Maatiyu 15 - Fulfulde Nigeria

Ndonu Maama'en

¹ Sey woɓɓe Faarisanko'en e moodiɓɓe Attawra ngari to Yeesu daga Urucaliima, ɓe mbi'i,

² “Ngam ɗume tokkuɓema tokkataa ndonu maama'en meeɗen? Ngam ɓe lootataa juuɗe maɓɓe ko ɓe puɗɗa nyaamuki nyamndu.”

³ Sey Yeesu nootii, wi'iɓe, “Onon maa, ngam ɗume on tokkataa ko Allah wi'i ngam ndonu mooɗon?

⁴ Ngam Allah wi'ii, ‘Hokku nyaako maaɗa e maduujo maaɗa mangu,’ nden, ‘Koo moye huɗi nyaako muuɗum koo maduujo muuɗum doole waree.’

⁵ Ammaa onon on mbi'a to neɗɗo wi'ii nyaako muuɗum koo maduujo muuɗum, ‘Fuu ko kokkaynomaami, mi hokkiiɗum Allah,’ too, naa' doole neɗɗo on mawnina nyaako maako won ɗon.

⁶ Non ngartirɗon Wolde Allah meere ngam ndonu mooɗon.

⁷ Onon munaafuki'en! Icaaya wi'ii goonga nde o waɗi annabaaku dow mooɗon wiiki,

⁸ Allah wi'ii, ‘Ɓen ɗon yimɓe e honduko tan ɓe mawnintayam, ammaa ɓerɗe maɓɓe e ngoɗɗitiiyam.

⁹ E meere ɓe mawnintayam. E ɓe ekkitina dooka yimɓe bo to am ɗum ƴiwoyi.’ ”

Fii Gaɗayɗum Neɗɗo Warta Mo Laaɓaa Yeeso Allah

¹⁰ Sey Yeesu noddi yimɓe hawrutuɓe, wi'iɓe, “Kettindee, paamon.

¹¹ Naa' ko nattata neɗɗo e honduko wartirta ɓernde maako nde laaɓaa yeeso Allah, ammaa ko wurtoytoo daga nder honduko maako wartirtamo mo laaɓaa yeeso Allah.”

¹² Sey tokkuɓemo ngari to maako, mbi'imo, “A andi Faarisanko'en nanii monnere nde ɓe nani kan ɗon haala ka mbiiɗaa?”

¹³ Yeesu nootii, wi'i, “Fuu awre nde ɗum aawi, to naa' Nyaako am Mo Dow aawinde, ɗum ɗoofaynde.

¹⁴ Aleeɓe! Ɓe wumɓe ardiiɓe wumɓe. To bumɗo ardake bumɗo, ɓe fuu ɗiɗo ɓe njanay nder ngayka.”

¹⁵ Sey Biiturus wi'imo, “Wi'umin ma'ana ɗu'um misaalu.”

¹⁶ Yeesu wi'iɓe, “Haa jooni onon maa on paamaayi?

¹⁷ On andaa fuu ko natti nder honduko neɗɗo nder reedu maako ɗum natti, nden ɗum wurtoto?

¹⁸ Ammaa ko wurtoyii nder honduko, daga nder ɓernde ɗum ƴiwoyi. Kanjum wartirta neɗɗo mo laaɓaa yeeso Allah.

¹⁹ Ngam daga nder ɓernde neɗɗo nyumo kallungo wurtoytoo, e warhoore, e njeenu, e njeenu hakkunde yimɓe ɓe ngalaa teegal, e nguyka, e ceyda fewre, e wonnuki inde neɗɗo.

²⁰ Ɗu'um kanjum wartirta neɗɗo mo laaɓaa yeeso Allah, ammaa nyaamuki nyamndu e juuɗe ɗe lootaaka naa' kanjum wartirta neɗɗo mo laaɓaa yeeso Allah.”

Hoolaare Debbo Kan'aaniyankeejo

²¹ Yeesu ali ɗon yahi haade gariije Taaya e Sidon.

