Maatiyu 12 - Fulfulde Nigeria

Ƴamol Dow Nyalnde Siwtaare

¹ E carel ngel ɗum Nyalnde Siwtaare. Yeesu e yaha nder ngesa alkamaari, sey tokkuɓemo nani weelo ɓe puɗɗi ɓoruki cammeeje mayri e ɓe nyaama.

² Ammaa nde woɓɓe Faarisanko'en ngi'i non, mbi'i Yeesu, “Raa tokkuɓema e ngaɗa ko Attawra haɗi ɗum waɗa Nyalnde Siwtaare.”

³ Sey Yeesu wi'iɓe, “On meeɗaayi janguki ko Dawda waɗi nde nani weelo, kanko e gonduɓe e maako?

⁴ O natti Lukuru Seniiɗum, o nyaami buroodi ceniiɗum, o hokkori jaadooɓe e maako. Attawra boo wi'ii ardiiɓe diina tan haani nyaamuki buroodi ɗum.

⁵ Koo on meeɗaayi janguki nder Attawra no ardiiɓe diina ngewirta dooka Nyalnde Siwtaare nder Wuro Ceniingo, ammaa ɗum wartaayi hakke?

⁶ E mi wi'a'on, raa ɓurɗo Wuro Ceniingo ɗo'o.

⁷ Ammaa daa on andunoo ma'ana aayaare nde'e bi'unde, ‘E mi yiɗi kollon yurmeende, naa' sakkuki cakkiri,’ daa on kiitaaki ɓe ngaɗaayi hakke.

⁸ Ngam Ɓii Neɗɗo woni Joomu Nyalnde Siwtaare.”

Yeesu Yamɗitinii Mo Jungo Jaraango

⁹ Sey Yeesu ali ɗon dilli, natti suudu do'aare maɓɓe.

¹⁰ E woodi goɗɗo mo jungo jaraango nder mayru. Sey Faarisanko'en ƴami Yeesu, mbi'i, “Attawra jaɓii ɗum yamɗitina Nyalnde Siwtaare?” Ɓe mbi'u non ngam ɓe keɓa ko ɓe ngulliroytoomo.

¹¹ Sey Yeesu wi'iɓe, “Moye nder mooɗon to e woodi mbaala go'o to nga yanii nder ngayka Nyalnde Siwtaare, o jogataakonga o ittoyanga?

¹² Too! Neɗɗo ɓurii mbaala daraja naa' seɗɗa! Ngam non, Attawra haɗaayi ɗum waɗa ko wooɗi Nyalnde Siwtaare.”

¹³ Sey o wi'i neɗɗo on, “Fortu jungo maaɗa.” Sey o fortingo, sey ngo yamɗiti, ngo warti bo wo'oto ngon.

¹⁴ Ammaa Faarisanko'en ɓen mburtii meddi dow no ɓe mbardata Yeesu.

Maccuɗo Mo Allah Suɓi

¹⁵ Nde Yeesu faami ko ɓe ciryotoo, sey o ummii o ali wigeere nden. Sey yimɓe ɗuɗɓe tokkimo, o yamɗitiniɓe ɓe fuu,

¹⁶ o wagginiɓe to' ɓe mbi'aka koo moye kanko o moye.

¹⁷ Ɗu'um fuu waɗii ngam ɗum hebbina ko Allah wi'i daga honduko Annabi Icaaya, wiiki,

¹⁸ “O'o woni maccuɗo mo cuɓumi, mo ngiɗumi, e mi nana belɗum maako naa' seɗɗa. Mi hokkaymo Ruuhu am, o hokkay lenyi habaru kisndam am.

¹⁹ O yeddataa o metataa sembee, walaa nanayɗo hoolo hononde maako dow ɗate.

²⁰ O heenyitataa yewuki ƴombal ɓadiingal yewuki. O nyifataa fitilaaru ɓadiindu waatuki, naa o waɗii aadilaaku heɓi jaalorgal dow halleende.

²¹ Lenyi fuu ngaɗay kammunde dow maako.”

Yeesu e Ba'aljabul

²² Sey ɗum waddanimo goɗɗo paho bumɗo gooduɗo ginnol. Yeesu boo yamɗitinimo, o warti e mo meta, e mo yi'a.

²³ Kawrutuɓe fuu kayɗini, mbi'i, “E yiiki mooɗon koo o'o woni Ɓiɗɗo Dawda?”

²⁴ Ammaa nde Faarisanko'en nani non, ɓe mbi'i, “E bawɗe Ba'aljabul laamiiɗo ginni o wurtinirta ginni.”

²⁵ Ammaa Yeesu e andi ko woni nder ɓerɗe maɓɓe, o wi'iɓe, “Laamu fuu cendiiɗum e wanywanytira, ɗum lallay. Non maa to gariiri koo wuro sendake e wanywanytira, ɗum waawataa ɗum daroo.

²⁶ To Ceyɗan e wurtina ginni Ceyɗan nder laamu Ceyɗan, Ceyɗan sendake e wanywanytira won ɗon. To laamu maako sendake, noye laamu ɗum darortoo?

²⁷ To e mi wurtinira ginni nder bawɗe Ba'aljabul, e bawɗe moye tokkuɓe'on mburtinirtaɗi? Ngam non tokkuɓe'on kollay on ngalaa goonga.

²⁸ Ammaa, to e mi wurtina ginni nder bawɗe Ruuhu Allah, too, hollii Laamu Allah waranii'on.

