Luka 2 - Fulfulde Nigeria

Danyngol Yeesu

¹ Carel ko Yahaya Gaɗoowo Baptisma danyaa, Mawɗo Laamiiɓe leyɗe Rooma bi'eteeɗo Kaysar Agustus wi'i wonɓe nder laamu Rooma fuu ɗum winda inɗe maɓɓe.

² Kanki woni winduki arandehi ki ɗum waɗi carel ko Kiriiniyus woni gomnaajo leydi Siiriya.

³ Koo moye yahi to lenyol muuɗum ƴiwoyi ngam ɗum winda inde muuɗum.

⁴ Sey Yusufu maa ummii daga gariiri Najarat nder leydi Galiili. O yahi gariiri to Dawda danyaa bi'eteendi Baytalaami ngondi nder leydi Yahuudiya, ngam kanko daga lenyol Dawda.

⁵ O yahu ton ngam ɗum winda inde maako, kanko e Maryaama, mo ɗum waɗanimo alkawal teegal. Maryaama on e woodi reedu.

⁶ E ɓe nder Baytalaami, sey carel danyngol maako waɗi.

⁷ Sey o danyi ɓiɗɗo gorko, afo maako, o saawimo nder wudere wooɗunde, o fukkinimo nder to ɗum waɗanta marle nyamndu, ngam walaa njayri nder suudu hoɓɓe.

Malaa'ika'en Wanganii Woynaaɓe

⁸ E woodi woynaaɓe haade ɗon e ɓe mbaala yaasi, e ɓe ndeena marle maɓɓe jemma.

⁹ Sey malaa'ikaajo Joomiraawo wanganiɓe nder teddungal Joomiraawo, kulol nangiɓe.

¹⁰ Ammaa malaa'ikaajo on wi'iɓe, “To' on kulu! Mi waddanii'on habaru ɓurɗum welki ngam koo moye.

¹¹ Hande nder gariiri Dawda ɗum danyanii'on kisnoowo, kanko woni Almasiihu, Joomiraawo.

¹² Raa no keɓtirtonmo, on taway ɓingel e saawaa nder wudere, nden e ngel fukkinaa nder to ɗum waɗanta marle nyamndu.”

¹³ Ɗon e ɗon sey woɓɓe malaa'ika'en ɗuɗɓe wangi haade malaa'ikaajo on, e ɓe mawnina mangu Allah, e ɓe mbi'a,

¹⁴ “En mawnin Allah Mo Dow, jam jooɗoo nder duuniyaaru e dow yimɓe ɓe o nanata belɗum maɓɓe.”

¹⁵ Nde malaa'ika'en ɓen co''ii dow, sey woynaaɓe ɓen ngaɗi ka medduki, e ɓe mbi'a, “En njahu Baytalaami ngi'en fii ɗu'um ɗum Joomiraawo wi'i'en.”

¹⁶ Sey ɓe njawɗii, ɓe njahi, ɓe tawi Maryaama e Yusufu e ɓingel ngel e ngel fukkii nder to ɗum waɗanta marle nyamndu.

¹⁷ Nde ɓe ngi'ingel, ɓe ndilli, ɓe mbi'i yimɓe ko malaa'ikaajo wi'iɓe dow maagel.

¹⁸ Ko woynaaɓe ɓen mbi'i kayɗinii koo moye nanɗo.

¹⁹ Ammaa Maryaama boo e jogii ko nani fuu nder ɓernde muuɗum, o waɗi ka nyumuki dow maajum.

²⁰ Sey woynaaɓe ɓen co''ii, e ɓe mawnina Allah, e ɓe mantamo ngam koo ɗume ko ɓe nani e ko ɓe ngi'i, non no ɗum wi'iriɓe.

Yeesu Waɗanaama Inde

²¹ Nde ɓingel ngel waɗi balɗe joweetati, ɗum naadimo ɗum hokkimo inde Yeesu, inde nde malaa'ikaajo hokkimo ko ɗum waɗa reedu maako.

Ɗum Yaarii Yeesu Wuro Ceniingo

²² Gaɗa balɗe lootaaki maɓɓe heenyi no Annabi Muusa wi'i nder Attawra ɓe ngaɗa to ɓe ndanyii, Yusufu e Maryaama njaari Yeesu Urucaliima yeeso Joomiraawo.

²³ Non ɗum windiraa nder Attawra, “Koo moye gorko afo, Joomiraawo jeyimo.”

²⁴ Ɓe cakkani Allah no ɗum windiraa nder Attawra, “pooli ɗiɗi koo boo tattabarahoy ɗiɗoy.”

²⁵ E carel ngel e woodi goɗɗo neɗɗo nder Urucaliima bi'eteeɗo Saaminu, aadiliijo, kuloowo Allah. O haaɓii o yi'a garol Almasiihu ngam hisna yimɓe Israa'iila. Ruuhu Allah e wondi e maako,

²⁶ holliimo o maayataa naa o yi'ii Almasiihu Joomiraawo.

