Maatiyu 10 - Fulfulde Nigeria

Lilaaɓe Sappo e Ɗiɗo

¹ Sey Yeesu noddi tokkuɓemo sappo e ɗiɗo, o hokkiɓe bawɗe wurtinki ginni e yamɗitinki yimɓe daga koo iri ɗume nyawu e ciya njamu.

² Raa inɗe lilaaɓe sappo e ɗiɗo ɓen: arande e woodi Siiman bi'eteeɗo Biiturus, e minyiraawo maako Andiraawus, e Yaakubu ɓii Jabadi, e minyiraawo maako Yahaya,

³ e Filibus, e Batiloomi, e Tooma, e Maatiyu jaɓoowo ceede leydi, e Yaakubu ɓii Halfa, e Taadiyus,

⁴ e Siiman Kananiyankeejo, nden e Yahuuda Iskariyooti, gartuɗo kokkitirɗo Yeesu.

Yeesu Lilii Tokkuɓemo Sappo e Ɗiɗo

⁵ Yeesu lili tokkuɓemo sappo e ɗiɗo ɓen, o wi'iɓe, “To' on njahu to yimɓe naa' Yahuudanko'en. Ɗonmaa to' on nattu gariije Samaariyanko'en.

⁶ Sey ni njahon to yimɓe Israa'iila gartuɓe bo baali majjuɗi.

⁷ Njahee, nga'ajinanonɓe, mbi'on, ‘Laamu Allah warii haade.’

⁸ Njamɗitinee nyawɓe, umminee mayɓe daga mayde, njamɗitinee gooduɓe nyawu nyaamoojum laral, mburtinanee yimɓe ginni. Mi hokkii'on bawɗe yamɗitinki yimɓe caahu, ngam non njamɗitinee yimɓe caahu.

⁹ To' on njogo ceede jiinaari, koo ceede ajurfaari, koo ceede njamndi mboɗeeri.

¹⁰ Nden to' on njaadu e jakaare, koo toggooje ɗiɗi, koo paɗe koyɗe ɗiɗi, koo sawru, ngam kuwoowo haanii hokkee nyamndu.

¹¹ “Fuu gariiri koo gariyel pamarel to nattuɗon, ɗaɓɓitee neɗɗo mo ngikku boɗɗum, njooɗooɗon wuro maako naa on alii wigeere nden.

¹² To on nattii wuro ngon, cilminee.

¹³ To yimɓe wuro ngon njaɓɓake'on boɗɗum, alee barka mooɗon jooɗoo dow maɓɓe. Ammaa to ɓe njaɓɓaaki'on boɗɗum, alee barka mooɗon warta to mooɗon.

¹⁴ Fuu mo jaɓɓaaki'on, koo wanyi ko mbiiɗon, to on mburtake wuro ngon koo gariiri ndin, piɗɗee sollaare koyɗe mooɗon.

¹⁵ E mi wi'a'on goonga, Nyalnde Jaango Allah ɓuray yurminanki yimɓe Sodom e Gomoora dow yimɓe gariiri ndin ɗon.

Torraaji Garayɗi

¹⁶ “Raɗɗum, e mi lila'on bono mbaaloy caka caafaali. Ngam non, paamanee ko'e mooɗon no boole ngaɗata, ɗonmaa ngartee ɓe kallaa bo pooli.

¹⁷ Paamanee yimɓe, ngam ɓe njaaray'on yeeso mawɓe, ɓe piya'on nder cuuɗi do'aare maɓɓe,

¹⁸ ɓe njaara'on yeeso mawɓe leydi e laamiiɓe, ngam on tokkuɓeyam on kokkayɓe habaru am. Non wartay laawol no kokkirtonɓe habaru am kamɓe e yimɓe naa' Yahuudanko'en.

¹⁹ Fuu carel ngel ɗum nangi'on ɗum yaari'on yeeso laamu, to' on ngannu dow no metirton, koo ko mbi'oton, ngam nder carel ngel ɗum wi'ay'on ko mbi'oton.

²⁰ Ngam naa' ɗum onon metata, ammaa ɗum Ruuhu Nyaako mooɗon Mo Dow metata nder konduɗe mooɗon.

