Luka 5 - Fulfulde Nigeria

Yeesu Noddii Tokkuɓemo Arande'en

¹ Wonde nyalnde Yeesu e darii daande Mbeela Janisarat, yimɓe e piliimo e nana Wolde Allah.

² O yi'i komiije ɗiɗi e ɗe ndesii daande ndiyam. Nangooɓe liƴƴi mburtii nder maaje, e ɓe laɓɓina nangirɗum liƴƴi maɓɓe.

³ O natti komiwal Siiman, o torii Siiman dirdinangal seɗɗa nder ndiyam. O jooɗii nder maagal, e mo ekkitina yimɓe.

⁴ Nde o heenyi ko o wi'ata, o wi'i Siiman, “Turta komiwal ngal yaaki ton to luggi, ngaɗaa nangirɗum liƴƴi maaɗa nder ndiyam ngam nanguki liƴƴi.”

⁵ Siiman Biiturus wi'i, “Moodibbo, min kuwii jemmaare fuu, min nangaayi goɗɗum. Ammaa daga a wi'i non, mi waɗay nangirɗum liƴƴi nder ndiyam.”

⁶ Nde ɓe ngaɗi non, ɓe nangi liƴƴi ɗuɗɗi haa nangirɗum ɗum fuɗɗi seekuki.

⁷ Sey ɓe noddiri higooɓe maɓɓe juuɗe, wonɓe nder wongal komiwal, ngam ɓe ngara ɓe mballaɓe. Ɓe ngari, ɓe kebbini komiije ɗen ɗe fuu ɗiɗi e liƴƴi naaki ɗe fuɗɗi mutuki nder ndiyam.

⁸ Nde Siiman yi'i non, o diccii yeeso Yeesu, o wi'i, “Moodibbo, woɗɗitayam, mi neɗɗo gooduɗo hakke!”

⁹ Siiman wi'i non ngam kanko e gonduɓe e maako ɓe kayɗinii e liƴƴi ɗuɗɗi ɗi ɓe nangi.

¹⁰ Yaakubu e Yahaya, ɓiɓɓe Jabadi, higooɓe kuugal Siiman, kamɓe maa ɓe kayɗinii. Yeesu wi'i Siiman, “Taa' hulu! Daga jooni a wadday yimɓe to am.”

¹¹ Ɓe mburtini komiije maɓɓe daga nder ndiyam, ɓe ali koo ɗume, ɓe tokki Yeesu.

Gooduɗo Nyawu Nyaamoowu Laral

¹² Wonde nyalnde Yeesu e nder wondi gariiri, goɗɗo waroyi gooduɗo nyawu nyaamoojum laral fuu ɓandu maako. Nde o yi'i Yeesu, o diccii, o torii Yeesu, o wi'i, “Moodibbo, taa jaɓii, a waaway njamɗitinaayam.”

¹³ Sey Yeesu forti jungo muuɗum, meemimo, wi'i, “Mi jaɓii. Yamɗutu!” Ɗon e ɗon o yamɗiti, nyawu ngun alimo.

¹⁴ Yeesu wi'imo, “Taa' wi'uka goɗɗo. Ammaa yahu, kollaa hoore maaɗa to ardiiɗo diina, kokkaa cakkiri no Annabi Muusa wi'i ngam laaɓol maaɗa. Waɗu non ngam tabbitinanki yimɓe a yamɗitii.”

¹⁵ Ammaa koo nde Yeesu haɗiimo wi'ukika, habaru ɗum woɗɗinii, yimɓe ɗuɗɓe ngari ngam nanuki ekkitinol maako e yamɗitineeki daga nyawuuji mu''en.

¹⁶ Ammaa no Yeesu woowi e yaha wigeere nder ladde waɗa do'aare.

Yeesu Yamɗitinii Jaraaɗo

¹⁷ Wonde nyalnde Yeesu e nder ekkitinki, Faarisanko'en e moodiɓɓe Attawra e njooɗii ɗon ƴiwoyɓe ngarihoy fuu ngonkoy nder leyɗe Galiili e Yahuudiya e gariiri Urucaliima. Bawɗe Joomiraawo e wondi e maako, e mo yamɗitina nyawɓe.

¹⁸ Sey woɓɓe ngaddi goɗɗo jaraaɗo dow daago, ɓe ɗaɓɓiti ɗatal ngal ɓe nattinirtamo nder wuro ngon, ɓe pukkinamo yeeso Yeesu.

