Ibraaniyanko'en 10 - Fulfulde Nigeria

¹ Attawra ɗum nandinirɗum fuu fii boɗɗum garayɗum yeeso ɗo'o, naa' kanjum woni fii ɗum e hoore maajum. Ngam non sakkuki ki ɗum waɗata koo ndeye hitaande ki wartirtaa ɓen ɗon ɓaddotooɓe Allah keewuɓe.

² Daa e ki waawi wartirkiɓe keewuɓe, daa ɓe alaayi sakkanki Allah? Daa mawninooɓe Allah ɓen laaɓinaama daga hakke maɓɓe fuu, daa ɓerɗe maɓɓe ngannataaɓe mbi'aɓe ɓe ngaɗii hakke.

³ Ammaa nder sakkuki ki'i e woodi ko siftoranta yimɓe hakke maɓɓe koo ndeye hitaande.

⁴ Ngam ɗum waɗataako ƴiiƴam ga'i e ƴiiƴam be'i itta hakke.

⁵ Kanjum waɗi carel ko Almasiihu natti duuniyaaru o wi'ii Allah: “Naa' sakkaneeki e hokkeeki dokke ngiɗɗaa, ammaa a siryanakeyam ɓandu.

⁶ Naa' cakkiri guleteendi e cakkiri ngam ittuki hakke welnantama ɓernde.

⁷ Sey mbiimi, ‘Yaa Allah, rammi ɗo'o. Mi warii ngam mi waɗa ko ngiɗɗaa, non no ɗum windiraa nder Attawra dow am.’ ”

⁸ Arande o wi'ii, “A yiɗaa sakkaneeki e hokkeeki dokke koo e fuu ko ɗum sakkata guleteeɗum, koo ko ɗum sakkata ngam ittuki hakke, a nanataa belɗum maajum.” O wi'ii ɗu'um koo nde Attawra wi'ii ɗum sakkee.

⁹ Nden o wi'i, “Rammi ɗo'o, mi warii ngam mi waɗa ko ngiɗɗaa.” Allah ittii sakkuki arandehi ngam o wadda sakkuki ɗiɗaɓi, waato Almasiihu.

¹⁰ Nde Yeesu Almasiihu waɗii ko Allah yiɗi o waɗa, en fuu en laaɓinaama daga hakke barka sakkuki hoore maako nde go'o tan ngam haa abadaa.

¹¹ Koo moye ardiiɗo diina e huwa kuugal muuɗum koo ndeye nyalnde, e mo sakka sakkuki iri go'o koo ndeye. Sakkuki kin boo ittataa hakke haa abadaa.

¹² Ammaa Almasiihu sakkii hoore muuɗum nde go'o ngam hakke yimɓe. Ki boo heƴii haa abadaa. Gaɗa o waɗii non, o jooɗii to jungo nyaamo ngo Allah.

¹³ Daga ngel ton carel e mo heɗoo naa Allah wartirii wanywanyɓe maako to o yowata koyɗe maako.

¹⁴ E sakkuki go'oti kin ɗon, o wartirii ɓen ɗon laaɓinaaɓe daga hakke maɓɓe keewuɓe haa abadaa.

¹⁵ Ruuhu Allah maa e hokka'en ceyda dow maajum. Arande ɗum wi'ii,

¹⁶ “Joomiraawo wi'ii, ‘Raa alkawal ngal ngaadaymi e maɓɓe nder balɗe garayɗe: mi waɗay dookaaji am nder ɓerɗe maɓɓe, mi windaɗi nder nyumooji maɓɓe.’ ”

¹⁷ Nden o ɓeydi wiiki, “Mi fuɗɗitataa mi siftora hakke maɓɓe e kuuɗe maɓɓe kalluɗe.”

¹⁸ Nden to ɗu'um yaafaama, walaa wokki sakkuki kadin ngam ittuki hakke.

