Markus 14 - Fulfulde Nigeria

Ɗum Darwii Warki Yeesu

¹ Horii balɗe ɗiɗi ɗum waɗa Humto Sakkinki e Humto Buroodi Ɗum Walaa Ƴuufinirɗum. Mawɓe ardiiɓe diina e moodiɓɓe Attawra e ɗaɓɓita laawol no ɓe nangirta Yeesu e suuɗe ɓe mbaramo.

² Ɓe mbi'i, “Ammaa naa' ni carel Humto, ngam to' yimɓe ummina hawre.”

Ɗum Moytanii Yeesu Nebbam Uroojam e Betani

³ Yeesu e nder gariiri Betani to wuro Siiman gooduɗo nyawu nyaamoojum laral. E mo nyaama nyamndu, sey goɗɗo debbo wari e jogii jolloyel hayre bongel ngel nebbam uroojam mbelɗam ɗam ɗum waɗiri nardi gooduɗam ceede. Sey o maɓɓitingel, o wayli nebbam ɗam dow hoore Yeesu.

⁴ Woɓɓe gonɓe ɗon ɓe monni ɓe mbi'i hakkunde maɓɓe, “Ngam ɗume o wonni nebbam ɗa'am nihi?

⁵ Daa ɗam sooraama, daa ɗum heɓii ceede ɓurɗe ɗe ɗum yoɓata kuwoowo hitaande go'o, ɗum hokkaɗe ɓe ngalanaa.” Ɓe kaɓani debbo on sembee.

⁶ Ammaa Yeesu wi'iɓe, “Aleemo. Ngam ɗume ngannotonmo? Ko o waɗaniyam ɗum boɗɗum.

⁷ Koo ndeye ɓe ngalanaa e ngondi e mooɗon, on mbaaway wallukiɓe fuu carel ngel ngiɗɗon. Ammaa min, carel e wara ngel alaymi'on.

⁸ O'o debbo waɗii ko o waawata waɗuki. O waylanii ɓandu am nebbam ngam siryaaki uwukiyam.

⁹ E mi wi'a'on goonga, koo toye to ɗum wa'ajini Habaru Belɗum nder duuniyaaru fuu, ɗum hokkay habaru ko debbo o'o waɗi ngam siftorkimo.”

Yahuuda Jaɓii Hokkitira Yeesu

¹⁰ Sey go'oto nder tokkuɓe Yeesu sappo e ɗiɗo bi'eteeɗo Yahuuda Iskariyooti yahi to mawɓe ardiiɓe diina ngam hokkitira Yeesu nder juuɗe maɓɓe.

¹¹ Ɓe nani belɗum naa' seɗɗa nde ɓe nani non, ɓe ngaɗi alkawal hokkukimo ceede. Ngam non, Yahuuda fuɗɗi ɗaɓɓutuki laawol no hokkitirta Yeesu nder juuɗe maɓɓe.

Yeesu Waɗii Humto Sakkinki e Tokkuɓemo 12

¹² Nyalnde arandeere nde Humto Buroodi Ɗum Walaa Ƴuufinirɗum, nyalnde nde ɗum hirsata karooji ngam Humto Sakkinki, tokkuɓe Yeesu ƴamimo, mbi'i, “Toye ngiɗɗaa min njaha min ciryanomaa ngam nyaamen nyamndu Humto Sakkinki?”

¹³ Sey o lili tokkuɓemo ɗiɗo, o wi'iɓe, “Nattee gariiri, on kawray e goɗɗo e mo rondii ƴoogirde ndiyam. Tokkeemo

¹⁴ yaaki wuro ngo o nattata, mbi'on joomu wuro ngon, ‘Moodibbo wi'ii min ƴamumaa: Toye suudu ndu nyaamaymi nyamndu Humto Sakkinki, min e tokkuɓeyam?’

¹⁵ O hollay'on suudu mawndu ndu dow mo''inaandu ciryaandu. Ciryanee'en koo ɗume ɗon ngam nyaamen nyamndu Humto Sakkinki.”