²² Sey raa goɗɗo Kan'aaniyankeejo debbo neɗɗo leydi ndin wari noddi sembee, wi'i, “Moodibbo, Ɓii Dawda, yurminanam! Wongol ginnol e torra ɓiɗɗo am surbaajo.”

²³ Ammaa Yeesu wi'aayimo goɗɗum. Sey tokkuɓemo ngari toriimo, mbi'i, “Riiwumo, ngam e mo tokki'en e mo wanna'en e wulluki!”

²⁴ Sey o wi'i debbo on, “Mi liloyaaka to woɓɓe, sey to baali majjuɗi ɗi lenyol Israa'iila tan.”

²⁵ Ammaa o wari o diccii yeeso Yeesu, o wi'i, “Moodibbo, wallam!”

²⁶ Yeesu nootii, wi'i, “Ɗum haanaayi ɗum hocca nyamndu ɓikkoy ɗum hubanoondu kutihoy.”

²⁷ O wi'i, “Ee, ɗum non, Moodibbo, ammaa koo kutihoy e nyaama horaano januɗum daga teebur jeyɗokoy.”

²⁸ Sey Yeesu nootii, wi'imo, “Hoolaare maaɗa e ɗuuɗi! Ɗum waɗante no ngiɗɗaa.” Ɗon e ɗon ɓiɗɗo maako yamɗiti.

Yeesu Yamɗitinii Yimɓe Ɗuɗɓe

²⁹ Yeesu ummii, ali ɗon, tokki haade Mbeela Galiili, o ƴenti dow hocceere o jooɗii.

³⁰ Yimɓe ɗuɗɓe ngari to maako, ɓe ngaddoyi ɓe koyɗe jaraaɗe, e wumɓe, e laƴooɓe, e ɓe mbaawataa metuki, e woɓɓe ɗuɗɓe gooduɓe nyawuuji. Ɓe ndesiɓe yeeso maako, sey o yamɗitiniɓe.

³¹ Yimɓe kayɗini nde ngi'i yimɓe ɓe metataa e meta, laƴooɓe e njaha, ɓe koyɗe jaraaɗe e njaaɓa, wumɓe e ngi'a. Sey ɓe manti Allah Israa'iila.

Yeesu Nyamnii Yimɓe 4,000

³² Sey Yeesu noddi tokkuɓemo, wi'iɓe, “E mi nana jurumɗum yimɓe ɓe'e ngam hande balɗe maɓɓe tati e ɓe ngondi e am, ammaa ɓe ngalaa ko ɓe nyaamata. Mi yiɗaa ɓe ndillida e weelo, ngam ɗum saɗaa ɓe pekkora dow ɗatal.”

³³ Sey tokkuɓemo mbi'imo, “Toye min keɓoyta buroodi nder ladde nde'e keƴayɗum yimɓe ɗuɗɓe ɓe'e?”

³⁴ Yeesu ƴamiɓe wi'i, “Buroodi noye ngooduɗon?” Ɓe mbi'i, “Buroodi joweeɗiɗi e liƴƴi seɗɗa.”

³⁵ Sey o wi'i yimɓe hawrutuɓe ɓen fuu ɓe njooɗoo e leydi.

³⁶ O hocci buroodi joweeɗiɗi ɗum e liƴƴi ɗin, o yetti Allah, o sendiɗum, o hokki tokkuɓemo, kamɓe boo ɓe ngeedani yimɓe ɓen.

³⁷ Yimɓe ɓen fuu nyaami kaari. Gaɗa maajum tokkuɓemo moɓti ko horii, ɗum heewi kondooje joweeɗiɗi.

³⁸ Nyamɓe ɓen worɓe tan ngaɗi 4,000, rewɓe e sukaaɓe limaaka.

³⁹ Gaɗa Yeesu jaɓɓitake hawrutuɓe ɓen, sey o natti komiwal, o dilli leydi Magadan.