Markus 6 - Fulfulde Nigeria

Yeesu Wanyaama To Najarat

¹ Sey Yeesu ali wigeere nden so''ii gariiri to mawni, tokkuɓemo njaadi e maako.

² Nde Nyalnde Siwtaare wari, o fuɗɗi ekkitinki nder suudu do'aare. Yimɓe ɗuɗɓe nanɓe ko o wi'i, ɓe kayɗini e ekkitinol maako. E ɓe mbi'a, “Toye neɗɗo o'o heɓi fuu fii ɗu'um? Toye o heɓi iri faamu ɗu'um? Toye o heɓi bawɗe waɗuki iri kuuɗe kayɗiniiɗe ɗe'e?

³ Naa' kanko woni on ɗon cehoowo, ɓiɗɗo Maryaama, mawniraawo Yaakubu, e Yusufu, e Yahuuda, e Siiman? Nden minyiraaɓe maako rewɓe naa' en ngondi e maɓɓe ɗo'o?” Sey ɓe njawanimo.

⁴ Yeesu wi'iɓe, “Koo toye yimɓe e kokka annabiijo mangu, ammaa yimɓe gariiri maako, e bandiraaɓe maako, e yimɓe wuro maako, ɓe kokkataamo mangu.”

⁵ Yeesu waawaayi waɗuki goɗɗum kayɗiniiɗum ton, sey ni yimɓe seɗɗa ɓe njamɗaa o yowi juuɗe maako dow maɓɓe o yamɗitiniɓe.

⁶ O hayɗini ngam ɓe koolaakimo. Yeesu e yiiloo e ekkitina nder ngarihoy.

Yeesu Lili Tokkuɓemo Sappo e Ɗiɗo

⁷ O noddi tokkuɓemo sappo e ɗiɗo, o liliɓe ɗiɗo‑ɗiɗo, o hokkiɓe laamu dow ginni.

⁸ O wi'iɓe to' ɓe kocca goɗɗum ngam yaadu, koo nyamndu, koo jakaare, koo ceede e jiiba. Sawru tan ɓe njogotoo.

⁹ Ɓe ngatta paɗe, ammaa to' ɓe ɓornoo toggooje ɗiɗi.

¹⁰ O boo wi'iɓe, “Fuu wuro ngo njippiiɗon, njooɗee nder maago naa on alii gariiri ndin.

¹¹ To ɗum jaɓɓaaki'on e wigeere, koo ɗum wanyii hettindanaaki'on, piɗɗee sollaare koyɗe mooɗon carel ko aloton wigeere nden. Kanjum hollata ɓe ngaɗii hakke.”

¹² Sey ɓe ndilli e ɓe nga'ajina wi'uki yimɓe tuuba.

¹³ Ɓe mburtinani yimɓe ɗuɗɓe ginni, ɗuɗɓe ɓe njamɗaa boo ɓe moytaniɓe nebbam ɓe njamɗitiniɓe.

Mayde Yahaya Gaɗoowo Baptisma

¹⁴ Hirudus Laamiiɗo nani habaru fii ɗu'um, ngam inde Yeesu andaama koo toye. Woɓɓe e mbi'a Yahaya Gaɗoowo Baptisma umminaa daga mayde, kanjum waɗi e mo woodi bawɗe waɗuki kuuɗe kayɗiniiɗe.

¹⁵ Woɓɓe boo mbi'i, “Ɗum Annabi Iliya.” Nden woɓɓe mbi'i, “O annabiijo bo annabo'en ndenno.”

¹⁶ Ammaa nde Hirudus nani non, o wi'i, “Yahaya mo ittanmi hoore, kanko umminaa daga mayde!”

¹⁷ Ngam ndenno Hirudus e hoore muuɗum waɗii ɗum nangii Yahaya, ɗum haɓɓimo, ɗum surimo nder suudu cural. O waɗu non ngam Hiruudiya debbo mawniraawo maako Filibus mo o te'i.

¹⁸ Ngam Yahaya waɗii ka wiiki Hirudus, “Ɗum haanaayi te'aa debbo mawniraawo maaɗa.”

