Luka 6 - Fulfulde Nigeria

Ƴamol Dow Nyalnde Siwtaare

¹ Wonde Nyalnde Siwtaare Yeesu e yaha nder ngesa alkamaari, sey tokkuɓemo ngaɗi ka ɓoruki cammeeje mayri e molmaɗe nder juuɗe maɓɓe, e ɓe nyaama.

² Ammaa woɓɓe Faarisanko'en mbi'iɓe, “Ko waɗi ngaɗoton ko Attawra haɗi ɗum waɗa Nyalnde Siwtaare?”

³ Yeesu wi'iɓe, “On meeɗaayi janguki ko Dawda waɗi nde nani weelo, kanko e gonduɓe e maako?

⁴ O natti Lukuru Seniiɗum, o hocci buroodi ceniiɗum, o nyaamiɗum. Attawra boo wi'ii ardiiɓe diina tan haani nyaamuki buroodi ɗum, ammaa Dawda nyaamiɗum haa maa o hokkori jaadooɓe e maako.”

⁵ Sey Yeesu wi'iɓe, “Ɓii Neɗɗo woni Joomu Nyalnde Siwtaare.”

Yeesu Yamɗitinii Mo Jungo Jaraango

⁶ Wonde Nyalnde Siwtaare o natti nder suudu do'aare, e mo ekkitina. Goɗɗo mo jungo jaraango e nder mayru.

⁷ Moodiɓɓe Attawra e Faarisanko'en cutii Yeesu koo o yamɗitinay goɗɗo nder Nyalnde Siwtaare, ngam ɓe keɓa ko ɓe ngulliroytoomo.

⁸ Ammaa, Yeesu e andi ko woni nder ɓerɗe maɓɓe, sey o wi'i neɗɗo mo jungo jaraango on, “Woroy, ndaroɗaa caka maɓɓe.” O ummii, o darii ɗon.

⁹ Sey Yeesu wi'iɓe, “E mi ƴama'on, ko Attawra wi'i ɗum waɗa nder Nyalnde Siwtaare, waɗa ko wooɗi koo waɗa ko wooɗaa, hisna yonki koo halkaki?”

¹⁰ Gaɗa o raariiɓe ɓe fuu, sey o wi'i neɗɗo on, “Fortu jungo maaɗa.” O fortingo, sey ngo yamɗiti.

¹¹ Ammaa ɓerɗe maɓɓe metti naa' seɗɗa, ɓe meti hakkunde maɓɓe dow ko ɓe ngaɗanta Yeesu.

Yeesu Suɓii Lilaaɓe Sappo e Ɗiɗo

¹² Nder balɗe ɗen, Yeesu yahi dow hocceere ngam waɗa do'aare. O waali waɗuki do'aare.

¹³ Nde weeti, o noddi tokkuɓemo, o suɓi sappo e ɗiɗo, o hokkiɓe inde lilaaɓe.

¹⁴ Kamɓe ngoni: Siiman mo o hokki inde Biiturus, e minyiraawo maako Andiraawus, e Yaakubu, e Yahaya, e Filibus, e Batiloomi,

¹⁵ e Maatiyu, e Tooma, e Yaakubu ɓii Halfa, e Siiman bi'eteeɗo Jalooti,

¹⁶ e Yahuuda ɓii Yaakubu, e Yahuuda Iskariyooti, gartuɗo kokkitirɗo Yeesu.

Yeesu Ekkitinii Moɓgal, Yamɗitinii Nyawɓe

¹⁷ Sey Yeesu jippodii e maɓɓe o darii e njayri. Tokkuɓemo ɗuɗɓe e ɗon e yimɓe ɗuɗɓe ƴiwoyɓe daga leydi Yahuudiya fuu, e Urucaliima, e leydi Taaya e Sidon haade mbeela.

¹⁸ Ɓe ngaroyi ngam nanukimo e yamɗineeki daga nyawuuji maɓɓe. Ɓe ginni torrata njamɗinaa.

¹⁹ Wonɓe ɗon fuu e ɓaddoo ngam meema Yeesu, ngam bawɗe e mburtoo daga nder maako, e mo yamɗitina koo moye.

Barkiɗinki e Laanuki

²⁰ Yeesu raari tokkuɓemo, wi'i, “On barkiɗinaaɓe, onon ɓe ngalanaa, ngam onon njeyi Laamu Allah.

²¹ “On barkiɗinaaɓe, onon nanooɓe weelo jooni, ngam on ngartay karneteeɓe. “On barkiɗinaaɓe, onon woyooɓe jooni, ngam on ngartay jalayɓe.

²² “On barkiɗinaaɓe to yimɓe nganyii'on, ndiiwii'on, kuɗii'on, mbonnii inɗe mooɗon ngam Ɓii Neɗɗo.

²³ Nanee belɗum nder nyalnde nden, ngamee ngam belɗum, ngam barka mooɗon ɗum ɗuɗɗum e dow. Non maama'en maɓɓe ngaɗannoo annabo'en arande'en.

²⁴ “On mbonii, onon riskuɓe, ngam on keɓii ko ɗaɓɓitoton.

²⁵ “On mbonii, onon karɓe jooni, ngam on nanay weelo. “On mbonii, onon jalayɓe jooni, ngam on nanataa belɗum, on mboyay bojji nawɗi.

²⁶ “On mbonii to yimɓe fuu manii'on, ngam non maama'en maɓɓe ngaɗannoo annabo'en fewre.

