Luka 14 - Fulfulde Nigeria

Yeesu Yamɗitinii Gooduɗo Nyawu Ɓuddi

¹ Wonde Nyalnde Siwtaare Yeesu yahi wuro go'oto nder ardiiɓe Faarisanko'en ngam o nyaama nyamndu. Sey ɓe ngaɗi ka raarukimo, koo o waɗay ko ɓe keɓata ɓe nangiramo.

² Haade maako e woodi goɗɗo gorko gooduɗo nyawu ɓuddi.

³ Yeesu ƴami Faarisanko'en e moodiɓɓe Attawra o wi'i, “Dooka jaɓii ɗum yamɗitina neɗɗo Nyalnde Siwtaare ko aa'a?”

⁴ Ammaa ɓe nootaaki. Sey Yeesu meemi nyawɗo on yamɗitinimo, wi'imo o dilla.

⁵ Nden o ƴamiɓe, o wi'i, “Moye nder mooɗon to ɓiɗɗo muuɗum koo ngaari muuɗum yanii nder ɓundu Nyalnde Siwtaare ittoytaamo ɗon e ɗon?”

⁶ Ɓe keɓaayi ko ɓe mbi'imo.

Hoccu Hoore Maaɗa Naa' A Goɗɗum

⁷ Nde Yeesu faami kumpitaaɓe nyaamuki nyamndu ɗon fuu e cuɓa jooɗaaki to mawɓe njooɗotoo, o hokkiɓe misaalu ɗu'um, o wi'i,

⁸ “To goɗɗo humpitiima humto, taa' jooɗa to mawɓe njooɗotoo. Ɗum gaɗotooɗum o humpitii goɗɗo ɓurɗoma mangu.

⁹ Nden kumpitoyɗoma on o waroyay o wi'umaa, ‘Umma neɗɗo o'o jooɗoo.’ Ngam non boo a semtay, njooɗoɗaa to jooɗorgal cakitiingal.

¹⁰ Ammaa to ɗum humpitiima, jooɗa to jooɗorgal cakitiingal, ngam to kumpitoyɗoma waroyi, o wi'ete, ‘Higo, umma, njooɗoyoɗaa dow jooɗorgal mawɓe.’ Non hokkete mangu yeeso garoyɓe ɗon fuu.

¹¹ Ngam mawninɗo hoore muuɗum fuu o lesneteeɗo, lesninɗo hoore muuɗum boo o mawninteeɗo.”

¹² Nden o wi'i kumpitoyɗomo, “Taa humpitay yimɓe humto to wuro maaɗa, taa' humputu higooɓe maaɗa tan, koo mawniraaɓe e minyiraaɓe maaɗa tan, koo bandiraaɓe maaɗa tan, koo ɓe kedduɗaa riskuɓe. Ngam ɓe kumpitete kamɓe maa, ɓe ngaatanmaa ko ngaɗanɗaaɓe.

¹³ Ammaa taa woodi humto, humputu ɓe ngalanaa, e jaraaɓe, e gurgu'en, e wumɓe.

¹⁴ Ɗum barkiɗinte, ngam ɓe mbaawataa waatankima ko ngaɗanɗaaɓe. Allah waatante Nyalnde Jaango, nyalnde nde o umminta mayɓe gaɗuɓe jonde wooɗunde.”

Misaalu Dow Humto Mango

¹⁵ Nde goɗɗo nder jooɗodiiɓe e maako nani non, o wi'i Yeesu, “Neɗɗo nyaamoowo nyamndu nder Laamu Allah o barkiɗinaaɗo!”

¹⁶ Sey Yeesu wi'imo, “E woodi goɗɗo neɗɗo ciryiiɗo humto mango o humpiti yimɓe ɗuɗɓe.

¹⁷ Nde carel humto ngon waɗi, o lili maccuɗo maako wi'oya kumpitaaɓe ɓen, ‘Ngaroyee, koo ɗume siryaama!’

¹⁸ Ammaa ɓe fuu ɓe ngaɗi ka ɗaɓɓutuki no ɓe calortoo ngam ɓe ngiɗaa yaaki. Arandeejo on wi'imo, ‘Mi soodii ngesa, doole mi yaha mi yi'aka. Waɗu munyal, mi heɓataa yaaki.’

¹⁹ Ɗiɗaɓo wi'imo, ‘Mi soodii na'i demooji kanji sappo, e mi yiɗi yaaki mi foondaɗi jooni. Waɗu munyal mi heɓataa yaaki.’

²⁰ Non tataɓo maa wi'i, ‘Mi neeɓaayi ko te'umi, ngam non mi heɓataa yaaki.’

²¹ Maccuɗo on so''ii wi'i joomu wuro muuɗum koo ɗume. Ɓernde joomu wuro on metti, o wi'i maccuɗo on, ‘Yawnu njahaa dow ɗate mawɗe e ɗate pamare nder gariiri, noddanowaayam ɓe ngalanaa, e jaraaɓe, e wumɓe, e gurgu'en.’

²² Gaɗa maccuɗo on wartoyii wi'i joomu wuro muuɗum, ‘Ko mbiiɗaa ɗum waɗa waɗaama, ammaa fuu e non njayri e horii.’

²³ Sey joomu wuro on wi'i maccuɗo on, ‘Yahu dow ɗate mawɗe e ɗate pamare gaɗa gariiri, noddaa yimɓe ngaroya natta wuro am ngam ngo heewa.

²⁴ E mi wi'a'on, nder kumpitaaɓe arande'en walaa nyaamayɗo nyamndu humto am.’ ”

Bone Tokkuki Yeesu

²⁵ Wonde nyalnde yimɓe ɗuɗɓe e njaada e Yeesu. Sey o raariɓe o wi'i,

²⁶ “Garoyɗo to am fuu to ɓuraayi yiɗukiyam dow nyaako muuɗum e maduujo muuɗum e debbo muuɗum e ɓiɓɓe muuɗum e mawniraaɓe e minyiraaɓe muuɗum ‑ haa maa e yonki muuɗum, o waawataa wartuki tokkuɗoyam.

²⁷ Koo moye to hoccaayi gaafaangal muuɗum tokkiyam waawataa wartuki tokkuɗoyam.

²⁸ Misaalu, to goɗɗo mooɗon e yiɗi mahuki wuro mango, ay arande o jooɗoto taw o lima ko o majjinta, o yi'a koo e mo woodi ko heƴatamo o yottinango.

²⁹ To naa' non, to o fuɗɗii mahukingo o waawataa yottinkingo, gi'uɗongo fuu jalaymo

³⁰ wi'a, ‘Raa neɗɗo o'o fuɗɗii mahuki, ammaa o waawaayi yottinki.’

³¹ Koo boo to laamiiɗo gooduɗo sooji'en 10,000 honiday e laamiiɗo garoyɗo honamo e sooji'en 20,000, arande o jooɗoto taw o yi'a koo e mo woodi sembe honuduki e maako.

³² To o yi'ii o waawataa, o lilay lilaaɓe to garayɗo on ko o yotto, ngam ɓe ɗaɓɓita siryootirki e maako.

³³ Non maa, koo moye to sendiraayi e ko woodi fuu waawataa wartuki tokkuɗoyam.

Lamɗam Mbaatuɗam

³⁴ “Lamɗam ɗum fii boɗɗum, ammaa to belɗum maajam ittake, ko wartirta belɗum maajam?

³⁵ Walaa ko ɗam waɗetee. Ɗam nafataa goɗɗum, sey ni ɗam rufee. Gooduɗo noppi nanooji fuu nana!”