¹⁹ Hiruudiya boo nder ɓernde maako e mo jogitii Yahaya e mo yiɗi warkimo. Ammaa o waawaayi warkimo,

²⁰ ngam Hirudus e hula Yahaya e suranamo, nde e mo andi kanko o aadiliijo o ceniiɗo. Fuu carel ngel Hirudus nani haala Yahaya, e mo natta wannaare. Ammaa fuu e non e mo yiɗi hettindanaakimo.

²¹ Ammaa Hiruudiya heɓi laawol no warirta Yahaya. Nyalnde humto siftorki danyngol Hirudus, Hirudus siryii humto ngam kuwooɓe mawɓe nder laamu maako, e mawɓe ardiiɓe sooji'en, e mawɓe leydi Galiili.

²² Nde ɓiɗɗo Hiruudiya surbaajo natti wami, o welnani Hirudus ɓernde e hoɓɓe maako. Sey Hirudus wi'imo, “Torayam fuu ko ngiɗɗaa, mi hokketeɗum.”

²³ Hirudus hunaniimo wi'i, “Fuu ko toriɗaayam mi hokketeɗum haa ko hewtata sendere laamu am.”

²⁴ Sey surbaajo on wurtii wi'i maduujo muuɗum, “Ko haani mi toroo?” Maduujo on wi'imo, “Toramo hoore Yahaya Gaɗoowo Baptisma.”

²⁵ Ɗon e ɗon surbaajo on nder yawɗaare o so''ii to laamiiɗo on o wi'imo, “E mi yiɗi jooni‑jooni kokkaayam hoore Yahaya Gaɗoowo Baptisma nder le'al.”

²⁶ Hirudus Laamiiɗo wannii naa' seɗɗa, ammaa nde o yaadake o hunanakemo yeeso hoɓɓe, o yiɗaa o haɗamo.

²⁷ Ɗon e ɗon o waɗi soojiijo o yaha o waddoya hoore Yahaya. Soojiijo on yahi ittani Yahaya hoore nder suudu cural,

²⁸ o waddoyi hoore nden nder le'al, o hokkinde surbaajo on. Surbaajo on boo hokkinde maduujo muuɗum.

²⁹ Nde tokkuɓe Yahaya nani non ɓe ngari ɓe kocci ɓandu maako ɓe pukkinoyindu nder yenaande gasaande nder hayre.

Yeesu Nyamnii Yimɓe 5,000

³⁰ Lilaaɓe ɓe Yeesu lilunoo ngartoyii to maako, ɓe mbi'imo koo ɗume ko ɓe ngaɗi e ko ɓe ekkitini.

³¹ O wi'iɓe, “Ngaree, njahen to wigeere gewtunde keɓon ciwtooɗon seɗɗa.” O wi'ii non ngam yimɓe ɗuɗɓe e ngara e co''oo haa hewti ɓe keɓaayi koo carel ɓe nyaami nyamndu.

³² Sey ɓe natti komiwal ɓe ndilli to wigeere nder ladde kamɓe tan.

³³ Ammaa carel ngel ɓe ndillata yimɓe ɗuɗɓe ngi'iɓe anditiɓe. Yimɓe ɓen mburtoyii daga gariije ɗuɗɗe ɓe ndoggi e koyɗe ɓe artiɓe yaaki ton.

³⁴ E jippaaki Yeesu daga nder komiwal ngal o yi'i yimɓe ɗuɗɓe e kawriti, sey o nani jurumɗum maɓɓe, ngam e ɓe ɗon bo baali ɗi ngalaa gaynaako. Sey o fuɗɗi ekkitinkiɓe fii ɗuɗɗum.

³⁵ Nde alaasara waɗi, sey tokkuɓemo ngari to maako mbi'imo, “Ɗo'o ɗum ladde, ɗonmaa naange hiirii.

³⁶ Wi'u yimɓe ɓe'e ndilla ngam ɓe njaha gure gonɗe haade e ngarihoy ngonkoy haade ɓe coodana ko'e maɓɓe ko ɓe nyaamata.”

