1 Biiturus 5 - Fulfulde Nigeria

Faamanki Ornde Joomiraawo

¹ E mi toroo mawɓe kawtal tokkuɓe Yeesu gonɓe nder mooɗon. Min maa mi mawɗo nder tokkuɓe Yeesu, bandiraawo mooɗon, ceydiiɗo torra ka Almasiihu yari, keɓayɗo geɗal muuɗum nder mangu maako to o wartoyii. E mi toroo'on,

² paamanee ornde Allah nde ɗum tambini'on. Paamaneende nder belɗum ɓernde, naa' bo doole ɗum waɗata'on, ɗonmaa naa' ngam heɓuki ceede, ammaa ngam on ngoodi yidde kuugal ngal nder ɓerɗe mooɗon.

³ To' on kollu yimɓe ɓe Allah tambini'on laamu sembe, ammaa ngartee ko ɓe ekkitotoo to mooɗon.

⁴ Ngam to Almasiihu laamiiɗo woynaaɓe wartoyii, on keɓay giifol mangu ngol haa abadaa.

⁵ Onon sukaaɓe, ngaɗee ko mawɓe kawtal tokkuɓe Yeesu gonɓe nder mooɗon mbi'i. On fuu ngartee leynooɓe ko'e, mballindiree hakkunde mooɗon. Ngam aayaare wi'ii, “Allah wanyii gooduɓe mangu hoore, ammaa e mo walla lesnuɓe ko'e.”

⁶ Ngam non, lestinee ko'e mooɗon yeeso Allah mo bawɗe, ngam o waɗa keɓon mangu e carel ngel o yiɗi.

⁷ Tambinaneemo fuu ko wannata'on, ngam e mo faamana'on.

⁸ Curee ko'e mooɗon, njooɗooɗon on ciryii. Ganyo mooɗon Ceyɗan e mo woosoo bo sembindu ɓernundu e mo ɗaɓɓita mo o halkata.

⁹ Nganyeemo, ndarooɗon dow hoolaaki Yeesu e sembe. On andi bandiraaɓe mooɗon fuu nder duuniyaaru e njara iri kan ɗon torra.

¹⁰ Nden gaɗa on njarii torra carel seɗɗa, Allah gooduɗo yidde fuu, nodduɗo'on ngam keɓon geɗal nder teddungal maako tabotoongal barka Almasiihu, kanko e hoore maako o wartiray'on keewuɓe, o joɗɗina'on, o sembiɗina'on bo tafaare.

¹¹ Laamu tabbita to maako haa abadaa abadin. Aamin.

Kownol Cakitiingol

¹² Silbaanus walliyam mbindanmi'on ɗerewol ngo'ol pamarol. E yiiki am o tokkuɗo Yeesu kooleteeɗo. E mi yiɗi mi sembiɗina'on mi wi'a'on ɗu'um woni caahu Allah ɗum goonga. Ndaree dow maajum e goonga.

¹³ Kawtal tokkuɓe Yeesu wonɓe ɗo'o Baabiila, ɓe Allah suɓi no o suɓiri'on, e ɓe kowna'on. Markus maa, ɓiɗɗo am nder tokkuki Yeesu, e howna'on.

¹⁴ Kowniree hakkunde mooɗon kownol yidde. Allah hokka'on jam onon tokkuɓe Almasiihu fuu.