²¹ “Neɗɗo hokkitiray sakiraawo muuɗum ɗum waramo, nyaako maa hokkitiray ɓiɗɗo muuɗum. Ɓiɓɓe ummanto danyooɓe maɓɓe, ɓe ngaɗa ɗum waraɓe.

²² Koo moye wanyay'on ngam on tokkuɓeyam. Ammaa munyuɗo haa re'irde hisay.

²³ To yimɓe torrii'on nder wondi gariiri, ndoggee njahon wondi gariiri. E mi wi'a'on goonga, ko njahidon gariije Israa'iila fuu, Ɓii Neɗɗo wartoyay.

²⁴ “Ekkitotooɗo ɓurataa moodibbo muuɗum, maccuɗo boo ɓurataa jeyɗomo.

²⁵ Ekkitotooɗo nanay belɗum to wartii bo moodibbo muuɗum, maccuɗo maa nanay belɗum to wartii bo jeyɗomo. To ɓe noddirii joomu wuro on Ba'aljabul laamiiɗo ginni, ɓe ɓuray wiiki ko halli dow ɓe wuro ngon!

Kaanuɗo Hulee

²⁶ “Ngam non, to' on kulu yimɓe, ngam walaa goɗɗum ombaaɗum ɗum omtataake, non maa walaa cuuɗiiɗum ɗum suuritataake.

²⁷ Ko mbiimi'on nder nyiwre, mbi'eeka nyalawma, non maa ko nanɗon to am e suuɗe, mbi'eeka e njayri.

²⁸ To' on kulu warooɓe ɓandu neɗɗo, ammaa ɓe mbaawataa warki yonki maako. Sey ni kulon on ɗon baawayɗo halka ɓandu e yonki fuu nder wuro hiite.

²⁹ Naa' coloy ɗiɗoy e cooree yamnde go'o? Fuu e non walaa koo go'otel maakoy baatayngel naa e yidde Nyaako mooɗon Mo Dow.

³⁰ Koo gaasa ko'e mooɗon maa fuu ka limaama.

³¹ Ngam non, to' on kulu, on ɓurii coloy ɗuɗkoy.

Jaɓuki Almasiihu Yeeso Yimɓe

³² “Koo moye jaɓuɗoyam yeeso yimɓe, mi jaɓaymo yeeso Nyaako am Mo Dow.

³³ Ammaa fuu ganyuɗoyam yeeso yimɓe, min maa mi wanyaymo yeeso Nyaako am Mo Dow.

Mi Waddaayi Jonde Jam

³⁴ “To' on kammo mi waroyii waddanki duuniyaaru jonde jam. Mi waroyaayi ngam wadduki jonde jam, sey ni hawre.

³⁵ Mi warii ngam mi wadda sendirki hakkunde ɓiɗɗo e nyaako muuɗum, ɓiɗɗo debbo e maduujo muuɗum, debbo boo e esiraawo muuɗum debbo.

³⁶ Ɓe njooɗodiɗaa wuro go'o ɓe ngartay wanywanyɓe maaɗa.

³⁷ “Koo moye ɓuri yiɗuki nyaako muuɗum koo maduujo muuɗum dow am, o fotaayi wartuki tokkuɗoyam. Ɗonmaa fuu ɓurɗo yiɗuki ɓiɗɗo muuɗum dow am, o fotaayi wartuki tokkuɗoyam.

³⁸ Nden fuu mo hoccaayi gaafaangal muuɗum tokkiyam, o fotaayi wartuki tokkuɗoyam.

³⁹ Fuu giɗɗo hisnuki yonki muuɗum, o dullayki. Ammaa fuu dulluɗo yonki muuɗum ngam am, o hisnayki.

Mbarjaari

⁴⁰ “Fuu jaɓuɗo'on jaɓiiyam, ɗonmaa fuu jaɓuɗoyam jaɓii on ɗon liloyɗoyam.

⁴¹ Koo moye jaɓuɗo annabiijo ngam o annabiijo, o heɓay mbarjaari annabiijo. Nden koo moye jaɓuɗo aadiliijo ngam o aadiliijo, o heɓay mbarjaari aadiliijo.

⁴² Koo moye kokkuɗo ɓurɗo famɗuki nder tokkuɓeyam ɓe'e koo ndiyam pewɗam nder jardugel ngam o tokkuɗoyam, e mi wi'a'on goonga, o dullataa heɓuki mbarjaari.”