Luka 22 - Fulfulde Nigeria

Mawɓe Meddii Dow No Nangirta Yeesu

¹ Too, carel ɓadake ngam Humto Buroodi Ɗum Walaa Ƴuufinirɗum bi'eteengo Humto Sakkinki.

² Mawɓe ardiiɓe diina e moodiɓɓe Attawra e ɗaɓɓita no ɓe mbardata Yeesu, ngam e ɓe kula yimɓe.

Yahuuda Jaɓi Hokkitira Yeesu

³ Sey Ceyɗan natti ɓernde Yahuuda bi'eteeɗo Iskariyooti, go'oto nder tokkuɓe Yeesu sappo e ɗiɗo.

⁴ Sey o yahi to mawɓe ardiiɓe diina e mawɓe ardiiɓe taadiiɓe Wuro Ceniingo, o meddi e maɓɓe dow no o hokkitirta Yeesu nder juuɗe maɓɓe.

⁵ Ɓe nani belɗum ɗuɗɗum, ɓe ngaɗi alkawal hokkukimo ceede.

⁶ Kanko boo o jaɓi, o fuɗɗi ɗaɓɓutuki laawol no o hokkitirta Yeesu nder juuɗe maɓɓe.

Yeesu Siryake Nyaamuki Nyamndu Humto Sakkinki

⁷ Sey nyalnde wari nde Humto Buroodi Ɗum Walaa Ƴuufinirɗum nde ɗum hirsata karoori Humto Sakkinki.

⁸ Ngam non Yeesu lili Biiturus e Yahaya wi'iɓe, “Njahee ciryanee'en koo ɗume ngam nyaamen Humto Sakkinki.”

⁹ Ɓe ƴamimo ɓe mbi'i, “Toye ngiɗɗaa min njaha min ciryooɗum?”

¹⁰ O wi'iɓe, “Raɗɗum, e nattuki mooɗon gariiri, on kawray e goɗɗo e mo rondii ƴoogirde ndiyam. Tokkeemo yaaki wuro ngo o nattata,

¹¹ mbi'on joomu wuro ngon, ‘Moodibbo wi'ii min ƴamumaa: “Toye suudu ndu nyaamaymi nyamndu Humto Sakkinki e tokkuɓeyam?” ’

¹² O hollay'on suudu ndu dow, mawndu mo''inaandu. Ciryanee'en koo ɗume ɗon ngam nyaamen nyamndu Humto Sakkinki.”

¹³ Sey ɓe njahi ɓe tawi koo ɗume no Yeesu wi'iɓe, sey ɓe ciryii koo ɗume ngam Humto Sakkinki.

Kirtaari Joomiraawo

¹⁴ Nde carel waɗi, Yeesu e tokkuɓemo sappo e ɗiɗo njooɗii ngam nyaama.

¹⁵ Sey o wi'iɓe, “Mi haaɓii nyamduki nyamndu Humto Sakkinki ndu'u e mooɗon ko mi torree.

¹⁶ Ngam e mi wi'a'on, mi fuɗɗitataa nyaamuki nyamndu Humto Sakkinki sey to ma'ana maajum heewii nder Laamu Allah.”

¹⁷ Sey o hocci inabojam nder jardugel, o yetti Allah, o wi'i, “Njaɓee nge'el cendon inabojam ɗam hakkunde mooɗon.

¹⁸ Ngam e mi wi'a'on, mi fuɗɗitataa yaruki ndiyam inabooje naa Laamu Allah waroyii.”

¹⁹ Nden o hocci buroodi, o yetti Allah, o sendiɗum, o hokki tokkuɓemo, e mo wi'a, “Ɗu'um ɗum ɓandu am, kokkaandu ngam mooɗon. Ngaɗee ka waɗuki non ngam siftorkiyam.”

²⁰ Non maa, gaɗa ɓe kirtake, o hocci jardugel ndiyam inabojam, o wi'i, “Ɗa'am woni alkawal kesal tabbitayngal e ƴiiƴam am ndufeteeɗam ngam mooɗon.

²¹ “Ammaa, raɗɗum, kokkitirayɗoyam e nyamda e am ɗo'o.

²² Ngam Ɓii Neɗɗo maayay non no Allah suɓi, ammaa kokkitirayɗomo wonii!”

²³ Tokkuɓemo puɗɗi ƴamƴamtirki hakkunde maɓɓe, koo ɗum moye nder maɓɓe waɗata fii ɗu'um.

