3 Yahaya 1 - Fulfulde Nigeria

Kownol Yahaya

¹ Min Yahaya, mawɗo nder kawtal tokkuɓe Yeesu, e mi windanmaa ɗerewol ngo'ol Gaayus giɗaaɗo am mo ngiɗumi e goonga.

² Giɗo am, e mi waɗanmaa do'aare koo ɗume yahanmaa boɗɗum keɓaa njamu ɓandu, non no andirmi sumpo maaɗa e Allah e yaha boɗɗum.

³ Mi nanii belɗum naa' seɗɗa carel ko woɓɓe tokkuɓe Yeesu ngari kokkiyam habaru no tokkirɗaa goonga e no kuutinirtaaka.

⁴ Walaa ko ɓuri welnankiyam ɓernde bo mi nana ɓiɓɓe am e tokka goonga.

Ɗum Manii Gaayus

⁵ Giɗo am Gaayus, a waɗa koo ɗume no haani ngam tokkuɓe Yeesu, ko ɓuri maa woni ɓe a andaa.

⁶ Kamɓe kokki habaru boɗɗum dow maaɗa yeeso kawtal tokkuɓe Yeesu gonɓe ɗo'o dow yidde nde ngooduɗaa. A waɗay boɗɗum taa waɗii ka walluki iri yimɓe ɓen ɗon nder yaadu maɓɓe non no haani Allah mawniniree.

⁷ Ɓen ɗon yimɓe ɓe mburtoyake ngam wa'ajinki Almasiihu, ɗonmaa ɓe njaɓaayi koo ɗume to jungo ɓe tokkaayi Yeesu.

⁸ Ngam non e haani mballen iri maɓɓe ngam ngarten higooɓe nder wa'ajinki goonga.

Diyotaarifis e Dimitiiriyus

⁹ Mi windanii kawtal tokkuɓe Yeesu gonɓe to maaɗa, ammaa Diyotaarifis wanyii ko mbiimi ngam e mo yiɗi o warta mawɗo dow mooɗon.

¹⁰ Ngam non to mi warii, mi wi'ay koo ɗume ko o waɗi e njayri ngam koo moye anda fewre maako e metemeteeji ɗi o waɗata dow amin. Nden naa' kanjum tan o waɗata. Haa e mo wanya jaɓɓaaki tokkuɓe Yeesu garɓe, ɗonmaa e mo haɗa woɓɓe njaɓɓooɓe e mo riiwa jaɓɓotooɓe ɓen daga nder kawtal tokkuɓe Yeesu.

¹¹ Higo am Gaayus mo ngiɗumi, taa' ekkita halleende, ammaa ekkita ngikku boɗɗum. Koo moye gaɗoowo ko wooɗi o ɓiɗɗo Allah. Koo moye gaɗoowo ko halli o andaa Allah koo seɗɗa.

¹² Koo moye e meta fii boɗɗum dow Dimitiiriyus. Ɗonmaa goonga e hoore maaka e holla kuuɗe maako ɗe boɗɗe. Minon maa min ceydakemo, nden on andi ko min mbi'i ɗum goonga.

Kownol Cakitiingol

¹³ E woodi fii ɗuɗɗum ko ngiɗumi wi'ukima, ammaa mi yiɗaa windukiɗum nder ɗerewol.

¹⁴ E mi kammoo waroyki to maaɗa naa' ko neeɓi, ngam medden honduko e honduko.

¹⁵ Allah hokkumaa jam. Higooɓe mooɗon gonɓe ɗo'o e kownumaa. Hownu koo moye higo meeɗen.