Luka 10 - Fulfulde Nigeria

Yeesu Lilii Tokkuɓemo 72

¹ Gaɗa maajum Yeesu suɓi woɓɓe kamɓe 72, nden o liliɓe ɗiɗo‑ɗiɗo, ɓe artamo yaaki koo ndiye gariiri e wigeere to o yiɗi yahuki fuu.

² O wi'iɓe, “Gese ɓenduɗe e ɗuuɗi, ammaa huwooɓe ɗuuɗaa. Toree Joomu gese ɗen liloya huwooɓe nder gese maako.

³ Njahee. Mi lilii'on to yimɓe bono mbaaloy hakkunde caafaali.

⁴ To' on njaadu e jakaare ceede koo jakaare limce, koo paɗe, nden to' on kownu goɗɗo kownol juutungol dow ɗatal.

⁵ Wuro ngo nattuɗon fuu, puɗɗee wi'uki, ‘Allah hokka wuro ngo'o jam!’

⁶ To e woodi neɗɗo giɗɗo jam nder wuro ngon, barka mooɗon jooɗoto dow maako, ammaa to walaa, ɗum wartay to mooɗon.

⁷ Njooɗee nder wuro ngo ɗum jaɓɓii'on, nyaamee, njaree koo ɗume ko ɓe kokki'on, ngam kuwoowo e haani yoɓeeki. To' on kakkito daga wuro yaaki wuro.

⁸ Fuu gariiri ndi nattuɗon, to yimɓe mayri njaɓɓake'on, nyaamee ko ɗum resi yeeso mooɗon.

⁹ Njamɗinee nyawɓe wonɓe nder gariiri ndin, nden mbi'onɓe, ‘Laamu Allah warii haade mooɗon.’

¹⁰ Ammaa, gariiri ndi nattuɗon fuu, to ɓe njaɓɓaaki'on, mburtee njahon dow ɗate mayri mbi'on,

¹¹ ‘Min piɗɗii sollaare gariiri mooɗon daga koyɗe amin, kanjum ɗum heɓtirta on ngaɗii hakke. Ammaa andee ɗu'um, Laamu Allah warii haade mooɗon.’

¹² E mi wi'a'on, e Nyalnde Jaango Allah ɓuray yurminanki yimɓe gariiri Sodom dow yimɓe gariiri ndin ɗon.”

Gariije Ɗe Njaɓaayi Goonga Njaray Bone

¹³ O wi'i, “Yimɓe gariiri Korasin, on mbonii! Yimɓe gariiri Betasayda, on mbonii! Daa kuuɗe kayɗiniiɗe gaɗaaɗe nder mooɗon ɗe ngaɗanaama yimɓe Taaya e Sidon, daa ɓe ɓornake kolte kollayɗe wannaare ɓe njooɗake nder tooka ngam holluki ɓe tuubii.

¹⁴ Ammaa Nyalnde Jaango Allah ɓuray yurminanki yimɓe Taaya e Sidon dow mooɗon.

¹⁵ Onon boo, yimɓe gariiri Kafarnahum, on kammii ɗum hoccay'on yaaki dow? Naa' non! Ɗum nattinay'on nder ngayka hiite.”

¹⁶ Nden Yeesu wi'i tokkuɓemo, “Jaɓuɗo ko mbiiɗon fuu jaɓii ko mbiimi, ganyuɗo'on boo wanyiiyam, nden ganyuɗoyam wanyii on ɗon liloyɗoyam.”

So''oyaaki Lilaaɓe 72

¹⁷ Sey tokkuɓemo 72 ngarti e nana belɗum, ɓe mbi'i, “Moodibbo, haa ginni maa ngaɗii ko min mbi'iɗi fuu nder inde maaɗa!”

¹⁸ O wi'iɓe, “Mi yi'ii Ceyɗan yanoyii bo maƴƴere daga dow.

¹⁹ Raa, mi hokkii'on laamu yaaɓuki dow boole e jahe e heɓuki jaalorgal dow bawɗe Ganyo, walaa ko heɓata'on.

²⁰ Ammaa to' on nanu belɗum ngam ginni e ngaɗa ko mbiiɗon, ammaa nanee belɗum ngam inɗe mooɗon mbindaama e wuro Allah.”

Yeesu Nanii Belɗum

²¹ E carel ngel, Yeesu nani belɗum nder Ruuhu Allah, o wi'i, “Mi yettiima, Nyaako am Mo Dow, Joomiraawo dow e ley, ngam a suuɗii fii ɗu'um to gooduɓe faamu e andal, a holliiɗum ɓikkoy pamaroy. Non Nyaako am, ngam non welanmaa ngaɗaa.”

