Luka 18 - Fulfulde Nigeria

Misaalu Dow Alkaaliijo e Goɗɗo Debbo

¹ Sey Yeesu hokki tokkuɓemo misaalu ɗu'um ngam o hollaɓe ɓe ngaɗa ka waɗuki do'aare to' ɓe coma.

² O wi'i, “E wondi gariiri e woodi goɗɗo alkaaliijo mo hulataa Allah o wannaa e yimɓe.

³ E woodi goɗɗo debbo nder gariiri ndin gorko maako maayi. Koo ndeye e mo yaha to alkaaliijo on e mo toroomo e mo wi'a, ‘Waɗu ko haani hakkunde am e ganyo am.’

⁴ Alkaaliijo on neeɓi jaɓaayi. Ammaa gaɗa ɗon o wi'i nder ɓernde maako, ‘Koo nde mi hulataa Allah, kadin mi wannaa e koo moye,

⁵ ammaa ngam debbo o'o e wannayam, mi waɗanaymo ko haani, ngam to' o waɗa mi soma e garol maako.’ ”

⁶ Nden Yeesu wi'i, “Nanee ko alkaaliijo o'o mo hulataa Joomiraawo wi'i.

⁷ E yi'uki mooɗon Allah waɗantaa cuɓaaɓe muuɗum torotooɓemo jemma e nyalawma ko haani? O neeɓay o wallaayiɓe?

⁸ E mi wi'a'on, o yaaway waɗankiɓe ko haani. Ammaa to Ɓii Neɗɗo wartoyii, o taway kooliiɓemo nder duuniyaaru boo?”

Misaalu Dow Faarisankeejo e Jaɓoowo Ceede Leydi

⁹ E woodi ngi'ooɓe ko'e mu''en ɓe gaɗooɓe ko Allah yiɗi, e ɓe njawana woɓɓe. Yeesu hokkiɓe misaalu ɗu'um.

¹⁰ O wi'i, “Yimɓe ɗiɗo njahi Wuro Ceniingo ngam ɓe ngaɗa do'aare, go'oto Faarisankeejo, go'oto boo jaɓoowo ceede leydi.

¹¹ Faarisankeejo on darii, waɗi do'aare nder ɓernde muuɗum wi'i, ‘Allah, mi yettiima ngam mi waɗataa ko woɓɓe yimɓe ngaɗata, bo wuyɓe, e gaɗooɓe ko wooɗaa, e gaɗooɓe njeenu, koo maa bo jaɓoowo ceede leydi o'o.

¹² E mi suumoo nde ɗiɗi nder yontoore go'o, nden e mi itta jakka nder ko keɓumi fuu.’

¹³ Ammaa jaɓoowo ceede leydi on darii to woɗɗi. O raaraayi dow, e mo rondi juuɗe maako dow hoore, e mo wi'a, ‘Yaa Allah, yurminanam, mi waɗii hakke.’

¹⁴ E mi wi'a'on, jaɓoowo ceede leydi on hootii wuro o jaafanaaɗo hakke maako, ammaa Faarisankeejo on yaafanaaka. Ngam koo moye mawninɗo hoore muuɗum o pamɗinteeɗo, nden lestinɗo hoore muuɗum boo o mawninteeɗo.”

Yeesu Barkiɗini Ɓikkoy Pamaroy

¹⁵ Yimɓe e ngaddana Yeesu sukahoy maɓɓe pamaroy ngam o barkiɗinakoy, ammaa nde tokkuɓemo ngi'i non, ɓe kaɓaniɓe.

¹⁶ Ammaa Yeesu noddi sukahoy koy to muuɗum, wi'i, “Alee sukahoy pamaroy ngara to am. To' on kaɗukoy, ngam gooduɓe ɓerɗe iri ɗe maakoy njeyi Laamu Allah.

¹⁷ E mi wi'a'on goonga, koo moye mo jaɓaayi Laamu Allah bono sukayel pamarel, o nattataa laamu ɗum koo seɗɗa.”

Laamiiɗo Diskuɗo

¹⁸ Sey goɗɗo laamiiɗo ƴamimo wi'i, “Moodibbo geeto, ko haani mi waɗa mi heɓa yonki ki re'ataa?”

¹⁹ Yeesu nootii, wi'imo, “Ngam ɗume noddirɗaayam geeto? Walaa geeto sey Allah tan.

