Luka 1 - Fulfulde Nigeria

Habaru Yeesu Ɗum Luka Windi

¹ Yaa Tiyoofilus mawɗo, Yimɓe ɗuɗɓe fuɗɗii winduki habaru dow ko Yeesu waɗi nder amin.

² Ɓe mbindi habaru ɗum nanɗen daga konduɗe giiɓe ko waɗi e gite maɓɓe, andinooɓe Wolde Allah.

³ Ngam non, min maa ɗum wooɗaniiyam mi ɗaɓɓita koo ɗume e seese‑seese daga fuɗɗuki maajum, mi windanmaa koo ɗume no woni,

⁴ ngam andaa goonga dow koo ɗume ko ɗum ekkitinmaa.

Ɗum Andinii Danyngol Yahaya Gaɗoowo Baptisma

⁵ Nder carel ngel Hirudus laamiiɗo leydi Yahuudiya laamotoo, e woodi ardiiɗo diina bi'eteeɗo Jakaariya, e mo nder ardiiɓe diina daga lenyol Abija. Debbo maako Alisabatu ƴiwoyii daga lenyol Haruuna, waato ardiiɓe diina.

⁶ Ɓe fuu ɗiɗo ɓe njooɗake jonde wooɗunde yeeso Allah, e ɓe ngaɗa koo ɗume ko Joomiraawo wi'i yimɓe ngaɗa.

⁷ Ammaa ɓe ngalaa ɓiɓɓe, ngam Alisabatu o danyataa, kadimaa ɓe fuu ɗiɗo ɓe nawyii.

⁸ Wonde nyalnde Jakaariya e huwa yeeso Allah nder Wuro Ceniingo e ɓe o huudata.

⁹ Ɗum suɓiimo, no ardiiɓe diina mboowi waɗuki, ngam o natta nder Suudu Joomiraawo o wula urde welnde ngam Joomiraawo.

¹⁰ Nde carel wuluki urde welnde waɗi, moɓgal fuu e dari yaasi e ɓe ngaɗa do'aare.

¹¹ Sey malaa'ikaajo Joomiraawo wangi to maako e darii wuttudu nyaamo to ɗum wulata urde welnde.

¹² Nde Jakaariya yi'imo, ɓernde muuɗum taƴi, kulol nangimo.

¹³ Ammaa malaa'ikaajo on wi'imo, “Taa' hulu Jakaariya, Joomiraawo nanii do'aare maaɗa. Debbo maaɗa Alisabatu danyante ɓiɗɗo gorko, nden a hokkaymo inde Yahaya.

¹⁴ Ɓiɗɗo on waɗete nanaa belɗum ɗuɗɗum, ɗuɗɓe maa nanay belɗum ngam danyeeki maako,

¹⁵ ngam o wartay mawɗo yeeso Joomiraawo. O yarataa ndiyam inabojam koo njaru gaylitayngu hoore, nden o heeway Ruuhu Allah daga e mo nder reedu maduujo maako.

¹⁶ O wartiray ɓiɓɓe Israa'iila ɗuɗɓe to Allah Joomiraawo maɓɓe.

¹⁷ O artay Almasiihu warki nder bawɗe Ruuhu Allah ɗe Annabi Iliya heɓunoo, o siryootiray danyooɓe e ɓiɓɓe maɓɓe. O waylitay caliiɓe ɗatal Joomiraawo to ɗatal gooduɓe goonga. O waɗay yimɓe ciryoo ngam garol Joomiraawo.”

¹⁸ Jakaariya ƴami malaa'ikaajo on wi'i, “Noye andiraymi ko mbiiɗaa ɗum goonga? Min, mi nawyii, debbo am boo duuɓi muuɗum ɗuuɗii.”

¹⁹ Malaa'ikaajo on wi'imo, “Min woni Jibiriilu darotooɗo yeeso Allah, mi liloyaa to maaɗa ngam mi hokkumaa Habaru Belɗum ɗu'um.

²⁰ Ammaa jooni a waawataa metuki naa nyalnde nde fii ɗu'um waɗi, ngam a jaɓaayi haala am tabbitayka to carel maaka warii.”

²¹ E carel ngel yimɓe e keɗii Jakaariya yaasi, ɓe kayɗinii ko waɗi o neeɓiri non nder Suudu Joomiraawo.

²² Nde o wurtoyii, o waawaayi metankiɓe. Ɓe faami o yi'i wahayu nder Suudu Joomiraawo. O waɗi ka metirankiɓe juuɗe, ammaa non o jooɗorii o metataa.

²³ Nde o heenyi balɗe kuugal maako, o so''ii wuro maako.