²² Sey o wi'i yimɓe, “Nyaako am hokkiiyam koo ɗume. Walaa anduɗo moye woni Ɓiɗɗo on sey ni Nyaako on, non maa walaa anduɗo moye woni Nyaako on sey ni Ɓiɗɗo on, e mo Ɓiɗɗo on yiɗi andina Nyaako on.”

²³ Sey o waylitii to tokkuɓemo o wi'iɓe kamɓe tan, “Gite gi'uɗe ko ngiiɗon ɗe barkiɗinaaɗe!

²⁴ Ngam e mi wi'a'on, annabo'en ɗuɗɓe e laaminooɓe ɗuɗɓe ngiɗii ngi'a ko ngiiɗon, ammaa ɓe ngi'aayi. Ɓe ngiɗii nanuki ko nanoton, ammaa ɓe nanaayi.”

Misaalu Dow Samaariyankeejo Boɗɗo

²⁵ Sey goɗɗo moodibbo dooka ummii darii ngam foonda Yeesu, o wi'i, “Moodibbo, ko haani mi waɗa ngam mi heɓa yonki ki re'ataa?”

²⁶ Sey Yeesu wi'imo, “Ko windaa nder Attawra? Noye njangirtaa?”

²⁷ O nootii, o wi'i, “ ‘Yiɗu Joomiraawo Allah maaɗa e ɓernde maaɗa fuu, e yonki maaɗa fuu, e sembe maaɗa fuu, e hakkiilo maaɗa fuu,’ nden, ‘Yiɗu bandiraawo maaɗa no ngiɗirɗaa hoore maaɗa.’ ”

²⁸ Yeesu wi'imo, “A nootake boɗɗum. Waɗu non, nden a heɓay yonki ki re'ataa.”

²⁹ Ammaa moodibbo dooka on yiɗii wurtina hoore muuɗum, sey o ƴami Yeesu, o wi'i, “Moye woni bandiraawo am?”

³⁰ Yeesu wi'imo, “Goɗɗo neɗɗo e yaha daga Urucaliima yaaki Jeriiko, sey woɓɓe wuyɓe taɓɓiimo. Ɓe ɓortimo, ɓe njaɓi ko o woodi fuu, ɓe piyimo boɗɗum, ɓe ndilli, ɓe alimo hakkunde yonki e mayde.

³¹ Sey ardiiɗo diina tokkoyi ɗatal ngal. Nde o yi'i neɗɗo on, o seli, o ƴaɓɓii.

³² Kadimaa, goɗɗo Leewiyankeejo tokkoyi ɗatal ngal, nde o waroyi to neɗɗo on woni, o yi'imo, o seli, o ƴaɓɓii.

³³ Ammaa goɗɗo Samaariyankeejo e nder yaadu o waroyi to neɗɗo on woni, o yi'imo, o yurminanimo.

³⁴ O yahi to maako, o lootanimo nawnooɗe e nebbam e ndiyam inabojam, o haɓɓanimo nawnooɗe ɗen. Nden o waɗɗinimo dow mbabba maako o yaarimo wuro to ɗum yoɓata ɗum waala, o wallimo.

³⁵ Nde weeti, Samaariyankeejo on itti ceede ajurfaari ɗiɗi daga jiiba muuɗum, hokki mawɗo wuro on wi'imo, ‘Wallumo. Taa majjinii ceede ko ɓuri ɗe'e, mi yoɓete to mi so''oyake.’ ”

³⁶ Sey Yeesu ƴami moodibbo dooka on wi'i, “Moye nder yimɓe tato ɓe'e kammiɗaa woni bandiraawo mo wuyɓe piyi on?”

³⁷ O wi'i, “On ɗon jurminanɗomo.” Sey Yeesu wi'imo, “An maa, yahu ngaɗaa non.”

Yeesu Yahii Wuro Marta e Maryaama

³⁸ Yeesu e tokkuɓemo e nder yaadu, sey o natti wongel gariyel, goɗɗo debbo bi'eteeɗo Marta jaɓɓiimo to wuro muuɗum.

³⁹ Marta on e woodi minyiraawo bi'eteeɗo Maryaama. Maryaama jooɗii haade Yeesu e mo nana ekkitinol maako.

⁴⁰ Ammaa Marta wannii ngam e huwa kuuɗe ɗuɗɗe. Sey o wari to Yeesu, o wi'i, “Moodibbo, a wannaayi nde minyiraawo am aldiyam e kuugal nga'al min tan? Wi'umo o ummoo o wallayam!”

⁴¹ Ammaa Yeesu nootii, wi'i, “Marta, Marta, a wannii hoore maaɗa dow fii ɗuɗɗum.

⁴² Ammaa fii go'o tan yiɗaa. Maryaama boo suɓii ko ɓuri wooɗuki, ɗum jaɓtataake to maako.”