Markus 8 - Fulfulde Nigeria

Yeesu Nyamnii Yimɓe 4,000

¹ Nder ɗen ɗon balɗe yimɓe ɗuɗɓe fuɗɗiti kawri to Yeesu. Nde ɓe ngalaa ko ɓe nyaamata, sey Yeesu noddi tokkuɓemo, wi'iɓe,

² “E mi nana jurumɗum yimɓe ɓe'e ngam hande balɗe maɓɓe tati e ɓe ngondi e am, ammaa ɓe ngalaa ko ɓe nyaamata.

³ To mi wi'iiɓe ɓe kootida e weelo, ɓe pekkoray dow ɗatal, ngam woɓɓe ngaroyii daga ɓadaaki.”

⁴ Tokkuɓemo nootii mbi'i, “Toye goɗɗo heɓata buroodi nder ladde nde'e keƴayɗum yimɓe ɓe'e?”

⁵ Yeesu ƴamiɓe wi'i, “Buroodi noye ngooduɗon?” Ɓe mbi'imo, “Joweeɗiɗi.”

⁶ Sey o wi'i yimɓe hawrutuɓe ɓen fuu ɓe njooɗoo e leydi. O hocci buroodi joweeɗiɗi ɗum, o yetti Allah, o sendiɗum, o hokki tokkuɓemo ngeedana yimɓe, kamɓe boo ɓe ngeedani yimɓe hawrutuɓe ɓen.

⁷ Ɗonmaa e ɓe ngoodi goɗɗi liƴƴi pamari seɗɗanaaji, sey o yetti Allah ngam maaji, o wi'i tokkuɓemo kanji maa ɓe ngeedana yimɓe.

⁸ Yimɓe ɓen nyaami kaari. Gaɗa maajum tokkuɓemo moɓti ko horii, ɗum heewi kondooje joweeɗiɗi.

⁹ Yimɓe ɓen ɓadake 4,000. Sey o jaɓɓitiiɓe

¹⁰ o natti komiwal, kanko e tokkuɓemo, ɓe ndilli leydi Dalmanuuta.

Yiɗuki Holleeki Kayɗiniiɗum

¹¹ Faarisanko'en ngari puɗɗi yeddootirki e Yeesu. E ɓe ngiɗi foondukimo, sey ɓe mbi'imo o waɗanaɓe goɗɗum kayɗiniiɗum ƴiwoyɗum to Allah.

¹² Sey Yeesu fofti foofaango juutungo wi'i, “Ngam ɗume onon yimɓe jaamanu ɗu'um ɗaɓɓitoton holleeki goɗɗum kayɗiniiɗum? E mi wi'a'on goonga, walaa ko ɗum hollata yimɓe jaamanu ɗu'um.”

¹³ Daga ɗon o aliɓe, o fuɗɗiti o natti komiwal, o huuli yaaki ngon ton fongo.

Ƴuufinirɗum Faarisanko'en e Hirudus

¹⁴ Tokkuɓe Yeesu ngejjitii ngardoya e buroodi, sey buroodi go'o tan ɗum ɓe ngoodi nder komiwal maɓɓe.

¹⁵ Yeesu wagginiɓe wi'i, “Paamee, ngaɗee hakkiilo e ƴuufinirɗum Faarisanko'en e ɗum Hirudus.”

¹⁶ Sey tokkuɓemo meddi hakkunde maɓɓe, ɓe mbi'i, “O wi'u non ngam en ngalaa buroodi.”

¹⁷ Nde Yeesu faami ko ɓe mbi'ata, sey o ƴamiɓe, o wi'i, “Ngam ɗume meddoton dow on ngalaa buroodi? Haa jooni on keɓtaayi on paamaayi? Koo ɓerɗe caatuɗe ngooduɗon?

¹⁸ On ngoodi gite, ammaa tampuɗon yiiki? On ngoodi noppi, ammaa tampuɗon nanuki? On ciftoraayi?

¹⁹ Carel ngel nyamnumi yimɓe 5,000 buroodi jowi, kondooje noye ɓoptuɗon e keewi horaano?” Ɓe mbi'i, “Sappo e ɗiɗi.”