¹⁹ Ammaa ɓe mbaawaayi nattinkimo ngam yimɓe ɗuuɗii, sey ɓe ƴentinimo dow suudu ndun, ɓe njulindu, ɓe njippinimo daga dow mayru yaaki hakkunde yimɓe yeeso Yeesu.

²⁰ Nde Yeesu yi'i hoolaare maɓɓe, o wi'i jaraaɗo on, “Higo, ɗum yaafanakema hakkeeji maaɗa.”

²¹ Sey Faarisanko'en e moodiɓɓe Attawra puɗɗi metitaaki hakkunde maɓɓe, e ɓe mbi'a, “O'o ɗum moye pottidinoowo hoore muuɗum e Allah? Moye waawata yaafaaki hakke to naa' Allah?”

²² Yeesu faami nyumo maɓɓe, o wi'iɓe, “Ngam ɗume nyumoton iri nyumooji ɗi'i nder ɓerɗe mooɗon?

²³ Ko ɓuri hoyki, ɗum wi'a, ‘A yaafanaama hakke maaɗa,’ koo ɗum wi'a, ‘Umma yaaɓu?’

²⁴ Ammaa e mi yiɗi andon Ɓii Neɗɗo e woodi laamu nder duuniyaaru yaafoo hakke.” Sey o wi'i jaraaɗo on, “E mi wi'imaa, umma, koccaa daago maaɗa, kootaa wuro!”

²⁵ Ɗon e ɗon o ummii yeeso maɓɓe, o hocci daago maako, o hooti wuro, e mo manta Allah.

²⁶ Ɓe fuu ɓe kayɗini, ɓe mawnini Allah. Kulol nangiɓe, ɓe mbi'i, “Hande en ngi'i ko hulnii!”

Yeesu Noddii Leewi

²⁷ Gaɗa ɗon, Yeesu wurtii yi'i jaɓoowo ceede leydi bi'eteeɗo Leewi, e mo jooɗii to ɗum jaɓata ceede leydi, Yeesu wi'imo, “Tokkam.”

²⁸ Leewi ummii, ali koo ɗume, tokkimo.

²⁹ Sey Leewi yaari Yeesu wuro muuɗum defanimo nyamnduuji feere‑feere. Jaɓooɓe ceede leydi ɗuɗɓe e woɓɓe yimɓe e nyamda e maɓɓe.

³⁰ Ammaa, Faarisanko'en e moodiɓɓe Attawra maɓɓe ngaɗi ka metitaaki, e ɓe mbi'a tokkuɓe Yeesu, “Ngam ɗume nyamdoton e jaɓooɓe ceede leydi e gaɗooɓe hakke?”

³¹ Yeesu wi'iɓe, “Naa' yamɓe ngiɗi nyawndoowo, sey ni nyawɓe.

³² Mi waroyaayi ngam nodduki nyumooɓe ɓe aadili'en, ammaa mi waroyi ngam nodduki anduɓe ɓe gaɗooɓe hakke ɓe tuuba.”

Ƴamol Dow Suumaaki

³³ Ɓe mbi'imo, “Koo ndeye tokkuɓe Yahaya Gaɗoowo Baptisma e cuumoo e ngaɗa do'aare, non maa tokkuɓe Faarisanko'en ngaɗata, ammaa tokkuɓema e nyaama e njara.”

³⁴ Yeesu nootii wi'iɓe, “On mbaaway kaɗon higooɓe angoojo nyaamuki nyamndu carel ngel o wondi e maɓɓe? On mbaawataa!

³⁵ Ammaa carel e wara ngel ɗum hoccata angoojo on daga nder maɓɓe, gaɗa ɗon ɓe cuumoto.”

³⁶ O wi'iɓe misaalu ɗu'um, “Walaa ceekoowo lefel daga limcere heyre nyootangel to limcere kiinde. To o waɗii non, o seekay limcere heyre nden, lefel kesel ngel boo yaadataa e limcere hiinde nden.

³⁷ Non maa walaa gaɗayɗo inabojam kesam nder faandu hiindu. To o waɗii non, ɗam ƴuufay, ɗam pusa faandu ndun, ɗam rufa.

³⁸ Ammaa, inabojam kesam haani waɗee nder faandu heyru.

³⁹ Walaa boo jaroowo inabojam kiiɗam gaɗa ɗon ɗaɓɓita kesam, ngam o wi'ay, ‘Kiiɗam ɗam ɓurii.’ ”