³⁷ Ammaa Yeesu wi'iɓe, “Onon kokkeeɓe ko ɓe nyaamata.” Sey ɓe mbi'imo, “A yiɗi min njaha min coodonoyaɓe nyamndu kewtundu ceede ɗe kuwoowo yoɓetee balɗe 200 min kokkaɓe ɓe nyaama?”

³⁸ O wi'iɓe, “Buroodi noye ngooduɗon? Njahee ndaaron.” Nde ɓe ndaari, ɓe mbi'i, “Buroodi jowi e liƴƴi ɗiɗi.”

³⁹ Sey Yeesu wi'iɓe ɓe mbi'a yimɓe njooɗoo moɓɗe‑moɓɗe dow huɗo hecco.

⁴⁰ Sey ɓe njooɗii moɓɗe 100‑100, woɓɓe njooɗii moɓɗe 50‑50.

⁴¹ O hocci buroodi jowi ɗum e liƴƴi ɗiɗi ɗin, o raari dow, o yetti Allah, o sendi buroodi ɗum o hokki tokkuɓemo ngeedana yimɓe fuu. Non o waadi e liƴƴi ɗiɗi ɗin maa.

⁴² Ɓe fuu ɓe nyaami ɓe kaari.

⁴³ Tokkuɓemo moɓti buroodi koriiɗum e liƴƴi koriiɗi ko waɗi kondooje sappo e ɗiɗi.

⁴⁴ Nyaamuɓe buroodi ɗum worɓe tan ɓadake 5,000.

Yeesu Waɗii Yaadu Dow Ndiyam

⁴⁵ Ɗon e ɗon Yeesu waɗi tokkuɓemo natta komiwal ɓe artamo huuluki yaaki Betasayda, kanko boo o jaɓɓitoto kawrutuɓe.

⁴⁶ Gaɗa o jaɓɓitakeɓe o ƴenti wonde hocceere ngam o waɗa do'aare.

⁴⁷ Nde futuro waɗi, komiwal ngal e caka mbeela, Yeesu boo e dow hocceere kanum tan.

⁴⁸ O yi'i tokkuɓemo e piida e komiwal, ngam hendu e haɗaɓe yaadu. Fajiri e mo yaha to maɓɓe, e mo yaha dow ndiyam mbeela ngan. E mo yiɗi o ƴaɓɓooɓe,

⁴⁹ ammaa nde ɓe ngi'imo e mo yaha dow ndiyam, ɓe kammi ɗum ginnol, sey ɓe ngulli,

⁵⁰ ngam ɓe fuu ɓe ngi'iimo ɓe kultorii. Ammaa ɗon e ɗon o metaniɓe, o wi'i, “Pukkinee ɓerɗe mooɗon, ɗum min. To' on kulu.”

⁵¹ Nden o natti komiwal ngal to maɓɓe, sey hendu ndun darii. Ɓe kayɗini naa' seɗɗa,

⁵² ngam ɓe paamaayi ma'ana nyamnuki yimɓe 5,000 ki o waɗi, ngam ɓerɗe maɓɓe paamaayi ma'ana maajum.

Yeesu Yamɗitinii Nyawɓe To Leydi Janisarat

⁵³ Nde ɓe kuuli fongo mbeela ngan, ɓe njottii leydi Janisarat ɓe kaɓɓi komiwal ngal.

⁵⁴ Nde ɓe mburtii nder maagal, ɗon e ɗon yimɓe anditi Yeesu.

⁵⁵ Yimɓe ɓen ndoggi ɓe njahi koo toye nder leydi ndin, e ɓe ngaddoya nyawɓe dow mbe''itaari to Yeesu koo toye to ɓe nani o woni.

⁵⁶ Koo toye to o yahi, koo nder ngarihoy, koo nder gariije mawɗe, koo nder gure ladde, yimɓe e pukkina nyawɓe nder luumo, ɓe toroomo nyawɓe ɓen meema koo cilmbi toggoore maako. Fuu meemuɓeɗi njamɗiti.