Luka 9 - Fulfulde Nigeria

Yeesu Lilii Tokkuɓemo Sappo e Ɗiɗo

¹ Gaɗa Yeesu noddii tokkuɓemo sappo e ɗiɗo, o hokkiɓe bawɗe e laamu dow wurtinki ginni e yamɗinki nyawuuji.

² O liliɓe ɓe nga'ajina Laamu Allah, ɓe njamɗitina ɓe njamɗaa.

³ O wi'iɓe, “To' on koccu koo ɗume ngam yaadu, koo sawru, koo jakaare, koo nyamndu, koo ceede, koo toggooje ɗiɗi.

⁴ Wuro ngo artuɗon nattuki fuu, njooɗee ɗon naa on alii gariiri ndin.

⁵ To yimɓe nder gariiri ndin njaɓɓaaki'on, alee gariiri ndin, piɗɗee sollaare koyɗe mooɗon. Kanjum hollata ɓe ngaɗii hakke.”

⁶ Sey ɓe ndilli, ɓe njahi ngarihoy feere‑feere, e ɓe nga'ajina Habaru Belɗum, e ɓe njamɗitina yimɓe koo toye.

Hirudus Wannii

⁷ Nde Hirudus, laamiiɗo leydi Galiili, nani koo ɗume ko waɗata, o wannii ngam woɓɓe e mbi'a ɗum Yahaya Gaɗoowo Baptisma ummii daga mayde.

⁸ Woɓɓe boo e mbi'a ɗum Annabi Iliya wangi, ammaa woɓɓe kadimaa e mbi'a ɗum go'oto nder annabo'en ndenno ummii.

⁹ Hirudus wi'i, “Mi ittanii Yahaya hoore. Ɗum moye kadin woni o'o, mo nanaymi fii ɗu'um dow muuɗum?” Nden o ɗaɓɓiti no o yi'irta Yeesu.

Yeesu Nyamnii Yimɓe 5,000

¹⁰ Nde lilaaɓe ngarti, ɓe mbi'i Yeesu ko ɓe ngaɗi. Sey o hocciɓe kamɓe tan yaaki haade gariiri bi'eteendi Betasayda.

¹¹ Ammaa nde yimɓe ɗuɗɓe hawrutuɓe ngi'i non, ɓe tokkimo. O jaɓɓiiɓe, o metaniɓe dow Laamu Allah. O yamɗitini giɗɓe yamɗitineeki.

¹² Nde naange hiiri, tokkuɓemo sappo e ɗiɗo ngari to maako, mbi'i, “Wi'u hawrutuɓe ndilla ngarihoy e gure gonɗe haade ngam ɓe keɓa ko ɓe nyaamata e to ɓe mbaalata, ngam ɗo'o ɗum ladde.”

¹³ Sey o wi'iɓe, “Onon kokkeeɓe ko ɓe nyaamata.” Ammaa ɓe mbi'imo, “Buroodi jowi e liƴƴi ɗiɗi tan min ngoodi ɗo'o. Sey ni min njaha, min cooda nyamndu ngam yimɓe ɓe'e fuu.”

¹⁴ Worɓe tan nder hawrutuɓe ɓen ɓadake 5,000. Sey Yeesu wi'i tokkuɓemo, “Mbi'eeɓe ɓe njooɗo moɓde yimɓe 50 ‑ 50 koo toye.”

¹⁵ Sey ɓe ngaɗi non, koo moye jooɗii.

¹⁶ Yeesu hocci buroodi jowi ɗin e liƴƴi ɗiɗi ɗin, o raari dow, o yetti Allah, o sendiɗum, o hokki tokkuɓemo ngeedana hawrutuɓe.

¹⁷ Ɓe fuu ɓe nyaami, ɓe kaari. Tokkuɓemo moɓti ko horii ko waɗi kondooje sappo e ɗiɗi.

Yeesu Woni Almasiihu

¹⁸ Wonde nyalnde Yeesu e waɗa do'aare, kanum tan, tokkuɓemo e haade maako. O ƴamiɓe, o wi'i, “Moye yimɓe mbi'atayam?”

¹⁹ Ɓe nootii ɓe mbi'i, “Woɓɓe e mbi'a a Yahaya Gaɗoowo Baptisma. Woɓɓe boo e mbi'a a Annabi Iliya. Nden woɓɓe kadimaa e mbi'a go'oto nder annabo'en ndenno ummii.”

