Luka 4 - Fulfulde Nigeria

Ceyɗan Foondi Yeesu

¹ Yeesu ƴiwoyi daga Caangol Urdun e heewi Ruuhu Allah. Sey Ruuhu Allah yaarimo nder ladde.

² Ton o waɗi balɗe 40 Ceyɗan e foondamo, o nyaamaayi goɗɗum nder balɗe ɗen. Nden gaɗa maaje, weelo nangimo.

³ Ceyɗan wi'imo, “To an woni Ɓiɗɗo Allah, wi'u nde'e hayre warta buroodi.”

⁴ Yeesu nootii wi'imo, “Aayaare wi'ii, ‘Naa' e nyamndu tan neɗɗo marortoo.’ ”

⁵ Sey Ceyɗan yaarimo wonde wigeere townde, bo maƴƴuki hollimo leyɗe duuniyaaru fuu.

⁶ Nden Ceyɗan wi'imo, “Mi hokkete laamu e mangu dow leyɗe ɗe'e fuu, ngam ɗum hokkiiyamɗe. Mi waaway hokkukiɗe koo moye mo ngiɗumi.

⁷ Ngam non, taa mawniniiyam, ɗu'um fuu ɗum wartay ɗum maaɗa.”

⁸ Yeesu wi'imo, “Aayaare wi'ii, ‘Mawnin Allah Joomiraawo maaɗa, kanko tan mawnintaa.’ ”

⁹ Sey Ceyɗan yaarimo Urucaliima, darnimo ton dow hoore Wuro Ceniingo, wi'imo, “To an woni Ɓiɗɗo Allah, diwu daga ɗo'o,

¹⁰ ngam aayaare wi'ii, ‘Allah wi'ay malaa'ika'en muuɗum mballumaa boɗɗum.

¹¹ Ɓe taɓɓete nder juuɗe maɓɓe, ngam to' nawnaa koyɗe maaɗa dow hayre.’ ”

¹² Yeesu wi'imo, “Aayaare wi'i, ‘Taa' foondu Allah Joomiraawo maaɗa.’ ”

¹³ Nde Ceyɗan heenyi foonduki Yeesu fuu, sey o alimo yaaki wongel carel.

Yeesu Fuɗɗi Kuugal Muuɗum Nder Galiili

¹⁴ Sey Yeesu so''ii leydi Galiili nder bawɗe Ruuhu Allah. Habaru maako sankitii nder leydi ndin.

¹⁵ O fuɗɗi ekkitinki nder cuuɗi do'aare maɓɓe, koo moye mantimo.

Ɗum Wanyii Yeesu Nder Najarat

¹⁶ Yeesu yahi Najarat, gariiri to mawni. Nyalnde Siwtaare, o natti suudu do'aare no o woowi waɗuki. Sey o ummii o darii ngam o janga Deftere Ceniinde.

¹⁷ Ɗum hokkimo deftere Annabi Icaaya, o maɓɓitinde, o jangi aayaaje bi'uɗe,

¹⁸ “Ruuhu Joomiraawo e dow am, ngam o suɓiiyam mi hokka ɓe ngalanaa Habaru Belɗum. O liliiyam mi wadda habaru yoofuki maccuɓe, mi wumtina wumɓe, mi waɗa ɗum ala torreteeɓe ndilla,

¹⁹ Mi wa'ajinana duuniyaaru wiiki hitaande nde Joomiraawo hisnata yimɓe muuɗum waroyi.”

²⁰ Sey o maɓɓi deftere nden, o hokkitinde ballitoowo o jooɗii. Koo moye gonɗo nder suudu do'aare ndun sutiimo.

²¹ Sey Yeesu wi'iɓe, “Ɗe'e aayaaje ɗe nanɗon, hande ɗe keewii.”

²² Koo moye e wi'a boɗɗum dow maako. Boliiɗe boɗɗe burtiiɗe nder honduko maako hayɗiniiɓe. Ɓe mbi'i, “Naa' o'o woni ɓiɗɗo Yusufu?”

²³ O wi'iɓe, “Walaa seko on mbi'ayyam haala ka'a, ‘Nyawndoowo, yamɗin hoore maaɗa! Ko min nani a waɗii nder Kafarnahum, waɗu ɗum ɗo'o nder gariiri maaɗa.’ ”

²⁴ Kadimaa o wi'iɓe, “Goonga, e mi wi'a'on, walaa annabiijo jaɓeteeɗo to gariiri muuɗum.

