Maatiyu 23 - Fulfulde Nigeria

Wagginki Dow Faarisanko'en e Moodiɓɓe Attawra

¹ Yeesu metani hawrutuɓe e tokkuɓemo, wi'i,

² “Moodiɓɓe Attawra e Faarisanko'en kokkaama laamu hokkuki yimɓe ma'ana ko Muusa windi.

³ Ngam non, ngaɗee fuu ko ɓe ekkitini'on tokkeeɗum, ammaa to' on ngaɗu ko ɓe ngaɗata, ngam ɓe ngaɗataa ko ɓe nga'ajinta.

⁴ E ɓe kaɓɓa doŋle tedduɗe caɗuɗe hoccuki, ɓe njowaɗe dow balbe yimɓe, ammaa kamɓe e ko'e maɓɓe koo koolel go'o ɓe ngaɗataa ɓe mballaɓe.

⁵ Fuu ko ɓe ngaɗata e ɓe ngaɗaɗum ngam yimɓe ngi'aɓe. E ɓe kaɓɓa laayaho mawko ko aayaaje Deftere Ceniinde to tiiɗe maɓɓe e juuɗe maɓɓe, e ɓe njuutina cilmbi toggooje maɓɓe.

⁶ To humto e ɓe ngiɗi jooɗaaki to mawɓe njooɗotoo; nder cuuɗi do'aare maa e ɓe ngiɗi jooɗorle mawɓe.

⁷ E ɓe ngiɗi hownireeki mangu nder luumo, nden e ɓe ngiɗi ɗum wi'aɓe, ‘Allah sabbinanee, Moodibbo.’

⁸ Ammaa onon, to' ɗum noddira'on ‘Moodibbo,’ ngam Moodibbo mooɗon o go'oto, nden on fuu on bandiraaɓe.

⁹ To' on noddu koo moye ‘Nyaako’ e duuniyaaru, ngam on ngoodi Nyaako go'oto, gonɗo ton dow.

¹⁰ Nden to' ɗum noddira'on ‘Ardiiɗo,’ ngam on ngoodi Ardiiɗo go'oto, kanko woni Almasiihu.

¹¹ Sey mawɗo nder mooɗon warta jaggantooɗo'on.

¹² Fuu mawninɗo hoore muuɗum ɗum lestinaymo. Fuu lestinɗo hoore muuɗum ɗum mawninaymo.

¹³ “On mbonii, onon moodiɓɓe Attawra e Faarisanko'en! On munaafuki'en! On maɓɓanii yimɓe dammugal nattuki Laamu Allah. Onon on nattaayi, on alaayi giɗuɓe nattuki natta.

¹⁴ [On mbonii onon moodiɓɓe Attawra e Faarisanko'en! On munaafuki'en! On nyaama jawdi rewɓe ɓe worɓe maɓɓe maayi, on ngaɗa do'aare juutunde ngam yimɓe ngi'a. Ngam non, Allah ɓuray hokkuki'on bone.]

¹⁵ “On mbonii, onon moodiɓɓe Attawra e Faarisanko'en! On munaafuki'en! Ngam on kuula maayo on ngiiloo nder leyɗe feere‑feere ngam heɓuki go'oto tokkayɗo diina mooɗon. To on keɓiimo, on ngartiramo kalluɗo ɓurɗo'on halluki nde ɗiɗi nattayɗo hiite bo mooɗon.

¹⁶ “On mbonii, onon wumɓe ardiiɓe wumɓe! On mbi'a, ‘Koo moye hunorii Wuro Ceniingo, naa' ɗum goɗɗum. Ammaa koo moye hunorii jiinaari gonɗum nder maago, doole o waɗa ko o hunanii.’

¹⁷ Onon kaaŋaaɓe, wumɓe! Ɗume ɓuri mangu, jiinaari ɗum, koo Wuro Ceniingo ngon gartirngo jiinaari ɗum ceniiɗum?

¹⁸ Ɗonmaa on mbi'a, ‘Koo moye hunorii sakkirde, naa' ɗum goɗɗum. Ammaa koo moye hunorii cakkiri ngondi dow sakkirde nden, doole o waɗa ko o hunanii.’

¹⁹ Onon wumɓe! Ɗume ɓuri mangu, cakkiri ndin, koo sakkirde gartiraynde cakkiri ndin ceniindi?

