Maatiyu 26 - Fulfulde Nigeria

Mawɓe Meddii Dow No Nangirta Yeesu

¹ Nde Yeesu yottini wiiki fuu fii ɗu'um, o wi'i tokkuɓemo,

² “On andi Humto Sakkinki hande horii balɗe ɗiɗi, ɗum hokkitiray Ɓii Neɗɗo ɗum waramo dow gaafaangal.”

³ Sey mawɓe ardiiɓe diina e mawɓe yimɓe kawriti e laamorde Mawɗo Mawɓe Ardiiɓe Diina bi'eteeɗo Kayaafa.

⁴ Ɓe kaɓɓi ɓe nanga Yeesu e suuɗe ɓe mbaramo.

⁵ Ɓe mbi'i, “Ammaa naa' ni carel Humto Sakkinki, ngam ɗum gaɗotooɗum yimɓe ummina hawre.”

Ɗum Moytanii Yeesu Nebbam Uroojam e Betani

⁶ Yeesu e nder gariiri Betani to wuro Siiman gooduɗo nyawu nyaamoojum laral,

⁷ sey goɗɗo debbo wari to maako e jogii jolloyel hayre bongel ngel nebbam uroojam mbelɗam gooduɗam ceede. Yeesu e nyaama nyamndu, sey debbo on wayliɗam dow hoore maako.

⁸ Ammaa nde tokkuɓemo ngi'i non, sey ɓerɗe maɓɓe metti, ɓe mbi'i, “Ngam ɗume o wonni nebbam ɗa'am nihi?

⁹ Daa ɗam sooraama ceede ɗuɗɗe, ɗum hokka ɓe ngalanaa ceede ɗen.”

¹⁰ Ammaa Yeesu faami ko woni nder ɓerɗe maɓɓe, sey o wi'iɓe, “Ngam ɗume ngannoton debbo o'o? Ko o waɗaniyam ɗum boɗɗum.

¹¹ Koo ndeye ɓe ngalanaa e ngondi e mooɗon, ammaa min, carel e wara ngel alaymi'on.

¹² Nde o wayli ɗa'am nebbam dow ɓandu am, o waɗu non ngam siryaaki uwukiyam.

¹³ E mi wi'a'on goonga, koo toye to ɗum wa'ajini ɗu'um Habaru Belɗum nder duuniyaaru fuu, ɗum hokkay habaru ko debbo o'o waɗi ngam siftorkimo.”

Yahuuda Jaɓii Hokkitira Yeesu

¹⁴ Sey go'oto nder tokkuɓe Yeesu sappo e ɗiɗo bi'eteeɗo Yahuuda Iskariyooti yahi to mawɓe ardiiɓe diina,

¹⁵ o wi'i, “Ɗume kokkotonyam to mi waɗii Yeesu nder juuɗe mooɗon?” Sey ɓe kokkimo ceede ajurfaari kanje 30.

¹⁶ Daga carel ngel Yahuuda fuɗɗi ɗaɓɓutuki laawol no hokkitirta Yeesu nder juuɗe maɓɓe.

Yeesu Waɗii Humto Sakkinki e Tokkuɓemo

¹⁷ Nyalnde arandeere nde Humto Buroodi Ɗum Walaa Ƴuufinirɗum, sey tokkuɓemo ngari to maako, ɓe mbi'imo, “Toye ngiɗɗaa min njaha min ciryanomaa ngam nyaamen nyamndu Humto Sakkinki?”

¹⁸ Sey o wi'i, “Nattee gariiri to goɗɗo neɗɗo mbi'onmo, ‘Moodibbo wi'i: Carel am ɓadake. Mi waɗay Humto Sakkinki e tokkuɓeyam to wuro maaɗa.’ ”

¹⁹ Sey tokkuɓemo ɓen ngaɗi non no Yeesu wi'iɓe, sey ɓe ciryii koo ɗume ngam Humto Sakkinki.

²⁰ Nde futuro waɗi, Yeesu jooɗii ngam nyamda e tokkuɓemo sappo e ɗiɗo.

