Luka 13 - Fulfulde Nigeria

A Maayay Taa Alaayi Hakke Maaɗa

¹ E carel ngel e woodi woɓɓe ɗon bi'uɓe Yeesu ko heɓi woɓɓe Galilanko'en. Galilanko'en ɓen e kirsana Allah cakkiri, sey Bilaatus gomnaajo waɗi ɗum wariɓe haa ƴiiƴam maɓɓe hawtii e ƴiiƴam ko ɓe cakki.

² Yeesu nootii wi'iɓe, “On kammoo Galilanko'en ɓen ɗon ɓurii Galilanko'en koriiɓe fuu hakke ngam ɓe torriraama nihi?

³ E mi wi'a'on, naa' non! Ammaa to naa' on tuubu, onon maa on fuu on kalketeeɓe.

⁴ Koo maa yimɓe sappo e njoweetato mayɓe carel ko suudu towndu ndu Siluwam yani dow maɓɓe, on kammoo ɓe ɓurii yimɓe koriiɓe jooɗiiɓe nder Urucaliima fuu waɗuki hakke?

⁵ E mi wi'a'on, naa' non! Ammaa to naa' on tuubu, onon maa non kalkirton.”

Misaalu Dow Lekki Ki Rimataa

⁶ Sey o hokki misaalu ɗu'um, o wi'i, “Goɗɗo neɗɗo e woodi lekki ibbi nder ngesa muuɗum, o yahi o yi'a koo e ki woodi ɓikkoy, ammaa o tawi ki walanaa.

⁷ Ngam non o wi'i neɗɗo kuwanoowomo to ngesa kan, ‘Raa, duuɓi tati e mi wara ɗaɓɓutuki ibbe dow ibbi ki'i, ammaa mi heɓataa. Fe''uki! Ngam ɗume ki surata leydi e meere?’

⁸ Kuwoowo to ngesa kan wi'imo, ‘Joomu wuro, ɓeydanki ndungu go'o, mi mo''inanaki leydi, mi waɗanaki ngoobaari.

⁹ To ki rimii ɓikkoy hitaande garaynde, too, wooɗii, ammaa to ki rimaayi, sey pe''aaki.’ ”

Yeesu Yamɗitinii Debbo Nder Nyalnde Siwtaare

¹⁰ Wonde Nyalnde Siwtaare Yeesu e ekkitina nder suudu do'aare.

¹¹ E woodi debbo ɗon ginnol e haɓɓimo duuɓi sappo e joweetati, e ngol turnimo, koo hoore maako o waawataa ƴeftuki.

¹² Nde Yeesu yi'imo, noddimo haade, wi'imo, “Bandiraawo, a hoyii daga nyawu maaɗa.”

¹³ Yeesu yowi juuɗe muuɗum dow maako, ɗon e ɗon o ɓantii o fuɗɗi mantuki Allah.

¹⁴ Ɓernde ardiiɗo suudu do'aare ndun metti ngam Yeesu yamɗitinii goɗɗo Nyalnde Siwtaare. Ngam maajum o wi'i yimɓe, “E woodi balɗe joweego'o ngam kuuɗe, ngaree ɗum yamɗitina'on nder balɗe ɗen, naa' ni nder Nyalnde Siwtaare.”

¹⁵ Sey Yeesu nootii wi'imo, “Onon munaafuki'en! Naa' koo moye mooɗon e fitta ngaari muuɗum koo mbabba muuɗum nder Nyalnde Siwtaare yarnoyanga?

¹⁶ O'o debbo taanu Ibraahim, mo Ceyɗan haɓɓi duuɓi sappo e joweetati, haanaa o fittee Nyalnde Siwtaare?”

¹⁷ Nde o wi'i non, wanywanyɓe maako fuu cemti, ammaa yimɓe nani belɗum e fii kayɗiniiɗum fuu ɗum o waɗata.

Misaalu Dow Gabbel Mastat

¹⁸ Nden Yeesu wi'i, “Ɗume Laamu Allah nandi? Ko nandinaymiɗum?

¹⁹ Laamu Allah e nandi e gabbel mastat ngel goɗɗo hocci aawi nder ngesa muuɗum. Gabbel ngel fuɗi, warti leggel, colli ngaɗi caɓɓe dow lice maaki.”

Misaalu Dow Ƴuufinirɗum

²⁰ O wi'i kadin, “Ɗume nandinaymi Laamu Allah?

²¹ E ɗum nandi e ƴuufinirɗum ɗum goɗɗo debbo hocci lancindiri e condi alkamaari poondirkoy tatoy ndi fuu ndi ƴuufi.”

Dammugal Ɓiɗɗiingal

²² Yeesu e yaha Urucaliima o tokki gariije e ngarihoy e mo ekkitina.

²³ Goɗɗo ƴamimo wi'i, “Moodibbo, yimɓe seɗɗa tan kisata?” O wi'iɓe,

²⁴ “Ndurwee nattiron to dammugal ɓiɗɗiingal, ngam e mi wi'a'on, ɗuɗɓe ndoolay ngam natta ammaa ɓe mbaawataa.

²⁵ To joomu wuro ngon ummake maɓɓii dammugal ngal, on ndaroto yaasi on piya dammugal ngal on toroo on mbi'a, ‘Moodibbo, maɓɓitanmin dammugal!’ Ammaa o wi'ay'on, ‘Mi andaa'on, mi andaa to ƴiwoyɗon.’

²⁶ Nden on mbi'ay, ‘Min nyamdii, min njardii e maaɗa, a ekkitinii nder gariije amin.’

²⁷ Ammaa o wi'ay, ‘E mi wi'a'on, mi andaa'on, mi andaa to ƴiwoyɗon. Cendiree e am, onon kalluɓe.’

²⁸ To on ngi'ii Ibraahim e Iciyaaku e Yaakubu e annabo'en fuu nder Laamu Allah, ammaa onon on mburtinaama, on mboyay nyerƴindiron nyiiƴe.

²⁹ Yimɓe naa' Yahuudanko'en ngaray daga fuuna e hirna e woyla e fombina ɓe njooɗoo ɓe nyaama nyamndu humto nder Laamu Allah.

³⁰ Raɗɗum, woɓɓe cakitiiɓe ɓe ngartay artuɓe, nden woɓɓe artuɓe ɓe ngartay cakitotooɓe.”

Yeesu e Wannii Dow Urucaliima

³¹ E carel ngel, woɓɓe Faarisanko'en ngari to Yeesu mbi'imo, “Alu ɗo'o ngam Hirudus e yiɗi warmaa.”

³² O wi'iɓe, “Njahee mbi'on dilaaru ndun ɗon, ‘Raɗɗum, hande e jaango mi wurtinay ginni mi yamɗitinay ɓe njamɗaa. E nyalnde tatawre mi yottinay kuugal am.’

³³ Fuu e non, doole mi nanga laawol hande e jaango e faɓɓi jaango, ngam haanaa ɗum wara annabiijo bannye sey nder Urucaliima.

³⁴ “Jalla Urucaliima, Urucaliima a warii annabo'en, a wardii liloyaaɓe to maaɗa e kaaƴe! Nde ɗuɗɗum e mi yiɗi moɓtuki yimɓe maaɗa no geroogal moɓtirta ɓikkoy maagal ley biyeeli maagal, ammaa a jaɓaayi.

³⁵ Raɗɗum, Allah alanay'on Wuro Ceniingo mooɗon. E mi wi'a'on, on puɗɗitataa ngi'onyam, naa nyalnde nde mbiiɗon, ‘O barkiɗinaaɗo, garoyɗo nder inde Joomiraawo.’ ”