Ngiɗee Ganyooɓe Mooɗon

²⁷ “Ammaa e mi wi'a'on onon nanooɓe ko mbi'aymi: Ngiɗee ganyooɓe mooɗon, ngaɗanee wanyuɓe'on ko wooɗi,

²⁸ mbarkiɗinee laanooɓe'on, ngaɗanee torrooɓe'on do'aare.

²⁹ To goɗɗo fiyiima to wolo, waylitanmo wo'oto ngon maa. To goɗɗo jaɓii cuddaari maaɗa, taa' haɗumo toggoore maaɗa.

³⁰ Toriiɗoma goɗɗum fuu, hokkumo. Teetanɗoma goɗɗum, taa' wi'imo o hokkutumaa.

³¹ Ngaɗanee woɓɓe ko ngiɗɗon ɓe ngaɗana'on.

³² “To yiɗuɓe'on tan ngiɗɗon, ɗume barka keɓoton? Koo kalluɓe maa e ngiɗi yiɗuɓeɓe.

³³ To gaɗanooɓe'on boɗɗum tan ngaɗanton boɗɗum, ɗume barka keɓoton? Ay, kalluɓe maa e ngaɗa non.

³⁴ To ɓe kammiiɗon njoɓay'on tan kokkoton nyamaande, ɗume barka keɓoton? Ay, kalluɓe maa e kokka kalluɓe nyamaande, e ɓe kammoo hokkiteeki nyamaande maɓɓe.

³⁵ Ammaa ngiɗee ganyooɓe mooɗon, ngaɗaneeɓe boɗɗum, kokkeeɓe nyamaande, to' on kammoo hokkiteeki. To on ngaɗii non, on keɓay barka ɗuɗɗum, on ngartay ɓiɓɓe Allah Joomu Mangu. Ngam Allah e yurminana ɓe ngettataa e kalluɓe.

³⁶ Njurminanee yimɓe non no Nyaako mooɗon Mo Dow yurmirta.

To' On Kiito Woɓɓe

³⁷ “To' on kiito woɓɓe, on kiitataake. To' on metu kalluka dow goɗɗo, ɗum metataa kalluka dow mooɗon. Njaafee, ɗum yaafanto'on.

³⁸ Kokkee, ɗum hokkay'on e poondirgel kewngel tiɗɗaangel dimbaangel boɗɗum, ɗum waylanay'on nder tummuɗe mooɗon, ngam poondirgel ngel poondirɗon, e maagel ɗum foondiranta'on.”

³⁹ Ɗonmaa o hokkiɓe misaalu ɗu'um, o wi'i, “On ngi'a bumɗo waaway ardaaki bumɗo? Ɓe fuu ɗiɗo naa' sey ɓe njana nder ngayka?

⁴⁰ Ekkitotooɗo ɓurataa moodibbo muuɗum, ammaa koo moye ekkitinaaɗo boɗɗum wartay bo moodibbo muuɗum.

⁴¹ “Ngam ɗume ndaarataa geenel gongel nder hitere bandiraawo maaɗa, ammaa a wannaayi e legga wonga nder hitere maaɗa?

⁴² No waɗata mbi'aa bandiraawo maaɗa, ‘Bandiraawo, al mi ittanmaa geenel nder hitere maaɗa,’ nden an e hoore maaɗa a yi'aayi legga wonga nder hitere maaɗa? An munaafukiijo, artu ittuki legga wonga nder hitere maaɗa, nden ngi'aa boɗɗum keɓaa no ittiraa geenel gongel nder hitere bandiraawo maaɗa.

Lekki e Andiree Ɓikkoy Maaki

⁴³ “Lekki boɗki rimataa ɓikkoy koy mbooɗaa, non maa lekki ki wooɗaa rimataa ɓikkoy mboɗkoy.

⁴⁴ Ngam koo kiye lekki e andiree ɓikkoy maaki. Ɗum teɓɓitataa ibbe to lekki kooraaje, non to gi'ehi ɗum teɓɓitataa ɓikkoy bummeeje.

⁴⁵ Neɗɗo mo ngikku boɗɗum e wurtina fii boɗɗum daga nder ko woni nder ɓernde muuɗum. Non maa neɗɗo kalluɗo e wurtina halleende daga nder ɓernde muuɗum, ngam honduko neɗɗo e meta ko woni nder ɓernde muuɗum.”

Ɓoliiɗe Yeesu Almasiihu e Cembiɗi Bo Tafaare

⁴⁶ O wi'iɓe, “Ngam ɗume noddirtoyyam, ‘Moodibbo, Moodibbo,’ ammaa on ngaɗataa ko mbiimi'on?

⁴⁷ Neɗɗo fuu garɗo to am nani boliiɗe am waɗi ko mbiimi, mi hollay'on ko o nandi.

⁴⁸ E mo nandi e neɗɗo mahoowo wuro gasuɗo leydi lugguɗum haa o hewti tafaare, o mahi wuro dow mayre. Caangol heewi falƴi fiyi wuro ngon, ammaa ngo dimbaaki, ngam ngo mahaama dow tafaare.

⁴⁹ Ammaa nanɗo boliiɗe am, nden waɗaayi ko mbiimi e nandi e neɗɗo mahuɗo wuro dow njaareendi. Nde caangol falƴi fiyingo, ɗon e ɗon ngo yani ngo fuu!”