Geddi Dow Moye Woni Mawɗo

²⁴ Kadimaa geddi ummii hakkunde maɓɓe dow moye nder maɓɓe woni mawɗo.

²⁵ Yeesu wi'iɓe, “Laamiiɓe yimɓe naa' Yahuudanko'en e kolla yimɓe maɓɓe laamu sembe, fuu e non e ɓe noddira ko'e maɓɓe wallooɓe yimɓe.

²⁶ Ammaa onon, to' on ngaɗu non. Sey ɓurɗo mangu nder mooɗon warta bo pamaro, nden ardiiɗo warta bo maccuɗo.

²⁷ Moye ɓuri mangu, jooɗiiɗo ngam nyaama koo gaddoowo nyamndu? Ay on ɗon jooɗiiɗo woni mawɗo. Ammaa, e mi ɗon hakkunde mooɗon bo maccuɗo.

²⁸ “Onon ngoni darodiiɓe e am e goonga nder torra ka njarumi.

²⁹ No Nyaako am Mo Dow hokkiriyam laamu, non min maa, mi hokkii'on laamu

³⁰ nyamdon e am njardon e am nder laamu am, nden njooɗooɗon dow jooɗorle laamu, on laamoo lenyi Israa'iila sappo e ɗiɗi.

Yeesu Wi'i Biiturus Yedday Andukimo

³¹ “Siiman, Siiman, raɗɗum Ceyɗan ƴamii laawol foonda'on, boo o hokkaama. E mo yiɗi o seɗa'on no ɗum seɗirta alkamaari e nyaande.

³² Ammaa mi waɗaniima do'aare, Siiman, ngam to' alaa hoolaakiyam. An boo, taa wartii to am, cembiɗinaa bandiraaɓe maaɗa.”

³³ Ammaa Biiturus wi'imo, “Moodibbo, e mi siryii yaaduki e maaɗa suudu cural, haa e mayde.”

³⁴ Yeesu wi'i, “E mi wi'umaa, Biiturus, hande ko njakardi hana, a wi'ay a andaayam nde tati.”

Carel Torra e Wara

³⁵ Sey Yeesu ƴamiɓe wi'i, “Carel ko lilmi'on mbiimi'on to' on njaadu e ceede, to' on njaadu e jakaare koo paɗe koyɗe ɗiɗi, e woodi ko ndulluɗon?” Ɓe mbi'i, “Walaa.”

³⁶ O wi'iɓe, “Ammaa jooni, gooduɗo ceede e jakaare, hocca. Mo walaa kaafahi, soora cuddaari muuɗum sooda go'oti.

³⁷ E mi wi'a'on, aayaare nde'e doole heewa dow am bi'unde, ‘Ɗum hoccaymo bo kalluɗo,’ ngam ko windaa dow am ɓadake heewuki.”

³⁸ Tokkuɓemo mbi'i, “Moodibbo, raa kaafaaje ɗiɗi.” O wi'iɓe, “Ɗum heƴii non.”

Yeesu Waɗii Do'aare Dow Hocceere Nde Leɗɗe Jaytun

³⁹ Yeesu wurtii, yahi Hocceere Nde Leɗɗe Jaytun no o woowi, tokkuɓemo maa e tokkimo.

⁴⁰ Nde ɓe njottii wigeere nden, o wi'iɓe, “Ngaɗee do'aare to' njahon to ngaɗoton hakke.”

⁴¹ Yeesu hakkitii kanum tan ko waɗata hubaaki hayre, sey o yani e leydi e mo hippii, o waɗi do'aare, o wi'i,

⁴² “Nyaako am Mo Dow, taa jaɓii, ittanam jardugel torra ka'a. Fuu e non, naa' ko ngiɗumi waɗetee, ammaa ko ngiɗɗaa waɗee.”

⁴³ Sey malaa'ikaajo ƴiwoyi daga dow wanganimo sembiɗinimo.

⁴⁴ E mo nder torra kalluka, ngam non o ɓeydi waɗuki do'aare. Asawre maako warti bo ƴiiƴam e simta e leydi.

⁴⁵ Nde o yottini do'aare, sey o so''ii to ɓen ɗon tokkuɓemo, o tawi e ɓe ɗaanii ngam wannaare waɗi ɓe comii.

⁴⁶ O wi'iɓe, “Ngam ɗume ɗaanotooɗon? Ummee, ngaɗee do'aare to ɗum foondii'on to' ngaɗon hakke.”

