Maatiyu 24 - Fulfulde Nigeria

Yeesu Metii Dow No Ɗum Sankitirta Wuro Ceniingo

¹ Yeesu e wurtoyoo Wuro Ceniingo e mo yaha, sey tokkuɓemo ngari mbi'imo o raara cuuɗi maago.

² Sey o nootii, o wi'iɓe, “On ngi'ii fuu cuuɗi ɗi'i? E mi wi'a'on goonga, walaa wonde hayre aleteende dow wonde. Ɗe fuu ɗum sankitayɗe.”

Torraaji e Caɗeele

³ Yeesu e jooɗii dow Hocceere Nde Leɗɗe Jaytun sey tokkuɓemo ngari to maako kamɓe tan, ɓe mbi'i, “Wi'umin, ndeye fii ɗu'um waɗata? Ɗume woni ko hollata wartoyki maaɗa e re'uki duuniyaaru?”

⁴ Sey Yeesu wi'iɓe, “Paamee to' goɗɗo majjina'on.

⁵ Yimɓe ɗuɗɓe ngaroyay ɓe mbi'a kamɓe ngoni min, ɓe mbi'a, ‘Min woni Almasiihu,’ ɓe majjina yimɓe ɗuɗɓe.

⁶ On nanay habaru konuuji gaɗeteeɗi haade mooɗon, e habaru konuuji gaɗeteeɗi ɓadaaki. To' on kulu, ngam doole ɗu'um waɗa, ammaa re'uki duuniyaaru e horii taw.

⁷ Lenyol ummanto lenyol, laamu ummanto laamu. Ɗum waɗay weelo kallungo e dimbol leydi to bigeeje feere‑feere.

⁸ Ammaa ɗu'um fuu ɗum fuɗɗoode torraaji garayɗi.

⁹ “Nden ɓe ngaɗay'on nder juuɗe yimɓe torrayɓe'on, ɗum wara'on. Fuu lenyi duuniyaaru nganyay'on ngam on tokkuɓeyam.

¹⁰ E carel ngel yimɓe ɗuɗɓe alay hoolaakiyam, e ɓe ngullootira, e ɓe nganyindira.

¹¹ Annabo'en fewre ɗuɗɓe ummoyto, ɓe majjina yimɓe ɗuɗɓe.

¹² Halleende ɓeydoto haa yidde ɗuɗɓe ustoo.

¹³ Ammaa munyuɗo haa re'irde o hisay.

¹⁴ Nden ɗum wa'ajinay Habaru Belɗum dow Laamu Allah koo toye nder duuniyaaru, ngam ɗum warta ceyda to leƴƴi fuu, nden re'uki duuniyaaru kin wara.

Torra Kalluka

¹⁵ “Carel e wara ngel ngi'oton ‘Nefniiɗum’ gartiroojum Wuro Ceniingo ngo laaɓaa e darii to Wigeere Ceniinde ɗum Annabi Daaniyel wi'i. Fuu jangoowo faama ma'ana maajum.

¹⁶ E carel ngel wonɓe nder leydi Yahuudiya ndogga nattoya kocceeje.

¹⁷ Gonɗo dow suudu fuu to' jippoyo ngam hoccuki ko woni nder suudu.

¹⁸ Gonɗo to ngesa to' so''o ngam hoccuki cuddaari muuɗum.

¹⁹ “Rewɓe gooduɓe deeɗi e musinteeɓe ɓe torroto naa' seɗɗa nder ɗen ɗon balɗe!

²⁰ Ngaɗee do'aare to' doggudu ndun warana'on nder ndungu koo Nyalnde Siwtaare.

²¹ Ngam nder ɗen ɗon balɗe ɗum waɗay torra kalluka mawka iri ka ɗum meeɗaayi waɗuki daga carel ngel Allah tagi duuniyaaru haa jooni. Ɗum boo fuɗɗitataa ɗum waɗa iri kan ɗon torra.

²² Daa Allah ustaayi ɗen ɗon balɗe, daa walaa goɗɗo kisayɗo. Ammaa ngam ɓen ɗon cuɓaaɓe maako, o ustay balɗe ɗen.

²³ “E ngel ɗon carel to goɗɗo wi'ii'on, ‘Raa Almasiihu ɗo'o!’ koo boo, ‘Rammo ɗaa'e!’ to' on njaɓu.

²⁴ Ngam Almasiihu'en fewre e annabo'en fewre mburtoyto, ɓe ngaɗa alaamaaji mawɗi e kuuɗe kayɗiniiɗe ngam ɓe majjina yimɓe, haa e cuɓaaɓe ɓen to ɗum waɗoto.

²⁵ Raɗɗum, mi wi'ii'on koo ɗume ko carel ngel wara.