²⁰ A andi ko Attawra wi'i, ‘Taa' waɗu njeenu. Taa' waɗu warhoore. Taa' wujju. Taa' hokku ceyda fewre. Hokku nyaako maaɗa e maduujo maaɗa mangu.’ ”

²¹ O wi'i, “E mi waɗa fii ɗu'um fuu daga e mi suka.”

²² Nde Yeesu nani non, wi'imo, “Haa jooni horanimaa fii go'o. Sooru ko ngooduɗaa fuu, cendanaa ɓe ngalanaa ceede ɗen, nden a heɓay mbarjaari ton dow. Nden ngaraa, tokkaayam.”

²³ Nde o nani non, o nanaayi belɗum, ngam e mo woodi risku ɗuɗɗum.

²⁴ Yeesu raarimo wi'i, “E ɗum saɗi naa' seɗɗa diskuɗo natta Laamu Allah!

²⁵ Ɗum ɓuray hoyki ngeelooba tokka nder yolnde baatal dow diskuɗo natta Laamu Allah.”

²⁶ Nanuɓe ko o wi'i mbi'imo, “Too, to ɗum non, moye hisata?”

²⁷ Yeesu wi'iɓe, “Ko yimɓe mbaawataa waɗuki, Allah waaway waɗukiɗum.”

²⁸ Biiturus wi'imo, “Raɗɗum, min alii ko min ngoodi fuu min tokkiima.”

²⁹ Yeesu wi'iɓe, “E mi wi'a'on goonga, koo moye aluɗo wuro muuɗum, koo debbo muuɗum, koo sakiraaɓe muuɗum, koo danyooɓe muuɗum, koo ɓiɓɓe muuɗum, ngam Laamu Allah,

³⁰ o heɓay ko ɓuri non ɗuuɗuki nder jaamanu ɗu'um, nden to o maayii o heɓay yonki ki re'ataa.”

Yeesu Metii Metuki Tataɓi Dow No Mayrata

³¹ Sey Yeesu noddi tokkuɓemo sappo e ɗiɗo, ɓe kakkitii o wi'iɓe, “Raɗɗum, en njahay Urucaliima, nden koo ɗume ko annabo'en mbindi dow Ɓii Neɗɗo ɗum heeway.

³² Ɗum nangaymo, ɗum hokkitiramo nder juuɗe heeferɓe, ɓe njukkitamo, ɓe kuɗamo, ɓe tuttanamo joode,

³³ ɓe piyamo, ɓe mbaramo. Nden nyalnde tatawre o ummoto daga mayde.”

³⁴ Tokkuɓemo sappo e ɗiɗo ɓen paamaayi ko o wi'i dow hoore maako. Faamu ɗum suuɗanakeɓe, ɓe keɓtaayi dow ɗume o metata.

Yeesu Yamɗitinii Bumɗo Torotooɗo

³⁵ Nde Yeesu ɓadii yottaaki gariiri Jeriiko, goɗɗo bumɗo e jooɗii haade ɗatal e toroo.

³⁶ Nde bumɗo on nani yimɓe ɗuɗɓe e ƴaɓɓoo, o ƴami, “Ko wangi?”

³⁷ Ɓe mbi'imo, “Yeesu Najarankeejo ƴaɓɓotoo.”

³⁸ O noddi e sembe, o wi'i, “Yeesu, Ɓiɗɗo Dawda, yurminanam!”

³⁹ Jahooɓe yeeso Yeesu kaɓanimo mbi'imo o de''ita, ammaa o ɓeydi nodduki e sembe, e mo wi'a, “Ɓiɗɗo Dawda, yurminanam!”

⁴⁰ Ngam non Yeesu darii wi'i ɗum wadda bumɗo on to maako. Nde o ɓaddoyii haade, Yeesu ƴamimo, wi'i,

⁴¹ “Ɗume ngiɗɗaa mi waɗanmaa?” O wi'i, “Moodibbo, e mi yiɗi mbumtinaayam.”

⁴² Sey Yeesu wi'imo, “Wumtu! Hoolaare maaɗa yamɗitiniima.”

⁴³ Ɗon e ɗon gite maako mbumti, o tokki Yeesu, e mo manta Allah. Nde wonɓe ɗon fuu ngi'i ko waɗi, kamɓe maa ɓe manti Allah.