, mo kokkuɗaa ceyda dow maako, too, e mo ton waɗana yimɓe baptisma, koo moye e yaha to maako.”

²⁷ Yahaya wi'iɓe, “Walaa keɓoowo goɗɗum sey ni to Allah hokkiimoɗum.

²⁸ Onon e ko'e mooɗon on ceydu'en mi wi'ii, ‘Naa' min woni Almasiihu, ammaa mi liloya mi artamo warki.’

²⁹ Angoojo jeyi ɓaŋaaɗo. Higo angoojo on dariiɗo e nana ko o wi'ata, o nanay belɗum naa' seɗɗa to o nanii hononde angoojo on. Iri belɗum ɗum higo angoojo on nani, iri maajum nanaymi naa' seɗɗa jooni.

³⁰ Doole mangu Yeesu waɗa ka ɓeydaaki, min boo mangu am waɗa ka ustaaki.

Garoyɗo Daga Dow

³¹ “On ɗon ƴiwoyɗo daga dow o ɓurii koo moye mangu. On ɗon ƴiwoyɗo duuniyaaru, duuniyaaru jeyimo, nden e mo meta dow fii duuniyaaru. Ƴiwoyɗo daga dow on o ɓurii koo moye.

³² O metii dow ko o yi'i e ko o nani, ammaa walaa jaɓuɗo ko o wi'i.

³³ Koo moye jaɓuɗo ko o wi'i tabbitinii jaɓii ko Allah wi'i ɗum goonga.

³⁴ On ɗon mo Allah lili, e mo meta ko Allah wi'i, ngam Allah hokkiimo Ruuhu muuɗum keerol walaa.

³⁵ Nyaako Mo Dow e yiɗi Ɓiɗɗo muuɗum, o waɗii koo ɗume nder juuɗe maako.

³⁶ Koo moye kooliiɗo Ɓiɗɗo on e woodi yonki ki re'ataa. Ammaa koo moye mo tokkaayi ko Ɓiɗɗo on wi'i, o heɓataa yonki ki re'ataa, ammaa monnere Allah e dow maako haa abadaa.”