Markus 2 - Fulfulde Nigeria

Yeesu Yamɗitinii Jaraaɗo

¹ Gaɗa balɗe seɗɗa Yeesu so''ii Kafarnahum. Sey yimɓe nani habaru e mo wuro.

² Yimɓe ɗuɗɓe kawriti keewi wuro ngon haa walaa njayri nder wuro ngon e yaasi dammugal maago. E mo wa'ajinanaɓe Wolde Allah.

³ Sey woɓɓe ngaroyi, ɓe ngaddanimo goɗɗo jaraaɗo, yimɓe nayo e koccoyimo.

⁴ Nde ɓe mbaawaayi nattinkimo to Yeesu woni ngam yimɓe ɗuuɗii, sey ɓe ƴentinimo dow suudu ndun, ɓe njulindu, ɓe ngaɗimo nder yulnde nden dow daago maako, ɓe njippinimo yeeso Yeesu.

⁵ Nde Yeesu yi'i hoolaare maɓɓe, o wi'i jaraaɗo on, “Higo, a yaafanaama hakkeeji maaɗa.”

⁶ Woɓɓe moodiɓɓe Attawra e njooɗii ɗon e ɓe nyuma nder ɓerɗe maɓɓe,

⁷ e ɓe mbi'a, “Ngam ɗume neɗɗo o'o metirta nihi? E mo fottidina hoore maako e Allah! Moye waawata yaafaaki hakke to naa' Allah tan?”

⁸ Ɗon e ɗon Yeesu faami nder ɓernde muuɗum e ɓe nyuma dow fii ɗu'um nder ɓerɗe maɓɓe, o wi'iɓe, “Ngam ɗume nyumoton iri nyumooji ɗi'i nder ɓerɗe mooɗon?

⁹ Ko ɓuri hoyki, ɗum wi'a jaraaɗo o'o, ‘A yaafanaama hakke maaɗa,’ koo ɗum wi'amo, ‘Umma hoccu daago maaɗa, yaaɓu?’

¹⁰ Ammaa e mi yiɗi andon Ɓii Neɗɗo e woodi laamu nder duuniyaaru yaafoo hakke.” Ngam non o wi'i jaraaɗo on,

¹¹ “E mi wi'umaa, umma, koccaa daago maaɗa, kootaa wuro.”

¹² Sey o ummii, o hocci daago maako, o wurtii, o dilli yeeso koo moye. Fii ɗu'um hayɗini fuu yimɓe gonɓe ɗon, ɓe manti Allah, ɓe mbi'i, “Min meeɗaayi yiiki iri fii ɗu'um!”

Yeesu Noddii Leewi

¹³ Yeesu fuɗɗiti wurtii yahi haade Mbeela Galiili. Yimɓe ɗuɗɓe ngari to maako o ekkitiɓe.

¹⁴ E mo ƴaɓɓoo, o yi'i Leewi ɓii Halfa e jooɗii to ɗum jaɓata ceede leydi, sey Yeesu wi'imo, “Tokkam.” Sey Leewi ummii tokkimo.

¹⁵ Gaɗa ɗon Yeesu e tokkuɓemo e ɓe njooɗii e ɓe kirtoo to wuro Leewi. Jaɓooɓe ceede leydi ɗuɗɓe e gaɗooɓe hakke e nyamda e maako e tokkuɓemo, ngam e woodi yimɓe ɗuɗɓe iri maɓɓe e tokkimo.

¹⁶ Nde moodiɓɓe Attawra Faarisanko'en ngi'i e mo nyamda e gaɗooɓe hakke e jaɓooɓe ceede leydi, ɓe mbi'i tokkuɓemo, “Ngam ɗume o nyamdata e jaɓooɓe ceede leydi e gaɗooɓe hakke?”

¹⁷ Nde Yeesu nani non, o wi'iɓe, “Naa' yamɓe ngiɗi nyawndoowo, sey ni nyawɓe. Mi waroyaayi ngam nodduki nyumooɓe ɓe aadili'en, ammaa mi waroyi ngam nodduki anduɓe ɓe gaɗooɓe hakke.”

Ƴamol Dow Suumaaki

¹⁸ Too, tokkuɓe Yahaya Gaɗoowo Baptisma e tokkuɓe Faarisanko'en e cuumoo. Sey woɓɓe ngari ƴami Yeesu, ɓe mbi'i, “Ngam ɗume tokkuɓe Yahaya e tokkuɓe Faarisanko'en e cuumoo, ammaa tokkuɓema cuumataako?”

¹⁹ Yeesu nootii, wi'iɓe, “E yiiki mooɗon higooɓe angoojo cuumoto e carel ngel angoojo on e wondi e maɓɓe? To ni e ɓe ngondi e angoojo on, ɓe cuumataako.

²⁰ Ammaa carel e wara ngel ɗum hoccata angoojo on daga nder maɓɓe, nden e nyalnde nden ɓe cuumotoo.

²¹ “Walaa nyootayɗo lefel kesel to limcere kiinde. To o waɗii non, lefel kesel ngel seekay e limcere kiinde nden. Non waɗay nde ɓura no ndenno seekuki.

²² Non maa walaa gaɗayɗo ndiyam inabojam kesam nder faandu hiindu. To o waɗii non, ɗam ƴuufay ɗam pusa faandu ndun, nden ɗum dullayɗam, ɗum dulla faandu ndun. Ammaa ndiyam inabojam kesam haani waɗee nder faandu heyru.”

Ƴamol Dow Nyalnde Siwtaare

²³ Wonde Nyalnde Siwtaare Yeesu e tokkuɓemo e ƴaɓɓoo nder gese alkamaari, sey tokkuɓemo puɗɗi ɓoruki cammeeje mayri e ɓe nyaama.

²⁴ Sey Faarisanko'en mbi'imo, “Raa ko tokkuɓema ngaɗata. Ko waɗata e ɓe ngaɗa ko Attawra haɗi ɗum waɗa Nyalnde Siwtaare?”

²⁵ Yeesu wi'iɓe, “On meeɗaayi janguki ko Dawda waɗi, kanko e gonduɓe e maako nde ɓe nani weelo kadin e ɓe nder dullere nyamndu?

²⁶ E jaamanu ɗum Abiyata woni Mawɗo Mawɓe Ardiiɓe Diina, Dawda natti Lukuru Seniiɗum nyaami buroodi ceniiɗum. Attawra boo wi'ii ardiiɓe diina tan haani nyaamuki buroodi ɗum, ammaa Dawda nyaamiɗum haa maa o hokkori jaadooɓe e maako.”

²⁷ Sey Yeesu wi'iɓe, “Nyalnde Siwtaare waɗaa ngam neɗɗo, naa' neɗɗo waɗaa ngam Nyalnde Siwtaare.

²⁸ Ngam non Ɓii Neɗɗo o Joomu koo ɗume haa e Nyalnde Siwtaare.”