²⁶ “Ngam non, to ɓe mbi'ii'on, ‘Rammo ɗaa'e nder ladde,’ to' on njahu. Koo to ɓe mbi'ii'on, ‘Rammo ɗo'o e mo suuɗii nder cuuɗi,’ to' on njaɓu.

²⁷ Non no maƴƴere maƴƴirta daga fuuna nde yi'e haa hirna, non wartuki Ɓii Neɗɗo wa'ata.

²⁸ “Fuu to baatuɗum woni, ɗon jigaaje kawritata.

Wartoyki Ɓii Neɗɗo

²⁹ “Gaɗa torra kalluka kan, ɗon e ɗon ɗum ɓalwinay naange, lewru boo hokkataa jayngol mayru. Koode njanoyay daga dow, nden ko woni dow fuu dimboto.

³⁰ E carel ngel ɗum yi'ay alaama Ɓii Neɗɗo wangii ton dow, nden fuu lenyi duuniyaaru mboyay bojji nawɗi. Sey ɓe ngi'a Ɓii Neɗɗo e wara nder duule e bawɗe e teddungal mangal.

³¹ O waɗay ɗum duuda luwal sembee duuduki liluki malaa'ika'en maako, ɓe kawrita ɓe o suɓi daga koo toye nder duuniyaaru, daga ngo'ol keerol duuniyaaru yaaki ngol ton keerol duuniyaaru.

Misaalu Dow Ibbi

³² “Too, ekkitee ekkitinol ngo'ol daga to ibbi. To lice maaki puɗɗi wilutuki, on andi ndungu ɓadake won ɗon.

³³ Non maa to on ngi'ii fuu fii ɗu'um e waɗa, too, on anday Ɓii Neɗɗo ɓadake wartoya, e mo haade dammugal.

³⁴ E mi wi'a'on goonga, jaamanu ɗu'um ɗum re'ataa naa fuu fii ɗu'um waɗii.

³⁵ Dow e ley ƴaɓɓoto, ammaa boliiɗe am ƴaɓɓataako haa abadaa.

Allah Tan Andi Nyalnde Wartoyki Almasiihu

³⁶ “Walaa anduɗo nden ɗon nyalnde koo ngel ɗon carel ngel fii ɗum ɗon waɗata. Koo malaa'ika'en wonɓe dow andaa, koo Ɓiɗɗo on maa andaa, sey Nyaako Mo Dow tan andi.

³⁷ Non no ɗum waɗi e jaamanu Annabi Nuhu, non maa wartoyki Ɓii Neɗɗo wa'ata.

³⁸ Nder balɗe ko ndiyam tufaana waɗa, yimɓe e nyaama, e njara, e te'a, e te'ee, haa carel ko Annabi Nuhu natti komiwal.

³⁹ Ɓe paamaayi haa ndiyam tufaana wari halkiɓe ɓe fuu. Non maa wartoyki Ɓii Neɗɗo wa'ata.

⁴⁰ E carel ngel, worɓe ɗiɗo e kuwa e ngesa, ɗum hocca go'oto ɗum ala go'oto.

⁴¹ Rewɓe ɗiɗo e namida, ɗum hocca go'oto ɗum ala go'oto.

⁴² Njooɗee on ciryii, ngam on andaa carel ko Joomiraawo mooɗon warata.

⁴³ Ammaa andee ɗu'um, daa joomu wuro e andi carel ngel gujjo warantamo jemma, daa o jooɗoto e mo siryii o alataa o nattanamo wuro.

⁴⁴ Ngam non, onon maa doole njooɗooɗon on ciryii ngam e carel ngel on andaa Ɓii Neɗɗo warata.

Maccuɗo Gaɗoowo Goonga

⁴⁵ “Moye woni maccuɗo mo goonga mo faamu, mo joomu wuro muuɗum yowi dow maccuɓe muuɗum, ngam o hokkaɓe nyamndu nder carel?

⁴⁶ O barkiɗinaaɗo maccuɗo mo joomu wuro muuɗum warti tawi e mo waɗa non.

⁴⁷ E mi wi'a'on goonga, joomu wuro on yowaymo dow jawdi muuɗum fuu.

⁴⁸ Ammaa to maccuɗo on o kalluɗo o wi'ay hoore maako, ‘Joomu wuro am wartataa jooni,’

⁴⁹ sey o fuɗɗi fiyuki maccuɓe ɓe o huudata, e mo nyaama, e mo yarda njaru e yarooɓe.

⁵⁰ Joomu wuro on wartay e nyalnde nde maccuɗo on kammaaki e carel ngel o andaa,

⁵¹ o fiyaymo boɗɗum o waɗamo nder munaafuki'en. Ɗon ɗum woyata ɗum nyerƴindira nyiiƴe.