En Njahu Haade Allah

¹⁹ Ngam non, bandiraaɓe am, en ngoodi sembe ɓernde nattuki Wigeere Ɓurnde Senaaki barka ƴiiƴam Yeesu.

²⁰ O maɓɓitanii'en laawol kesol, jaarayngol kisndam nattirteengol gaɗa wudere cendunde Suudu Joomiraawo, waato nattirteengol ɓandu maako.

²¹ En ngoodi ardiiɗo diina mawɗo paamanoowo wuro Allah.

²² Ngam non en njahu haade Allah e ɓernde go'o, e hoolaare tabbutunde, e ɓerɗe meeɗen laaɓinaaɗe daga nyumo kallungo, e ɓalli lootiraaɗi ndiyam laɓɗam.

²³ Kammunde nde mbi'eten en ngoodi, en njogande boɗɗum, ngam on ɗon gaɗuɗo alkawal o hebbinayngal.

²⁴ En ngaɗu hakkiilo meeɗen dow no mballindirten ngam kollen yidde e waɗuki kuuɗe boɗɗe.

²⁵ To' en alu hawrutuki no woɓɓe mboowi waɗuki. Ammaa en cembiɗindir, en ɓeydu waɗuki non nde on andi nyalnde nde Yeesu wartoyta e ɓaddoyoo.

²⁶ To en ngaɗii ka waɗuki hakke e yidde ɓernde meeɗen gaɗa en andi goonga, walaa wokki sakkuki ittayki hakke meeɗen.

²⁷ Ammaa ko horii woni keɗooɗen kiita Allah nder kulol, kiita garayka e hiite kallunge kalkaynge ɓen ɗon nganyuɓe Allah.

²⁸ Koo moye gewuɗo Dooka Muusa, o waraama yurmeende walaa dow ceyda yimɓe ɗiɗo koo tato tabbitinɓe ko o waɗi.

²⁹ To neɗɗo wanyii Ɓiɗɗo Allah, kadin o wartirii ƴiiƴam alkawal Allah laaɓinɗanmo daga hakke walaa ko nafi, ɗonmaa o huɗi Ruuhu Allah kollayɗum yidde, iri ɗume bone kalluɗum haani o yara? O yaray bone kalluɗum ɓurɗum ɗum gewoowo dooka yarata.

³⁰ Ngam en andi on ɗon biiɗo, “Waataaki ɗum ki am, mi waatanay koo moye ko waɗi.” Ɗonmaa o wi'ii, “Joomiraawo waɗanay yimɓe muuɗum kiita.”

³¹ Ɗum fii kulniiɗum neɗɗo natta jungo Allah mo yonki.

³² Ammaa ciftoree balɗe arandeeje ɗe ɗum famtini'on dow Almasiihu. On munyii nder yarki torra kalluka.

³³ Bannye e ɗum semtina'on yeeso yimɓe, e ɗum huɗa'on, bannye ɗum torra'on, nden bannye on mballa jarooɓe torra iri ka mooɗon.

³⁴ On njurminanii curaaɓe, nden nde ɗum teetani'on ko ngooduɗon, on njaɓii ko ɗum waɗani'on e welwelo. Ngam on andi on ngoodi goɗɗum ɓurɗum wooɗuki tabitayɗum haa abadaa.

³⁵ Ngam non to' on paɗɗu sembe ɓerɗe mooɗon. Ɗum waddanay'on mbarjaari mawndi.

³⁶ E haani munyon ngam ngaɗon ko Allah yiɗi, keɓon ko o waɗi alkawal.

³⁷ Ngam aayaare wi'ii, “Naa' ko neeɓi, on ɗon garayɗo waray; o wonnataa carel.

³⁸ Neɗɗo am aadiliijo o jooɗoto laawol hoolaakiyam; ammaa to o yaatirii gaɗa, mi nanataa belɗum maako.”

³⁹ Ammaa enen naa' en nder yaatirɓe gaɗa kalki. Enen en nder kooliiɓe Allah kisi.