Luka 20 - Fulfulde Nigeria

Ƴamol Dow Baptisma Yahaya

¹ Wonde nyalnde, Yeesu e ekkitina yimɓe nder Wuro Ceniingo, e mo wa'ajina Habaru Belɗum, sey mawɓe ardiiɓe diina e moodiɓɓe Attawra e mawɓe yimɓe ngari to maako,

² ɓe mbi'imo, “E laamu moye ngaɗataa kuuɗe ɗe'e? Moye hokkumaa laamu ɗum?”

³ O wi'iɓe, “Min maa mi ƴamay'on, jooni mbi'eeyam,

⁴ baptisma ɗum Yahaya waɗi, to Allah ɗum ƴiwoyi koo to yimɓe ɗum ƴiwoyi?”

⁵ Sey ɓe meddi hakkunde maɓɓe, ɓe mbi'i, “To en mbi'ii, ‘Daga to Allah ɗum ƴiwoyi,’ o wi'ay, ‘Ko waɗi on jaɓaayi ko o wi'i?’

⁶ To boo en mbi'ii, ‘To yimɓe ɗum ƴiwoyi,’ yimɓe ɓe'e fuu kuborto'en kaaƴe, ngam ɓe njaɓii Yahaya o annabiijo.”

⁷ Ngam non ɓe mbi'i Yeesu, “Min andaa to ɗum ƴiwoyi.”

⁸ Sey Yeesu wi'iɓe, “Non min maa, mi wi'ataa'on koo e ɗume laamu ngaɗiraymi kuuɗe ɗe'e.”

Misaalu Ɗum Jaɓuɓe Nyamaande Ngesa Inabooje

⁹ Sey Yeesu fuɗɗi hokkuki yimɓe misaalu ɗu'um, o wi'i, “Goɗɗo neɗɗo waɗi ngesa inabooje, o hokkika woɓɓe remooɓe mo''inaka, o dilli wondi leydi o neeɓi ton.

¹⁰ Nde carel ɓenduki inabooje ɗen waɗi, o lili maccuɗo to ɓe o hokki ngesa kan o jaɓonoyamo ko ɓe ngaadi nder ko ɓendi. Sey ɓe piyi maccuɗo on ɓe ndiiwimo koo ko ɓe kokkimo.

¹¹ Joomu ngesa on lili goɗɗo maccuɗo kadin, kanko maa ɓe piyimo ɓe kuɗi kuɗinimo, ɓe co''imo, koo ko ɓe kokkimo.

¹² Sey o fuɗɗiti o lili maccuɗo tataɓo, kanko boo ɓe nawnimo ɓe mburtinimo nder ngesa kan.

¹³ Sey joomu ngesa on wi'i, ‘Ko ngaɗaymi? Mi lilay ɓiɗɗo am mo ɓurmi yiɗuki. E mi kammoo ɓe kokkaymo mangu.’

¹⁴ Ammaa nde ɓe o hokki ngesa kan ngi'i ɓiɗɗo joomu ngesa on, sey ɓe mbi'i hakkunde maɓɓe, ‘Too! Raa donoowo ngesa kan. Ngaree mbarenmo, ndonu ngesa kan warta ɗum meeɗen.’

¹⁵ Sey ɓe mburtinimo nder ngesa kan ɓe mbarimo. “Too, ko kammiiɗon joomu ngesa on waɗantaɓe?

¹⁶ O waray o halkaɓe, o hokka woɓɓe ngesa kan.” Nde yimɓe nani non, ɓe mbi'i, “Allah hoyna!”

¹⁷ Ammaa Yeesu raariɓe wi'i, “Too, ko woni ma'ana aayaare bi'unde: ‘Hayre nde mahooɓe nganyi, kayre warti hayre ɓurnde darnuki maadi?’

¹⁸ “Koo moye yanoyi dow hayre nden yewi yewinay; ammaa to hayre nden yanii dow goɗɗo, nde namaymo bo condi.”

Yoɓuki Kaysar Ceede Leydi

¹⁹ Moodiɓɓe Attawra e mawɓe ardiiɓe diina e ngiɗi nanga Yeesu ɗon e ɗon, ngam ɓe paamii dow maɓɓe o hokki misaalu ɗu'um, ammaa e ɓe kula yimɓe.

²⁰ Ngam non ɓe ngaɗani Yeesu gite, ɓe lili woɓɓe nanditinɓe e yimɓe ɓe goonga ngam ɓe nana koo o wi'ay goɗɗum ɗum ɓe keɓata ɓe ngulliroyoomo yeeso gomnaajo leydi.

²¹ Lilaaɓe ɓen sey ƴami Yeesu mbi'i, “Moodibbo, e min andi ko mbi'ataa e ko ngaɗataa ɗum goonga, a hollataa yidde hoore, a ekkitina laawol Allah e goonga.