²⁵ E mi wi'a'on goonga, e carel Annabi Iliya e woodi rewɓe ɗuɗɓe nder leydi Israa'iila ɓe worɓe mu''en maayi. E carel ngel, ɗum waɗi duuɓi tati e lebbi joweego'o ndiyam toɓaayi, nden ɗum waɗi weelo kallungo nder leydi ndin fuu.

²⁶ Ammaa Annabi Iliya liloyaaka to koo moye maɓɓe, sey to goɗɗo debbo naa' Yahuudankeejo mo gorko muuɗum maayi, gonɗo gariiri Jarifat nder leydi Sidon.

²⁷ Kadimaa e woodi gooduɓe nyawu nyaamoojum laral ɗuɗɓe nder Israa'iila e carel Annabi Iliica, ammaa walaa jamɗinaaɗo nder maɓɓe sey Na'aman neɗɗo leydi Siiriya, naa' o Yahuudankeejo.”

²⁸ Nde yimɓe wonɓe nder suudu do'aare ndun nani non, ɓe fuu ɓerɗe maɓɓe metti.

²⁹ Ɓe ummii, ɓe ndiiwimo daga nder gariiri, nden ɓe njaarimo dow ƴolde to gariiri maɓɓe woni, ngam ɓe tuuroyoomo ley,

³⁰ ammaa o tokki hakkunde maɓɓe, o dilli.

Yeesu Wurtini Ginnol

³¹ Sey Yeesu yahi gariiri Kafarnahum nder leydi Galiili, e mo ekkitinaɓe nder suudu do'aare Nyalnde Siwtaare.

³² Ɓe kayɗini e ekkitinol maako, ngam boliiɗe maako e woodi bawɗe.

³³ E woodi gooduɗo ginnol nder suudu do'aare ndun, o wulli sembee, o wi'i,

³⁴ “Wayyoo! Ko wannumaa e amin, Yeesu Najarankeejo? A waroyi ngam kalkaamin? E mi andi an a moye. An woni Ceniiɗo Allah!”

³⁵ Yeesu haɓaningol wi'i, “De''utu! Wurta nder maako!” Sey ginnol ngol do''i neɗɗo on yeeso maɓɓe, ngol wurtii ngol nawnaayimo.

³⁶ Ɓe fuu ɓe kayɗini, ɓe ngaɗi ka metuki hakkunde maɓɓe, e ɓe mbi'a, “Iri ɗeye boliiɗe ngoni ɗo'o? Ngam e mo metana ginni nder laamu e bawɗe, e ɗi mburtoo.”

³⁷ Nden habaru Yeesu sankitii nder leydi ndin.

Yeesu Yamɗitini Yimɓe Ɗuɗɓe

³⁸ Gaɗa Yeesu alii suudu do'aare, dillii wuro Siiman. Esiraawo Biiturus debbo jonte kalluɗe e torramo, ɓe torii Yeesu yamɗitinamo.

³⁹ O wari to nyawɗo on, o haɓani jonte ɗen, sey ɗe njoofimo. Ɗon e ɗon nyawɗo on ummii, fuɗɗi waddankiɓe nyamndu.

⁴⁰ Nde naange hiiri, yimɓe ngaddani Yeesu gooduɓe nyawuuji feere‑feere, o yowi juuɗe maako dow koo moye nyawɗo, o yamɗitiniɓe.

⁴¹ Ginni maa mburtii nder yimɓe ɗuɗɓe, e ɗi ngulla, e ɗi mbi'a, “An, a Ɓiɗɗo Allah!” Ammaa o haɓaniɗi, o haɗiɗi metuki, ngam e ɗi andi kanko woni Almasiihu.

Yeesu Wa'ajini Nder Suudu Do'aare

⁴² Nde weeti, Yeesu wurtii gariiri ndin yahi wonde wigeere nder ladde. Yimɓe ngaɗi ka ɗaɓɓutukimo. Nde ɓe tawimo, ɓe ngiɗaa o dilla o alaɓe.

⁴³ Ammaa o wi'iɓe, “Doole mi wa'ajina Habaru Belɗum dow Laamu Allah e goɗɗe gariije, ngam maajum ɗum liloyiyam.”

⁴⁴ Nden o waɗi ka wa'ajinki nder cuuɗi do'aare leydi Yahuudiya.