Markus 15 - Fulfulde Nigeria

Yeesu Yeeso Bilaatus

¹ Ilaa subaka mawɓe ardiiɓe diina, e mawɓe yimɓe, e moodiɓɓe Attawra, e fuu Kawtal Mawɓe ɓe meddi dow ko ɓe ngaɗata. Sey ɓe kaɓɓi Yeesu ɓe ndillidi e maako, ɓe tambinimo Bilaatus gomnaajo.

² Bilaatus ƴamimo, wi'i, “An woni laamiiɗo Yahuudanko'en?” Yeesu nootii, wi'imo, “Ee, a wi'iika.”

³ Mawɓe ardiiɓe diina ngulloriimo fii ɗuɗɗum.

⁴ Sey Bilaatus fuɗɗiti ƴamimo, wi'i, “Walaa ko mbi'ataa? Raa ɓe ngullorakema fii ɗuɗɗum.”

⁵ Ammaa Yeesu ɓeydaayi nootaaki, haa ɗum hayɗini Bilaatus.

Ɗum Taƴanii Yeesu Kiita Mayde

⁶ Too, e carel Humto Sakkinki Bilaatus woowii yoofankiɓe curaaɗo go'oto mo ɓe torii.

⁷ E woodi goɗɗo bi'eteeɗo Barabbas curaaɗo, kanko e woɓɓe curaaɓe ngam ɓe kaɓdii e laamu, ɓe ngaɗii warhoore nder hawre nden.

⁸ Sey yimɓe ɗuɗɓe ngari ɓe torii Bilaatus waɗanaɓe ko o woowi waɗankiɓe.

⁹ Bilaatus ƴamiɓe wi'i, “On ngiɗi mi yoofana'on Laamiiɗo Yahuudanko'en?”

¹⁰ Ngam Bilaatus faamii lawliiru waɗi mawɓe ardiiɓe diina ngaɗi Yeesu nder jungo maako.

¹¹ Ammaa mawɓe ardiiɓe diina ɓen ngaɗi yimɓe mbi'a Bilaatus o yoofanaɓe Barabbas naa' Yeesu.

¹² Sey Bilaatus ƴamiɓe, wi'i, “Too, ko ngiɗɗon mi waɗana neɗɗo o'o mo noddirton Laamiiɗo Yahuudanko'en?”

¹³ Ɓe fuu ɓe mbi'i sembee, “Warumo dow gaafaangal!”

¹⁴ Bilaatus ƴamiɓe, wi'i, “Ngam ɗume? Ɗume ko halli o waɗi?” Ammaa ɓe ɓeydi wi'uki sembee, “Warumo dow gaafaangal!”

¹⁵ Nde Bilaatus e yiɗi waɗa ko hawrutuɓe ɓen ngiɗi, o yoofaniɓe Barabbas. O waɗi ɗum fiyi Yeesu looci, nden o tambinimo sooji'en Rooma ngam ɓe mbaroyamo dow gaafaangal.

Sooji'en Njukkitii Yeesu

¹⁶ Sooji'en ɓen ardini Yeesu yaaki laamorde gomnaajo bi'eteende “Firetooriyum.” Ɓe noddi fuu sooji'en koriiɓe ɓe kawritiɓe.

¹⁷ Ɓe ɓornimo iri toggoore laamiiɓe, nden ɓe mbaali giifol gi'e, ɓe taaranimongol to hoore.

¹⁸ Sey ɓe puɗɗi hownukimo, e ɓe mbi'a, “Allah reene, laamiiɗo Yahuudanko'en!”

¹⁹ Ɓe ngaɗi ka piirukimo sawru to hoore. E ɓe tuttanamo joode. Ɓe ndiccii yeeso maako bo ɓe kokkaymo mangu.

²⁰ Gaɗa ɓe njukkitiimo, ɓe ɓortimo toggoore laamiiɓe nde ɓe ɓornunoomo, nden ɓe ɓornimo kolte maako. Sey ɓe mburtinimo ɓe ardinimo ngam ɓe mbaroyamo dow gaafaangal.

Yeesu Waraama Dow Gaafaangal

²¹ Goɗɗo neɗɗo Saayirankeejo e ƴaɓɓoo bi'eteeɗo Siiman, nyaako Alijanda e Ruufus. O ƴiwoyɗo nder ladde e mo nattoya gariiri ndin. Sey ɓe ngaɗimo e sembe o hocca gaafaangal Yeesu.

²² Ɓe njaari Yeesu wonde wigeere bi'eteende Golgoota, waato “Wigeere Ƴiƴal Hoore.”

²³ Nden ɓe kokkimo ndiyam inabojam jillindiraaɗam e mur ngam o yara, ammaa o yaraayiɗam.