²¹ E ɓe nder nyaamuki, sey o wi'i, “E mi wi'a'on goonga, go'oto nder mooɗon hokkitirayyam.”

²² Sey ɓe nganni naa' seɗɗa, ɓe puɗɗi wi'ukimo go'oto‑go'oto, “Moodibbo, naa' ɗum min, koo?”

²³ Sey o nootii, o wi'i, “Neɗɗo nyamdayɗo e am e le'al go'o, kanko hokkitirtayam.

²⁴ Ɓii Neɗɗo maayay no ɗum windiraa dow maako, ammaa kokkitirayɗomo wonii! Ɗum ɓuranaymo daa o danyaaka.”

²⁵ Sey Yahuuda kokkitirayɗomo wi'i, “Moodibbo, naa' ɗum min, koo?” Yeesu wi'imo, “Ee, ɗum an.”

Kirtaari Joomiraawo

²⁶ E ɓe nder nyaamuki nyamndu, sey Yeesu hocci buroodi yetti Allah, o sendiɗum, o hokki tokkuɓemo, o wi'i, “Njaɓeeɗum, nyaamon. Ɗu'um ɗum ɓandu am.”

²⁷ Ɗonmaa o hocci jardugel ndiyam inabojam, o yetti Allah, o hokkiɓeɗam, o wi'i, “Njaree, on fuu,

²⁸ ngam ɗa'am kanjam woni ƴiiƴam am tabbitinayɗam alkawal Allah ndufeteeɗam ngam yimɓe ɗuɗɓe ngam yaafaaki hakke.

²⁹ E mi wi'a'on, mi fuɗɗitataa mi yara ndiyam inabooje naa nyalnde nde njaraymi ngoɗɗam kesam hawti e mooɗon nder Laamu Nyaako am Mo Dow.”

³⁰ Sey ɓe ngimi gimol mantuki Allah, nden ɓe ndilli Hocceere Nde Leɗɗe Jaytun.

Yeesu Wi'ii Biiturus Wi'ay Andaamo

³¹ Yeesu wi'i tokkuɓemo, “Nder jemmaare nde'e on fuu on ndoggay alonyam, ngam nder aayaare Allah wi'ii, ‘Mi waray gaynaako, nden ornde baali ɗin cankitoto.’

³² Ammaa gaɗa mi ummake daga mayde, mi artay'on yaaki Galiili.”

³³ Sey Biiturus wi'imo, “Koo ɓe fuu ɓe aliima, min mi alataama koo seɗɗa.”

³⁴ Yeesu wi'imo, “E mi wi'umaa goonga, hande, nder jemmaare nde'e, ko njakardi hana, a wi'ay a andaayam nde tati.”

³⁵ Ammaa Biiturus wi'imo, “Koo ɗum wardayyam e maaɗa, mi wi'ataa mi andaama.” Horiiɓe ɓen maa mbi'i non.

Yeesu Waɗii Do'aare Nder Geesamani

³⁶ Sey Yeesu yaadi e tokkuɓemo wonde wigeere bi'eteende Geesamani, o wi'iɓe, “Njooɗee ɗo'o, mi yaha ɗaa'e mi waɗa do'aare.”

³⁷ O hocci Biiturus e ɓiɓɓe Jabadi ɗiɗo. Ɓernde maako boo teddi, o fuɗɗi wannuki naa' seɗɗa.

³⁸ Sey o wi'iɓe, “Ɓernde am wannii naa' seɗɗa haa bo mi maayay. Njooɗodee e am ɗo'o on ndeena.”

³⁹ Nde o yahi yeeso seɗɗa, sey o yani e leydi e mo hippii, o waɗi do'aare, o wi'i, “Nyaako am Mo Dow, to ɗum waɗoto, ittanam jardugel torra ka'a. Fuu e non naa' ko ngiɗumi waɗetee, ammaa ko ngiɗɗaa waɗee.”

