1 Korintiyanko'en 16 - Fulfulde Nigeria

Walluki Bandiraaɓe Gonɓe Urucaliima

¹ Too, jooni dow hawrutuki ceede ngam walluki yimɓe Allah gonɓe Urucaliima, ngaɗee ko mbiimi tokkuɓe Yeesu ɓe Galaatiya ngaɗa.

² Koo ndeye nyalnde arandeere nde yontoore, koo moye mooɗon resa goɗɗum nder ko heɓii keerol no waawata. Nden to' on alu naa mi warii puɗɗon hawrutuki ceede ɗen.

³ To mi yottake to mooɗon, mi hokkay yimɓe ɓe cuɓuɗon ɗereeji kollayɗi on cuɓiiɓe ɓe njaara ballal mooɗon Urucaliima.

⁴ To e haani min maa mi yaha, sey ɓe njaada e am.

Ko Bulus Yiɗi Waɗuki

⁵ Mi waray to mooɗon gaɗa mi yahii leydi Makidooniya, ngam mi suɓii yaaki Makidooniya.

⁶ Ɗum gaɗotooɗum mi jooɗoo to mooɗon carel seɗɗa, koo maa mi ruuma, ngam mballonyam mi yaha fuu to njahaymi.

⁷ Mi yiɗaa mi yaala to mooɗon tan mi ƴaɓɓoo, ngam e mi yiɗi mi neeɓida e mooɗon to Joomiraawo jaɓii.

⁸ Ammaa mi jooɗoto to gariiri Aafisa naa Humto Ɓendol Alkamaari,

⁹ ngam mi heɓii laawol huwuki kuugal mangal, nden e woodi ɗuɗɓe ganyuɓeyam.

¹⁰ To Timooti warii to mooɗon, tabbitinon o wedditake nder mooɗon, ngam kanko maa o kuwanoowo Joomiraawo bo am.

¹¹ Ngam non, to' goɗɗo yawanamo. Mballeemo nder yaadu maako, njaɓɓootiron jam e jam, o wartoya to am. Min e woɓɓe bandiraaɓe e min ndenti gartol maako.

¹² Jooni dow bandiraawo meeɗen Afoolos, mi torakemo naa' seɗɗa o wara to mooɗon kanko e woɓɓe bandiraaɓe, ammaa o yiɗaa yaadu ndun jooni. O waray to mooɗon to o heɓii laawol.

Wagginki E Kownol Cakitiingol

¹³ Njooɗee on paama, ndaree boɗɗum dow hoolaare mooɗon, ngaɗon ngorgu, cembiɗee.

¹⁴ Fuu ko ngaɗoton, ngaɗeeɗum nder yidde.

¹⁵ Bandiraaɓe, on andi nder leydi Akaaya yimɓe wuro Istifaanus arti wartuki tokkuɓe Yeesu, nden ɓe kokkii ko'e maɓɓe ngam walluki yimɓe Allah.

¹⁶ E mi toroo'on kokkee iri ɓen ɗon yimɓe mangu hawti e fuu yimɓe ɓe min kuwidi min piidi nder kuugal.

¹⁷ Mi nanii belɗum waroyki Istifaanus, e Fartunaatus, e Akaykus, ngam ɗum wartaniiyam bo onon ngari to am,

¹⁸ ngam ɓe mbaltinii ɓernde am e ɓerɗe mooɗon onon maa. Ngam non, kokkee iri ɓen ɗon yimɓe mangu.

¹⁹ Tokkuɓe Yeesu wonɓe leydi Aasiya e kowna'on. Akiila, e Biriskila, e tokkuɓe Yeesu kawritooɓe e wuro maɓɓe e ɓe kowna'on boɗɗum nder inde Joomiraawo.

²⁰ Fuu bandiraaɓe gonɓe ɗo'o e kowna'on. Kownindiree hownirki higaaku ceniiki.

²¹ Min Bulus windi kownol ngo'ol e jungo am.

²² Fuu mo yiɗaa Joomiraawo, Allah laanamo. Yaa Joomiraawo amin, waroy!

²³ Yeesu Joomiraawo barkiɗina'on.

²⁴ E mi yiɗi'on on fuu ngam sumpootirki meeɗen e Yeesu Almasiihu.