Ɗum Nangii Yeesu

⁴⁷ Yeesu e meta, sey yimɓe ɗuɗɓe ngari. Yahuuda, go'oto nder tokkuɓemo sappo e ɗiɗo e mo ardiiɓe. Yahuuda ɓaddii Yeesu ngam hownamo.

⁴⁸ Yeesu wi'imo, “Yahuuda, a hokkitiray Ɓii Neɗɗo e hownuki higaaku?”

⁴⁹ Nde tokkuɓe Yeesu ngi'i ko waɗata, ɓe mbi'imo, “Moodibbo, min pe''iraɓe kaafaaje?”

⁵⁰ Go'oto maɓɓe fe''i maccuɗo Mawɗo Mawɓe Ardiiɓe Diina ittanimo nowru nyaamo.

⁵¹ Ammaa Yeesu wi'i, “Alee! To' on ɓeydu!” Yeesu meemi nowru neɗɗo on, yamɗitinimo.

⁵² Sey Yeesu wi'i mawɓe, e mawɓe ardiiɓe diina, e mawɓe taadiiɓe Wuro Ceniingo garoyɓe nangukimo, “On ngardoyi e kaafaaje e cabbi ngam nangoyyam bo mi gujjo calorɗo?

⁵³ Koo ndeye nyalnde e mi wondi e mooɗon nder Wuro Ceniingo, on nangaayiyam. Ammaa jooni ɗum carel mooɗon, e laamu nyiwre.”

Biiturus Wi'ii Andaa Yeesu

⁵⁴ Sey ɓe nangi Yeesu, ɓe ndillidi e maako, ɓe njaarimo wuro Mawɗo Mawɓe Ardiiɓe Diina. Biiturus boo e woɗɗiti e tokkiriɓe gaɗa.

⁵⁵ Nden ɓe kuɓɓi hiite caka wuro, ɓe njooɗii, Biiturus maa sey jooɗii nder maɓɓe.

⁵⁶ Sey goɗɗo korɗo yi'imo e mo jooɗii e mo irfoo. Korɗo on boo sutiimo wi'i, “Neɗɗo o'o maa e wondi e Yeesu.”

⁵⁷ Ammaa Biiturus yeddi, wi'i, “Mi andaamo.”

⁵⁸ Gaɗa ɗon seɗɗa goɗɗo yi'imo wi'i, “An maa, a go'oto nder tokkuɓemo.” Ammaa Biiturus wi'i, “Higo, naa' mi tokkuɗomo!”

⁵⁹ Nde yawtii seɗɗa, goɗɗo maa wi'i, “Seko walaa neɗɗo o'o maa e wondi e Yeesu, ngam kanko maa o Galilankeejo.”

⁶⁰ Biiturus wi'imo, “Higo, mi andaa ko mbi'ataa!” Ɗon e ɗon e mo nder metuki, njakardi hani.

⁶¹ Sey Yeesu yeeƴii raari Biiturus. Sey Biiturus siftori ko Yeesu wi'unoomo wi'uki, “Hande ko njakardi hana, a wi'ay a andaayam nde tati.”

⁶² Sey o wurtii yaasi o woyi bojji nawɗi.

Ɗum Jukkitii Yeesu Ɗum Fiyiimo

⁶³ Sey yimɓe jogiiɓe Yeesu fuɗɗi jukkutukimo, e ɓe piyamo.

⁶⁴ Ɓe cuddi gite maako ɓe ngaɗi ka ƴamukimo ɓe mbi'i, “Waɗu annabaaku! Moye fiyumaa?”

⁶⁵ Ɓe kuɗirimo haalaaji nawɗi.

Yeesu Yeeso Kawtal Mawɓe

⁶⁶ Nde weeti, Kawtal Mawɓe kawriti e mawɓe ardiiɓe diina e moodiɓɓe Attawra. Yeesu waddaa yeeso maɓɓe.

⁶⁷ Ɓe mbi'imo, “To an woni Almasiihu, wi'uminka.” Ammaa Yeesu wi'iɓe, “To mi wi'ii'onka, on njaɓataa.

⁶⁸ To mi ƴamii'on boo, on nootantaakoyam.

⁶⁹ Ammaa daga jooni, Ɓii Neɗɗo jooɗoto e jungo nyaamo ngo Allah Joomu Bawɗe.”

⁷⁰ Ɓe fuu ɓe mbi'i, “An, a Ɓiɗɗo Allah?” O wi'iɓe, “Non no mbiiɗon.”

⁷¹ Ɓe mbi'i, “En naniika e honduko maako jooni. E woodi ko ɗaɓɓiteten kadin?”