Yahaya 10 - Fulfulde Nigeria

Misaalu Dow Gaynaako e Baali Maako

¹ Yeesu wi'i, “E mi wi'a'on goonga, koo moye mo nattiraayi hoggo baali dammugal, ammaa o ƴenti hoggo ngon o natti, o gujjo o teetoowo.

² Nattirɗo hoggo baali dammugal maago, kanko woni gaynaako baali ɗin.

³ Deenoowo dammugal hoggo ngon maɓɓitanaymo dammugal, baali ɗin boo e andi hononde maako. E mo noddiraɗi inɗe maaji, o ardooɗi ɗi mburtoo.

⁴ To o wurtinii fuu baali maako, o ardotoɗi, ɗi tokkaymo, ngam e ɗi andi hononde maako.

⁵ Ammaa ɗi tokkataa koɗo, ɗi ndoggaymo, ngam ɗi andaa hononde koɗo.”

⁶ Yeesu hokki yimɓe misaalu ɗu'um, ammaa ɓe paamaayi ko o wi'ataɓe.

Yeesu Woni Gaynaako Boɗɗo

⁷ Ngam non Yeesu fuɗɗiti wi'iɓe, “E mi wi'a'on goonga, min woni dammugal baali.

⁸ Fuu artuɓeyam warki ɓe wuyɓe ɓe teetooɓe, baali ɗin boo kettindanaakiɓe.

⁹ Min woni dammugal. Fuu tokkirɗo to am natti hisay, o nattay, o wurtoo, o heɓa ko o marortoo.

¹⁰ Gujjo waray tan ngam wujja, waɗa warhoore, halka. Min boo mi waroyi ngam tokkirɓe to am keɓa yonki, ɓe keɓaki keewuki.

¹¹ “Min woni gaynaako boɗɗo. Gaynaako boɗɗo e hokka yonki muuɗum ngam baali muuɗum.

¹² Neɗɗo koccaaɗo durngol naa' o jeyɗo baali ɗin. To o yi'ii caafaandu e wara, o alay baali ɗin o dogga. Caafaandu ndun nangaɗi sankitaɗi.

¹³ O doggay ngam o koccaaɗo durngol, walaa ko wannimo e baali ɗin.

¹⁴ Min woni gaynaako boɗɗo. E mi andi baali am, nden baali am e andiyam,

¹⁵ non no Nyaako am andiriyam, e no andirmoomi. Mi hokkii yonki am ngam baali ɗin.

¹⁶ E mi woodi goɗɗi baali ɗi ngalaa nder hoggo ngo'o. Doole mi waddaɗi kanji maa. Ɗi kettindanto hononde am. Ngam non ɗi ngartay ornde go'o, gaynaako go'o.

¹⁷ “Ko waɗi Nyaako am Mo Dow e yiɗiyam, kanjum woni mi hokkay yonki am, ngam mi fuɗɗita mi hoccaki kadin.

¹⁸ Walaa ittanoowoyam yonki. Min e hoore am hokkataki. E mi woodi bawɗe hokkukiki, nden e mi woodi bawɗe mi wartiraki. Ɗu'um kanjum Nyaako am wi'iyam mi waɗa.”

¹⁹ Sey feerootirol fuɗɗiti natti hakkunde Yahuudanko'en ngam haala ka'a.

²⁰ Ɗuɗɓe nder maɓɓe mbi'i, “E mo woodi ginnol, o kaaŋaaɗo. Ngam ɗume kettindantooɗonmo?”

²¹ Woɓɓe boo mbi'i, “Ka'a haala naa' ɗum ka neɗɗo gooduɗo ginnol. No waɗata ginnol waawa wumtinki bumɗo?”

Yeesu Wanyaama

²² Too, ɗum carel peewol, e ɗum waɗa Humto Laaɓinki Wuro Ceniingo nder Urucaliima.

²³ Yeesu e woosoo nder Rumpaaru Suleymaanu nder Wuro Ceniingo ngon.

²⁴ Sey Yahuudanko'en kawriti piliimo mbi'imo, “Haa ndeye alataamin nder seko? To an woni Almasiihu wi'uminka e njayri.”

²⁵ Yeesu wi'iɓe, “Mi wi'ii'onka, ammaa on koolaakiyam. Kuuɗe kayɗiniiɗe ɗe ngaɗaymi nder inde Nyaako am, e ɗe kolla min ɗum moye,

²⁶ ammaa on koolaakiyam, ngam onon naa' on baali am.

²⁷ Baali am e kettindanooyam. E mi andiɗi, nden e ɗi tokkayam.

²⁸ Mi hokkiiɗi yonki ki re'ataa, ɗi kalkataa haa abadaa, nden walaa teetayɗoɗi daga jungo am.

²⁹ Nyaako am kokkuɗoyam baali ɗin, o ɓurii koo ɗume bawɗe, nden walaa baawayɗo teetaɗi daga jungo maako.

³⁰ Min e Nyaako Mo Dow min go'o.”

³¹ Sey Yahuudanko'en puɗɗiti kocci kaaƴe ngam kuboomo mbaramo.

³² Yeesu wi'iɓe, “Mi hollii'on kuuɗe boɗɗe ɗuɗɗe ɗe Nyaako Mo Dow hokkiyam mi waɗa. Ngam ngale nder maaje ngiɗɗon huboraakiyam kaaƴe?”

³³ Ɓe mbi'i Yeesu, “Naa' ngam kuuɗe boɗɗe ɗe ngaɗuɗaa min kubotomaa, ammaa ngam huɗuki Allah. Ngam an a neɗɗo tan, ammaa a wartira hoore maaɗa Allah.”

³⁴ Yeesu wi'iɓe, “Naa' ɗum windaama nder Attawra mooɗon, ‘Mi wi'ii'on, onon on allaaji?’

³⁵ Deftere Ceniinde ɗum goonga haa abadaa, nden Allah noddirii nanɓe wolde muuɗum allaaji, yimɓe kokkaaɓe wolde maako.

³⁶ To ɗum non, min mo Nyaako Mo Dow suɓi ngam kuugal maako liloyiyam nder duuniyaaru, mi huɗii Allah won ɗon nde mbiimi, ‘Min mi Ɓiɗɗo Allah?’

³⁷ To naa' kuuɗe Nyaako am ngaɗaymi, to' on koolayam.

³⁸ Ammaa to e mi waɗa kuuɗe maako, koo to on koolaakiyam, koolee kuuɗe ɗen, ngam andon paamon Nyaako Mo Dow e nder am, min maa e mi nder maako.”

³⁹ Ɓe puɗɗiti ɓe ndarwi nangukimo, ammaa o wurtii juuɗe maɓɓe o daɗi.

⁴⁰ Sey Yeesu dilli huuli Caangol Urdun, wigeere to Yahaya waɗayno baptisma, o jooɗii ɗon.

⁴¹ Yimɓe ɗuɗɓe ngari to maako, e ɓe mbi'a, “Yahaya waɗaayi goɗɗum kayɗiniiɗum, ammaa koo ɗume ɗum o wi'i dow neɗɗo o'o ɗum goonga.”

⁴² Yimɓe ɗuɗɓe koolii Yeesu ɗon.