1 Yahaya 1 - Fulfulde Nigeria

Wolde Kokkaynde Yonki

¹ E min mbindana'on habaru goɗɗo bi'eteeɗo Wolde kokkaynde yonki. Ko duuniyaaru tagee e mo ɗon. Min naniimo, min ngi'iimo e gite amin. Min ndaariimo, min meemiimo e juuɗe amin.

² On ɗon kokkoowo yonki on, ɗum wanginaniiminmo, min ngi'imo. Dow maako min kokkata ceyda, ɗonmaa e min nga'ajinana'on wiiki kanko woni mo yonki ki re'ataa. Daga ndenno e mo wondi e Nyaako Mo Dow, nden ɗum wanginaniiminmo.

³ E min nga'ajinana'on ko min nani e ko min ngi'i ngam kawten sumpo. Sumpo meeɗen woni sumpootirki e Nyaako meeɗen Mo Dow e Ɓiɗɗo maako Yeesu Almasiihu.

⁴ E min mbindonoya'on ɗu'um ngam nanen belɗum naa' seɗɗa.

Jooɗaaki Nder Jayngol

⁵ Ɗu'um habaru woni ɗum min nani to Yeesu Almasiihu min nga'ajinani'onɗum wiiki, Allah o Jayngol, nyiwre walaa to maako koo seɗɗa.

⁶ To en mbi'ii en cumpootira e Allah, ammaa en njooɗii nder nyiwre, too, en pewii, en tokkataa goonga.

⁷ Ammaa to en njooɗake nder jayngol non no Allah jooɗorii nder jayngol, en cumpootira hakkunde meeɗen won ɗon. Ɗonmaa ƴiiƴam Yeesu Ɓiɗɗo maako e lootana'en hakkeeji fuu.

⁸ To en mbi'ii en ngalaa hakke, en ƴoyra ko'e meeɗen won ɗon, nden goonga walaa nder ɓerɗe meeɗen.

⁹ Ammaa to en mbi'ii Allah hakke ɗum ngaɗuɗen, o yaafanto'en hakke meeɗen, o loota'en daga ko wooɗaa ɗum ngaɗuɗen, ngam kanko o kebbinoowo alkawal, e mo woodi aadilaaku.

¹⁰ To en mbi'ii en ngaɗaayi hakke, en ngartiriimo pewoowo won ɗon, nden wolde maako walaa nder ɓerɗe meeɗen.