⁴⁰ Gaɗa ɗon o so''ii to ɓen ɗon tokkuɓemo tato, o tawi e ɓe ɗaanii, sey o wi'i Biiturus, “Too, on mbaawataa jooɗodaaki e am on ɗaanaaki koo carel seɗɗa?

⁴¹ Njooɗee, to' on ɗaano, ngaɗee do'aare to ɗum foondii'on to' ngaɗon hakke. Ɓernde e yiɗi waɗuki ko haani, ammaa ɓandu tampii.”

⁴² O fuɗɗiti o dilli ɗiɗaɓum, o waɗi do'aare, o wi'i, “Nyaako am Mo Dow, to ɗum waɗataako ɗum ittanayam torra ka'a, sey to mi yariika, al ko ngiɗɗaa waɗee.”

⁴³ Sey o fuɗɗiti o so''oyii to maɓɓe, o tawi e ɓe ɗaanii, ngam e ɓe nana ɗeyngol teddungol.

⁴⁴ Sey o fuɗɗiti o dilli tataɓum o waɗi do'aare, o wi'i non no o wi'uno.

⁴⁵ O fuɗɗiti o so''ii to maɓɓe tataɓum, o wi'iɓe, “Haa jooni on ɗaanii, on ciwtoo? Carel warii. Ɗum hokkitirii Ɓii Neɗɗo nder juuɗe gaɗooɓe hakke.

⁴⁶ Ummee ndillen! Raa on ɗon kokkitirayɗoyam e wara.”

Ɗum Nangii Yeesu

⁴⁷ Yeesu e meta, sey Yahuuda, go'oto nder tokkuɓemo sappo e ɗiɗo wari. O wardoyi e yimɓe ɗuɗɓe e ɓe njogii kaafaaje e cabbi. Mawɓe ardiiɓe diina, e mawɓe yimɓe liloyiɓe.

⁴⁸ Too, nden maa kokkitirayɗo Yeesu on o yaadake o wi'iiɓe no o hollirtaɓe Yeesu, o wi'i, “Neɗɗo mo kownaymi hownuki higaaku ɗum kanko. Nangeemo.”

⁴⁹ Ɗon e ɗon Yahuuda on ɓaddii Yeesu, wi'i, “Moodibbo, Allah sabbinanee!” Nden o hownimo hownuki higaaku.

⁵⁰ Yeesu nootii, wi'imo, “Higo am, waɗu ko waddumaa.” Sey yimɓe ɓen ɓaddii nangi Yeesu ɓe njogiimo boɗɗum.

⁵¹ E yiiki non, go'oto nder gonduɓe e Yeesu nangi kaafahi muuɗum soltiki, fe''i maccuɗo Mawɗo Mawɓe Ardiiɓe Diina o ittanimo nowru.

⁵² Ammaa Yeesu wi'imo, “Wattu kaafahi maaɗa nder holgo maaki. Ngam fuu koccuɗo kaafahi, kaafahi waratamo.

⁵³ On kammii mi waawataa toraaki Nyaako am Mo Dow, ɗon e ɗon o liloya moɓɗe malaa'ika'en ɓurɗe moɓɗe sappo e ɗiɗi?

⁵⁴ Ammaa no waɗata aayaaje keewa biiɗe doole ɗu'um waɗa nihi?”

⁵⁵ E ngel ɗon carel Yeesu wi'i garoyɓe ɓen, “On ngardoyi e kaafaaje e cabbi ngam nangoyyam bo mi gujjo calorɗo? Koo ndeye e mi jooɗoo nder Wuro Ceniingo e mi ekkitina, on nangaayiyam.

⁵⁶ Ammaa ɗu'um waɗii ngam ko annabo'en mbindi heewa.” Sey fuu tokkuɓemo alimo, ndoggi.

Yeesu Yeeso Laamu

⁵⁷ Sey nanguɓe Yeesu ɓen njaarimo to wuro Kayaafa Mawɗo Mawɓe Ardiiɓe Diina, to moodiɓɓe Attawra e mawɓe yimɓe kawriti.

