Ibraaniyanko'en 5 - Fulfulde Nigeria

¹ Koo moye mawɗo mawɓe ardiiɓe diina cuɓaaɗo daga nder yimɓe, ɗum hokkumo kuugal ngam o huwana Allah ngam maɓɓe, o hokka Allah cakkiri e dokke ngam hakke maɓɓe.

² Nde kanko maa e hoore maako o tampuɗo e ɗate ɗuɗɗe, o waaway o waada munyal e ɓe ngalaa andal e celuɓe laawol.

³ Nden nde kanko e hoore maako o tampuɗo, doole o sakkana Allah ngam hakke yimɓe e hakke maako, kanko maa.

⁴ Walaa keɓanayɗo hoore muuɗum mangu wartuki mawɗo mawɓe ardiiɓe diina, ammaa Allah noddatamo, non no noddiri Haruuna.

⁵ Non maa Almasiihu naa' kanum mawnini hoore muuɗum warti mawɗo mawɓe ardiiɓe diina, ammaa Allah hokkimo kuugal ngal, wi'imo, “An a Ɓiɗɗo am. Hande mi wartii Nyaako maaɗa.”

⁶ No o wi'i nder wonde aayaare, “An a ardiiɗo diina haa abadaa bo Malkisadik.”

⁷ Carel ko Yeesu woni nder duuniyaaru, o waɗii do'aaje e hononde cembinde e gonɗi o torake Allah baawayɗo hisnukimo daga mayde. Ɗum boo jaɓii do'aare maako ngam o waɗii ko Allah wi'i nder kulol Allah.

⁸ Koo nde o Ɓiɗɗo Allah o ekkitake waɗuki ko Allah wi'i nder torra ka o yari.

⁹ Nde o wartiraa kewɗo, o wartii kokkoowo fuu gaɗooɓe ko o wi'i kisndam tabitayɗam.

¹⁰ Allah noddiimo o warta mawɗo mawɓe ardiiɓe diina bo Malkisadik.

Wagginki Dow Seluki Laawol Goonga

¹¹ Dow haala ka'a e min ngoodi fii ɗuɗɗum ɗum min mbi'ata, ammaa e ɗum saɗi famtineeki ngam on njaawaa faamuki.

¹² E haani jooni daa on ngartii moodiɓɓe, ammaa haa jooni sey to goɗɗo ekkitinii'on ekkitinol arandewol ngol Wolde Allah. E haani nyaamon nyamndu cembindu, ammaa haa jooni on musina.

¹³ Ngam koo moye musinoowo haa jooni o ɓingel, o andaa ekkitinol aadilaaku.

¹⁴ Ammaa nyamndu cembindu boo, ɗum ndu mawnuɓe. Kamɓe ngoni huutirɓe hakkiilo maɓɓe koo ndeye haa e ɓe mbaawi feerootirki hakkunde ko wooɗi e ko wooɗaa.