¹⁶ Sey tokkuɓemo ɓen nangi laawol natti gariiri ndin ɓe tawi koo ɗume non no Yeesu wi'iɓe. Sey ɓe ciryii koo ɗume ngam Humto Sakkinki.

¹⁷ Nde futuro waɗi, Yeesu e tokkuɓemo sappo e ɗiɗo ngari wuro ngon.

¹⁸ E ɓe njooɗii e ɓe nyaama nyamndu, sey Yeesu wi'i, “E mi wi'a'on goonga, go'oto nder mooɗon nyamndayɗo e am hokkitirayyam.”

¹⁹ Sey ɓe nganni, ɓe puɗɗi wi'ukimo go'oto‑go'oto, “Naa' ɗum min, koo?”

²⁰ Yeesu nootii, wi'i, “Ɗum go'oto nder mooɗon, onon sappo e ɗiɗo ɓe cuɓumi, nyamdayɗo e am le'al go'o.

²¹ Ɓii Neɗɗo maayay no ɗum windiraa dow maako, ammaa kokkitirayɗomo wonii! Ɗum ɓuranaymo daa o danyaaka.”

Kirtaari Joomiraawo

²² E ɓe nder nyaamuki nyamndu, sey Yeesu hocci buroodi yetti Allah, o sendiɗum, o hokki tokkuɓemo, o wi'i, “Njaɓeeɗum. Ɗu'um ɗum ɓandu am.”

²³ Ɗonmaa o hocci jardugel ndiyam inabojam, o yetti Allah, o hokkiɓeɗam, ɓe fuu ɓe njariɗam.

²⁴ Nden o wi'iɓe, “Ɗa'am kanjam woni ƴiiƴam am tabbitinayɗam alkawal Allah ndufeteeɗam ngam yimɓe ɗuɗɓe.

²⁵ E mi wi'a'on goonga, mi fuɗɗitataa mi yara ndiyam inabooje naa nyalnde nde njaraymi ngoɗɗam kesam nder Laamu Allah.”

²⁶ Sey ɓe ngimi gimol mantuki Allah, nden ɓe ndilli Hocceere Nde Leɗɗe Jaytun.

Yeesu Wi'ii Biiturus Wi'ay Andaamo

²⁷ Yeesu wi'i tokkuɓemo, “On fuu on ndoggay alonyam, ngam nder aayaare Allah wi'ii, ‘Mi waray gaynaako, nden baali ɗin cankitoto.’

²⁸ Ammaa gaɗa mi ummake daga mayde, mi artay'on yaaki Galiili.”

²⁹ Sey Biiturus wi'imo, “Koo ɓe fuu ɓe aliima, min mi alataama.”

³⁰ Yeesu wi'imo, “E mi wi'umaa goonga, hande, nder jemmaare nde'e, ko njakardi hana nde ɗiɗi, a wi'ay a andaayam nde tati.”

³¹ Ammaa Biiturus jaɓaayi, o wi'i, “Koo ɗum wardayyam e maaɗa, mi wi'ataa mi andaama.” Horiiɓe ɓen maa mbi'i non.

Yeesu Waɗii Do'aare to Geesamani

³² Sey ɓe njahi wigeere bi'eteende Geesamani, Yeesu wi'i tokkuɓemo, “Njooɗee ɗo'o, mi yaha mi waɗa do'aare.”

³³ Sey o hocci Biiturus, e Yaakubu, e Yahaya. Ɓernde maako boo teddi, o fuɗɗi wannuki naa' seɗɗa.

³⁴ O wi'iɓe, “Ɓernde am wannii naa' seɗɗa haa bo mi maayay. Njooɗee ɗo'o on ndeena.”

³⁵ Nde o yahi yeeso seɗɗa, sey o yani e leydi e mo hippii, o waɗi do'aare, o wi'i to ɗum gaɗotooɗum ɗum hoccanamo carel torra wonka yeeso maako.

