Maatiyu 6 - Fulfulde Nigeria

Ekkitinol Dow Walluki Ɓe Ngalanaa

¹ “Paamee to' ngaɗon kuuɗe aadilaaku mooɗon yeeso yimɓe ngam ɓe ngi'a. Ngam to on ngaɗii non, on keɓataa mbarjaari to Nyaako mooɗon Mo Dow.

² “Ngam non, taa hokkay ɓe ngalanaa caahu, taa' andinka koo moye no munaafuki'en ngaɗata nder cuuɗi do'aare e dow ɗatal ngam yimɓe ngi'a mantaɓe. E mi wi'a'on goonga, ɓe njaadake ɓe keɓi mbarjaari maɓɓe.

³ Ammaa taa hokkay mo walanaa caahu, taa' jaɓu jungo nano maaɗa anda ko jungo nyaamo maaɗa waɗata.

⁴ Hokku caahu maaɗa e suuɗe, nden Nyaako maaɗa Mo Dow anduɗo koo ɗume gaɗaaɗum e suuɗe, o hokkete mbarjaari.

Ekkitinol Dow Do'aare

⁵ “To on ngaɗay do'aare, to' on ngaɗu no munaafuki'en ngaɗata, ngam e ɓe ngiɗi waɗuki do'aare e ɓe ndarii nder cuuɗi do'aare e dow to ɗate kawri ngam koo moye yi'aɓe. E mi wi'a'on goonga, ɓe njaadake ɓe keɓii mbarjaari maɓɓe.

⁶ Ammaa taa waɗay do'aare, nattu suudu maaɗa maɓɓaa dammugal, toroɗaa Nyaako maaɗa Mo Dow mo yi'ataake. Nden kanko gi'oowo ko waɗetee e suuɗe o hokkete mbarjaari.

⁷ “To on ngaɗa do'aare, to' on metu haalaaji meere no yimɓe ɓe andaa Allah ngaɗata. E ɓe nyuma allaaji maɓɓe nanay ko ɓe mbi'i ngam ɓe kuutiri boliiɗe ɗuɗɗe.

⁸ To' on ngaɗu no ɓe ngaɗata ngam Nyaako mooɗon Mo Dow e andi ko ngiɗɗon ko torooɗonmo.

⁹ Raa no ngaɗirton do'aare, ‘Yaa Allah Nyaako amin Mo Dow, inde maaɗa ceniinde mawninee.

¹⁰ Laamu maaɗa wara, ko ngiɗɗaa waɗee nder duuniyaaru, no ɗum waɗirtee e dow.

¹¹ Hokkumin ko min nyaamata hande.

¹² Yaafanamin hakkeeji amin no min njaaforantoo gaɗanɓemin ko wooɗaa.

¹³ Taa' alu min njaha to min ngaɗata hakke, ammaa hisnumin daga Kalluɗo.’

¹⁴ “Ngam to on njaafanake gaɗanɓe'on ko wooɗaa, Nyaako mooɗon Mo Dow maa yaafanto'on.

¹⁵ Ammaa to on njaafanaakiɓe, kanko maa o yaafantaako'on hakke mooɗon.

Ekkitinol Dow Suumaaki

¹⁶ “To on cuumii, to' on mbonnu geece mooɗon no munaafuki'en ngaɗata, ngam kamɓe e ɓe mbonna geece maɓɓe ngam ɓe kolla yimɓe e ɓe cuumii. E mi wi'a'on goonga, ɓe njaadake ɓe keɓii mbarjaari maɓɓe.

¹⁷ Ammaa taa suumii, sulma, moytanaa hoore maaɗa nebbam.

¹⁸ Taa waɗii non, walaa andayɗo a suumii, sey ni Nyaako maaɗa Mo Dow mo yi'ataake. Nden kanko gi'oowo ko waɗetee e suuɗe, o hokkete mbarjaari.

Resuki Jawdi Ton Dow

¹⁹ “To' on ndesan ko'e mooɗon jawdi e duuniyaaru to mooƴu wonnatandi, koo ndi nyola, koo to wuyɓe pusata natta ngujjandi.

²⁰ Ammaa ndesanee ko'e mooɗon jawdi ton dow to mooƴu wonnataandi, koo ndi nyola, to wuyɓe mbaawataa pusa natta ngujjandi.

²¹ Ngam to jawdi maaɗa woni, ton ɓernde maaɗa maa so''otoo.

Jayngol Ɓandu

²² “Gite ngoni fitilaaru ɓandu. To gite maaɗa e njamɗi, ɓandu maaɗa fuu heeway jayngol.

²³ Ammaa to gite maaɗa njamɗaa, ɓandu maaɗa fuu heeway nyiwre. To jayngol gongol nder ɓandu maaɗa ɗum nyiwre, nyiwre nden wartay ɓaleere naa' seɗɗa.

Allah Koo Jawdi

²⁴ “Walaa baawayɗo jagganaaki joomu wuro'en ɗiɗo. Koo o wanya go'oto o yiɗa go'oto, koo o mawnina go'oto o yawana go'oto. Non onon maa, on mbaawataa jagganaaki Allah e jagganaaki jawdi carel go'o.

Taa' Wannu

²⁵ “Ngam non, e mi wi'a'on, to' on ngannu dow jonde mooɗon, waato dow ko nyaamoton, koo ko njaroton, koo ko ɓornotooɗon. Naa' yonki ɓurii nyamndu? Nden naa' ɓandu ɓurii kolte?

²⁶ Ndaaree colli! Ɗi aawataa, ɗi pe''ataa, ɗi ngalaa to ɗi ndesata nyamndu. Fuu e non Nyaako mooɗon Mo Dow e nyamnaɗi. Naa' on ɓurii colli daraja?

²⁷ Moye nder mooɗon to wannii waawata ɓeydanki hoore muuɗum carel seɗɗa nder balɗe muuɗum?

²⁸ “Too, ngam ɗume ngannoton dow ko ɓornotooɗon? Ndaaree pindi ladde no mawnirta, ndi huwataa, ndi sanyataa kolte.

²⁹ Fuu e non e mi wi'a'on, Annabi Suleymaanu fuu e risku muuɗum meeɗaayi mo''itinaaki bo pindi wo'oyri ndi'i.

³⁰ To Allah e mo''itinira pindi ladde nihi, hande e ndi ɗon, jaango ndi wulee, hakko onon, o ɓuray non ɓornuki'on, onon kooliiɓemo seɗɗa!

³¹ “Ngam non, to' on ngannu mbi'on, ‘Ko nyaameten?’, koo ‘Ko njareten?’, koo ‘Ko ɓornotooɗen?’

³² Ngam iri ɗum ɗon yimɓe ɓe andaa Allah ɗaɓɓitata. Nyaako mooɗon Mo Dow e andi on ngiɗi fuu fii ɗu'um.

³³ Ammaa arande ɗaɓɓitee Laamu Allah e aadilaaku maako, nden ɗum ɓeydanay'on fuu fii ɗu'um.

³⁴ Ngam non, to' on ngannu e jaango, ngam jaango e woodi wannaare muuɗum. Koo ndeye nyalnde e woodi wannaare mayre keƴayndende.