²⁷ Ruuhu Allah yaarimo nder Wuro Ceniingo. Sey Maryaama e Yusufu ngaddoyi Yeesu nder wuro ngon ngam waɗankimo ko Attawra wi'i.

²⁸ Saaminu jaɓi ɓingel ngel nder juuɗe muuɗum, nden manti Allah, wi'i,

²⁹ “Yaa Joomiraawo, a hebbinii alkawal maaɗa. Jooni alu maccuɗo maaɗa dilla jam.

³⁰ Ngam gite am ngi'ii kisnoowo mo liloyɗaa,

³¹ mo ciryaniɗaa lenyi fuu.

³² O wartay bo jayngol, o hollay lenyi duuniyaaru laawol maaɗa, o waɗay yimɓe maaɗa Yahuudanko'en keɓa mangu.”

³³ Nyaako ɓingel ngel e maduujo maagel ɓe kayɗini e ko ɗum wi'i dow maagel.

³⁴ Sey Saaminu barkiɗiniɓe, nden o wi'i Maryaama, maduujo Yeesu, “Ɓingel nge'el wartay ɗatal yanuki ɗuɗɓe e ummaaki ɗuɗɓe nder leydi Israa'iila. Ngel wartay anditirɗum daga Allah ɗum yimɓe ɗuɗɓe nganyata.

³⁵ Ɓiɗɗo o'o wanginay nyumooji yimɓe cuuɗiiɗi. An maa, ɓernde maaɗa naaway bono kaafahi tufinde.”

³⁶ Ɗonmaa e woodi annabiijo debbo bi'eteeɗo Hannatu ɓii Faanuwel, ƴiwoyɗo daga lenyol Aaciru. Debbo on o nayeejo, o jooɗodake e gorko maako duuɓi joweeɗiɗi, nden gorko on maayii.

³⁷ Gaɗa goriiko maayi, o jooɗii o te'aaka haa duuɓi maako ngaɗi 84. Koo ndeye e mo yaha Wuro Ceniingo e mo mawnina Allah, e mo suumoo, e mo waɗa do'aare jemma e nyalawma.

³⁸ E carel ngel, o waroyi to maɓɓe, o yetti Allah, o yahi to kaaɓuɓe yi'uki carel ko Allah rimɗinta Urucaliima, o hokkiɓe habaru dow ɓingel ngel.

Danyooɓe Yeesu Co''ake Najarat

³⁹ Nde Yusufu e Maryaama njottini koo ɗume ko Attawra wi'i ɗum waɗa, ɓe co''ii gariiri maɓɓe Najarat nder leydi Galiili.

⁴⁰ Yeesu mawni, sembiɗi, faamu heewimo, nden barka Allah e dow maako.

Yeesu Nder Wuro Ceniingo

⁴¹ Koo ɗume ndungu danyooɓe Yeesu e njaha Urucaliima ngam Humto Sakkinki.

⁴² Nde Yeesu waɗi duuɓi sappo e ɗiɗi, ɓe njahi humto no ɓe mboowi.

⁴³ Gaɗa humto ngon heenyi, danyooɓe maako e dow ɗatal hootuki wuro, Yeesu boo darii nder Urucaliima, ammaa danyooɓe ɓen andaa o darake.

⁴⁴ E ɓe kammii e mo nder ɓe ɓe njaadata, ɓe ngaɗi yaadu nyalnde go'o, nden ɓe puɗɗi ɗaɓɓutukimo nder bandiraaɓe maɓɓe e higooɓe maɓɓe.

⁴⁵ Nde ɓe ɗaɓɓiti ɓe keɓtaayimo, ɓe co''ii Urucaliima ngam ɗaɓɓutukimo.

⁴⁶ Nder nyalnde tatawre ɓe tawimo nder Wuro Ceniingo, e mo jooɗii hakkunde moodiɓɓe, e mo nanaɓe, nden e mo ƴamaɓe.

⁴⁷ Nanɗomo fuu hayɗini e faamu maako e nootaaki maako.

⁴⁸ Nde danyooɓe maako ngi'imo, ɓe kayɗini. Maduujo maako wi'imo, “Ɓiɗɗo am, ko waɗi ngaɗanɗaamin niini? Min e nyaako maaɗa nde min ɗaɓɓiti min ngi'aayima, min ngannii.”

⁴⁹ O wi'iɓe, “Ko waɗi ɗaɓɓitotoyyam? On andaa e haani mi jooɗoo nder wuro Nyaako am?”

⁵⁰ Ammaa ɓe faamaayi ko o wi'iɓe.

⁵¹ Sey Yeesu so''odii e maɓɓe Najarat, e mo waɗa ko ɓe mbi'imo fuu. Maduujo maako jogii fii ɗu'um fuu nder ɓernde muuɗum.

⁵² Yeesu mawni, ɓeydi faamu e heɓuki yidde daga to Allah e to yimɓe.