Wahayu Yahaya 19 - Fulfulde Nigeria

Mawninki Allah Ton Dow

¹ Gaɗa ɗon mi nanii hoolo cembingo bo hononde yimɓe ɗuɗɓe cembinde ton dow e ɓe ngima e ɓe mbi'a, “Haaliluuya! Allah meeɗen jeyi kisndam e mangu e laamu,

² ngam kiita maako e woodi goonga e aadilaaku, o halkii kaaruwaajo on ɗon mawɗo bonnuɗo duuniyaaru e njeenu muuɗum. Allah waatanake maccuɓe muuɗum ɓe kaaruwaajo on wari.”

³ Sey ɓe fuɗɗiti ɓe nangi gimol e ɓe mbi'a, “Haaliluuya! Curka hiite nyaamungemo waɗay ka ummaaki haa abadaa abadin.”

⁴ Sey mawɓe ɓen ɗon 24 e ɗum ɗon tagaaɗum nayum gooduɗum yonki ndiccii mawnini Allah jooɗiiɗo dow jooɗorgal laamu. E ɓe mbi'a, “Aamin! Haaliluuya!”

Humto Teegal Karoori Ndin

⁵ Nden wonde hononde daga jooɗorgal laamu ngal e wi'a, “Mantee Allah meeɗen, onon maccuɓe maako kulooɓemo mawɗo e pamaro.”

⁶ Nden mi nanii goɗɗum bo hoolo yimɓe ɗuɗɓe, bo hoolo ndiyamji doggooji, bo hoolo riggaango cembingo, e ɓe mbi'a, “Haaliluuya! Ngam Allah Joomiraawo meeɗen Joomu Bawɗe e laamoo!

⁷ En welweltu nanen belɗum naa' seɗɗa, en mawninmo, ngam carel ngel Karoori te'ata warii. Nden ɓaŋaaɗo maako on siryake.

⁸ Ɗum hokkii ɓaŋaaɗo on limcere ɗelmunde lamnde ɗelkitotoonde. Limcere nden kayre woni kuuɗe yimɓe Allah ɗe aadilaaku.”

⁹ Sey malaa'ikaajo on wi'iyam, “Windu ɗu'um. Ɓe barkiɗinaaɓe kumpitaaɓe humto teegal Karoori ndin.” Nden o wi'iyam, “Ka'a haala ɗum goonga, to Allah ɗum ƴiwoyi.”

¹⁰ Sey ndicciimi yeeso maako ngam mi mawninamo, ammaa o wi'iyam, “Taa' waɗu non! Min maa, mi maccuɗo Allah bo maaɗa, an e bandiraaɓe maaɗa jogiiɓe goonga boɗɗum ka Yeesu wangini. Mawnin Allah! Ngam goonga ka Yeesu wangini kanka waɗi yimɓe mbaawi waɗuki annabaaku.”

Goɗɗo Dow Puccu Ndanewu

¹¹ Sey ngiimi dow e omtii, sey raa wongu puccu ndanewu gonɗo dow maggu, e wi'ee Gaɗoowo Ko Haani, Gooduɗo Goonga. E mo waɗa aadilaaku nder kiita e konu.

¹² Gite maako bo ɗemngal hiite, hoore maako e woodi giifi ɗuɗɗi, nden inde e windii dow maako, walaa anduɗonde sey kanko tan.

¹³ E mo ɓornii toggoore nde ɗum somniri ƴiiƴam, nden inde nde ɗum noddirtamo woni, “Wolde Allah.”

¹⁴ Honooɓe ɓe dow e tokkimo dow pucci, e ɓe bornii kolte ɗelmuɗe laaɓuɗe.

¹⁵ Wokki kaafahi nyaaɗuki e wurtoyoo nder honduko maako, e maaki o fe''irta duuniyaaru, o laamortoɓe e sawru njamndi, o yaaɓay ɓikkoy inabooje nder ngayka monnere Allah Joomu Bawɗe.

¹⁶ To toggoore maako e dango maako wonde inde e windii wi'uki, “Laamiiɗo lamlamɓe, Joomiraawo joomiraaɓe.”

¹⁷ Nden mi yi'i goɗɗo malaa'ikaajo e darii dow naange, o noddi colli fuu piirooji e dow nder hononde cembinde, o wi'i, “Ngaree kawriton ngam humto Allah mango,

¹⁸ nyaamon kusel laamiiɓe, e ngel sooji'en mawɓe, e ngel baawuɓe konu, e ngel pucci, e ngel ƴentooɓe pucci ɗin, e ngel yimɓe fuu maccuɓe e naa' maccuɓe, mawɗo e pamaro!”

¹⁹ Sey ngiimi mardi arandeeri ndin ɗon e laamiiɓe duuniyaaru e sooji'en maɓɓe kawritii to go'o ngam ɓe kona gonɗo dow puccu on e sooji'en maako.

²⁰ Sey ɗum nangi mardi ndin e annabiijo fewre on. Kanko woni gaɗuɗo kayɗiniiɗum yeeso mayri majjini gaɗanaaɓe alaama mayri e mawninɓe ngunkiwa nandunga e mayri. E yonki ɗum hubini annabiijo fewre on e mardi ndin nder mbeela hiite kibiritu.

²¹ Ɗum wariri sooji'en maɓɓe e kaafahi burtoytooki daga honduko on ɗon jooɗiiɗo dow puccu. Sey colli nyaami kusel maɓɓe keerol no ɗi mbaawata nyaamuki.