2 Korintiyanko'en 3 - Fulfulde Nigeria

Alkawal Allah Kesal

¹ Too, on kammii min puɗɗii mantuki ko'e amin kadin? Koo boo ɗum doole min ngarda e ɗereeji kollayɗi minon min ɓeye, koo ƴiwuɗi to mooɗon ngam kolla woɓɓe min ɓeye no woɓɓe ngaɗata?

² Onon e ko'e mooɗon ngoni ɗerewol amin bindaangol nder ɓerɗe amin. Koo moye waaway jangangol andangol.

³ On kollii onon ngoni ɗerewol ngol Almasiihu windi, ngol o lildi laawol amin. Naa' e dawaaru ngol windiraa, ammaa e Ruuhu Allah gooduɗo yonki ngol windiraa. Naa' dow allowal hayre ngol windaa, ammaa dow allowal ɓerɗe yimɓe ngol windaa.

⁴ Min mbi'u non ngam e min koolii Allah laawol Almasiihu.

⁵ Min keƴaayi min mbi'a min mbaaway waɗuki koo ɗume e bawɗe amin, ammaa bawɗe amin to Allah ƴiwoyi.

⁶ Kanko waɗi min mbaawi wartuki ekkitinooɓe Alkawal Kesal. Alkawal ngal boo daraaki dow dooka bindaaɗum, ammaa dow Ruuhu maako ngal dari. Ngam dooka bindaaɗum e fooɗa mayde, ammaa Ruuhu e hokka yonki ki re'ataa.

⁷ Ɗum windi dooka Muusa dow allooje hayre, nden carel ko Muusa hokketeeɗum, teddungal Allah wangi waɗi yeeso maako e ɗelkitoo. Koo nde ɗelkitaaki kin e ustoo, fuu e non Israa'iilanko'en mbaawaayi sutaaki yeeso maako. To dooka gaddayɗum mayde wardii e iri nga'al teddungal,

⁸ too, kuugal Ruuhu Allah ɓuray non teddungal!

⁹ To ko fooɗata kiita e woodi teddungal, too, ko waɗata yimɓe keɓa aadilaaku Allah ɓuray non teddungal naa' seɗɗa!

¹⁰ Goonga, teddungal alkawal kiingal walaa mangu jooni to ngal hawtaama e teddungal alkawal kesal.

¹¹ To ƴaɓɓotooɗum wardii e teddungal, too, alkawal kesal tabitayngal ɓuray non teddungal naa' seɗɗa!

¹² Ngam non, nde e min ngoodi iri nde'e kammunde, e min metira sembe ɓernde naa' seɗɗa.

¹³ Minon naa' bo Muusa min mba'i, cuddirɗo yeeso maako e lefel, ngam to' Israa'iilanko'en cutoomo ngi'a no ɗelkitol yeeso maako ustortoo.

¹⁴ Ammaa ɓe ndullii faamu, ngam haa hande to ɓe njanganaama alkawal kiingal, lefel ngel e haɗaɓe ɓe paama goonga, ngam sumpootirki e Almasiihu tan ittatangel.

¹⁵ Goonga, haa jooni to ɓe njanganaama Attawra, lefel ngel e wumna ɓerɗe maɓɓe.

¹⁶ Ammaa to neɗɗo tuubii tokkii Joomiraawo, ɗum ittay lefel ngel daga ɓernde maako.

¹⁷ Too, Joomiraawo on woni Ruuhu Allah, nden to Ruuhu Allah woni ɗon rimɗineeki woni.

¹⁸ Enen ɓe geece mu''en cudditaa en fuu en kolla teddungal Joomiraawo en ɓeyda wartuki bo maako. Teddungal ngal waɗay ka ɓeydaaki. Ɗu'um ɗum kuugal Joomiraawo, kanko woni Ruuhu.