²⁴ Gaɗa fii ɗu'um waɗii, debbo maako Alisabatu heɓi reedu, waɗi lebbi jowi o wurtaaki daga nder wuro. O wi'i,

²⁵ “Joomiraawo waɗaniiyam ɗu'um. Nder balɗe ɗe'e, o ittaniiyam semteende am hakkunde yimɓe.”

Malaa'ikaajo Hokkii Habaru Danyngol Yeesu

²⁶ Nder lewru joweego'ooru gaɗa Alisabatu heɓii reedu, Allah lili malaa'ikaajo Jibiriilu to gariiri bi'eteendi Najarat ngondi nder leydi Galiili.

²⁷ Malaa'ikaajo on yahi to surbaajo bi'eteeɗo Maryaama gaɗanaaɗo alkawal teegal e bi'eteeɗo Yusufu, daga lenyol Dawda. Maryaama on andaa gorko.

²⁸ Malaa'ikaajo on wi'imo, “E mi silminoo, barkiɗinaaɗo Joomiraawo! Joomiraawo e wondi e maaɗa!”

²⁹ Haala kan wannii Maryaama ko ɗuuɗi. O wi'i nder ɓernde maako, “Min, mi moye o'o mettirantayam nihi?”

³⁰ Ammaa malaa'ikaajo on wi'imo, “Taa' hulu, Maryaama, Allah suɓii barkiɗinmaa.

³¹ A heɓay reedu, a danyay ɓiɗɗo gorko, nden a nodday inde maako Yeesu.

³² O wartay mawɗo, ɗum noddaymo Ɓiɗɗo Allah Joomu Mangu. Allah Joomiraawo hokkaymo jooɗorgal laamu maama maako Dawda.

³³ O laamoto dow ɓiɓɓe Israa'iila haa abadaa. Laamu maako re'ataa.”

³⁴ Maryaama wi'i malaa'ikaajo on, “Noye ɗum waɗortoo? Mi andaa gorko sam.”

³⁵ Malaa'ikaajo on wi'imo, “Ruuhu Allah jippoyto dow maaɗa, bawɗe Allah Joomu Mangu suddete bo ɗowdi. Ngam non, danyeteeɗo on ɗum noddiraymo ‘Ɓiɗɗo Allah, Ceniiɗo.’

³⁶ Raa, Alisabatu bandiraawo maaɗa heɓii reedu nder nayewu muuɗum, o danyay ɓiɗɗo gorko. Kanko mo yimɓe mbi'ata o danyataa, jooni e mo woodi reedu ndu lebbi joweego'o.

³⁷ Ngam walaa ko salorta Allah.”

³⁸ Nden Maryaama wi'i, “Mi korɗo Joomiraawo, ɗum wartanayam non no mbiiɗaa.” Sey malaa'ikaajo on dilli alimo.

Maryaama Yahi to Alisabatu

³⁹ Nder balɗe ɗen, Maryaama ummii nder yawɗaare yahi gariiri ngondi nder kocceeje leydi Yahuudiya.

⁴⁰ O natti wuro Jakaariya, o howni Alisabatu.

⁴¹ Carel ko Alisabatu nani kownol Maryaama, ɓiɗɗo gonɗo nder reedu maako diwi ngam belɗum, Alisabatu boo hebbinaa Ruuhu Allah.

⁴² O noddi Maryaama e sembe, o wi'i, “A barkiɗinaaɗo nder rewɓe! Ɓiɗɗo mo caawuɗaa o barkiɗinaaɗo.

⁴³ Min, mi moye nde inna Almasiihu warata to am?

⁴⁴ Nde nanumi kownol maaɗa, ɓiɗɗo gonɗo nder reedu am diwii ngam belɗum.

⁴⁵ A barkiɗinaaɗo ngam a jaɓii ko Joomiraawo waɗanmaa alkawal ɗum heeway.”

Gimol Maryaama

⁴⁶ Nden Maryaama wi'i, “E mi manta Joomiraawo e ɓernde am fuu.

⁴⁷ E mi nana belɗum ɗuɗɗum nder ɓernde am ngam Allah, Kisnoowoyam,

⁴⁸ ngam o yurminaniiyam, min, korɗo maako, lestinɗo hoore. Daga jooni yimɓe duuniyaaru fuu noddirayyam barkiɗinaaɗo,

⁴⁹ ngam Allah Baawuɗo waɗaniiyam fii mawɗum ɗuɗɗum, o ceniiɗo.

⁵⁰ Jurumɗum maako jooɗoto dow kulooɓemo haa abadaa.

