1 Korintiyanko'en 10 - Fulfulde Nigeria

Haɓanki Dow Mawninki Gunkiiji

¹ Bandiraaɓe, e mi yiɗi andon ko heɓi maama'en meeɗen. Ɓe ngaɗii yaadu ley nduula njuutunga portiinga dow, ɓe fuu ɓe kultii Maayo Woɗewo.

² Yaadu ndu ɓe ngaɗi ley nduula e huuluki ki ɓe kuuli Maayo Woɗewo bo ɓe ngaɗana baptisma, ɓe ngarti tokkuɓe Muusa.

³ Ɓe fuu ɓe nyaamii nyamndu go'o ƴiwoyndu to Allah,

⁴ nden ɓe njarii ndiyam ngo'otam ƴiwoyɗam to Allah. Ngam ɓe njarii ndiyam daga Hayre ƴiwoynde to Allah yaadaynde e maɓɓe. Hayre nden boo woni Almasiihu.

⁵ Fuu e non Allah nanaayi belɗum ɗuɗɓe maɓɓe haa ɓe mbaraa, ɓalli maɓɓe cankitaa nder ladde.

⁶ Fuu fii ɗu'um ɗum waɗu ngam ɗum warta misaalu to meeɗen, ngam to' ngaɗen suuno waɗuki fii kalluɗum non no ɓe ngaɗi.

⁷ To' on ngartu mawninooɓe gunkiiji no woɓɓe maɓɓe ngaɗi. Non no ɗum windiraa, “Yimɓe njooɗake nyaamii, njarii, ɓe ummii, ɓe ngami gamol kallungol.”

⁸ To' en ngaɗu njeenu no woɓɓe maɓɓe ngaɗi haa yimɓe 23,000 maayi nyalnde go'o.

⁹ To' en poondu Joomiraawo no woɓɓe maɓɓe ngaɗi, haa boole kalkiɓe.

¹⁰ Nden to' on metito no woɓɓe maɓɓe ngaɗi haa Malaa'ikaajo Mayde wariɓe.

¹¹ Ɗu'um fuu heɓuɓe ngam ɗum warta misaalu to meeɗen, nden ɗum windaa ngam ɗum waggina'en, enen gonɓe re'irde jaamanu.

¹² Ngam non, taa nyuma a darii boɗɗum, waɗu hakkiilo to' njanaa.

¹³ Walaa poondol ngol ɗum foondata'on ngol ɗum meeɗaayi foonduki neɗɗo. Allah boo o kebbinoowo alkawal, o alataa ɗum foonda'on poondol ɓurngol sembe mooɗon. Ammaa nder poondol ngol, o waɗanay'on laawol no mburtortooɗon ngam mbaawon munyon nder maggol.

¹⁴ Ngam non, onon ɓe ngiɗumi, ngoɗɗitee mawninki gunkiiji.

¹⁵ E mi metana'on onon yimɓe ɓe hakkiilo. Ndaaranee ko'e mooɗon ngi'on koo ko mbi'aymi ɗum goonga.

¹⁶ Jardugel ndiyam inabojam ɗam njareten nder kirtaari Joomiraawo ɗam ngetteten Allah ngam maajam, to en njariiɗam, naa' en keɓay barka gonɗum nder ƴiiƴam Almasiihu? Nden Buroodi ɗum cendeten, to en nyaamiiɗum, naa' en keɓay barka gonɗum nder ɓandu Almasiihu?

¹⁷ Nde buroodi ɗum ɗum go'otum, enen ɗuɗɓe en ngartii bo ɓandu go'o, ngam en fuu buroodi go'o nyaameten.

¹⁸ Ndaaree ɓiɓɓe Israa'iila; nyaamooɓe ko ɗum sakki, naa' ɓe ngartii go'o nder mawninki Allah?

¹⁹ Ɗume ngiɗumi wiiki? Ko ɗum sakkani ngunkiwa ɗum goɗɗum? Koo ngunkiwa ɗum goɗɗum?

²⁰ Naa' non! Ammaa ko heeferɓe cakkata, ginni ɓe cakkanta, naa' Allah. Mi boo yiɗaa ngarton go'o e ginni.

²¹ Ɗum waɗataako njaron ko woni nder jardugel Joomiraawo, nden fuɗɗiton njaron ko woni nder jardugel ginni. Ɗum waɗataako nyaamon kirtaari Joomiraawo, nden nyaamon nyamndu ginni.

²² En ngiɗi njukkiten Joomiraawo umminanenmo lawliiru? En nyuma en ɓuriimo sembe?

Waɗu Koo Ɗume Ngam Mawninki Allah

²³ Woɓɓe mooɗon e mbi'a, “Ɗum jaɓii ngaɗen koo ɗume.” Ɗum non, ammaa naa' koo ɗume nafanta'en. Kadin e ɓe mbi'a, “Ɗum jaɓii ngaɗen koo ɗume.” Ɗum non, ammaa naa' koo ɗume sembiɗinta'en.

²⁴ To' goɗɗo mooɗon ɗaɓɓita ko nafantamo tan, ammaa o ɗaɓɓita ko nafanta woɓɓe.

²⁵ Nyaamee koo ngele kusel cooreteengel to luumo. To' on ƴamu koo ɗum sakkaniingel gunkiiji.

²⁶ Ngam aayaare wi'ii, “Duuniyaaru e koo ɗume ko woni nder mayru, Joomiraawo jeyiɗum.”

²⁷ To goɗɗo mo tokkaayi Yeesu noddii'on nyaamuki nyamndu, to on njaɓii on njahii, nyaamee koo ɗume ko ɗum hokki'on, naa' naa on ƴamii koo gunkiiji ɗum sakkani nyamndu ndun.

²⁸ Ammaa to goɗɗo wi'ii'on, “Gunkiiji ɗum sakkani nyamndu ndun,” too, to' on nyaamundu ngam on ɗon biiɗo'onka, kadin ngam nyumo ɓernde.

²⁹ Naa' dow nyumo mooɗon metaymi, ammaa e mi meta dow nyumo biiɗo'onka. Ngam ɗume nyumo goɗɗo haɗatayam nyaamuki koo ɗume?

³⁰ To e mi yetta Allah dow nyamndu am, ngam ɗume ɗum huɗatayam dow ko ngettumi Allah nyaamumi?

³¹ Too, koo on nyaama koo on njara, koo nder koo ɗume ɗum ngaɗoton, ngaɗeeɗum ngam teddinki Allah.

³² To' on ngaɗu goɗɗum ko wonnata nyumo goɗɗo, koo o Yahuudankeejo, koo ɗum wongol lenyol, koo kawtal yimɓe Allah,

³³ non no ngiɗumi mi welnana koo moye ɓernde. Mi ɗaɓɓitataa ko nafantayam, ammaa e mi ɗaɓɓita ko nafanta yimɓe ɗuɗɓe, ngam ɓe keɓa ɓe kisa.