⁵⁸ Ammaa Biiturus tokkirimo gaɗa daga to woɗɗi haa yaaki caka wuro Mawɗo Mawɓe Ardiiɓe Diina on. O natti o jooɗodii e taadiiɓe Wuro Ceniingo, ngam o yi'a no ɗum waɗanta Yeesu.

⁵⁹ Mawɓe ardiiɓe diina e fuu Kawtal Mawɓe e ɓe ɗaɓɓita ceyda fewre ɗum ɓe nangirta Yeesu, ngam ɓe keɓa ɓe mbaramo.

⁶⁰ Ammaa ɓe keɓaayi goɗɗum, koo nde yimɓe ɗuɗɓe ndarake yeeso maɓɓe kokki ceyda fewre. E re'irde, yimɓe ɗiɗo ndarii yeeso yimɓe, ɓe mbi'i,

⁶¹ “O'o neɗɗo wi'ii, ‘Mi waaway sankutuki Wuro Ceniingo ngo Allah, mi mahitoongo nder balɗe tati.’ ”

⁶² Sey Mawɗo Mawɓe Ardiiɓe Diina ummii darii wi'i Yeesu, “A walaa ko mbi'ataa? Ko ɓe mbi'i dow maaɗa ɗum goonga?”

⁶³ Ammaa Yeesu de''iti. Sey Mawɗo Mawɓe Ardiiɓe Diina on wi'imo, “Mi hawtiima e Allah mo yonki, wi'umin to an woni Almasiihu, Ɓiɗɗo Allah.”

⁶⁴ Yeesu nootii, wi'i, “Ee, ɗum non no mbiiɗaa. Ammaa e mi wi'a'on, yeeso ɗo'o on ngi'ay Ɓii Neɗɗo e jooɗii to jungo nyaamo ngo Joomu Bawɗe e mo waroya nder duule.”

⁶⁵ Sey Mawɗo Mawɓe Ardiiɓe Diina on seeki kolte muuɗum wi'i, “O huɗii Allah. Ɗume ceyda ɗaɓɓiteten kadin? Jooni on nanii ni haala kalluka ka o meti dow Allah.

⁶⁶ Ko woni cuɓol mooɗon?” Sey ɓe mbi'i, “Hewtii o waree!”

⁶⁷ Sey ɓe tuttanimo joode to yeeso, ɓe piyimo, woɓɓe kellimo to wolo,

⁶⁸ e ɓe mbi'amo, “Almasiihu, waɗanmin annabaaku! Moye fiyumaa?”

Biiturus Wi'ii Andaa Yeesu

⁶⁹ Biiturus e jooɗii caka wuro ngon, sey goɗɗo korɗo wari to maako wi'i, “An maa, a wondi e Yeesu Galilankeejo!”

⁷⁰ Ammaa Biiturus yeddi yeeso maɓɓe ɓe fuu wi'i, “Mi andaa ko mbi'ataa!”

⁷¹ Sey o yahi haade dammugal wuro ngon. Ɗonmaa sey goɗɗo korɗo yi'imo, wi'i yimɓe dariiɓe ɗon, “O'o neɗɗo e mo wondi e Yeesu Najarankeejo!”

⁷² Sey Biiturus fuɗɗiti yeddi haa e hunaaki, wi'i, “Mi andaa neɗɗo on!”

⁷³ Gaɗa ɗon seɗɗa, sey dariiɓe ɗon ɓaddii Biiturus, mbi'i, “Seko walaa an maa a go'oto nder tokkuɓemo, ngam iri no metirtaa nangiima.”

⁷⁴ Sey Biiturus fuɗɗi laanuki hoore muuɗum hunii wi'i, “Mi andaa neɗɗo on!” Ɗon e ɗon njakardi hani.

⁷⁵ Sey Biiturus siftori ko Yeesu wi'unoomo wi'uki, “Ko njakardi hana a wi'ay nde tati a andaayam.” Sey o wurtii yaasi o woyi bojji nawɗi.