Markus 3 - Fulfulde Nigeria

Neɗɗo Mo Jungo Yaraango

¹ Wonde nyalnde Yeesu natti suudu do'aare, e woodi goɗɗo mo jungo jaraango nder mayru.

² Sey woɓɓe nder suudu do'aare ndun cutiimo koo o yamɗitinay neɗɗo on Nyalnde Siwtaare ngam ɓe keɓa ko ɓe ngulliroytoomo.

³ Sey Yeesu wi'i mo jungo jaraango on, “Woroy ɗo'o.”

⁴ Nden Yeesu ƴamiɓe wi'i, “Ko Attawra wi'i ɗum waɗa Nyalnde Siwtaare? Ɗum waɗa ko wooɗi, koo ɗum waɗa ko wooɗaa? Ɗum hisna yonki, koo ɗum waɗa warhoore?” Ammaa ɓe fuu ɓe nde''iti.

⁵ Yeesu raariɓe ɓernde muuɗum e metti, o wannii ngam ɓerɗe maɓɓe ɗe caatuɗe. Sey o wi'i mo jungo jaraango on, “Fortu jungo maaɗa.” O fortingo, sey ngo yamɗiti.

⁶ Sey Faarisanko'en mburtii suudu do'aare ndun, ɓe puɗɗi medduki e yimɓe Hirudus dow no ɓe mbardata Yeesu.

Yimɓe Ɗuɗɓe Ngarii To Yeesu

⁷ Sey Yeesu dillidi e tokkuɓemo yaaki haade Mbeela Galiili. Sey yimɓe ɗuɗɓe ƴiwoyiɓe Galiili tokkimo.

⁸ Nde yimɓe ɗuɗɓe nani habaru fuu ko o waɗata, ɓe ngari to maako daga Yahuudiya, e Urucaliima, e Iduumiya, e fongo Caangol Urdun, e leydi haade gariije Taaya e Sidon.

⁹ O wi'i tokkuɓemo ngaddanamo komiwal ngam yimɓe ɗuɗɓe kawritii to' ɓe ɓiɗɗamo.

¹⁰ O waɗu non ngam o yamɗitinii yimɓe ɗuɗɓe haa nyawɓe ɗuɗɓe ngaɗi ka fiiduki ngam ɓe meemamo.

¹¹ Fuu carel ngel yimɓe gooduɓe ginni ngi'imo, sey ɓe njana yeeso maako e ɓe mbi'a e sembe, “An a Ɓiɗɗo Allah!”

¹² Ammaa o wagginiɓe to' ɓe mbi'aka koo moye kanko o moye.

Yeesu Suɓii Tokkuɓemo Sappo e Ɗiɗo

¹³ Yeesu ƴenti hocceere noddi ɓe o yiɗi. Ɓe njahi to maako.

¹⁴ O suɓi yimɓe sappo e ɗiɗo ngam ɓe njooɗodoo e maako, nden o lilaɓe ɓe nga'ajinoya, o noddiɓe lilaaɓe,

¹⁵ o hokkiɓe bawɗe wurtinki ginni.

¹⁶ Raa inɗe yimɓe ɓe o suɓi ɓen: Siiman mo o hokki inde Biiturus,

¹⁷ e Yaakubu ɓii Jabadi, e minyiraawo muuɗum Yahaya, o hokkiɓe inde Buwarnajis, waato Ɓiɓɓe Riggaango,

¹⁸ e Andiraawus, e Filibus, e Batiloomi, e Maatiyu, e Tooma, e Yaakubu ɓii Halfa, e Taadiyus, e Siiman Kananiyankeejo,

¹⁹ e Yahuuda Iskariyooti, gartuɗo kokkitirɗo Yeesu.

Yeesu e Ba'aljabul

²⁰ Nden Yeesu natti wuro to jooɗotoo, sey yimɓe ɗuɗɓe fuɗɗiti kawriti to maako haa kanko e tokkuɓemo ɓe mbaawaayi nyaamuki nyamndu.

²¹ Nde bandiraaɓe maako nanii non, ɓe njahi ngam ɓe nangoyamo, ngam ɓe nanii yimɓe e mbi'a, “O haaŋake.”

²² Moodiɓɓe Attawra garoyɓe daga Urucaliima mbi'i, “Ba'aljabul laamiiɗo ginni nangimo, nden e bawɗe maagol o wurtinirta ginni.”

²³ Sey Yeesu noddiɓe hokkiɓe misaalu wi'iɓe, “No waɗata Ceyɗan riiwa Ceyɗan?

²⁴ To laamu sendake e wanywanytira, ɗum waawataa ɗum daroo.

²⁵ Non maa to wuro sendake e wanywanytira, ngon ɗon wuro ngo waawataa ngo daroo.

²⁶ To laamu Ceyɗan sendake e wanywanytira, ɗum waawataa ɗum daroo, re'irde maajum warii won ɗon.

²⁷ “Walaa baawayɗo natta wuro cembiɗɗo teetanamo ko o woodi, sey ni arta haɓɓukimo, nden waawa hoccuki ko o woodi nder wuro ngon.

²⁸ “E mi wi'a'on goonga, ɗum waaway yaafanaaki yimɓe hakke e koo iri ɗiye haalaaji kalluɗi ɗi ɓe meti.

²⁹ Ammaa fuu bi'uɗo ko wooɗaa dow Ruuhu Allah, o yaafantaake haa abadaa. Haa abadaa hakke ɗum e dow maako.”

³⁰ Yeesu wi'ii non ngam e ɓe mbi'a, “E mo woodi ginnol.”

Maduujo Yeesu e Minyiraaɓe Maako

³¹ Sey maduujo Yeesu e minyiraaɓe maako ngari ndarii yaasi, ɓe lili goɗɗo noddoya Yeesu.

³² Yimɓe ɗuɗɓe e njooɗii e ɓe pilii Yeesu, ɓe mbi'imo, “Maduujo maaɗa e minyiraaɓe maaɗa e ɓe ton yaasi, e ɓe ɗaɓɓutumaa.”

³³ Yeesu ƴamiɓe wi'i, “Moye woni maduujo am, nden ɓeye ngoni minyiraaɓe am?”

³⁴ O raari jooɗiiɓe e piliimo o wi'i, “Raa maduujo am e minyiraaɓe am ɗo'o!

³⁵ Fuu gaɗuɗo ko Allah yiɗi, kanko woni minyiraawo am e maduujo am.”