²² E yiiki maaɗa e haani min njoɓa Kaysar Mawɗo Laamiiɓe ceede leydi, koo ɗum haanaayi?”

²³ Ammaa Yeesu e andi ƴoyre maɓɓe, sey o wi'iɓe,

²⁴ “Kolleeyam yamnde ajurfaari. Ɗowdi moye e inde moye woni dow mayre?” Ɓe mbi'i, “Ɗum Kaysar.”

²⁵ O wi'iɓe, “Ngam non, kokkee Kaysar ko woni ɗum Kaysar, nden kokkon Allah ko woni ɗum Allah.”

²⁶ Ɓe keɓaayi ko ɓe nangirtamo nder ko o wi'iɓe yeeso yimɓe, sey ɓe nde''iti e ɓe kayɗina e no o nootoraniiɓe.

Ƴamol Dow Ummaaki Yimɓe Daga Mayde

²⁷ Saadusanko'en e mbi'a walaa ummaaki mayɓe. Woɓɓe maɓɓe ngari to Yeesu,

²⁸ ɓe ƴamimo, ɓe mbi'i, “Moodibbo, Annabi Muusa wi'ii to neɗɗo te'ii debbo maayii danyidaayi e maako, sey sakiraawo maako te'amo ngam heɓana sakiraawo muuɗum mayɗo ɓiɓɓe.

²⁹ Too, ndenno e woodi woɓɓe sakiraaɓe worɓe njoweeɗiɗo. Afo on te'i debbo, maayi, danyidaayi e maako.

³⁰ Ɗiɗaɓo on te'i debbo on, kanko maa o maayi, ɓe ndanyidaayi.

³¹ Tataɓo on maa te'i debbo on, kanko maa o maayi ɓe ndanyidaayi. Non sakiraaɓe njoweeɗiɗo ɓen ɗon ɓe fuu ɓe te'iinomo, ɓe maayi, ɓe ndanyidaayi e maako.

³² Gaɗa maajum debbo on maa maayi.

³³ Too, jooni, nyalnde nde mayɓe ummotoo, debbo on wartay debbo moye nder maɓɓe? Ngam ɓe fuu njoweeɗiɗo ɓe te'iimo.”

³⁴ Yeesu nootii wi'iɓe, “Yimɓe jaamanu ɗu'um e te'indira,

³⁵ ammaa yimɓe ɓe Allah yi'i e haani ɓe ummoo Nyalnde Jaango, nyalnde nde ɗum umminta mayɓe, worɓe te'ataa, rewɓe te'ataake.

³⁶ Ɓe puɗɗitataa ɓe maaya, ngam ɓe ngartay bo malaa'ika'en. Ɓe ɓiɓɓe Allah ngam ɓe ummake daga mayde.

³⁷ Koo nder habaru leggel goodungel hiite, Annabi Muusa hollii mayɓe ummoto, ngam o noddirii Joomiraawo ‘Allah mo Ibraahim, Allah mo Iciyaaku, Allah mo Yaakubu.’

³⁸ Kanko naa' o Allah mayɓe, ammaa o Allah gooduɓe yonki. Ngam to maako, koo moye e woodi yonki.”

³⁹ Woɓɓe moodiɓɓe Attawra mbi'imo, “Moodibbo, a wi'ii goonga.”

⁴⁰ Daga ɗon walaa gaɗuɗo sembe ɓernde ƴamimo wongol ƴamol.

Ƴamol Dow Kisnoowo

⁴¹ Ammaa Yeesu wi'iɓe, “No waɗata e ɓe mbi'a Almasiihu ɗum ɓiɗɗo Dawda?

⁴² Ngam Dawda e hoore muuɗum wi'i nder deftere Jabuura, ‘Joomiraawo wi'ii Joomiraawo am, “Jooɗa to jungo am nyaamo,

⁴³ naa mi waɗii a yaaɓii wanywanyɓe maaɗa.” ’

⁴⁴ Dawda e noddira Almasiihu ‘Joomiraawo.’ No waɗata o warta ɓiɗɗo Dawda?”

Yeesu Wagginii Tokkuɓemo Dow Moodiɓɓe Attawra

⁴⁵ Yeeso koo moye o wi'i tokkuɓemo,

⁴⁶ “Paamanee moodiɓɓe Attawra, giɗuɓe yiilaaki e ɓornii toggoho njuutuko, giɗuɓe hownireeki mangu nder luumo. E ɓe ngiɗi jooɗaaki dow jooɗorle mawɓe nder cuuɗi do'aare e jooɗorle mawɓe to humto.

⁴⁷ Kamɓe ngoni nyaamooɓe jawdi rewɓe ɓe worɓe mu''en maayi, waɗooɓe do'aaje juutuɗe ngam ɗum yi'aɓe. Ɓe ɓuray yaruki bone.”