³⁶ O wi'i, “Yaa Nyaako am Mo Dow, koo ɗume ɗum gaɗotooɗum to maaɗa. Taa jaɓii, ittanam jardugel torra ka'a. Fuu e non naa' ko ngiɗumi waɗetee, ammaa ko ngiɗɗaa waɗee.”

³⁷ Gaɗa ɗon o so''ii to ɓen ɗon tokkuɓemo tato, o tawi e ɓe ɗaanii, sey o wi'i Biiturus, “Biiturus, a ɗaanii? A waawataa jooɗaaki a ɗaanaaki koo carel seɗɗa?

³⁸ Njooɗee, to' on ɗaano, ngaɗee do'aare to ɗum foondii'on to' ngaɗon hakke. Ɓernde e yiɗi waɗuki ko haani, ammaa ɓandu tampii.”

³⁹ O fuɗɗiti o dilli, o waɗi do'aare, o wi'i ko o wi'unoo.

⁴⁰ O fuɗɗiti o so''oyii to maɓɓe, o tawi e ɓe ɗaanii, ngam e ɓe nana ɗeyngol teddungol. Ɓe ndulli ko ɓe mbi'atamo.

⁴¹ O fuɗɗiti o so''ii to maɓɓe tataɓum, o wi'iɓe, “Haa jooni on ɗaanii, on ciwtoo? Ɗum heƴii non! Carel warii. Ɗum hokkitirii Ɓii Neɗɗo nder juuɗe gaɗooɓe hakke.

⁴² Ummee ndillen! Raa on ɗon kokkitirayɗoyam e wara.”

Ɗum Nangii Yeesu

⁴³ Yeesu e meta, sey Yahuuda, go'oto nder tokkuɓemo sappo e ɗiɗo yottii. O wardoyi e yimɓe ɗuɗɓe e ɓe njogii kaafaaje e cabbi. Mawɓe ardiiɓe diina, e moodiɓɓe Attawra, e mawɓe yimɓe liloyiɓe.

⁴⁴ Too, nden maa kokkitirayɗo on yaadake wi'iiɓe no hollirtaɓe Yeesu, o wi'i, “Neɗɗo mo kownaymi hownuki higaaku ɗum kanko. Nangeemo, ngaɗon taadiiɓe njogoomo boɗɗum ndillida e maako.”

⁴⁵ Nde Yahuuda yottii to ɓe ngoni, ɗon e ɗon o ɓaddii Yeesu, o wi'imo, “Moodibbo!” nden o hownimo hownuki higaaku.

⁴⁶ Sey yimɓe ɓen nangi Yeesu ɓe njogiimo boɗɗum.

⁴⁷ Ammaa go'oto nder tokkuɓe Yeesu dariiɗo ɗon solti kaafahi muuɗum fe''i maccuɗo Mawɗo Mawɓe Ardiiɓe Diina ittanimo nowru.

⁴⁸ Sey Yeesu wi'iɓe, “On ngardoyi e kaafaaje e cabbi ngam nangoyyam bo gujjo calorɗo?

⁴⁹ Koo ndeye e mi wondi e mooɗon, e mi ekkitina nder Wuro Ceniingo, on nangaayiyam. Ammaa doole ko aayaaje mbi'i heewa.”

⁵⁰ Sey tokkuɓemo fuu alimo ndoggi.

⁵¹ Goɗɗo kayeejo boo e tokkiri Yeesu ton gaɗa, o ɓornaaki goɗɗum, wudere nde ceede tan o waanii. Ɓe nangimo,

⁵² sey o alaniɓe wudere nden, o doggi o ɓornaaki.

Yeesu Yeeso Laamu

⁵³ Ɓe njaari Yeesu to Mawɗo Mawɓe Ardiiɓe Diina. Fuu mawɓe ardiiɓe diina, e mawɓe yimɓe, e moodiɓɓe Attawra kawritii ɗon.

⁵⁴ Biiturus boo tokkirimo gaɗa daga to woɗɗi haa yaaki caka wuro Mawɗo Mawɓe Ardiiɓe Diina. O jooɗodii e taadiiɓe Wuro Ceniingo, e mo irfoo haade hiite.

