Ibraaniyanko'en 11 - Fulfulde Nigeria

Hoolaaki Allah

¹ Too, hoolaare woni tabbitinki heɓuki ko ngaɗɗen kammunde heɓuki, kayre tabbitinanta'en fii ɗum en ngi'ataa.

² Ngam yimɓe arande'en koolake Allah waɗi o jaɓiɓe.

³ Ngam en koolii Allah waɗi paamuɗen o tagirii duuniyaaru wolde maako, ngam ko yi'etee wurtinaama daga nder ko yi'ataake.

⁴ Ngam Habiila e hoolii Allah waɗi sakkanimo cakkiri ɓurndi ndi Kayinu. Ngam e mo hoolii Allah waɗi Allah jaɓimo o aadiliijo nde jaɓi dokke maako. Kadimaa hoolaare nden waɗi kuugal maako haa hande e metana'en koo nde o maayi.

⁵ Ngam Enok e hoolii Allah waɗi o hoccaa yaaki dow ngam to' o maaya. Walaa giiɗomo kadin, ngam Allah hocciimo yaaki dow. Nden aayaare wi'ii, ko o hoccee yaaki dow, o welnanii Allah ɓernde.

⁶ To naa' neɗɗo hoolii Allah waawataa welnankimo ɓernde, ngam koo moye garayɗo to Allah doole jaɓa Allah e ɗon, nden e mo waatana ɗaɓɓitooɓemo.

⁷ Ngam Nuhu e hoolii Allah waɗi o jaɓi wagginol Allah dow ko waroyta yeeso ɗum yi'aaka e carel ngel. O waɗii ko Allah wi'i o waɗi komiwal ngam o hisna wuro maako. Non o holli yimɓe duuniyaaru ngaɗii ko wooɗaa, o boo wartii aadiliijo laawol hoolaaki Allah.

⁸ Ngam Ibraahim e hoolii Allah waɗi o jaɓi nde Allah wi'imo o yaha leydi ndi waɗi alkawal hokkukimo. Ibraahim ali leydi muuɗum koo nde andaa to yahata.

⁹ Ngam e mo hoolii Allah waɗi o jooɗii bo koɗo e leydi ndi o waɗanaa alkawal. O jooɗii nder lukuru. Non maa Iciyaaku e Yaakubu ngaɗii donuduɓe alkawal ngal e maako.

¹⁰ Ibraahim waɗii non ngam o haaɓii o yi'a gariiri tabitayndi ndi Allah siryii, mahi.

¹¹ Ngam Ibraahim e hoolii Allah waɗi o heɓi ɓiɗɗo, koo nde o nawyi. Saaratu debbo maako boo danyataa. O heɓii ɓiɗɗo on ngam o hoolake Allah hebbinay alkawal muuɗum.

¹² Ngam non, daga o'o neɗɗo go'oto nayeejo ɓadiiɗo maaya, ɗum heɓii ɓiɓɓe ɓiɓɓeeji ɗuɗɓe bo koode dow, bo njaareendi daande maayo ndi limataako.

¹³ Yimɓe ɓe'e fuu maayii e koolii Allah. Ɓe keɓaayi alkawal ngal, ammaa ɓe kaynakengal ɓe nanii belɗum maagal. Ɓe mbi'ii e njayri ɓe hoɓɓe ɓe garɓe nder duuniyaaru ndu'u.

¹⁴ Fuu biiɓe non, ɓe kollii e ɓe ɗaɓɓita leydi ndi ko'e maɓɓe.

¹⁵ Daa ɗum wi'a ɓe ngaɗii ka nyumuki dow leydi ndi ɓe aloyi, daa ɓe keɓii laawol so''aaki.

¹⁶ Ammaa ɓe ngaɗii ɓerɗe maɓɓe dow leydi ɓurndi wooɗuki, waato ndi ton dow. Ngam non, naa' ɗum cemtiniiɗum to Allah ɗum noddamo Allah maɓɓe, ngam o siryanakeɓe gariiri.

¹⁷ Ngam Ibraahim e hoolii Allah waɗi o siryii sakkanki Allah ɓiɗɗo maako Iciyaaku nde Allah foondimo. Kanko gaɗanaaɗo alkawal e mo haade sakkuki ɓiɗɗo maako bajjo,

¹⁸ koo nde Allah wi'iinomo, “Barka Iciyaaku keɓataa ɓiɓɓe ɓiɓɓeeji ɓe ngaɗanmaami alkawal.”

¹⁹ Ibraahim tabbitinii Allah waaway umminki mayɗo. Boo ɗum waaway ɗum wi'a, ɗum hokkitii Ibraahim Iciyaaku daga mayde.

²⁰ Ngam Iciyaaku e hoolii Allah waɗi o barkiɗini Yaakubu e Isaw ngam yeeso.