²⁰ O wi'iɓe, “Ammaa onon, moye mbi'otonyam?” Sey Biiturus nootii, wi'i, “An woni Almasiihu mo Allah!”

Yeesu Wi'ii No Mayrata

²¹ Ammaa Yeesu haɗiɓe to' ɓe mbi'aka koo moye.

²² Nden o wi'i, “Doole Ɓii Neɗɗo yara bone ɗuɗɗum. Mawɓe yimɓe e mawɓe ardiiɓe diina e moodiɓɓe Attawra nganyamo, nden o waree. Nder nyalnde tatawre boo ɗum umminaymo.”

²³ Sey o wi'iɓe ɓe fuu, “Fuu giɗɗo warta tokkuɗoyam, to' waɗa ko hoore muuɗum yiɗi waɗuki tan, ammaa doole hocca gaafaangal muuɗum koo ndeye tokkayam.

²⁴ Ngam fuu giɗɗo hisnuki yonki muuɗum o dullayki. Ammaa fuu dullayɗo yonki muuɗum ngam am o hisnayki.

²⁵ Ko ɗum nafanta neɗɗo, to o heɓii duuniyaaru fuu, ammaa o majjinii hoore maako koo o halki?

²⁶ Koo moye ganyuɗoyam, min Ɓii Neɗɗo e boliiɗe am, mi wanyaymo to mi wartoyii nder teddungal am, e nder teddungal Nyaako am Mo Dow, e malaa'ika'en maako ceniiɓe.

²⁷ E mi wi'a'on goonga, e woodi woɓɓe dariiɓe ɗo'o ɓe maayataa naa ɓe ngi'ii Laamu Allah.”

Yeesu Wangii Nder Mangu Muuɗum

²⁸ Balɗe joweetati gaɗa Yeesu wi'iɓe boliiɗe ɗen, o ƴeeŋi dow hocceere ngam o waɗa do'aare. Biiturus, e Yahaya, e Yaakubu e wondi e maako.

²⁹ E mo nder do'aare sey yeeso maako e kolte maako ngarti daneeje tar.

³⁰ Ɗon e ɗon sey raa, annabo'en ɗiɗo, Muusa e Iliya, wangi

³¹ nder teddungal, e ɓe medda e maako. Ɓe meddi dow mayde maako nde tabbitay naa' ko neeɓi nder Urucaliima.

³² Biiturus e gonduɓe e muuɗum ɗaanake, carel ko ɓe kuylii, ɓe ngi'i teddungal maako e yimɓe ɗiɗo darodiiɓe e maako.

³³ Carel ko annabo'en ɓen alata Yeesu, Biiturus wi'imo, “Moodibbo, wonki amin ɗo'o e wooɗi. Al min nyiɓa cuuɗi tati, wo'oyru ndu maaɗa, wo'oyru ndu Muusa, nden wo'oyru ndu Iliya.” Ammaa Biiturus andaa ko wi'ata.

³⁴ E mo nder metuki, sey nduula wangi, suddiɓe, ɓe kultori.

³⁵ Ɓe nani hononde Allah daga nder nduula ngan wi'i, “O'o woni Ɓiɗɗo am mo cuɓumi. Nanee ko o wi'ata'on.”

³⁶ Nde hononde nden de''iti, ɓe ngi'i Yeesu kanum tan. Tokkuɓemo aliɗum hakkunde maɓɓe, nder nyalɗe ɗen ɓe mbi'aayi goɗɗo ko ɓe ngi'i.

Yeesu Yamɗitinii Ɓiɗɗo Gooduɗo Ginnol

³⁷ Nde weeti, ɓe njippoyii daga dow hocceere nden, kawrutuɓe ɗuɗɓe tawimo.

³⁸ Nder kawrutuɓe ɓen goɗɗo gorko noddi e sembe, wi'i, “Moodibbo, e mi toromaa, raaru ɓiɗɗo am gorko ngam kanko tan ngoodumi.

³⁹ Ginnol neeɓii e nangamo. To ngol nangiimo, o fuɗɗa wulluki, o waɗa ka diwnuki, nguufo ngaɗa ka wurtoyaaki nder honduko maako, ngol alataamo naa ngol nawniimo.

⁴⁰ Mi torake tokkuɓema mburtinangol, ammaa ɓe mbaawaayi.”