⁵¹ E mo waɗa fii mawɗum e jungo maako sembingo, e mo sankita mawninɓe ko'e maɓɓe e ko ɓe mantortoo nder ɓerɗe maɓɓe.

⁵² E mo itta laamiiɓe dow laamu maɓɓe, ammaa e mo mawnina lesnuɓe ko'e maɓɓe.

⁵³ E mo harna nanooɓe weelo e fii boɗɗum, ammaa e mo ala riskuɓe juuɗe meere.

⁵⁴ E mo walla yimɓe Israa'iila maccuɓe maako, o yejjitataa yurminanki

⁵⁵ Ibraahim e lenyol muuɗum haa abadaa, no o wi'unoo maama'en meeɗen.”

⁵⁶ Maryaama jooɗodake e Alisabatu ko waɗi lebbi tati, nden o so''ii wuro maako.

Danyngol Yahaya Gaɗoowo Baptisma

⁵⁷ Nde carel danyuki Alisabatu waɗi, o danyi ɓiɗɗo gorko.

⁵⁸ Ɓe o heddi e bandiraaɓe maako ɓe nanidi belɗum e maako nde ɓe nani Joomiraawo yurminanimo.

⁵⁹ Nde ɓingel ngel waɗi balɗe joweetati, ɓe ngari naadukingel. Ɓe ngiɗiino noddankingel inde nyaako maagel Jakaariya.

⁶⁰ Ammaa maduujo maagel wi'i, “Naa' non, ɗum noddanangel Yahaya.”

⁶¹ Ɓe mbi'imo, “Walaa goɗɗo nder lenyol maaɗa gooduɗo inde nden ɗon.”

⁶² Sey ɓe metirani nyaako maagel juuɗe, ngam ɓe anda inde nde o yiɗi ɗum noddanangel.

⁶³ Jakaariya holliɓe e mo yiɗi allowal, o windi, “Inde maagel Yahaya.” Ɓe fuu fii ɗum hulniiɓe.

⁶⁴ Ɗon e ɗon, honduko maako maɓɓitii, ɗemngal maako yoofi, nden o fuɗɗi metuki, e mo manta Allah.

⁶⁵ Kulol nangi ɓe o heddi fuu, koo moye waɗi ka metuki dow fii ɗum fuu nder kocceeje leydi Yahuudiya.

⁶⁶ Koo moye nanɗo fii ɗu'um nyumi dow maajum, e wi'a, “Ɗume ɓingel nge'el wartata to mawni?” Ngam jungo Joomiraawo e wondi e maagel.

Annabaaku Jakaariya

⁶⁷ Jakaariya, nyaako ɓingel ngel, e heewi Ruuhu Allah, waɗi annabaaku, o wi'i,

⁶⁸ “En mantu Joomiraawo, Allah Israa'iila, ngam o waroyii o rimɗinii yimɓe maako.

⁶⁹ Allah waddanii'en kisnoowo mawɗo ƴiwoyɗo daga lenyol Dawda, maccuɗo maako.

⁷⁰ No o wi'unoo nder konduɗe annabo'en maako cuɓaaɓe daga ko neeɓi,

⁷¹ o hisnay'en daga ganyooɓe meeɗen e kallanɓe'en.

⁷² O wi'iino o yurminanay maama'en meeɗen, o yejjitataa alkawal maako ceniingal,

⁷³ ngal o waɗannoo maama meeɗen Ibraahim.

⁷⁴ O wi'ii o hisnay'en daga juuɗe ganyooɓe meeɗen, ngam kuwanenmo kulol walaa,

⁷⁵ njooɗooɗen jonde ceniinde e aadilaaku yeeso maako nder balɗe meeɗen fuu, ngaɗen koo ɗume ko o wi'i.

Annabaaku Jakaariya Dow Ɓiɗɗo Muuɗum

⁷⁶ “An ɓingel am, ɗum noddirte annabiijo Joomiraawo Joomu Mangu, a artay Almasiihu warki ngam mo''inanaamo laawol,

⁷⁷ ngam andinaa yimɓe maako ɗum hisnayɓe laawol yaafaaki hakke maɓɓe.

⁷⁸ Allah waɗii fii ɗu'um ngam o keewuɗo jurumɗum. Ngam jurumɗum maako, Almasiihu waroyay to meeɗen daga dow no naange wurtiroytoo,

⁷⁹ ngam o yeynanoo wonɓe nder nyiwre e nder kulol mayde, ɗum tokkinay koyɗe meeɗen dow laawol jam.”

⁸⁰ Ɓiɗɗo on mawni, faamu maako ɓeydii. E mo jooɗii nder ladde haa carel ko ɗum andinimo to yimɓe Israa'iila.