²⁴ Sey, ɓe piyanimo kuusaaje dow gaafaangal. Nden ɓe cendi kolte maako hakkunde maɓɓe, ɓe ngaɗi caaca ngam ɓe ngi'a ko koo moye heɓata.

²⁵ Carel ngel ɓe piyanimo kuusaaje dow gaafaangal ɗum njamndi joweenayi subaka.

²⁶ Dow hoore gaafaangal ngal ɗum takki allowal. Ɗum windi dow maagal ko ɗum wulloriimo wi'uki, “Laamiiɗo Yahuudanko'en.”

^27-28 Kadin ɓe piyani wuyɓe ɗiɗo kuusaaje dow gaafaale haade Yeesu, go'oto e jungo maako nyaamo, go'oto e jungo maako nano.

²⁹ Yimɓe ƴaɓɓotooɓe e kuɗa Yeesu e ɓe ngiila ko'e, e ɓe mbi'a, “Too! An giɗɗo pusuki Wuro Ceniingo mahitoɗaango nder balɗe tati,

³⁰ jippoya daga dow gaafaangal kisnaa hoore maaɗa!”

³¹ Non maa mawɓe ardiiɓe diina e moodiɓɓe Attawra ɓe njukkitimo hakkunde maɓɓe, e ɓe mbi'a, “O hisnii woɓɓe, ammaa o waawaayi hisnuki hoore maako.

³² Al o'o bi'oowo kanko woni Almasiihu, Laamiiɗo Israa'iila, o jippoyoo jooni daga dow gaafaangal ngam ngi'en koolooɗenmo.” Ɓen ɗon wuyɓe ɓe ɗum piyani kuusaaje dow gaafaale maa kuɗimo.

Mayde Yeesu

³³ Caka nyalawma, sey nyiwre maɓɓi leydi fuu haa yaaki njamndi tati ndi alaasara.

³⁴ E njamndi tati ndin, sey Yeesu wi'i e sembe, “Eloy, Eloy, lama sabattani?” waato, “Yaa Allah am, Yaa Allah am, ngam ɗume cendirɗaa e am?”

³⁵ Nde woɓɓe dariiɓe to wigeere nden nani non, ɓe mbi'i, “Nanee, e mo nodda Annabi Iliya.”

³⁶ Sey go'oto maɓɓe doggi sofni soosowa nder ndiyam inabojam lammuɗam, o ɗiisinga to sawru, o hokki Yeesu yara. O wi'i, “Alee ngi'en koo Iliya waray jippinamo.”

³⁷ Sey Yeesu wulli sembee, nden maayi.

³⁸ Sey wudere cendunde Suudu Joomiraawo seeki ɗiɗi daga dow yaaki ley.

³⁹ Mawɗo sooji'en dariiɗo ɗon e raara Yeesu. Nde o yi'i no Yeesu foftiri foofaango cakitiingo, maayi, o wi'i, “Goonga, neɗɗo o'o o Ɓiɗɗo Allah!”

⁴⁰ E woodi woɓɓe rewɓe e ɓe ndaara daga to woɗɗi. Nder maɓɓe e woodi Maryaama ƴiwoyɗo Magadala, e Maryaama maduujo Yaakubu pamaro, e Yusufu, e Saloomi.

⁴¹ Ɓe'e rewɓe kamɓe tokkaynoo Yeesu, e ɓe mballamo ko o wonnoo leydi Galiili. E woodi rewɓe ɗuɗɓe feere gardoyɓe Urucaliima e maako e ɓe ɗon ɗum kamɓe maa.

Uwuki Yeesu

⁴² Ɗum alaasara Nyalnde Siryaaki, waato to finii ɗum Nyalnde Siwtaare.

⁴³ Ngam maajum Yusufu ƴiwoyɗo gariiri Armaatiya, o waɗi sembe ɓernde, o yahi to Bilaatus, o toriimo o hokkamo ɓandu Yeesu. Yusufu o neɗɗo mo ɗum hokkata mangu nder Kawtal Mawɓe, kanko maa o haaɓii yi'uki garol Laamu Allah.

⁴⁴ Bilaatus hayɗini nde nani Yeesu yaadake maayii. O noddi mawɗo sooji'en, o ƴamimo koo ɗum non.

⁴⁵ Nde o nani to honduko mawɗo sooji'en on Yeesu yaadake maayi, sey o jaɓi Yusufu hocca ɓandu ndun.

⁴⁶ Sey Yusufu soodoyi wudere nde ceede, o waɗi ɗum jippini ɓandu Yeesu, o taarindu e wudere nden, o fukkinoyindu nder yenaande gasaande nder hayre. O talliti kaaƴa manga o maɓɓi dammugal yenaande nden.

⁴⁷ Maryaama ƴiwoyɗo Magadala e Maryaama maduujo Yusufu ɓe ngi'i to ɗum fukkini ɓandu Yeesu.