⁴¹ Yeesu nootii, wi'i, “Onon yimɓe jaamanu ɗu'um kalluɗum on koolaakiyam, haa ndeye njooɗodotoomi e mooɗon e mi munyida e mooɗon? Waddu ɓiɗɗo maaɗa ɗo'o.”

⁴² Ɓiɗɗo on e waroya, sey ginnol ngol do''imo, e mo diwna. Ammaa Yeesu haɓani ginnol ngol, yamɗitini suka on, hokkitimo nyaako maako.

⁴³ Wonɓe ɗon fuu kayɗini e mangu Allah. Ammaa e ɓe nder hayɗinki dow ko o waɗi, Yeesu wi'i tokkuɓemo,

Yeesu Fuɗɗiti Wi'i Ɓadake Maayuki

⁴⁴ “Paamee boɗɗum nanon ko mbi'aymi'on! Ɗum hokkitiray Ɓii Neɗɗo nder juuɗe yimɓe.”

⁴⁵ Ammaa ɓe paamaayi ko o wi'iɓe. Ɗum suuɗanakeɓe ngam to' ɓe paamaɗum, nden e ɓe kula ƴamukimo dow maajum.

Moye Ɓuri Mangu?

⁴⁶ Nden geddi ummii hakkunde tokkuɓemo dow ɗum moye ɓuri mangu nder maɓɓe.

⁴⁷ Ammaa Yeesu heɓti ko woni nder ɓerɗe maɓɓe, sey o hocci sukayel pamarel, o darningel haade maako.

⁴⁸ Nden o wi'iɓe, “Koo moye jaɓuɗo sukayel pamarel bo nge'el nder inde am jaɓiiyam. Nden koo moye jaɓuɗoyam jaɓii liloyɗoyam. Ngam lestinɗo hoore muuɗum fuu nder mooɗon, kanum woni mawɗo.”

Mo Wanyaayi'on Fuu e Wondi e Mooɗon

⁴⁹ Yahaya nootii, wi'i, “Moodibbo, min ngi'ii goɗɗo e wurtina ginni nder inde maaɗa, min kaɗimo ngam kanko naa' o tokkuɗo'en.”

⁵⁰ Ammaa Yeesu wi'imo, “To' on kaɗumo, ngam fuu mo wanyaayi'on e wondi e mooɗon.”

Yimɓe Gariiri Samaariya Nganyii Yeesu

⁵¹ Nde carel ɓadii ngam ɗum hoccamo yaaki dow, Yeesu e hoore muuɗum suɓi yahuki Urucaliima.

⁵² Sey o lili lilaaɓe yeeso maako, ɓe njaha nder gariyel Samaariyanko'en ngam ɓe ciryoo koo ɗume ngam garol maako.

⁵³ Ammaa yimɓe gariyel ngel njaɓaayimo ngam ɓe keɓtii Urucaliima o fa'i.

⁵⁴ Nde tokkuɓemo Yaakubu e Yahaya ngi'i non, ɓe mbi'i, “Moodibbo, a yiɗi min nodda hiite daga dow wara halkaɓe?”

⁵⁵ Ammaa Yeesu waylitii haɓaniɓe,

⁵⁶ sey ɓe njahi wongel gariyel.

Tokkuki Yeesu

⁵⁷ E ɓe nder yaadu dow ɗatal, sey goɗɗo wi'imo, “Mi tokkete to njahataa fuu.”

⁵⁸ Yeesu wi'imo, “Dilaaji e ngoodi gayɗe, colli e ngoodi caɓɓe, ammaa Ɓii Neɗɗo walaa to fukkotoo.”

⁵⁹ O wi'i goɗɗo neɗɗo, “Tokkam.” Ammaa neɗɗo on wi'imo, “Moodibbo, al mi yaha, mi uwoya nyaako am taw.”

⁶⁰ Ammaa Yeesu wi'imo, “Alu mayɓe uwa mayɓe mu''en, ammaa an, yahu, nga'ajinaa Laamu Allah.”

⁶¹ Goɗɗo kadimaa wi'i, “Mi tokkete, moodibbo, ammaa al mi yaha mi ƴama ɓe wuro am taw.”

⁶² Ammaa Yeesu wi'imo, “Koo moye jogiiɗo remergo fuɗɗi remuki e yeeƴoo gaɗa, walaa ko nafi nder kuugal Allah.”