Maatiyu 5 - Fulfulde Nigeria

Yeesu Wa'ajini Dow Ƴolde

¹ Nde Yeesu yi'i yimɓe ɗuɗɓe ngari, sey o ƴenti ƴolde o jooɗi, tokkuɓemo ngari to maako.

² Sey o fuɗɗi ekkitinkiɓe, o wi'i,

Barkiɗinki

³ “Ɓe barkiɗinaaɓe gaɗuɓe fuu kammunde dow Allah, ngam kamɓe njeyi Laamu Allah.

⁴ “Ɓe barkiɗinaaɓe yimɓe woyooɓe, ngam ɗum waltinay ɓerɗe maɓɓe.

⁵ “Ɓe barkiɗinaaɓe leynooɓe ko'e, ngam kamɓe ndonata duuniyaaru.

⁶ “Ɓe barkiɗinaaɓe nanooɓe weelo e ɗonka waɗuki aadilaaku, ngam ɓe karneteeɓe.

⁷ “Ɓe barkiɗinaaɓe jurminanooɓe yimɓe, ngam kamɓe maa ɗum yurminanayɓe.

⁸ “Ɓe barkiɗinaaɓe ɓe ɓerɗe laɓɗe, ngam ɓe ngi'ay Allah.

⁹ “Ɓe barkiɗinaaɓe ciryootirooɓe yimɓe, ngam ɗum noddirayɓe ɓiɓɓe Allah.

¹⁰ “Ɓe barkiɗinaaɓe torreteeɓe ngam waɗuki aadilaaku, ngam kamɓe njeyi Laamu Allah.

¹¹ “On barkiɗinaaɓe to yimɓe kuɗii'on, torrii'on, pewanii'on mbi'ii haalaaji kalluɗi feere‑feere dow mooɗon ngam am.

¹² Nanee belɗum, mbelmbeltee, ngam barka mooɗon ɗum ɗuɗɗum e dow, ngam non ɓe ngaɗannoo annabo'en arande'en.

Lamɗam e Jayngol

¹³ “Onon ngoni lamɗam duuniyaaru. Ammaa to belɗum maajam ittake, ko wartirta belɗum maajam? Walaa ko ɗam nafata kadin, sey ni ɗam rufee yimɓe njaaɓaɗam.

¹⁴ “Onon ngoni jayngol duuniyaaru. Gariiri ngondi dow ƴolde ndi suuɗataako.

¹⁵ Walaa gaɗanayɗo fitilaaru hiite hippa tummude dow mayru. Sey ni o resandu dow danki, ndu yeynanoo koo moye gonɗo nder wuro ngon.

¹⁶ Non onon maa, alee jayngol mooɗon yeynanoo yimɓe, ngam ɓe ngi'a kuuɗe mooɗon boɗɗe, ɓe mawnina Nyaako mooɗon Mo Dow.

Attawra e Defte Annabo'en

¹⁷ “To' on kammo mi waroyi ngam mi wartira Attawra koo Defte Annabo'en meere. Mi waroyi naa' ngam mi wartiraɗum meere, ammaa ngam mi hebbinaɗum.

¹⁸ E mi wi'a'on goonga, haa dow e ley re'a, walaa bindel go'o koo toɓɓel go'el itteteengel nder Attawra naa koo ngele bindel nder Attawra hebbinaama.

¹⁹ Ngam non, koo moye yewi go'o nder koo ko ɓuri famɗuki nder ko Allah wi'i ɗum waɗa, nden o ekkitini woɓɓe ngaɗa non, ɗum noddaymo ɓurɗo famɗuki nder Laamu Allah. Ammaa koo moye waɗi ko Allah wi'i ɗum waɗa, nden o ekkitini woɓɓe ngaɗa non, ɗum noddaymo mawɗo nder Laamu Allah.

²⁰ E mi wi'a'on, to aadilaaku mooɗon ɓuraayi ɗum moodiɓɓe Attawra e Faarisanko'en, on nattataa Laamu Allah koo seɗɗa!

Wa'ajinki Dow Monnere

²¹ “On nani ɗum wi'i yimɓe ndenno, ‘Taa' waɗu warhoore,’ nden ‘koo moye waɗi warhoore o kiiteteeɗo.’

²² Ammaa e mi wi'a'on, koo moye monnani goɗɗo, Allah hiitotomo. Kadin koo moye huɗi goɗɗo, ardiiɓe hiitotomo. Nden koo moye wi'i goɗɗo ‘A meereejo!’ e mo dow laawol nattuki wuro hiite.

²³ Ngam non, taa warii hokkuki dokkal ngam Allah to sakkirde, taa siftorii bandiraawo maaɗa e monnanmaa,

²⁴ alu dokkal maaɗa yeeso sakkirde nden, arande yahu ciryootiraa e bandiraawo maaɗa on, nden ngartaa kokkaa dokkal maaɗa.