²¹ Ngam Yaakubu e hoolii Allah waɗi nde o ɓadii mayde, o barkiɗini ɓiɓɓe Isufu go'oto‑go'oto. O ɓaggi sawru ndu o yahirta, o mawnini Allah.

²² Ngam Isufu e hoolii Allah waɗi nde o ɓadii mayde, o meti dow wurtaaki yimɓe Israa'iila daga leydi Masar, o wi'iɓe no ɓe ngaadata e ƴi'e maako.

²³ Ngam danyooɓe Muusa e koolii Allah waɗi ɓe cuuɗimo lebbi tati gaɗa o danyaama, ngam ɓe ngi'ii o ɓiɗɗo boɗɗo, ɓe kulaayi wanyuki ko laamiiɗo wi'i ɗum waɗa.

²⁴ Ngam Muusa e hoolii Allah waɗi nde o mawni o wanyi o noddiree ɓiɗɗo ɓii Fir'awna debbo.

²⁵ O suɓii o yarda torra e yimɓe Allah dow o nana belɗum hakke ngam carel seɗɗa.

²⁶ O yi'ii semtineeki ngam Almasiihu ɗum risku ɓurɗum jawdi leydi Masar, ngam hakkiilo maako e dow mbarjaari ndi o heɓata yeeso.

²⁷ Ngam Muusa e hoolii Allah waɗi o ali leydi Masar, o hulaayi monnere laamiiɗo leydi ndin. O wanyi o so''o ngam o yi'ii Allah mo yi'ataake.

²⁸ Ngam e mo hoolii Allah waɗi o fuɗɗi Humto Sakkinki. O wi'i Israa'iilanko'en misana dammuɗe maɓɓe ƴiiƴam, ngam to' Malaa'ikaajo Mayde wara fuu worɓe afo'en maɓɓe.

²⁹ Ngam Israa'iilanko'en e koolii Allah waɗi ɓe mbaawi huuluki Maayo Woɗewo bo dow leydi njorndi. Ammaa nde Masaranko'en kuulay, ndiyam nyaamiɓe.

³⁰ Ngam Israa'iilanko'en e koolii Allah waɗi maadi piliindi gariiri Jeriiko yani gaɗa ɓe pilakendi balɗe joweeɗiɗi.

³¹ Ngam Rahab kaaruwaajo e hoolii Allah waɗi o wardaaka e ɓen ɗon ganyuɓe ngaɗa ko Allah wi'i, ngam o jaɓɓake Israa'iilanko'en boɗɗum daarooɓe sirru leydi.

³² Ɗume ɓeydaymi wiiki? Walaa carel keƴayngelyam mi meta dow Gidiyon, e Barak, e Samsin, e Jepta, e Dawda, e Samaa'ila, e annabo'en,

³³ ngam e ɓe koolii Allah waɗi ɓe koni leyɗe ɗuɗɗe ɓe nyaamiɗe. Ɓe laamorake aadilaaku, ɓe keɓi ko Allah waɗi alkawal. Ɓe maɓɓii konduɗe cembiɗɗi.

³⁴ Ɓe nyifii hiite kallunge, ɓe ndaɗii wardeeki e kaafaaje. Ɓe tampuɓe, ammaa ɓe ngartii cembiɗɓe. Ɓe ngartii wawɓe konu, ɓe ndiiwii sooji'en goɗɗe leyɗe.

³⁵ Ngam woɓɓe rewɓe maayanaaɓe e koolii Allah waɗi mayɓe ɓen umminaa daga mayde. Woɓɓe yimɓe boo ɓe torraa haa ɓe maayi, ɓe nganyii ɗum yoofaɓe ngam ɓe keɓa ɓe umminee daga mayde nder jonde ɓurnde wooɗuki.

³⁶ Woɓɓe njukkitaama piyaama, haa ɓe kaɓɓiraa ɓoggi njamndi ɓe maɓɓaa nder suudu cural.

³⁷ Woɓɓe mbariraa kaaƴe, woɓɓe taƴaa cendaa ɗiɗi, woɓɓe mbariraa kaafaaje. Woɓɓe e ngiiloo e ɓornii lare baali e ɗe be'i, koo ko ɓe ngoodi, ɓe torraama, ɓe ngaɗanaama ko halli.

³⁸ E ɓe ngiiloo nder ladde e nder kocceeje, e ɓe njooɗoo nder luurooji kaaƴe e nder gayɗe. Duuniyaaru hewtaayi ɓe njooɗoo nder mayru.

³⁹ Fuu yimɓe ɓe'e ɓe mantaama ngam ɓe koolake Allah, ammaa fuu e non walaa goɗɗo nder maɓɓe keɓuɗo ko Allah waɗi alkawal.

⁴⁰ Allah siryake goɗɗum ɓurɗum wooɗuki ngam meeɗen, ngam to naa' hawti e meeɗen, ɓe ngartirtaake keewuɓe.