²⁰ Ngam non, koo moye hunorii sakkirde nden hunorakende e koo ɗume ko woni dow mayre.

²¹ Ɗonmaa koo moye hunorii Wuro Ceniingo ngon hunorakengo e Allah jooɗiiɗo nder maago.

²² Nden koo moye hunorii dow, hunorake jooɗorgal laamu Allah e jooɗiiɗo dow maagal.

²³ “On mbonii, onon moodiɓɓe Attawra e Faarisanko'en! On munaafuki'en! On kokka Allah jakka haakohoy njongeteekoy, ammaa on tokkaayi ko ɓuri daraja nder Attawra, waato waɗanki yimɓe ko haani, e yurmeende, e hoolaaki Allah. Ɗu'um tatum e haani ngaɗonɗum, ammaa to' on alu waɗuki ko horii.

²⁴ Onon wumɓe ardiiɓe wumɓe! On itta buululel nder ndiyam ɗam njaroton, ammaa on moɗa ngeelooba!

²⁵ “On mbonii, onon moodiɓɓe Attawra e Faarisanko'en, munaafuki'en! On layɓa gaɗa njardukoy mooɗon e le'oy mooɗon, ammaa nder e heewi nguyka e ciya suruki hoore.

²⁶ An Faarisankeejo bumɗo! Artu layɓuki nder jardugel ngel e le'el ngel, nden koo toye maakoy wartay laɓɗum.

²⁷ “On mbonii, onon moodiɓɓe Attawra e Faarisanko'en! On munaafuki'en! On nandi e genaale moytanaaɗe njoojeeri ndaneeri yaasi maaje e mbooɗi yiiki, ammaa nder maaje e woodi ƴi'e mayɓe e koo iri ɗume nefniiɗum.

²⁸ Non onon maa mbaaɗon. Yimɓe e ngi'a'on bo on aadili'en, ammaa nder ɓerɗe mooɗon on munaafuki'en on keewii halleende.

²⁹ “On mbonii, onon moodiɓɓe Attawra e Faarisanko'en! On munaafuki'en! On maha genaale boɗɗe ɗe siftorki annabo'en, ɗonmaa on mo''itina genaale aadili'en.

³⁰ On mbi'a, ‘Daa en ɗon carel maamaaji meeɗen, daa en mballaayiɓe warki annabo'en.’

³¹ Non kollirɗon on ɓiɓɓe barɓe annabo'en.

³² Too, sey keenyiton kuugal ngal maamaaji mooɗon puɗɗi!

³³ Onon boole, ɓiɓɓe boole kalluɗe! No ɗum waɗata kison nattuki wuro hiite?

³⁴ Ngam non, e mi lilonoya'on annabo'en e gooduɓe faamu e moodiɓɓe. On mbara woɓɓe, on mbara woɓɓe dow gaafaangal, on piira woɓɓe looci nder cuuɗi do'aare mooɗon, on tokkaɓe gariiri‑gariiri on torraɓe.

³⁵ Ngam non ƴiiƴam fuu aadili'en baraaɓe ndufaaɗam nder duuniyaaru ɗum ɗaɓɓitayɗam dow mooɗon, daga ƴiiƴam Habiila aadiliijo haa yaaki ƴiiƴam Annabi Jakaariya, ɓiɗɗo Beriikiya, mo mbarɗon hakkunde Suudu Joomiraawo e sakkirde.

³⁶ E mi wi'a'on goonga, ƴiiƴamji ɗin ɗon fuu ɗum ɗaɓɓitayɗi to juuɗe yimɓe jaamanu ɗu'um.

Yeesu Yurminanii Yimɓe Urucaliima

³⁷ “Jalla Urucaliima, Urucaliima a warii annabo'en, a wardii liloyaaɓe to maaɗa e kaaƴe! Nde ɗuɗɗum e mi yiɗi moɓtuki yimɓe maaɗa no geroogal moɓtirta ɓikkoy maagal ley biyeeli maagal, ammaa a jaɓaayi.

³⁸ Raɗɗum, Allah alanay'on Wuro Ceniingo mooɗon winde.

³⁹ E mi wi'a'on, on puɗɗitataa ngi'onyam, naa nyalnde nde mbiiɗon, ‘O barkiɗinaaɗo, garoyɗo nder inde Joomiraawo.’ ”