⁵⁵ Mawɓe ardiiɓe diina e fuu Kawtal Mawɓe e ɓe ɗaɓɓita ceyda ko ɓe nangirta Yeesu, ngam ɓe keɓa ɓe mbaramo, ammaa ɓe keɓaayi goɗɗum.

⁵⁶ Yimɓe ɗuɗɓe meti haalaaji fewre dow maako, ammaa ko ɓe mbi'i wardaayi go'o.

⁵⁷ Sey woɓɓe ummii ɓe mbi'i haalaaji fewre ɗi'i dow maako, ɓe mbi'i,

⁵⁸ “Min nanii o wi'ii o sankitay ngo'o Wuro Ceniingo ngo yimɓe mahi, nden nder balɗe tati o maha wongo naa' e juuɗe yimɓe.”

⁵⁹ Ammaa fuu e non ko ɓe mbi'i wardaayi go'o.

⁶⁰ Sey Mawɗo Mawɓe Ardiiɓe Diina ummii darii yeeso maɓɓe ƴami Yeesu, o wi'i, “A walaa ko mbi'ataa? Ko ɓe mbi'i dow maaɗa ɗum goonga?”

⁶¹ Ammaa Yeesu de''iti nootanaakimo. Mawɗo Mawɓe Ardiiɓe Diina on fuɗɗiti ƴami Yeesu, wi'i, “Too, an woni Almasiihu, Ɓiɗɗo Joomu Mangu?”

⁶² Yeesu nootii, wi'i, “Ee, ɗum min. On ngi'ay Ɓii Neɗɗo e jooɗii to jungo nyaamo ngo Joomu Bawɗe, e mo waroya nder duule.”

⁶³ Sey Mawɗo Mawɓe Ardiiɓe Diina on seeki kolte muuɗum wi'i, “Ɗume ceyda ɗaɓɓiteten kadin?

⁶⁴ On nanii ni haala kalluka ka o meti dow Allah. Ko woni cuɓol mooɗon?” Sey yimɓe fuu mbi'i e haani o waree.

⁶⁵ Woɓɓe puɗɗi tuttankimo joode, ɓe kaɓɓanimo gite, ɓe piyimo, e ɓe mbi'amo, “Waɗu annabaaku! Moye fiyimaa?” Sey taadiiɓe Wuro Ceniingo koccimo piyimo.

Biiturus Wi'ii Andaa Yeesu

⁶⁶ Biiturus e caka wuro ngon, sey go'oto nder horɓe Mawɗo Mawɓe Ardiiɓe Diina wari wigeere nden.

⁶⁷ Nde o yi'i Biiturus e irfoo, o sutiimo, o wi'imo, “An maa, a wondi e Yeesu on ɗon ƴiwoyɗo gariiri Najarat.”

⁶⁸ Ammaa Biiturus yeddi wi'i, “Min mi andaa, mi faamaayi ko mbi'ataa.” Biiturus wurtii yahi njayri dammugal yaasi, sey njakardi hani.

⁶⁹ Korɗo on yi'i Biiturus ton, o fuɗɗiti o wi'i dariiɓe ɗon kamɓe maa, “O'o neɗɗo o go'oto maɓɓe!”

⁷⁰ Ammaa Biiturus fuɗɗiti yeddi. Gaɗa ɗon seɗɗa, dariiɓe haade ɗon mbi'i Biiturus, “Seko walaa an maa a go'oto nder tokkuɓemo, ngam a Galilankeejo.”

⁷¹ Biiturus fuɗɗi laanuki hoore muuɗum hunii wi'i, “Mi andaa neɗɗo o'o mo mbi'oton.”

⁷² Ɗon e ɗon njakardi hani ɗiɗaɓum. Sey Biiturus siftori ko Yeesu wi'unoomo wi'uki, “Ko njakardi hana nde ɗiɗi, a wi'ay a andaayam nde tati.” Nden Biiturus fuɗɗi bojji.