²⁰ “Nden carel ngel nyamnumi yimɓe 4,000 buroodi joweeɗiɗi, kondooje noye ɓoptuɗon e keewi horaano?” Ɓe mbi'imo, “Joweeɗiɗi.”

²¹ Sey Yeesu wi'iɓe, “Haa jooni on paamaayi?”

Yeesu Wumtinii Bumɗo e Gariiri Betasayda

²² Yeesu e tokkuɓemo njottii gariiri Betasayda, sey woɓɓe yimɓe ngaddi bumɗo, ɓe torii Yeesu meemamo ngam yamɗitinamo.

²³ Yeesu jogii jungo bumɗo on, yaarimo ton gaɗa gariyel, tuttanimo joode to gite yowi juuɗe muuɗum dow maako, sey ƴamimo, wi'i, “A yi'ii goɗɗum?”

²⁴ Sey bumɗo on ƴefti hoore, raari, wi'i, “E mi yi'a yimɓe, ammaa e ɓe nandi e leɗɗe e ɓe ngiiloo.”

²⁵ Sey Yeesu fuɗɗiti meemi gite ɗen. Bumɗo on maɓɓiti gite boɗɗum, gite maako njamɗiti, o yi'i koo ɗume boɗɗum.

²⁶ Sey Yeesu wi'imo o hoota, wi'imo, “Taa' nattu nder gariyel ngel.”

Biiturus Wi'ii Yeesu Woni Almasiihu

²⁷ Yeesu e tokkuɓemo ɓe ndilli yaaki ngarihoy ngonkoy haade gariiri Kaysaariya Filibi. E ɓe njaha dow ɗatal sey o ƴamiɓe, o wi'i, “Moye yimɓe mbi'atayam?”

²⁸ Ɓe nootii ɓe mbi'i, “Woɓɓe e mbi'a a Yahaya Gaɗoowo Baptisma. Woɓɓe boo e mbi'a a Annabi Iliya. Nden woɓɓe e mbi'a a go'oto nder annabo'en ndenno.”

²⁹ Sey o ƴamiɓe, o wi'i, “Ammaa onon, moye mbi'otonyam?” Sey Biiturus nootii wi'i, “An woni Almasiihu.”

³⁰ Nden Yeesu wagginiɓe naa' seɗɗa wi'iɓe to' ɓe mbi'aka koo moye kanko o moye.

Yeesu Wi'ii No Mayrata

³¹ Sey Yeesu fuɗɗi ekkitinkiɓe e wi'a doole Ɓii Neɗɗo torroo naa' seɗɗa. Mawɓe yimɓe, e mawɓe ardiiɓe diina, e moodiɓɓe Attawra nganyamo, nden o waree. Gaɗa balɗe tati boo o ummoto daga mayde.

³² Yeesu metii haala ka'a e njayri. Sey Biiturus noddimo wuttudu go'o fuɗɗi haɓankimo.

³³ Ammaa Yeesu waylitii raari tokkuɓemo koriiɓe, haɓani Biiturus, wi'i, “Sendir e am, an Ceyɗan! Naa' to Allah nyumo maaɗa ƴiwoyi, iri nyumo yimɓe nyumataa.”

³⁴ Sey o noddi yimɓe ɗuɗɓe hawrutuɓe hawti e tokkuɓemo, o wi'iɓe, “Fuu giɗɗo warta tokkuɗoyam, to' waɗa ko hoore muuɗum yiɗi waɗuki tan, ammaa doole hocca gaafaangal muuɗum tokkayam.

³⁵ Ngam fuu giɗɗo hisnuki yonki muuɗum o dullayki. Ammaa fuu dullayɗo yonki muuɗum ngam am e ngam Habaru Belɗum o hisnayki.

³⁶ Ko ɗum nafanta neɗɗo, to o heɓii duuniyaaru fuu, ammaa o dullii yonki maako?

³⁷ Koo boo ko neɗɗo waawata hokkuki ngam jaɓtoya yonki muuɗum?

³⁸ Koo moye ganyuɗoyam e boliiɗe am nder ɗu'um jaamanu ɗum hakke, ɗum walaa goonga, min Ɓii Neɗɗo mi wanyaymo to mi wartidoyii e malaa'ika'en ceniiɓe nder teddungal Nyaako am Mo Dow.”