²⁹ “No waɗata ɗum waawa nattuki wuro neɗɗo cembiɗɗo ɗum teetanamo ko o woodi, naa' sey to ɗum artii haɓɓukimo? Nden ɗum waawa hoccuki ko o woodi nder wuro ngon.

³⁰ “Mo wondaa e am fuu, o ganyo am. Mo wallaayiyam moɓtuki fuu, o cankitoowo.

³¹ Ngam non, e mi wi'a'on, ɗum waaway yaafanaaki yimɓe hakke e koo iri ɗiye haalaaji ɗi mbooɗaa ɗi ɓe meti, ammaa bi'uɗo ko wooɗaa dow Ruuhu Allah o yaafantaake.

³² Fuu bi'uɗo ko wooɗaa dow Ɓii Neɗɗo, ɗum waaway yaafanaakimo. Ammaa fuu bi'uɗo ko wooɗaa dow Ruuhu Allah, o yaafantaake haa abadaa.

Lekki e Ɓikkoy Maaki

³³ “Lekki boɗki e rima ɓikkoy mboɗkoy, non maa lekki ki wooɗaa e rima ɓikkoy koy mbooɗaa. Koo kiye lekki e andiree ɓikkoy maaki.

³⁴ Onon boole kalluɗe! No waɗata onon kalluɓe meton ko wooɗi? Ngam honduko neɗɗo e meta ko woni nder ɓernde muuɗum.

³⁵ Neɗɗo mo ngikku boɗɗum e wurtina fii boɗɗum daga nder ɓernde muuɗum. Non maa neɗɗo kalluɗo e wurtina halleende daga nder ɓernde muuɗum.

³⁶ “E mi wi'a'on, nder Nyalnde Jaango koo moye doole wi'a Allah ngam ɗume wi'i koo ɗeye boliiɗe meereeje.

³⁷ Dow boliiɗe ɗe mbi'uɗaa ɗum waɗirantama kiita, koo ɗe nangumaa, koo ɗe mburtinmaa.”

Yiɗuki Holleeki Kayɗiniiɗum

³⁸ Sey woɓɓe nder moodiɓɓe Attawra e Faarisanko'en mbi'imo, “Moodibbo, e min ngiɗi yiiki goɗɗum kayɗiniiɗum daga to maaɗa tabbitinayɗum Allah liloymaa.”

³⁹ Sey Yeesu nootii, wi'iɓe, “Yimɓe jaamanu ɗu'um kalluɓe ɓe kulataa Allah, e ɓe ngiɗi holleeki goɗɗum kayɗiniiɗum, ammaa walaa ko ɗum hollataɓe sey ni ko heɓuno Annabi Inuusa.

⁴⁰ Ngam non, no Inuusa waɗiri balɗe tati jemma e nyalawma nder wonga linga manga, non maa Ɓii Neɗɗo waɗirta balɗe tati jemma e nyalawma nder yenaande.

⁴¹ E Nyalnde Jaango yimɓe gariiri Niineba ɓe ummodoto e yimɓe jaamanu ɗu'um. Ɓe kolla ko yimɓe jaamanu ɗu'um ngaɗi ɗum wooɗaa, ngam kamɓe, nde ɓe nani wa'aju Annabi Inuusa, ɓe tuubii. Raa boo ɓurɗo Inuusa ɗo'o.

⁴² Nyalnde Jaango laamiiɗo leydi fombina debbo o ummodoto e yimɓe jaamanu ɗu'um. O holla ko ɓe ngaɗi ɗum wooɗaa, ngam kanko o waroyii daga ɓadaaki nanuki faamu Annabi Suleymaanu. Raa boo ɓurɗo Suleymaanu ɗo'o.

Wartuki Ginnol

⁴³ “To ginnol wurtake nder ɓandu neɗɗo, ngol yahay to bigeeje jorɗe e ngol ɗaɓɓita to ngol siwtotoo. Ammaa to ngol heɓaayi,

⁴⁴ sey ngol wi'a, ‘Mi so''oto wuro ngo mburtoyiimi.’ To ngol wartii, ngol tawii wuro ngon walaa goɗɗum nder, ngo wuuwaama ngo mo''inaama.

⁴⁵ Sey ngol yaha ngol waddoya ginni joweeɗiɗi ɓurɗingol halluki, ɗi natta ɗi njooɗoo ɗon. Nden re'irde neɗɗo on ɓuray fuɗɗoode maako halluki. Non ɗum wartanta yimɓe jaamanu ɗu'um kalluɗum.”

Maduujo Yeesu e Minyiraaɓe Maako

⁴⁶ Yeesu e medda e yimɓe ɗuɗɓe hawrutuɓe, sey raa maduujo maako e minyiraaɓe maako ngari ndarii yaasi, e ɓe ngiɗi medduki e maako.

⁴⁷ Sey goɗɗo wi'imo, “Maduujo maaɗa e minyiraaɓe maaɗa e ton ndarii yaasi, e ɓe ngiɗi medduki e maaɗa.”

⁴⁸ Ammaa o wi'i biiɗomoka on, “Moye woni maduujo am, nden ɓeye ngoni minyiraaɓe am?”

⁴⁹ Sey o sappii tokkuɓemo, o wi'i, “Raa maduujo am e minyiraaɓe am ɗo'o!

⁵⁰ Ngam koo moye waɗi ko Nyaako am Mo Dow yiɗi, kanko woni minyiraawo am e maduujo am.”