Maatiyu 18 - Fulfulde Nigeria

Moye Ɓuri Mangu?

¹ E ngel ɗon carel tokkuɓe Yeesu ngari ƴamimo, mbi'i, “Moye ɓuri mangu fuu nder Laamu Allah?”

² Sey Yeesu noddi wongel sukayel pamarel darningel caka maɓɓe,

³ wi'i, “E mi wi'a'on goonga, to naa' on lestin ko'e mooɗon ngartuɗon bo sukahoy, on nattataa Laamu Allah koo seɗɗa!

⁴ Fuu lestinɗo hoore muuɗum bo sukayel pamarel nge'el, kanko woni ɓurɗo mangu nder Laamu Allah.

⁵ Nden fuu jaɓuɗo sukayel pamarel bo nge'el nder inde am jaɓiiyam.

Ko Waddata Hakke

⁶ “Ammaa fuu gaɗuɗo go'oto nder sukaaɓe ɓe'e kooliiɓeyam waɗi hakke, ɗum ɓuranaymo o haɓɓanee kaaƴa namol manga e daande maako ɗum faɗɗamo nder mbeela luggunga.

⁷ Duuniyaaru wonii ngam e woodi ko fooɗata yimɓe ngaɗa hakke! Ngam doole ko fooɗata yimɓe ngaɗa hakke wara, fuu e non fooɗuɗo goɗɗo waɗi hakke wonii.

⁸ “To jungo maaɗa koo koyngal maaɗa e waɗumaa ngaɗaa hakke, too, ittungo paɗɗaango, koo ittungal paɗɗaangal. Ɗum ɓuraniima nattaa wuro Allah e jungo wo'oto koo koyngal go'otal dow ɗum hubomaa nder hiite nge nyifataa haa abadaa e juuɗe ɗiɗi koo koyɗe ɗiɗi.

⁹ To boo hitere maaɗa e waɗumaa ngaɗaa hakke, ittunde paɗɗaande. Ɗum ɓuraniima nattaa wuro Allah e hitere go'o dow ɗum hubomaa nder wuro hiite e gite ɗiɗi.

Misaalu Dow Mbaala Majjunga

¹⁰ “Paamee, to' on njawan koo go'oto nder sukahoy pamaroy ko'oy. Ngam e mi wi'a'on, malaa'ika'en maakoy ton dow koo ndeye e ndaara yeeso Nyaako am Mo Dow.

¹¹ [Nden Ɓii Neɗɗo waroyii ngam hisna ko majji.]

¹² “Too, ko nyumoton? To neɗɗo e woodi baali 100, sey go'o nder baali ɗin majji, naa' o alay koriiɗi ley hocceere, o dilla ɗaɓɓutuki mbaala majjunga ngan?

¹³ E mi wi'a'on goonga, to o heɓtoyiinga, belɗum ɗum o nanata dow maaga ɗum ɓurii ɗum baali koriiɗi ɗin ɗi meeɗaayi majjuki.

¹⁴ Non Nyaako mooɗon Mo Dow yiɗaa koo go'oto nder sukaaɓe pamarɓe ɓe'e halka.

To Goɗɗo Waɗaniima Ko Wooɗaa

¹⁵ “To bandiraawo maaɗa waɗaniima ko wooɗaa, yahu mbi'aamo ko wooɗaa ɗum o waɗanmaa, an e maako tan. To o jaɓii, a wartirii sumpo hakkunde mooɗon won ɗon.

¹⁶ Ammaa to o wanyii jaɓuki, sey fuɗɗitaa co''odoɗaa e neɗɗo go'oto koo ɗiɗo to maako, ngam ‘doole ɗum heɓa ceydu'en ɗiɗo koo tato ko ɗum tabbitina haala.’

¹⁷ To boo o wanyii ko ɓe mbi'i kamɓe maa, sey mbi'aaka kawtal tokkuɓeyam. Ɗonmaa to o wanyii nanki kawtal tokkuɓeyam, hoccumo bo mo andaa Allah koo gooduɗo hakke ganyuɗo tuuba.

¹⁸ “E mi wi'a'on goonga, fuu ko kaɗuɗon e duuniyaaru, Allah Mo Dow jaɓi. Ɗonmaa fuu ko aluɗon ɗum waɗa e duuniyaaru, Allah Mo Dow jaɓi.

¹⁹ “Ɗonmaa, e mi wi'a'on, to yimɓe ɗiɗo nder mooɗon kawtii ko'e torake goɗɗum e duuniyaaru, Nyaako am Mo Dow waɗanayɓeɗum.

²⁰ Ngam to yimɓe ɗiɗo koo tato kawriti nder inde am, e mi wondi e maɓɓe.”

Misaalu Dow Maccuɗo Mo Yaafaaki

²¹ Sey Biiturus ɓaddoyii wi'i Yeesu, “Moodibbo, nde noye bandiraawo am e waɗanayam ko wooɗaa e mi yaafanoomo? Nde joweeɗiɗi?”

²² Yeesu nootii wi'imo, “Naa' nde joweeɗiɗi tan, ammaa joweeɗiɗi nde cappanɗe joweeɗiɗi.

²³ Ngam non, ɗum nandinay Laamu Allah e goɗɗo laamiiɗo giɗɗo lima jawdi muuɗum ngondi jungo kuwanooɓemo.

²⁴ Nde o fuɗɗi limukindi, sey ɗum waddanimo goɗɗo mo o tokkata nyamaande ceede ɗe o waawataa yoɓuki haa keerol jonde maako e duuniyaaru.

²⁵ Nde o tampi yoɓuki, sey laamiiɗo on waɗi ɗum sooramo e debbo maako e ɓiɓɓe maako e koo ɗume ko o woodi ngam ɗum yoɓa ceede ɗen.

²⁶ Sey maccuɗo on diccii yeeso maako, toriimo, wi'i, ‘Waɗu munyal. Mi yoɓete koo ɗume.’

²⁷ Sey laamiiɗo on nani jurumɗum maccuɗo on yaafaniimo nyamaande nden yoofimo.

²⁸ “Ammaa maccuɗo on e wurtaaki maako o tawi goɗɗo mo o huudata mo o tokkata nyamaande ceede ɗe ɗum yoɓata kuwoowo to ngesa lebbi jowi. O ɗeɗɗanimo daande, o wi'imo, ‘Yoɓam ko tokkaymaami!’

²⁹ Sey mo o huudata on dicci toriimo, wi'i, ‘Waɗanam munyal mi yoɓete.’

³⁰ Ammaa o wanyi, o waɗi ɗum maɓɓimo nder suudu cural sey nde o yoɓimo ko o tokkatamo.

³¹ Nde higooɓe kuugal maako ngi'i non, ɓe nganni naa' seɗɗa. Sey ɓe njahi ɓe mbi'ika laamiiɗo on fuu ko waɗi.

³² “Sey laamiiɗo on noddi maccuɗo on, wi'imo, ‘An a maccuɗo kalluɗo! Mi yaafanakema fuu nyamaande nde tokkaymaami ngam a torakeyam.

³³ Too, haanaayi njurminanaa mo kuudataa non no njurminiranmaami?’

³⁴ Laamiiɗo on nani monnere naa' seɗɗa, o waɗi ɗum nangimo ɗum waɗa ka torrukimo naa o yoɓii koo ɗume ko ɗum tokkatamo.

³⁵ “Non Nyaako am Mo Dow waɗanta koo moye mooɗon mo yaafanaaki bandiraawo muuɗum e ɓernde go'o.”