2 Yahaya 1 - Fulfulde Nigeria

Kownol Yahaya

¹ Min, Yahaya, mawɗo nder tokkuɓe Yeesu windani kawtal cuɓaaɓe Allah ɗerewol ngo'ol. E mi yiɗi'on e yidde nde goonga. Naa' min tan yiɗi'on ammaa haa e fuu anduɓe goonga.

² E min ngiɗi'on ngam goonga wonka nder ɓerɗe meeɗen, nden ka jooɗodoto e meeɗen haa abadaa.

³ Allah Nyaako Mo Dow e Yeesu Almasiihu ɓiɗɗo maako barkiɗina'en, yurminana'en, hokka'en jam nder goonga e yidde.

Tokkuki Ekkitinol Almasiihu

⁴ Mi nanii belɗum naa' seɗɗa nde ngiimi woɓɓe nder ɓiɓɓe maaɗa e tokka goonga non no Allah Nyaako Mo Dow wi'i ngaɗen.

⁵ Jooni e mi toroo'on, en ngiɗindir. Ɗu'um naa' ɗum dooka kesum mbindanmi'on, ammaa ɗum dooka ɗum ngoodunooɗen daga arande.

⁶ Yidde nde goonga woni ngaɗen ko Allah wi'i. No nanɗon daga arande, ko Allah wi'i woni ngiɗindiree.

⁷ Mi wi'u non ngam yimɓe ɗuɗɓe majjinooɓe yimɓe mburtoyake nder duuniyaaru. Ɓe njaɓaayi Almasiihu warii duuniyaaru nder ɓandu. Iri ɓen ɗon yimɓe ɓe majjinooɓe yimɓe, ɓe wanywanyɓe Almasiihu.

⁸ Ngam non paamanee ko'e mooɗon ngam to' ndullon ko kuwanɗon, ammaa keɓon mbarjaari kewndi mbondi.

⁹ Fuu mo daraaki dow ekkitinol Almasiihu, ammaa o ɓeydi wongol ekkitinol, Allah wondaa e maako. Ammaa dariiɗo dow ekkitinol Almasiihu e mo wondi e Nyaako Mo Dow e Ɓiɗɗo maako.

¹⁰ Fuu garɗo to mooɗon, to o jaɓaayi ekkitinol ngo'ol, to' on njaɓumo to gure mooɗon, to' on kownir e maako.

¹¹ Ngam fuu kownuɗomo hawtii hoore e maako won ɗon nder waɗuki kuuɗe kalluɗe ɗe o waɗata.

Kownol Cakitiingol

¹² E mi woodi fii ɗuɗɗum ko ngiɗumi mi wi'a'on, ammaa mi yiɗaa mi windaɗum nder ɗerewol. Sey ni e mi yiɗi mi wara mi medda e mooɗon honduko e honduko, ngam nanen belɗum naa' seɗɗa.

¹³ Kawtal cuɓaaɓe Allah gonɓe ɗo'o e kownumaa.