²⁵ “To goɗɗo wulloyakema, carel ngel ngonɗon dow ɗatal yaaki yeeso laamu siryootir e maako jawɗum. To naa' non, o yaarete yeeso gaɗoowo kiita, gaɗoowo kiita waɗumaa nder juuɗe taadiiɓe, ɗum maɓɓumaa nder suudu cural.

²⁶ E mi wi'a'on goonga, a wurtataako naa a yoɓii fuu ceede ɗe ɗum tokkatama koo aniiniyel horataako.

Wa'ajinki Dow Njeenu

²⁷ “On nani ɗum wi'ii, ‘Taa' waɗu njeenu.’

²⁸ Ammaa min, e mi wi'a'on koo moye raari debbo darɗe suuno yaadake waadii njeenu e maako nder ɓernde.

²⁹ To hitere maaɗa nde nyaamo e waɗumaa ngaɗaa hakke, ittunde, paɗɗaande. Ɗum ɓuraniima ndullaa jokkoode go'o nder jokkooɗe ɓandu maaɗa e dow ɗum hubina fuu ɓandu maaɗa nder wuro hiite.

³⁰ To jungo maaɗa nyaamo e waɗumaa ngaɗaa hakke, ittungo, paɗɗaango. Ɗum ɓuraniima ndullaa jokkoode go'o nder jokkooɗe ɓandu maaɗa e dow fuu ɓandu maaɗa natta nder wuro hiite.

Wa'ajinki Dow Warki Teegal

³¹ “Kadin ɗum wi'i, ‘Koo moye yoofi debbo muuɗum, sey hokkamo ɗerewol warki teegal.’

³² Ammaa min, e mi wi'a'on, koo moye yoofi debbo muuɗum to naa' njeenu o waɗi, too, o waɗiimo waɗuki njeenu to o waɗii wongal teegal. Nden koo moye te'i joofaaɗo waɗi njeenu.

Ekkitinol Dow Waɗuki Alkawal

³³ “On nanii ɗum wi'ii yimɓe ndenno, ‘Taa' huna dow fewre, ammaa hebbin alkawal ngal ngaɗanɗaa Joomiraawo.’

³⁴ Ammaa e mi wi'a'on, to' on kuno koo seɗɗa. To' on kunoro dow, ngam ton woni to Allah jooɗoto.

³⁵ Nden to' on kunoro duuniyaaru, ngam ɗon woni to Allah resata koyɗe muuɗum. Nden to' on kunoro Urucaliima ngam kayri woni gariiri Laamiiɗo Mawɗo.

³⁶ To' on kunoro gaasa ko'e mooɗon, ngam on mbaawataa wartirki laasol go'otol danewol koo ɓalewol.

³⁷ Al ‘Ee’ mooɗon warta ‘Ee,’ nden ‘Aa'a’ mooɗon warta ‘Aa'a.’ Fuu ko ƴaɓɓii ɗu'um, daga to Ceyɗan ɗum ƴiwoyi.

Ekkitinol Dow Waataaki

³⁸ “On nani ɗum wi'ii, ‘Hitere ngam hitere, nden nyiinde ngam nyiinde.’

³⁹ Ammaa e mi wi'a'on, to goɗɗo waɗanii'on goɗɗum kalluɗum, to' on ngaato. To goɗɗo fiyiima to wolo nyaamo, waylitanmo wo'oto ngon maa.

⁴⁰ To goɗɗo yaariima yeeso laamu ngam jaɓanmaa toggoore, hokkumo fuu e cuddaari maaɗa.

⁴¹ To goɗɗo waɗiima ngaɗaa yaadu mil go'o, yaadu e maako mil ɗiɗi.

⁴² Toriiɗoma goɗɗum fuu, hokkumo. To goɗɗo ƴamiima nyamaande, taa' haɗumo.

Yiɗu Ganyo Maaɗa

⁴³ “On nanii ɗum wi'ii, ‘Yiɗu bandiraawo maaɗa, wanyu ganyo maaɗa.’

⁴⁴ Ammaa e mi wi'a'on, ngiɗee ganyooɓe mooɗon, ngaɗanee torrooɓe'on do'aare,

⁴⁵ ngam ngarton ɓiɓɓe Nyaako Mo Dow. Ngam e mo waɗa naange maako yeynoo dow yimɓe kalluɓe e yimɓe gaɗooɓe ko wooɗi, nden e mo waɗa ndiyam toɓa dow aadili'en e ɓe ngalaa aadilaaku.

⁴⁶ To yiɗuɓe'on tan ngiɗɗon, ɗume barka keɓoton? Koo jaɓooɓe ceede leydi maa e ngiɗi yiɗuɓeɓe.

⁴⁷ To bandiraaɓe mooɗon tan kownoton, ɗume ngaɗoton ɓurɗum ɗum woɓɓe ngaɗata? Yimɓe naa' Yahuudanko'en naa' e ngaɗa non?

⁴⁸ Ngam non, ngartee keewuɓe no Nyaako mooɗon Mo Dow o kewɗo.